Nôvah a chhaihna kyh (Mt 19:1-12; Lk 16:18)
1 Cha su tawhtapa cha Zisu pua ta, Zudia râh lâta nata Zawdâh haosâ lâta sie ta, zawpizy cha a hnohta a vy pakhy heih ei ta; chatanachata a tao tyhpa hawhta âmo pachu heih ta.
2 Pharisaizy a hnohta a vy ei ta, ano pasiana awpa ta, “Chapaw ta a lahpinô ma hraopa a châ ma?” tahpa ta hiahri ei ta.
3 Ano chata ama hnohta, “Mawsi ta kheihta e bie a cha pie ei?” tahpa ta a chhy ta.
4 Âmo chata, “Mawsi ta a mana châ ropa ta ma a pasaih tyh.” tah ei ta.
5 Châhrasla Zisu ta ama hnohta, “Nama pathipalôh kuhchhana vâta he he biepiepa a cha ropa ei chuh.
6 Châhrasala aleilô tao tua no tawhta Khazohpa ta âmo cha chapaw nata chanô ta a tao ei.’
7 Cha vâna chata chapaw ta a nô nata paw siesai aw ta, [a lahpinô a patu aw],
8 chatanachata panopa cha pôhkha ama vaw châ aw,’ Chatanachata pano châ khao leipa aw ei ta pôhkha tlao ama vaw châ haw.
9 Khazohpa ta a pazaopa maih cha ahy ta hmahta pachhaih kha se,” tah ta.
10 Chatawhcha o liana chata a pachupazy ta cha bie cha ano hiahri heih ei ta.
11 Chatawhcha ano chata ama hnohta, “Ahyrai a lahpinô ma ta, chyhsa hropa a hneipa maih chata a lahpinô cha a pheisaipa a châ;
12 chanô chhao chata a vahpa a chhaih ta, chyhsa hropa a hnei khiahta cha, a pheisaipa a châ hra,” tah ta.
Hawti chyhpa ta zy byhnâ a aw(Mt 19:13-15; Lk 18:15-17)
13 Chatawhcha a hria awpa ta a hnohta hawti chyhpatazy a vaw chhi ei ta; châhrasala a pachupazy ta âmo cha ra ei ta.
14 Zisu deikua chata cha cha a hmô nahta aly leipa ta, ama hnohta, “Hawti chyhpatazy ei hnohta a vaw chhi ula, dytha kha u; Khazohpa Khihnarâh cha he hawhpa chyhsazy eih châ tlôh ta.
15 Hmeihseihta ta, ei cha chho ei chuh, ahyrai Khazohpa Khihnarâh cha hawti alypa hawhta aly leipa maih cha, a ngia chacheita aw veih ei,” tah ta.
16 Âmo cha a bâh ta chalo ta, ama chôta ku pazawhpa ta byhnâ aw pa ei ta.
Satlia hneirôhpa(Mt 19:16-30; Lk 18:18-30)
17 Chatawhcha siepa ta a pua nahta, chyhsa pakha ano o lâta a vaw râ ta, a hmiakô ta pakhuh paneihpa ta, a hnohta, “Pachutuhpa Phapa, tlyzaw hrona ei to theina awpa ta khâpa e ei tao aw?” tahpa ta hiahri ta.
18 Zisu ta a hnohta, “Khazia phapa eina tah chi? Pakha dei leipa cha ahyhmah ta phapa y veih ei, cha cha Khazohpa a châ.
19 Biepiepazy cha na pahno: ‘Liany cheih khâ; Aphei khâ; Paru khâ; Chyhsa leih khâ; Chyhsa dô khâ; Na nô nata paw palyupalih teh,’ tahpa zy he,” tah ta.
20 Ano chata a hnohta, “Pachutuhpa, he hmo zydua he ei hâti tawhta ei zyh lymâ tyh,” tah ta.
21 Zisu ta ano cha moh ta, kyhpachâna chôta a hnohta, “Hmo sâkha nâ phahla, sie la, na hneipa zydua zuah la, dyhchhiepazy hnohta pie teh, chatanachata avâ liata ryu na hnei aw; chatawhcha a vy la, na zi teh,” tah ta.
22 Cha bie reipa vâna chata a hmia chhie ha ta, pachârôh ngâsâpa ta sie syulyu ha ta; a hneirôh kawpa vâta.
23 Zisu cha a heih ta, a pachupazy hnohta, “A hneirôhpazy cha Khazohpa Khihnarâh liata a ngia a ru kaw dia” tah ta.
24 Chatawhcha a pachupazy cha a bie reipa cha noâh tah kaw ei ta. Zisu deikua chata âmo a chhy heih ta, “Ei nawhta saih u, hneirôna liata apahniehpazy Khazohpa Khihnarâh liata a ngia a ru kaw dia!
25 Chyhsa hneirôhpa Khazohpa Khihnarâh liata a ngia hlâta, râraoseipa chhiepho khaoh liata a ngiapa a nao via,” tah ta.
26 Chatawhcha âmo chata noâh ngâsâpa ta, a hnohta, “Cha khiahta cha ahyma pachhapa a châ thei aw tly?” tah ei ta.
27 Zisu ta âmo cha moh ta, “Cha cha chyhsa châta tao theipa ri châ vei, Khazohpa châta deikua cha tao theipa a châ; Khazohpa chata ato tao theipa châ tlôh ta,” tah ta.
