Zerusale raona chhochhieliena (Mt 24:1-2; Lk 21:5-6)
1 Chatawhcha achhyna-o tawhta a pua nahta, a pachupazy hryta pakha ta a hnohta, “Pachutuhpa, moh teh, alôzy nata ozy he a rôhnah kaw dia!” tah ta.
2 Zisu ta a hnohta, “He o rôhnahpazy he na hmô ma? Pacho leipa ta alô a khaipa rai sâkha hmah y aw vei,” tah ta.
Hupona a thaona(Mt 24:3-14; Lk 21:7-19)
3 Ôli Tlâh liata Khazohpa achhyna-o dady ta a tyuh thlâh ha nona chata, Pity zy, Zami zy, Zawhana zy, Adru zy chata a hnohta a ru lâta bie hiahri ei ta.
4 “Chazy cha khatita e a vaw y aw, cha hmo zydua vaw tlôna awpa daihti cha ngiana khâpa e a y aw, maniah chho teh?” tah ei ta.
5 Zisu ta ama hnohta, “Ahyhmah ta ama cha dô leina awpa ei ta a chado teh u.
6 Chyhsa hluhpi, Krista cha ei châ!’ tahpa ta keima moh ta a vy aw ei ta, chyhsa hluhpi ama dô aw.
7 Chatawhcha adyuhna bie pathâhpazy nama pahno tita, nama nô a papo khuh vy; chazy cha a vaw tlô awpa rai a châ, châhrasala a chhâna la châ mâh vei.
8 Pho hropa nata pho hropa adyuh aw ei ta, râh hropa nata râh hropa adyuh aw ei ta; su hluhpi liata zy alo a sih aw ta, chakâhnazy a y aw; chazy cha pasa a thaona a châ.
9 “Châhrasala a chado teh u; ryureituhpazy cha patusa aw ei ta; apakhyna-o liata cha chhei aw ei ta; keima vâta hyutuhpazy nata abeizy hmiakô liata âmo pahnosa awpa ta namâ duah hra aw.’
10 Chatawhcha Thâtihpha he pho zydua chho tuapa a châ aw.
11 Chatawhcha ama cha chhi nata ama cha patu tina chata, khâpa ei reih aw tahpa ta pachâ chhie khah u; a daihti liana chata a cha pahnosapa maih ei, cha tlai cha tlao reih teh u, a reihtuh awpa cha nâmo châ tlôh leipa aw ei chi ta, Thlahpa Pathaihpa tlao a châ aw.
12 Chatawhcha thie awpa ta unawhpa nata unawhpa a patusa aw ei ta, paw chhaota a saw a patusa hra aw, sawzy chhaota ama nôpawzy adyuh aw ei ta, ama pathiesa hra aw;
13 keimo vâta chyhsa zydua a haopa châ aw eichi ta. Châhrasala a chhâna taihta a tao hohpa maih cha, cha chyhsa tlai cha pachhapa ta a y aw.
Rietheipasana(Mt 24:15-28; Lk 21:20-24)
14 “Châhrasala roryhrana pasichhihpa cha a duah leina awpa su liata a duahpa nama hmô tita, (a reipa maihta a yzie pahno mawh sy), cha tina chata Zudia râh liata a ypazy cha tlâh lâtazy a râ ei se;
15 o chô liata ypa cha chô khah se, a o liata hmo la awpa ta a ngia khah ei se;
16 lyu liata a ypa cha a poh la awpa ta kua heih kha se.
17 Cha noh liana chata sawphaohpa nata hawsaih a pyhpazy chôta ama hu a po na!
18 Chatawhcha cha cha chasipaw nota a vaw tlô leina awpa ta thlahchhâ teh u.
19 Cha nohzy cha rietheipasana noh châ tlôh aw ta, cha tlatluta rarôhypa Khazohpa ta a taopa aleilô tao tua no tawhta atahmâ taihta y beih-leipa ta, y heih khao hra aw vei.
20 Abeipa ta cha nohzy cha pachhosa leipa chhochhi sala, chyhsa pachhapa rai y aw veih ei; châhrasala a chyhsa atlypa, raopazy vâna chata nohzy cha a pachhosa.
21 Chatawhcha cha tina chata ahyrai ta nama hnohta, ‘Moh teh u, Krista cha he liata a y!’ tlyma, ‘Moh teh u, hao liata a y!’ tlyma ama tah khiahtala zo khah u.
22 Krista pakheipazy nata hrohso pakheipazy vaw pua tlôh aw ei ta, chazy chata ngiana nata hmonoâhpazy ama tao aw, tah theipa châ sala atlypazy chhao tlai ama dô thei nawpa ta.
23 Nâmo deikua cha a chado teh u; ato ei cha chhochhielie haw ei hih.
Chyhsa Sawchapawpa a vyna(Mt 24:29-31; Lk 21:25-28)
24 “Châhrasala cha nohzy liata cha rietheipasana hnôh lâna chata, noh pazohsapa ta y aw ta, thlâpâ ta khaih khao leipa aw ta,
25 avâ tawhta awhsizy za tla aw ei ta, avâ hmotaotheina a ypazy cha chalyupa ama châ aw.
26 Cha tina chata Chyhsa Sawchapawpa he hmotaotheina thata nata rôhnah ngaitapa ta meihdo hry liata a zupa ama hmô aw.
27 Cha tina chata vâlyuhchâpazy tuah aw ta, atlypazy cha kaoki miapalih tawhtapa alei chy chhâna tawhta avâ chy chhâna taihta a pakhy aw.
Theiku pakhona(Mt 24:32-35; Lk 21:29-33)
28 “Chatanachata theiku kô liana heta a pakhona bie a chu teh u; a chhyh kaw thao ta, a hna a vaw thao khiahta cha, nopi a hnia haw tahpa nama pahno tyh.
29 Cha hawhna hra chata nâmo chhaota chazy cha a vaw tlôpa nama hmô tina chata, ano cha a vaw hnia ha ta, chhikao thaby lia tlai a y tahpa pahno teh u.
30 Hmeiseihta ta, ei cha chho ei chuh, he hmo zydua a tlô hlâ via cha, he chhâ he lei aw vei.
31 Avâ nata alei lei aw ta, ei biezy deikua cha lei chachei aw vei.
Ahyhmah ta noh nata dawh pahno veih ei(Mt 24:36-12; Lk 17:26-30, 34-36)
32 “Châhrasala cha noh nata dawh cha Paw dei leipa ta cha, ahyhmah ta avâ liata vâlyuchâpazy chhaota Sawchapawpa chhaota, pahno veih ei.
33 A chado ula, riahvaipa ta thlahchhâ teh u; a daihti cha nama pahno tlôh leipa vâta.
34 Chyhsa ta a o siesai ta, a seizy cha bie pahneisa ta, ama raihria awpa pie chyu ta, ochhivaihtuhpa chhao a pachyh thlâh ha awpa ta bie pie ta, râh hlapapi lâta a sie syulyupa hawhta a châ.
35 Chavâta riahvaipa ta y teh u, o hneituhpa vaw tlôna awpa daihti cha, zâlâ ta ma, zâcho ta ma, awhkho ta ma, my ta ma a châ aw nama pahno tlôh leipa vâta,
36 chata leipa ta la, sôkhata a môpa ta a cha vaw pachhai ei na.
37 Chatawhcha nâmo hnohta ei reipa he chyhsa zydua hnohta a reihpa ei châ: Riahvaipa ta y teh,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||