Theihthaina Bo 27

Theihthaina Bo 27

Pananona ryhpa biezy

1 ABEIPA ta Mawsi chho ta, 

2 Izarel pathlazy chho la ama hnohta, chyhsa ta kheihawhpa tlyma, a pei pachaihpa kyh liata bie â taih khiahtala, chyhsapa â phuhpa ta na raopa hawpa cha ABEIPA tovyuh châ aw ta, 

3 chapaw a châ khiahtala, na raozie awpa cha kô syno tawhta kô sycharupa cha su pathaihpa sekel hawhta tâkâ sekel sypangawh phuh a châ aw. 

4 Chanô a châ khiahtala, na raozie awpa cha sekel sythôh a châ aw. 

5 Kô pangawh tawhta kô synopa a châ khiahtala, na raozie awpa cha, chapaw cha sekel syno, chanô cha sekel miahrawh a châ aw. 

6 Thla kha tawhta kô pangawhpa a châ khiahtala, chapaw na raozie awpa cha tâkâ sekel miapangawh, chanô na raozie awpa cha tâkâ sekel miathô a châ aw. 

7 Kô sycharu tawhta a chô lâ a châ khiahtala, na raozie awpa cha, chapaw cha sekel miahrawh hlei pangawh, chanô cha sekel miahrawh a châ aw. 

8 Anodeikuacha na raopa hlâta sipasapa a châ khiahtala, theihthaipa lâta a chhi awpa châ ta, theihthaipa ta a vaw rao aw; bitaituhpa tao theinazie hawhta theihthaipa ta a rao aw.

9 Hmohlâpa ABEIPA lâta ama hlâ awpa cha, sahroh a cha khiahtala, ahyrai ta ABEIPA châta cha hawhta ama piepa cha hmo pathaihpa a châ awpa a châ. 

10 A panano awpa châ leipa ta, a phapa ta a chhiepa, a chhiepa ta a phapa a ri awpa châ hra vei, sahroh lilaw ta a ri khiahtala a pô no ta, a rina chhao chata hmo pathaihpa a châ awpa a châ. 

11 Chatawhcha sahroh pathaih leipa ABEIPA lâta hlâ beih leipa a châ khiahtala, sahroh cha theihthaipa hmiakô liata a soh awpa a châ, 

12 theihthaipa chata a phana nata a chhienazie hawhta â phuhpa rao aw ta, nama theihthaipa ta na raopa hawhna cha a châ lymâ aw. 

13 Anodeikuacha a chatlai heih hmeiseih awpa khiahtala, a raopazie su pangawh ta pachhaih ta, su kha a bai awpa a châ.

14 Chyhsa ta a o cha ABEIPA châta a hlâ awpa khiahtala, a pha nata a chhienazie ta theihthaipa ta a rao awpa a châ; theihthaipa raopa hawhna cha a châ aw. 

15 Chatawhcha a hlâtuhpa chata a o cha a chatlai heih awpa khiahtala, a ty awpa ta a raopazie su pangawh ta pachhaih ta su kha a bai awpa a châ, chatanachata ano eih a châ heih aw.

16 Chyhsa ta a râh liata lyu thokha ABEIPA châta a hlâ awpa khiahtala, na raozie awpa cha chi tuna yzie lymâ ta a châ aw; bali sâh homer kha su kha tâkâ sekel sypangawh a châ aw. 

17 A lyu cha zubili kô tawhta hlâpa a châ khiahtala, na raopa hawhna cha châ thlâh ha aw ta; 

18 zubili kô hnôh lâta a hlâpa a châ khiahta deikua cha, theihthaipa ta a ty cha, zubili tloh heihna awpa kô yzie hawhta raopa aw ta, na raozie tawhta a chokuanazie taopa a châ aw. 

19 A hlâtuhpa ta a chatlai hmeiseih awpa khiahtala, a ty a raopa zie su pangawh ta pachhaih ta su kha bai aw ta, ano eih a châ heih aw. 

20 Lyu cha a chatlai khoh vei tlyma, mo hropa lâta a zuah tlyma, a châ khiahtala, chatlai heih theipa châ khao aw vei; 

21 zubili kô liata a phuah heih tina chata lyu cha ABEIPA châta pathaihpa, ano châta pananopa hawhta châ aw ta; theihthaipa châta a châ aw. 

22 A râh liatahpa a châ leipa lyu ABEIPA lâta a hlâ khiahtala,

23 zubili kô taihta a raozie hawhta theihthaipa ta a ty cha raopa aw ta, a raopa hawhna chata ABEIPA châta hmo pathaihpa, cha noh liana chata a pie awpa a châ. 

24 Zubili kô liana chata a chaleina a râh a hneituhpa parohpa chata a hnei heih aw. 

25 Raonazie zydua cha thliena dopa hawh lymâ ta a châ awpa a châ: sekel miakha cha gerah syno a châ aw.

26 Anodeikuacha sahro hry liata a pi tua chaipa, ABEIPA chata rao hawhpa cha ahyhma ta ama hla awhpa cha vei; viachao topa rai, mitakupa rai cha sala, ABEIPA ei a cha. 

27 Chatawcha sahro pathai leipa a cha khiatala, na raozi hawta a chatlai awhpa cha awh ta, a su pangaw ta pachhai ta su kha a bai awhpa a cha; chatlaipa a cha vei khiatala, na raozi hawta zua awhpa a cha awh.

28 Anodeikuacha hmo pananopa chyhsa ta a hmo hneipazy hry liatahpa ABEIPA châta a panano hawpa cha, chyhsa tlyma, sahroh tlyma, a râh liata lyu tlyma, zua awpa châ leipa ta, chatlai awpa châ hra vei; pananopa hmo zydua cha ABEIPA châta pathaih ngaitapa a châ. 

29 Panano hawpa chyhsa cha chatlai awpa châ vei; thie thlyu awpa a châ. 

30 Râh chhôh liatahpa su hrawh liata su kha zydua, lyu liata hmo a pathaihpazy chhao, theilâpazy chhao, ABEIPA eih châ ta; ABEIPA châta pathaihpa a châ. 

31 Chyhsa ta a su hrawh liata su kha hry liatahpa, a kheihawhpa rai a chatlai awpa khiahtala, a su pangawh ta pachhaih ta su kha a bai awpa a châ. 

32 Sahroh zaw nata mietahkupa zaw hry liata, su hrawh liata su kha, chôhchahrei ry liata â ngiapa, a pô hrawhna lymâ cha ABEIPA châta pathaihpa a châ aw. 

33 A pha nata a chhie a pasia awpa châ leipa ta, a ri awpa châ hra vei; a ri raruah khiahtala, a pô no ta a rina chhaota hmo pathaihpa châ aw ta; chatlai heih theipa châ aw vei, tah teh,” tahpa ta. 

34 Hezy he Sinai Tlâh liata Izarel pathlazy châta ABEIPA ta Mawsi a piepa biepiepazy cha a châ. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27

Theihthaina Bo 26

Theihthaina Bo 26

Reingiahna byhnâzy (Rc 7:12-24; 28:1-14)

1 Nâmo chata khazoh nohthlapa nama tao awpa châ leipa ta, nohthlapa tao chhyhpa tlyma, lôbôpa tlyma, nama tao awpa châ leipa ta, a naoh awpata nama râh liana heta nohthlapa a kiapâh alô nama bô awpa châ hra vei; Kei he ABEIPA nama Khazohpa châ tlôh na ta. 