28 Pity ta a hnohta, “Pachâ teh, keimo ta ato siesaipa ta cha zi pi ta,” tahpa ta reih pathao ta.
29 Zisu ta, “Hmeihseihta ta, ei cha chho ei chuh, keima vâta nata thâtihpha vâta, unawhpazy tlyma, sietanôzy tlyma, nôzy tlyma, pawzy tlyma, sawzy tlyma, a râhzy tlyma a siesaipa maih,
30 atahmâ hro chhôh tlai chhaota ozy, unawhpazy, sietanôzy, nôzy, sawzy, râhzy a lie za kha ta, taolanazy chhaota a hmô lei awpa ahyhmah ta y veih ei; daihti a vaw tlô awpa liata tlyzaw hrona chhaota.
31 Châhrasala chyhsa hluhpi hmiatua chaipazy cha hnôh chaita y aw ei ta, a hnôh chaipazy cha hmia chaita ama y aw,” tah ta.
A thina awpa kyh reih chhieliena ei thôhna(Mt 20:17-19; Lk 18:31-34)
32 Zerusale khih lâ khypa ta, lâpi liata y ei ta, Zisu ta hmia a sah ta; âmo chata noâh tah kaw ei ta, a vaw zituhpazy chata chi ngâsâ ei ta. Chatawhcha pahrawhleinozy cha a nano ta a chhi ta, ama hnohta a chô liata hmo a vaw y awpazy cha chho pathao ta.
33 “Nahthlie teh u, Zerusale khih lâ eima khy hih; Chyhsa Sawchapawpa he theihthai beipazy nata Ryhpa pachutuhpazy hnohta patusapa ta y aw ta, âmo chata thiepa ta pathlu aw ei ta, Zenitaizy hnohta ama pie aw;
34 chatawhcha âmo chata taola aw ei ta, pachih ta pachhao aw ei ta, chhei aw ei ta, ama thie aw; ano cha noh thôh noh tawhta a thyu heih aw,” tah ta.
Zami nata Zawhana hiana(Mt 20:20-28)
35 Zebadi sawchapaw Zami nata Zawhana chata ano cha a vaw hnia ei ta, a hnohta, “Pachutuhpa, nâ liata eima cha hiapa maih cha maniah taopa la eima khoh,” tah ei ta.
36 Ano chata ama hnohta, “Khâpa e cha taopa aw ei sala nama khoh?” tah ta.
37 Âmo chata a hnohta, “Na Khihnarâh rôhnahna liana chata na chachâh lâta pakha, na chavei lâta pakha, maniah patyusa mah y,” tah ei ta.
38 Zisu deikua chata ama hnohta, “Nama hiapa cha pahno veih eichi. Nyu ei dopa cha nâmo nama doh thei aw ma, ei bâti châpa cha nâmo ta nama bâti thei hra aw ma?” tah ta.
39 Chatawhcha âmo chata a hnohta, “Eima thei aw,” tah ei ta. Zisu ta ama hnohta, “Ei nyu dopa cha nama doh aw; ei bâtina châ awpa chhao cha nama châ thei aw;
40 châhrasala ei chachâh lâ tlyma, ei chavei lâ tlyma atyuh theina awpa kyh cha, keima piepa châ leipa ta, amâ chhuahdy chiehpazy châta tlao a châ aw,” tah ta.
41 Chatawhcha pahrawhpazy chata cha cha ama vaw pahno nahta Zami nata Zawhana chô liata ama palôhtlâh leipa ta.
42 Zisu deikua chata âmo sahlao cha aw ta, ama hnohta, “Zenitaizy chôta ryureituhpa ama raopazy chata ama chôta a bei ngâsâ ei ta, ama molaipazy chata ama chô liata bie ama hnei ngâsâ hra tahpa nama pahno.
43 Châhrasala nâmo hry lia deikua cha cha hawhpa châ aw vei, ahyrai nama hryta molaipa cha a khoh khiahta cha nama chakaotuhpa ta a y aw pah tlao a châ,
44 ahyrai nama hryta hmiatua chai cha a khoh khiahta cha, chyhsa zydua sei ta a y awpa a châ.
45 Chyhsa Sawchapawpa chhao tlai cha chakaopa awpa ta a zu leipa ta, chakaotuhpa ta nata, chyhsa hluhpi chatlaina awpa ta a hrona pie awpa ta a zupa châ tlôh ta,” tah ta.
Mochaopa Bâtimia mopavâna(Mt 20:29-34; Lk 18:35-43)
46 Zerikô tlô ei ta; Zisu Zerikô tawhna chata a pachupazy nata chyhsa hluhpizy chhaota a pua no ta, kudaopa mochaopa Timia sawchapawpa, Batimia cha lâpi kiah liata a vaw tyuh thlâh ha ta.
47 Nazari Zisu a châ tahpa a pahno patanahta, “Zisu, Davi Sawchapawpa, na ngiachhie teh!” tahpa ta awh ta.
48 Chatawhcha chyhsa hluhpi ta a chalih awpa ta ra ei ta; châhrasala ano chata, “Davi Sawchapawpa, na ngiachhie teh!” tahpa ta awh rili ta.
49 Zisu a duah ta, “Ano cha va aw teh u,” tah ta. Chatawhcha mochaopa cha aw ei ta, a hnohta, “Thlahlôhpa ta y la, thyu teh, a cha aw cha,” tah ei ta.
50 Chatawhcha ano chata a poh thy ta, a kaw zaw ta, Zisu lâ pangai ha ta.
51 Zisu ta a hnohta, “Khâpa ei cha taopa awpa e na khoh?” tah ta. Chatawhcha mochaopa chata a hnohta, “Pachutuhpa, mo pavâpa ei khoh,” tah ta.
52 Zisu ta a hnohta, “Sie teh, nâ ngiapâna ta a cha patlâh ha hih,” tah ta. Chatanachata thlai vaw hmô thei ha ta, lâpi liana chata Zisu zi ha ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||