2 Ei pahânohzy cha a ô aw eichi ta, ei su pathaihpa cha nama za awpa a châ: Kei he ABEIPA cha ei châ.

3 Ei bie raopazy cha zyhpa ta, ei biepiepazy a pyhpa ta namâ ngiah khiahtala, 

4 vâsua zy cha a daihti ta patlasa aw na ta, alei chata papyusa aw ta, râh liata thozy chata thei pathei aw ei ta. 

5 Nama sawhri liata sâh chata kre thei lyuna daihti taih patu aw ta, nama kre lyupata chi cheina daihti patu aw ta; nama viahchhâ cha ribiepa ta nie aw eichi ta, nama râh liana heta thlalôh ngaitapa ta nama pahrâ aw.

6 He râh he thlalôh ngaitapa ta paysa aw na ta, a zia molo aw eichi ta, ahyhmah ta cha pachisa aw veih ei; sahrâpa moleipazy cha he râh tawhtapa he to khai aw na ta, zaozi ta nama râh chahry hra aw vei. 

7 Nama khakhaipazy cha a chadai aw eichi ta, nama hmiakô liata zaozi ta thiepata ama y aw. 

8 Chyhsa papangawh ta za kha a chadai aw eichi ta, za kha ta thy kha â chadai aw eichi ta; nama khakhaipazy cha nama hmiakô liata zaozi ta thiepata ama y aw. 

9 Chatawhcha ei cha khokheipa hawhta chi hluhpi cha pathlasa aw ei na ta, ei cha papôh aw ei, nâmo liata ei biehrai ei pa-i aw. 

10 Chatawhcha bohpi nama pasopa a parohpazy cha nie aw eichi ta, a thiehpa so nawpa ta a parohpazy nama patly aw. 

11 Nama hry liata ei achhyna byureih cha paysa aw na ta, ei hrona chata châ heihsai aw veih ei. 

12 Nama hry liata y aw na ta, nama Khazohpa châ aw na ta, nâmo chhao ei chyhsazy nama châ aw. 

13 Kei he, ABEIPA nama Khazohpa, ama sei nama châ lei nawpa ta, Izi râh tawhtapa châ chhithatuhpa châ na ta, nama raopakyzy cha thlie na ta â dopa ta ei cha pasiesa ei hih.

Reingiah leina hrienazy(Rc 28:16-68)

14 Anodeikuacha ei bie a pyh leipa ta, he biepiepa zydua he zyh leipa ta, 

15 ei bie raopa zy khoh leipa ta, nama hro nata ei ryureipazy a haopa ta, ei biepiepa zydua zyh leipa ta, ei biehraipa nama parao khiahtala, kei chhaota, 

16 nama chô liata he he ei tao aw; nama chô liata hmo chichhih ngaitapa, nama hrona a pahlei theipa nata nama mo zohna nata chasipa zy ei chareisa aw. Chatawhcha nama chicheipazy cha khâpahrao leipa a châ aw, nama khakhaipazy chata ama nie lymâ aw; 

17 nama chô liana chata ei hmia châ heihnao aw ei na ta, nama khakhaipazy hmiakô liata nama nawh aw, nâmo châ haotuhpazy ta nama chô liata ryu hi aw ei ta, ahyhmah a chadai leipata namâ râ aw. 

18 Chata chô chhaota ei bie namâ pyh leipa khiahtala, nama moleinazy vâta ei sari ei cha hrie aw ei, 

19 nama thatlôna a palaikheipa cha parao aw na ta, nama avâ cha thua hawhta tao aw na ta, nama alei cha dawh hawhta, chatawhcha nama tha nama pahryu thlâhthlipa a châ aw; 

20 nama râh chata panyu leipa aw ta, râh liata thozy chata pathei hra aw vei.

21 Ei kho leinazie ta ypa ta, ei bie namâ pyh vei khiahtala, namo moleinazy hawhta a lie sari ta nama chô liata hriena ei patlôsa aw. 

22 Chatawhcha nama hry liata sahrâhpazy vaw tuah aw na ta, cha chata nama sawzy cha lapa aw ei ta, nama sahrohzy cha siepa aw ei ta, nama chyhsazy ei pachyhsa aw, nama lâpizy dâhkaropa ta a y hra aw.

23 Chata chôna chhaota ei chhoreina a pyh hlei leipa ta, ei kho leinazie ta nama y khiahtala, 

24 kei chhaota namo kho leinazie ta y aw na ta, keima tlaita nama moleina vâta ei sari ei cha hrie aw ei.

25 Nama chô liata zaozi patlôsa aw na ta, cha chata biehrai phuh la aw ta, nama khih chhôh chyu liata ahmaohpakhy aw eichi ta, nama hry liata hri chareisa aw na ta, khakhaipazy ku liata piepa nama châ aw.

26 Namâ ngiapâ chaipa viahchhâ ei parao khai tita cha, chanô pahrawh ta a chhona miakha liata chho aw ei ta, nama viahchhâ cha khopathliapa tlaita ama cha pie hei aw; nie aw eichi ta, nama rih bie hlei aw vei.

27 Cha zydua chô chhaota, ei bie a pyh hlei leipa ta, ei kho leinazie ta nama y khiahtala, 

28 pathi-ia ngaitapa ta nama kho leinazie ta y aw na ta, nama moleina vâta ei sari ei cha hrie hra aw ei.

29 Nama sawchapawpazy sa nie aw eichi ta, nama sawchanôzy sa nama nie hra aw. 

30 Chatawhcha nama su sâhpazy parao aw na ta, nama noh khazoh nohthlapazy papao aw na ta, nama rizy cha nama khazoh nohthlapazy ri chô liata ei thy aw; ei hrona ta a châ hao aw ei. 

31 Nama khihzy cha dâhkaropa ta tao aw na ta, nama su pathaihpazy cha a ryhpata tao aw na ta, nama rohpahâhpazy cha pahnâ aw va na. 

32 Chatawhcha râh cha dâhkaropa ta tao aw na ta, nama khakhaipa cha liata a ypazy chata ama no a âh aw.

33 Chatawhcha pho hropazy hry liata cha papai aw ei na ta, châ chadai awpa ta zaozi ei phia aw, nama khihzy cha khi rypa a vaw châ aw.

34 Chatawhcha râh chata dâhkaropa ta a y chhôh zydua nata nama khakhaipazy râh liata nama y chhôh chata râh cha a pahâ aw ta, a pahânohzy liana chata a tha a pha aw. 

35 Dâhkaropa ta a y chhôh zydua cha â pahâ aw, nama y nota nama pahâ nota a pahâ tyh hra leipazy kha. 

36 Chatawhcha nama hry liata a laibâhpazy cha ama khakhaipazy râh liata ama pathipalôh liata thazeina ei paysa aw; chatawhcha chhohnapa pyu ta a chadai aw ta, zaozi tawhta a râpaipa hawhta a râpai aw ei ta, ahyhmah a chadai leipa ta ama pao aw. 

37 Ahyhmah a chadai leipa ta zaozi ta a chadaipa hawh tlaita ama chatichahnao aw; nama khakhaipazy vaw pakhâ awpa ta, thatlôna rai hnei aw veih ei chi. 

38 Pho hropazy hry liata leidia aw eichi ta, nama khakhaipazy râh chata a cha nie khai aw ei. 

39 Chatawhcha nama hry liata a laibâhpazy cha nama khakhaipazy râh liata ama hmo paraona vâta ama leidia aw; ama mahpawzy chata ama hmo paraonazy vâta ama leidiapa hawhta âmo chhao ama leidia hra aw. 

40 Ama moleina ei chô liata ama moleina vâta nata ama hmo paraona nata ama mahpawzy hmo paraona nata ei kho leinazie ta ama ypa vâta,

41 kei chhao ama kho leina zie ta y na ta, ama khakhaipazy râh liata ei paysapazy cha a papha leipa aw ei ta; ama pathipalôh kuhchhana vâta panawhsapa ta ama hmo paraona vâta hriena cha amâ pyh khiahtala; 

42 Zakaw hnohta ei biehraipa cha a thei thlâh ha aw na ta Aisika hnohta biehraipa nata Abarahâ hnohta ei biehraipazy chhaota a thei thlâh ha aw na ta, chatawhcha râh chhao cha ei thei thlâh ha hra aw. 

43 Râh chhao cha pasaih aw ei ta, âmo y leipa ta dâhkaropa ta a y chhôh chata a pahânohzy liana chata a tha a pha aw; ei ryureinazy ama khoh leipa vâta nata ama hrona ta ei bieraopazy â hao tyhpa vâta ama hmo paraona hriena cha amâ pyh awpa a châ. 

44 Chata chôna chhao chata, ama khakhaipazy râh liata ama ypa cha, amo pahleipadia awpa nata âmo liata ei biehraipa paraopa ta thy pathlah leipa aw na ta, a hao hra aw va na: Kei he ABEIPA ama Khazohpa cha châ tlôh na ta; 

45 ama Khazohpa ei châ thei nawpa ta pho tozy mohmô liata, Izi râh tawhtapa ei chhithapa ama pathlatuhpazy biehrai cha âmo vâna heta tlao ei thei thlâh ha aw: Kei he ABEIPA cha ei châ, tah teh,” tahpa ta.

46 Hezy he Sinai Tlâh liata Mawsi hmâpa ta, Ano nata Izarel pathlazy likawh ta ABEIPA ta a taopa biepiepazy, pachiapazy nata ryhpazy cha a châ. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27

Theihthaina Bo 25

Theihthaina Bo 25

Pahânoh kôzy nata Zubili kô

1 ABEIPA ta Sinai Tlâh liata Mawsi chho ta, 

2 Izarel pathlazy chho la, ama hnohta, râh ei cha piepa ei nama tlô tita râh cha ABEIPA lâta pahânoh a ô hra aw. 

3 Na lyu liata kô charu chhôh chi cheih aw chi ta, na kresadô cha kô charu chhôh chhawpa ta panyuhsa aw chi ta, a theilâpazy hria aw chi ta; 

4 a kô sari kô deikua cha, râh châta pahânoh pahâna ABEIPA lâta pahâna châ aw ta; na lyu liata chi na cheih awpa châ leipa ta, na kresadô chhawpata na panyuhsa awpa châ hra vei. 

5 Na sâh sawhlipa na hria awpa châ leipata, na mohôh leipa cha na lyu awpa châ vei, râh pahâna pathaihpa kô a châ aw.

6 Râh pahâ kô liatahpa cha nama nie chhyh châta a châ aw, na châta zy, na seichapaw nata na seichanô châta zy, châ hlaopa châta zy, na hnohta a ypa râh hropa chyhsa châta zy; 

7 na viahchao zaw châta zy, na râh liata sahroh châta zy, cha liata a patheihpa zydua cha nie chhyhpa châta a châ aw.

8 Chatawhcha pahâ kô, kô sari cha reih aw chi ta, kô sari suh sari châ aw ta, pahâ kô, kô sari chhôh cha kô sypalih nata kô chaki châ aw ta. 

9 Cha tawhta thla sarina noh hrawh noh ta chiahmie paro ngaitapa cha, nama patôsa awpa châ ta, aryhna noh liana chata nama râh zydua liata chiahmie nama patôsa awpa a châ. 

10 Chatawhcha kô sypangawhna cha aly aw ei chi ta, râh chhôh zydua liata, cha liata a ypa zydua hnohta khotalaina kyh nama phuah awpa a châ; nama châta zubili châ aw ta, chyhsa to ta ama eih chyu ama hnei heih aw, chyhsa to ama chhôhkha chyu liata nama y heih aw. 

11 Cha kô sypangawhna cha nama châta zubili châ aw ta; khâpahmah chi cheih leipa aw eichi ta, a sawhlipa chhao la leipa aw eichi ta, kre mohôh leipa thei cha nama lyu awpa châ hra vei. 

12 Zubili châ tlôh ta; nama châta pathaipa châ aw ta; cha nama lyu liata apatheihpa cha nama nie awpa a châ.

13 “He zubili kô liana heta chyhsa to ta âmo eih tlai ama hnei heih chyu awpa a châ.

14 Na vaih hnohta khâpa tlyma zuapata, na vaih tawhta khâpa tlyma na chaleipa chhaota, namâ dô rairieh awpa châ vei. 

15 Zubili tawhta a kô hluhzie lymâ hawhta na vaih hmo chalei aw chi ta, sâh kô veihna hluhna yzie ta na hnohta a zuah awpa a châ. 

16 A kô hluhna yzie lymâ ta a ty cha papôh aw chi ta, chatawhcha a kô chyhna yzie lymâ ta a ty cha pahnai aw chi ta, sâh veihna kô hluhna yzie ta nâma lâta zuapa a châ aw. 

17 Namâ dô rairieh awpa châ leipata, na Khazohpa cha na chi awpa a châ: Kei he ABEIPA nama Khazohpa cha, châ tlôh na ta.

18 “Chavâta ei bie raopazy cha zyhpata, ei pachiapazy cha a pyhpata, na chi awpa a châ; cha râh liana chata thlalôh ngaitapa ta nama pahrâ aw. 

19 Râh chata a theilâpa pathei aw ta, rihbiepa ta y aw eichi ta, thlalôh ngaitapa ta nama pahrâ aw. 

20 ‘Cha khiahta a kô sari kô chata, khâpa eima nie aw, pachâ teh, khâpahmah chi cheih tlôh leipa pi ta, eima theilâpazy hria tlôh leipa aw pi ta?’ nama tah khiahtala, 

21 a kô charu kô chata ei byhnâ nama chô liata patlôsa aw na ta, kô thôh chhôh châta a thei a pathei aw.

22 a kô charie kô chata, chi cheih aw eichi ta, a patheipa nama pachôpa a parohpazy cha nie aw eichi ta; kô chaki taihta a daih heihna taihta nama pachôpa a parohpazy cha nama nie awpa a châ. 

23 Chhâzaw ta râh cha nama zuah pathlah awpa châ vei, râh cha kei eih châ tlôh ta; khichhaipa ei hnohta a pahrâpa dei châ tlôh eichi ta. 

24 Nama râh pahrâhpa zydua cha chatlai lilaw awpata nama pasaih awpa a châ.

25 Na unawhpa cha a sipasapa ta a râh thokha zuah sala, a heinawh a hnia chaipa ta a unawhpata a zuapa cha a vaw chatlai awpa a châ. 

26 Chyhsa ta a chatlai patuhpa awpa hnei leipata, vaw hneirôhpa ta chatlaina a hnei khiahtala, 

27 a zuapa rakha kô cha, a laichadai sala a zuana laibâhpa cha pakua mawh sy, chatanachata a râh cha a pahrâ heih aw. 

28 Ano chata a chatlai lilaw thei leipa khiahta deikua cha a zuah hawpa cha zubili kô taihta a chaleituhpa liana chata y mawh sy; zubili kô ta pua heih aw ta ano chata a râh cha a pahrâ heih aw.

29 Kuh a hneipa khih liata o, chyhsa ta a zuah khiahtala, a zua rakha tawhta kô kha chhôh chata a chatlai heih thei aw; kô kha bohlo chhôh chata chatlai theina a hnei aw. 

30 Kô kha chhôhta a chatlai thei leipa khiahtala, kuh a hneipa khih liata o cha chhâzaw ta a pathlazy taih chhaota a chaleituhpa eih châ ha aw ta; zubili liata chhao pua hlei aw vei. 

31 Kuh a hnei leipa khih liata ozy deikua cha, tlâh râh hawhta pachâpa châ aw ta; chatlai theipa châ aw ta, zubili liata a pua aw. 

32 Anodeikuacha Livai sahlaozy khih, ama hneipa khihpa liata ozy cha, Livai sahlaozy chata, khatino raita ama chatlai thei aw. 

33 Chatawhcha Livai sahlao hry liatahpa ta a chatlai leipa khiahtala zuah hawpa o nata a hneipa khih cha zubili liata pua aw ta; Livai sahlaozy khih liata ozy cha Izarel pathlazy hry liata ama hneipa châ tlôh ta.

34 Ama khih kiapâh liata lyuzy deikua cha, zuah theipa châ leipa aw ta; chhâzaw ta ama hneipa châ tlôh ta.

35 Chatawhcha na unawhpa a sipasapa ta a châ vaw chhai khiahtala, na deichhy awpa a châ; khichhaipa na hnohta a ypa hawhta na paysa awpa a châ. 

36 Ano liata tâkâ tlyma, hmo tlyma, a pôhna la khâ, Khazohpa tlao chi teh; na unawhpa cha na hnohta a y thei nawpa ta. 

37 A pôhna a chadaipa ta na sôh dyu na pacheisa awpa châ leipa ta, a pôhna a chadaipa ta na niepazy dyu pacheisa hra khâ. 

38 Kei he ABEIPA nama Khazohpa Kana râh cha pietuh awpa nata nama Khazohpa châ awpa ta Izi râh tawhtapa châ chhituhpa ei châ.

39 Chatawhcha na unawhpa a sipasapa vâta na hnohta a cha zua hnao khiahtala, sei hawhta na hmâh awpa châ leipa ta; 

40 a hlaopa hawhta nata na hnohta a pahrâ hrapa hawhta na hnohta a y awpa a châ. Zubili kô taihta a cha chakao aw; 

41 cha khai tawhna chata nâ tawhtapa pua aw ta, ano nata a sawzy chhaota, âmo chhôhkha ualuapa liata a ngia heih aw ei ta, ama mahpawzy o nata lyu ama pahrâ heih awpa a châ. 

42 Izi râh tawhtapa ei chhihthapa ei chakaotuhpazy châ tlôh ei ta; sei zuapa hawhta zuah awpa châ vei. 

43 Nôchhie ngaitapa ta ano liata ryu na rei awpa châ leipa ta, na Khazohpa cha na chi awpa tlao a châ. 

44 Seichapaw nata seichanô ta na hnei thei awpazy cha; nama chheipâh phopizy hry liata seichapaw nata seichanô châta na chalei awpa a châ, 

45 nama hry liata a pahrâpa râh hropa chyhsa nata nama râh liata a pihpa ama sanawhzy hry liatahpazy chhao nama chalei thei hra aw, chazy cha nâma chyhsa ama châ aw. 

46 Nâma hnôh lâta nama sawzy ryuto châta ama chyhsa ta ama hnei awpa ta tao aw eichi ta; cha hry liatahpazy cha, chhâzaw ta nama sei ta nama hnei aw; anodeikua cha nama unawhpa Izarel pathlazy liana chata nôchhie ngaitapa ta ryu nama reih awpa châ vei.

47 Râh hropa chyhsa tlyma na hnohta a ypa ahy tlyma, vaw hneirôh sala, a kiapâh liata na unawhpa a sipasa sala, na hnohta râh hropa chyhsa tlyma, na hnohta a ypa hnohta tlyma, râh hropa chyhsazy pathla chhôhkhapa hnohta tlyma, a zua hnao khiahtala, 

48 a zua ha tawh chhaota chatlai heih theipa châ aw ta, a unawhpazy hry liatahpa ta chatlai thei aw ei ta,

49 a paw unawhpa tlyma, a paw unawhpa sawchapawpa tlyma ta a chatlai thei aw, a chiheihzy hry liata a heinawh a hniapa tlyma ta chatlai thei aw ta; ano chhao a vaw hneirôh khiahtala  chatlai thei aw ta. 

50 A zuanapa nata a zua ha tawhta zubili kô heih awpa a laichadai sala, a zuana mâ cha a kô yzie ta châ aw ta; chatawhcha a hlapa ta hruapa laichadaina yzie lymâ hawhta a laichadaipa a châ aw. 

51 Kô hluhpi a byuh khiahtala, a chatlaina mâ cha bâhta chhâ â phuhpa hawhta a pakua heih awpa a châ. 

52 Zubili kô tlôna awpa kô chyhta deita a y khiahtala, a laichadai ei sala, a yna kô hluhpa yzie ta chatlaina mâ a pakua awpa a châ. 

53 Kô kha lymâ ta a hruapa, a hlaopa hawhta a y awpa a châ; na mohmô liata nôchhie ngaitapa ta a chô liata ryu a reih awpa châ vei. 

54 Cha yzie hawhta chatlaipa a châ leipa chhaota, zubili kô chata pua aw ta, ano nata a sawzy chhaota, 

55 Izarel pathlazy cha keima chakaotuhpazy châ tlôh ei ta, Izi râh tawhtapa ei chhithapa nâ chakaotuhpazy ama châ: Kei he ABEIPA nama Khazohpa cha ei châ. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27

Theihthaina Bo 24

Theihthaina Bo 24

Meiôh vaina yzie (Pu 27:20-21)

1 Khazohpa ta Mawsi chho ta, 

2 Izarel pathlazy cha ôli thaw pasoh ngaitapa pakhaih awpa ta saohpa, meiô kha pakhaih thlâh ha nawpa ta, nâ lâta vaw cheih awpata bie pie teh. 

3 Ahmaohpakhyna poh-o liata pahnosana pohraipa khôtho lâna chata, zâlâ tawhta my taih chata ABEIPA hmiakô liata Arawna ta soh mawh sy; he he nama pathlazy taihta chhâzaw ryhpa awpa a châ. 

4 ABEIPA hmiakô liata meiô sona pathaih ngaitapa chô liata meiôzy cha soh tyh mawh sy.

Viahchhâ sopa

5 Chatawhcha viahdie dipa la la, cha cha viahchhâ tlâ hrawhleino ta na chhoh awpa a châ; viahchhâ tlâ kha liana chata ephah su hrawh ta pachhaih ta su no hmâh awpa a châ. 

6 ABEIPA hmiakô liata tlâhkhai pathaihpa chô liata tlâ no ta, tlâh kha liata tlâ charu rairieh ta na pacho awpa a châ. 

7 Viahchhâ chô liata a tlâh nona liana chata deiryh pasoh ngaitapa na soh awpa a châ, myleina ABEIPA châta mei hmohlâpa hawhta a vaw châ thei nawpa ta. 

8 Pahânoh maihta ABEIPA hmiakô liata a soh tyh awpa a châ; chhâzaw biehraina Izarel pathlazy châta a châ.

9 Arawna nata a sawchapawpazy tovyuh châ aw ta, su pathaihpa liata ama nie awpa a châ, chhâzaw ryhpata ABEIPA châta mei ta hmohlâpazy hry liatapa ano châta hmo pathaih ngaitapa a châ,” tahpa ta.

Reipachhiena nata thôna ryhpa bie

10 Izarel chanô sawchapawpa, a paw Izi chyhsa, chyhsa pakha cha, Izarel pathlazy hry liata vawh ta; cha Izarel chanô sawchapawpa nata Izarel chyhsa, chyhsa pakha cha, ariena su liata a tu ei ta, 

11 Izarel chanô sawchapawpa chata chhiesapa ta Khazohpa moh reipachhie ta. Mawsi lâta a chhi ei ta, a nô moh cha Shelomi châ ta, Dana chi Dibri sawchanônô a châ. 

12 ABEIPA pakah tawhta bie a puapa hâpa ta patâhna liata khô ei ta.

13 ABEIPA ta Mawsi chho ta,

14 Chhie a satuhpa cha ariena su khôtho lâ a chhi ula; a pahnotuhpa zydua chata aluh liata ama ku pahnieh ei sala, chyhsa zydua ta alô ta vawh ei se.

15 Chatawhcha Izarel pathlazy cha chho la, ama hnohta, ahyrai a Khazohpa lâta chhie a sapa maih chata, a molei maoh phaoh aw ta. 

16 ABEIPA moh a reipachhiepa maih cha, thie thlyu awpa a châ; chyhsa zydua ta alô ta ama vawh thlyu awpa a châ; ABEIPA moh ama reipachhiepa khiahtala, râh hropa chyhsa chhao, he râh liatahpa rai chhao thie awpa a châ. 

17 Thina taihta chyhsa chôta ku a pathlapa maih cha thie thlyu awpa châ ta. 

18 Thina taihta sahroh chôta a ku a pathlapa maih chata a thô awpa a châ, hrona vyuhpa ta hrona. 

19 Chyhsa ta a vaih a parao khiahtala, ataopa hawhna tlai chata a chô liata tao hra awpa a châ, 

20 ru tliepa vyuhpata ru tliepa, mo vyuhpata mo, hâh vyuhpata hâh; chyhsa a paraopa hawhta a chô liata chhao tao hra awpa a châ. 

21 Sahroh a thiepa maih chata a thô awpa châ ta; chyhsa a thiepa maih cha thie hra awpa a châ. 

22 Râh hropa chyhsazy châta nata he râh liatahpazy châta ryhpa su kha nama hnei awpa a châ: Kei he ABEIPA nama Khazohpa ei châ hih,” a tah tahpa ta. 

23 Mawsi chata Izarel pathlazy chho ta, chhie a satuhpa cha ariena su khôtho lâ a chhi ei ta, alô ta vawh ei ta. Izarel pathlazy chata ABEIPA ta Mawsi bie a piepa hawhna chata tao ei ta. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27

Theihthaina Bo 23

Theihthaina Bo 23

Kyhchhi raopazy (Mar 28:16-29:40)

1 ABEIPA ta Mawsi chho ta, 

2 Izarel pathlazy chho la, ama hnohta, ABEIPA kyhchhi daihti pakhypi pathaihpa ta nama tao awpa, ei kyhchhi daihti cha hezy he a châ. 

3 Noh charu raihria awpa châ ta; noh sari noh deikua cha pahâna pahânoh, pakhypi pathaihpa a châ; khâpa rai hmahta nama hria awpa châ vei; nama yna maih liata ABEIPA châta pahânoh a châ.

4 ABEIPA kyhchhi daihti, pakhypi pathaihpa a daihti lymâ ta nama phuah awpa cha hezy he a châ. 

5 Thla khana, noh hrawhleipalih noh, zâlâ cha, ABEIPA zawpakhô a châ. 

6 Cha thla ualua noh hrawhleipangawh noh cha, ABEIPA châta viahchhâ thinô pahlao leipa kyhchhi a châ; noh sari chhôh cha viahchhâ thinô pahlao leipa nama nie awpa a châ. 

7 A noh kha nohta pakhypi pathaihpa hnei aw eichi ta; rairupa nama hria awpa châ vei. 

8 Noh sari chhôhta mei ta hmohlâpa ABEIPA lâta nama hlâ awpa a châ, noh sari noh cha pakhypi pathaihpa châ ta; rairupa nama hria awpa châ vei, tah teh,” tahpa ta.

9 Chatawhcha ABEIPA ta Mawsi chho ta, 

10 Izarel pathlazy chho la, ama hnohta, râh ei cha piepa nama tlô nahta, cha liata sâhzy nama hria tina chata, nama sâh a daih tuapazy sapia miakha cha theihthaipa lâta nama vaw cheih awpa cha; 

11 a pyhpa theipa a châ nawpata ano ta sapia cha ABEIPA hmiakô liata hie aw ta; pahânoh mylâpa liana chata theihthaipa ta a hie awpa a châ. 

12 Chatawhcha sapia nama hie nota mietahkupa taw, a chapawpa, seina a hnei leipa, kô khapa, raopa hlâna ta ABEIPA lâta nama hlâ awpa a châ. 

13 Cha liata niepa hlâna cha viadie dipa ephah su hrawh pachhaih ta su no sathaw ta nypa ABEIPA châta rohpahâh ngaitapa, mei ta hmohlâpa a châ awpa a châ; cha liata dopa hlâna cha kresawti panuapa su palih ta pachhaih ta su kha a châ awpa a châ. 

14 Nama Khazohpa châta hmohlâpa cha nama hlâ hlâta cha, cha hlâ rai ta, a viahchhâ ta tlyma, raopa ta tlyma, a suh ta tlyma, nama nie awpa châ vei; he he nama yna maih liata nama pathlazy taihta chhâzaw ryhpa awpa a châ.

15 Pahânoh mylâpa hiepa hlâna sapia nama vaw chei no tawhta, reih aw eichi ta; pahânoh ei sari a tloh awpa a châ,

16 pahânoh ei sarina my taihna chata noh sypangawh reih aw eichi ta; ABEIPA lâta niepa thiehpa hlâna nama hlâ awpa a châ.

17 Nama yna su tawhta ephah suh hrawh ta pachhaih ta, su no ta taopa, viahchhâ tlâ hie awpa miano viahdie dipa, thinô chhaota chhopa ABEIPA châta a daih tua chaipa hlâ awpa nama vaw cheih awpa a châ. 

18 Chatawhcha viahchhâ hlâ nona chata mietahkupa taw pô sari seina a hnei leipa, kô khapa nata viahchao tôh dawpa nata mietahkupa tôhpa pô no nama hlâ awpa a châ; chazy cha ama niepa hlâna nata ama dopa hlânazy chhao chata ABEIPA châta raopa hlâna, ABEIPA châta rohpahâh ngaitapa mei ta hmohlâpa a châ aw. 

19 Chatawhcha moleina hlâna châta mie tôhpa pô kha nata dyhna hlâna atheihna ta mietahkupa taw a chapawpa pô no kô khapa nama hlâ awpa a châ. 

20 Theihthaipa ta a daih tua chaipa viahchhâ cha mietahkupa taw pô no chhaota ABEIPA hmiakô liata hiepa hlâna ta hie aw ta; theihthaipa tovyuh ABEIPA châta pathaipa a châ aw. 

21 Cha noh ualua cha phuah aw eichi ta; nama châta pakhypi pathaihpa châ aw ta; rairupa nama hria awpa châ vei: he he nama yna maih liata nama pathlazy taihta chhâzaw ryhpa awpa a châ.

22 Chatawhcha nama lyu liata sâh nama hria tita, nama lyupa adihliapa taihta nama hria khai awpa châ leipa ta, kâmo chhao nama tho awpa châ vei; sipasapa nata râh hropa chyhsazy châta nama pahlôh pa awpa a châ: Kei he ABEIPA nama Khazohpa ei châ, tah teh,” tahpa ta.

23 ABEIPA chata Mawsi chho ta, 

24 Izarel pathlazy chho la, ama hnohta, thla sarina, cha thla noh kha noh cha, nama châta pahânoh pahâna, chiahmie tôpata a thei thlâh hana, pakhypi pathaihpa châ aw ta. 

25 Rairupa nama hria awpa châ leipa ta; ABEIPA châta mei ta hmohlâpa nama hlâ awpa a châ, tah teh,” tahpa ta.

26 Chatawhcha ABEIPA ta Mawsi chho ta, 

27 Thla sarina noh hrawh noh deikua he aryhna noh châ ta; nama châta pakhypi pathaihpa châ aw ta, nama palôhrupazy rie pathei aw eichi ta, ABEIPA châta mei ta hmohlâpa nama hlâ awpa a châ. 

28 Cha noh chata khâpa rai hmah nama hria awpa châ vei; ABEIPA nama Khazohpa hmiakô liata aryhna cha taopa awpa ei ta, nama aryhna noh châ tlôh ta. 

29 Ahyrai châ sala cha noh liata ama palôhrupa rie a pathei leipazy cha, ama chiheihzy hry tawhtapa pathluapata ama y aw. 

30 Ahyrai châ sala cha noh liata, kheihawhpa rai a hriapa maih cha, cha chyhsa cha ama chiheihzy hry tawhtapa ei pahleipadia aw. 

31 Khâpa rai hmah nama hria awpa châ vei: he he nama yna maih liata nama pathlazy taihta chhâzaw ryhpa awpa a châ. 

32 Nama châta pahânoh pahâna châ aw ta, nama palôhrupazy rie namâ pathei awpa a châ; cha thla noh chaki noh zâlâ, cha zâlâ tawhta zâlâ heihpa taih cha, pahânoh ta nama hmâh awpa a châ,” tahpa ta.

33 ABEIPA ta Mawsi chho ta, 

34 Izarel pathlazy chho la, ama hnohta, thla sarina noh hrawhleipangawh noh he ABEIPA châta noh sari chhôh byureih kyhchhi châ ta. 

35 A noh khapa cha pakhypi pathaihpa châ aw ta; rairupa nama hria awpa châ vei. 

36 Noh sari chhôh chata mei ta hmohlâpa ABEIPA lâta hlâ aw eichi ta; a noh charie noh cha nama châta pakhypi pathaihpa châ aw ta, mei ta hmohlâpa ABEIPA lâta nama hlâ awpa a châ; ahmaohpakhyna pathaihpa a châ; rairupa nama hria awpa châ vei.

37 Hezy he a châ, ABEIPA kyhchhi daihti raopa, ABEIPA pahânoh zy, nama hmopiepa zy, nama bietai zydua zy, âmo lôhthai ta hmohlâpa, ABEIPA lâta nama hlâ tyhpazy rei leipa ta; 

38 ABEIPA châta mei ta hmohlâpa zy, raopa hlâna zy, niepa hlâna zy, atheihna zy, dopa hlâna zy, ano eihpa chyuta hlâ awpata pakhypi pathaihpa nama tao awpazy cha.

39 A thla sarina, noh hrawhleipangawh noh ta, nama lyu liata hmo a ypazy nama hria khai nahta ABEIPA kyhchhi cha noh sari a ô aw eichi ta; a noh khana noh cha pahâna noh cha aw ta, a noh charie noh chhao cha pahâna noh a châ hra aw.

40 A noh kha noh chata thokô a ngia ngaitapa thei zy, thiahra kuah zy, tho chhobuh ru ngaitapa chiah zy, chavah liata râhbuh zy a chaba aw eichi ta; ABEIPA nama Khazohpa hmiakô liata noh sari thaphapa ta nama y aw.

41 He kyhchhi he ABEIPA châta kô chareih noh sari nama ô awpa a châ; he he nama pathlazy taihta chhâzaw ryhpa awpa a châ; thla sarina liata nama hnei tyh aw.

42 Byureih liata noh sari y aw eichi ta; Izarel râh liatahpa rai cha byureih liata y khai aw eichi ta, 

43 chatanachata nama pathlazy chata, Izarel pathlazy cha Izi râh tawhta ei chhitha nona khata, byureih liata ei paysa tahpa ama pahno thei aw: Kei he ABEIPA nama Khazohpa cha ei châ, tah teh,” tahpa ta.

44 Chatanachata Mawsi ta ABEIPA kyhchhi daihti raopazy cha Izarel pathlazy hnohta phuah ta. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27

Theihthaina Bo 22

Theihthaina Bo 22

Hlâpa pathaina kyh

1 ABEIPA ta Mawsi chho ta, 

2 Arawna nata a sawchapawpazy hnohta reih la, Izarel pathlazy hmo pathaihpa ei châta ama hlâpa liana zy chata, a panano mawh sy, ei moh pathaihpa ama pachhie lei nawpata: Kei he ABEIPA cha, châ na ta. 

3 Ama hnohta, ‘Nama chhâzy liata, nama pathla zydua ta ABEIPA châta ama hlâpa hmo pathaihpa a vaw hniapa maih cha, kei tawhtapa pathluapa ta a y awpa a châ: Kei he ABEIPA cha ei châ. 

4 Arawna pathla ahyrai aphawhpa tlyma, khâpaleipa a lohpa tlyma chata, a pathaih hlâ lei cha hmo pathaihpazy hry liata a nie awpa châ vei. Ahyrai athihpa papuapaleipa tlyma, chi a puapa tlyma a hriapa maihzy, 

5 ahyrai âmo a papuapalei theipa alyhthaipa rai tlyma, pathaih leina a kiah theipa a hneipa chyhsa tlyma, a hriapa maihzy, 

6 cha hawhpa a hriatuhpa cha zâlâ taihta pathaih leipa châ aw ta, ti liata a ngai a si leipa khiahtala hmo pathaihpazy hry liatahpa cha a nie awpa châ vei. 

7 No a tla nahta a pathaih ha aw; cha khai tawhna chata hmo pathaihpazy hry liatahpa cha a nie thei aw, a nie awpa a châpa vâta. 

8 A papuapalei awpata ano kho ta a thipa tlyma, sa taipa tlyma, a nie awpa châ vei: Kei he ABEIPA cha ei châ. 

9 Chavâta ei bie piepa cha a pyh awpa a châ, chata leipatala ama pachhiepahru khiahtala a moleipa maoh cha phaoh aw ei ta, ama thi aw: Kei he ABEIPA âmo a pathaituhpa châ tlôh na ta.

10 Râh hropa chyhsa ta hmo pathaihpa cha ama nie awpa châ vei. Theihthaipa hnohta a ypa tlyma, hlaopa tlyma chata hmo pathaihpa cha ama nie awpa châ vei; 

11 anodeikuacha theihthaipa ta ahy tlyma ano sôh ta a chalei khiahtala, cha chyhsa chata a nie thei aw; chatawhcha a o liata a pihpazy chata a nie awpa cha ama nie hra aw. 

12 Theihthaipa sawchanônô ta râh hropa chyhsa a hnei khiahtala, hiepa hlâna hmo pathaihpazy hry liatahpa cha a nie awpa châ vei. 

13 Anodeikuacha theihthaipa sawchanônô cha saw hnei leipata, nôhmeipa ta tlyma, mapa ta tlyma ypa ta, a paw o lâ a kua heih khiahtala a laihsa no hawhna khata a paw nie awpa cha a nie heih hra aw; châhrasala râh hropa chyhsa chata ama nie awpa châ vei. 

14 Chyhsa ta pahno leipa ta hmo pathaihpa cha a nie khiahtala, a su pangawh ta pachhaih ta, su kha cha baichha aw ta, hmo pathaihpa cha theihthaipa a pie awpa a châ. 

15 Ama hmo pathaihpazy niepa chata thailei châna a tlôkheipatuhpa hmo paraona maoh cha a paphaosa awpata,

16 Izarel pathlazy hmo pathaihpa ABEIPA lâta ama hlâpazy cha ama pachhiepahru awpa châ leipa ta: Kei he ABEIPA âmo a pathaituhpa cha, châ tlôh na ta, tah teh,” tahpa ta.

17 ABEIPA ta Mawsi chho ta, 

18 Arawna nata a sawchapawpazy nata Izarel pathla zydua chho la, ama hnohta, Izarel chhôhkha hry liatahpa tlyma, Izarelzy hry liata a ypa râh hropa chyhsa tlyma, ahyrai ama hmohlâpa raopa hlâna ABEIPA lâta ama hlâpa ama bietaipa tlyma, ama lôhthai ta hmohlâpa tlyma, a hlâpa maih chata, 

19 a chhy tlâh nama châ thei nawpata viahchao tlyma, mietahkupa tlyma, mie tlyma, a chapawhpa seina a hnei leipa nama hlâ awpa a châ. 

20 Seina a hneipa rai nama hlâ awpa châ vei, nama châta a pyhpa tlâh châ tlôh leipa aw ta. 

21 Ahyrai bietai paki nawpa tlyma, âmo lôhthai ta hmohlâpata tlyma, dyhna hlâna atheihna a sahroh zaw hry liatahpa tlyma, a mietahkupa zaw hry liatahpa tlyma, ABEIPA lâta a hlâpa maih chata a pyh tlâh a châ thei nawpata, seina a hnei leipa a hlâ awpa châ ta; seina a hneina rai a y awpa châ vei.

22 A mochaopa zy, a ru tliepa zy, a sypa zy, hmah a phaohpa zy, hmahchhiepa a hneipa zy, aphawhpa zy cha ABEIPA lâta nama hlâ awpa châ leipa ta, mei ta hmohlâpata ABEIPA lâta nama hlâ awpa châ vei. 

23 Âmo lôhthai ta hmohlâpa liana chata viahchao tôhpa tlyma, mietahkupa taw tlyma, a ku phei a sei tupa tlyma, a chyu tupa tlyma rai hlâ thei aw eichi ta; bietaina châta a pyhpa awpa châ vei. 

24 A tihmô thi padôpa tlyma, chhuchheipa tlyma, pakeipa tlyma, lyupa tlyma cha ABEIPA lâta nama hlâ awpa châ leipa ta; nama râh liana heta, cha hawhpa cha atheihna ta nama hmâh awpa châ hra vei; 

25 râh hropa chyhsa tawhta lapa ta, chazy hry liatahpa rai cha nama Khazohpa niepa tovyuh ta nama hlâ awpa châ vei, chazy liata raona nata reipasipasuana a ypa vâna chata a pyhpa theipa châ aw vei, tah teh,” tahpa ta.

26 Chatawhcha ABEIPA ta Mawsi chho ta, 

27 Viahchao tôhpa tlyma, mietahkupa tlyma, mie tlyma a vaw pataw nahta a panô hnohta noh sari a y awpa a châ, noh charie noh tawhta cha hnôh lâna chata ABEIPA châta mei ta hmohlâpa ta a pyh theipa a châ aw. 

28 Viahchao panô tlyma, mietahkupa panô tlyma, a taw chhaota noh khata nama thie awpa châ vei. 

29 Alyna bie reina atheihna a theihpa ta ABEIPA lâta namâ theih tita, a chhy tlâh nama châ thei nawpa ta namâ theih awpa a châ. 

30 Cha noh liana chata nie khai awpa châ ta, a mylâ taihta khâpahmah nama soh awpa châ vei: Kei he ABEIPA cha ei châ.

31 Chavâta ei biepiepazy he a pyhpa ta nama zyh awpa a châ: Kei he ABEIPA cha ei châ. 

32 Ei moh pathaihpa he nama pachhie awpa châ leipa ta, Izarel pathlazy hry liata palyupalihpa ta ei y awpa a châ; Kei he nâmo cha palyupalihtuhpa nama Khazohpa châ awpa ta 

33 Izi râh tawhtapa châ chhithatuhpa cha ei châ: Kei he ABEIPA cha ei châ,” tahpa ta. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27

Theihthaina Bo 21

Theihthaina Bo 21

Theihthaipazy pathaina kyh

1 ABEIPA ta Mawsi hnohta, “Arawna sawchapawpa theihthaipazy cha chho la, ama hnohta ama chiheihzy hryta athihpa vâta ahyhmah amâ papuapalei awpa châ vei, 

2 ama heinawh a hniapa, ama nô zy, ama paw zy, ama sawchapawpa zy, ama sawchanônô zy, ama unawhpa zy, 

3 ama sietanô zy (ama ylâhpa laihsapa, vahpa a hnei leipazy vâna deikua chata ama papuapalei thei aw). 

4 Ama chiheihzy hryta pawhrâ chaipa ama châpa vâta a papuapaleipa ta ama pachhiepahru awpa châ vei. 

5 Ama luh pôlôpata amâ ngyu awpa châ leipa ta, ama kâhmi kâ lâ ama tai awpa châ hra leipa ta, ama pôhpa ama â awpa châ hra vei. 

6 Ama Khazohpa chata chyhsa pathaihpa ama châ awpa châ ta, ama Khazohpa moh ama pachhie awpa châ vei; ABEIPA chata mei ta hmohlâpazy ama Khazohpa châta niepa tovyuh zy ama hlâ tyhpa châ ta; chavâta ama pathaih awpa a châ. 

7 Chanô sihrypa tlyma, moh chhiepa tlyma, â vahpa ma chiehpa tlyma ama hnei awpa châ vei; ama Khazohpa châta chyhsa pathaihpa châ tlôh ei ta. 

8 Chavâta na pathaisa awpa a châ, na Khazohpa châta niepa tovyuh cha hlâ tyh tlôh ei ta; na châta chyhsa pathaihpa ama châ awpa a châ: Kei ABEIPA nâmo cha pathaituhpa cha pathaih tlôh na ta. 

9 Theihthaipa ahyrai a sawchanô sihrypata a pachhiepahru khiahtala, a paw a pachhiepahrupa cha ta; mei ta rao awpa a châ.

10 A unawhpazy hryta theihthaipa bei chaipa, a luh sathaw thupata thu hawpa chysia tao awpata panano hawpa chata a sâ â pathlia awpa châ leipa ta, a pohzy a hrie awpa châ leipa ta; 

11 athihpa ri yna liata a ngia awpa châ leipa ta, a nô tlyma, a paw tlyma vâta a pachhiepahru awpa châ hra vei; 

12 su pathaihpa tawhtapa cha a pua awpa châ leipa ta, a Khazohpa su pathaihpa a pachhiepahru awpa châ hra vei; a Khazohpa sathaw thupata cha a chô liata y tlôh ta: Kei he ABEIPA cha ei châ. 

13 Lahpinô châta cha laihsa kôpa a hnei awpa a châ. 

14 Nôhmei tlyma, ma chiehpa tlyma, chanô moh chhiepa tlyma, sihrypa tlyma zy cha, a hnei awpa châ leipata; ano chiheih laihsa kôpa lahpinô ta a hnei awpa a châ, 

15 a chiheihzy hry liata a pathlazy cha a pachhiepahru lei nawpata: Kei he ABEIPA a pathaituhpa cha châ tlôh na ta, tah teh,” tah ta.

16 Chatawhcha ABEIPA ta Mawsi chho ta, 

17 Arawna hnohta, ama chhâzy liata, na pathlazy hry liata a khaihly leipa maih chata, a Khazohpa viahchhâ hlâ awpa ta a vaw hnia kha se. 

18 Ahyrai a khaihly leipa maih chata amâ vaw hnia awpa châ vei; mochaopa zy, pheisypa zy, hnapasu a paihpa zy, ku phei a sei tuhpa maih zy, 

19 chyhsa phei tliepa zy, ku tliepa zy,

20 ku â kohpa zy, chyhsa a phuhlupa a kypa zy, tihmô a keipa zy cha; 

21 theihthaipa Arawna pathla a khaihly leipa maih chata ABEIPA châta mei ta hmohlâpa hlâ awpa ta amâ vaw hnia awpa châ vei; a khaihly leipa châ ei ta, ama Khazohpa viahchha hlâ awpa ta amâ vaw hnia chacheita awpa châ vei. 

22 Ama Khazohpa viahchhâ a pathai chaipa nata a pathaipa chhao cha ama nie rairieh thei aw; 

23 anodeikuacha a khaihly leipa ama châpa vâta pohraipa chhôh liata tlyma, maisâh kiapâh liata tlyma, a vy thei aw veih ei, ei su pathaihpa zy ama pachhiepahru lei nawpabta: Kei he ABEIPA âmo a pathaituhpa cha, châ tlôh na ta, tah teh,” tahpa ta. 

24 Cha hawhna chata Mawsi ta, Arawna nata a sawchapawpazy nata Izarel pathla zydua hnohta reih ta. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27

Theihthaina Bo 20

Theihthaina Bo 20

Reingiah leipa hriena kyh

1 ABEIPA ta Mawsi chho ta, 

2 Izarel pathlazy hnohta, ahyrai Izarel pathlazy hry liatahpa tlyma, Izarel liata a ypa râh hropa chyhsa tlyma, ama saw Môleka lâta a piepa maih cha, thie thlyu awpa châ ta; he râh liata chyhsazy heta alô ta ama vawh awpa a châ. 

3 Kei chhaota ei su pathaihpa papuapalei awpa nata ei moh pathaihpa papuapalei nawpata a saw Môleka lâta a piepa vâta, cha chyhsa chô liana chata a heihnao aw na ta, a chiheihzy hry tawhta ei pahlei padia aw. 

4 Chatawhcha he râh liata chyhsazy heta a saw Môleka lâta a piepa pahnolei pachâpata ama thie vei khiahtala,

5 ano nata a chhôhkhazy chô liana chata a heihnao aw na ta, Môleka liata aphei awpa ta nâ pheisaituhpazy chhaota ama chiheihzy hry tawhtapa ei pahleipadia aw. 

6 Amo liata aphei awpata lyurâhripa pachao thaipa a peihpazy nata dyuthaipazy a pangaituhpa chô liana chata a heihnao aw na ta, a chiheihzy hry tawhtapa ei pahleipadia aw.

7 Chavâta a pathai ula, pathaihpa ta y teh u: Kei he ABEIPA nama Khazohpa cha châ tlôh na ta. 

8 Ei biepiepazy cha a pyhpa ta nama zyh awpa a châ: Kei he ABEIPA châ pathaituhpa ei ei châ.

9 A nô tlyma, a paw tlyma, chhie a sapa maih cha thie thlyu awpa a châ, a nô tlyma, a paw tlyma chhie a sa papa cha ta, a chô liata a thisaih cha a y awpa a châ.

10 Chyhsa lahpinô liata apheipa, a vaih lahpinô liata apheipa cha, apheipa nata apheinô cha thie thlyu awpa a châ. 

11 Pawzy lahpinô a ziakheipa cha, a paw no a pazasapa châ ta, thie rairieh thlyu awpa châ ei ta; ama thisaih ama chô liata a y awpa a châ. 

12 Chyhsa ta a myuhnô â ziakhei khiahtala, thie rairieh thlyu awpa ama châ aw; moleina chôtluachona a taopa châ ei ta, ama thisaih ama chô liata a y awpa a châ. 

13 Chyhsa ta chanô a ziakheipa hawhta chapaw a ziakheipa khiahtala, hmo pasichhih ngaitapa a tao rairiehpa châ ei ta; thie thlyu awpa ama châ, ama thisaih cha ama chô liata a y awpa a châ. 

14 Chyhsa ta chanô nata a sawchanô lahpinô ta a hnei khiahtala, molei ngaitana châ ta; nama hry liata moleina a y lei nawpata ano nata âmo pano chhao mei ta rao sao awpa a châ. 

15 Chyhsa ta sahroh â ziakhei khiahtala thie thlyu awpa châ ta; sahroh chhao cha nama thie awpa a châ. 

16 Chanô ta sahroh â pahneisa khiahtala, chanô cha na thie awpa a châ, sahroh chhao cha thie thlyu awpa châ ei ta; ama thisaih cha ama chô liata a y awpa a châ.

17 Chyhsa ta a sietanô tlyma, a paw sawchanônô tlyma, a nô sawchanônô tlyma hneipa ta, a thluahruana hmôpata, ano chhaota a thluahruana a hmô khiahtala nozachhih ngaitapa châ ta, ama chiheihzy, pathla sahlao mohmô liata pahleipadia awpa ama châ; a sietanô no apazasapa cha ta, a hmo paraona maoh a phaoh aw. 

18 Chyhsa ta chanô a thaitly vei nota a ziakheipa ta a hnei khiahtala, a thi lona a hlaipa châ ta, ano chhao a thi lona ahlaipa châ ta; chatanachata ama chiheihzy hry tawhtapa pahleipadia rairieh awpa ama châ. 

19 Na nô narônô tlyma, na paw sietanô tlyma, na hnei awpa châ vei, a heinawh a hniapa nozapata taopa châ ta; ama hmo paraona maoh ama phaoh aw. 

20 Chyhsa ta a paw unawhpa lahpinô â ziakhei khiahtala, a paw unawhpa no pazasapa châ ta, ama moleina maophaoh aw ei ta; saw leipa ta ama thi aw. 

21 Chyhsa ta a unawhpa lahpinô a hnei khiahtala, hmo pathaih leipa a châ; unawhpa no a pazasapa châ ta, saw leipa ta ama thi aw.

22 Chavâta ei bie piepa zydua, ei bie pachiapa zydua a pyh aw eichi ta, nama zyh awpa a châ; chatanachata pahrâ awpa ta ei cha chhithana râh chata cha pali aw veih ei. 

23 Nama hmialâta ei to hawpa pho ryhpazy cha namâ chhi awpa châ vei; he hmo zydua he tao tyh ei ta, cha vâna chata ei pasi ei. 

24 Anodeikuacha nâmo hnohna chata, ‘Ama râh, sâhpiti nata kheihti lona râh cha, pahrâ aw eichi ta, nama pahrâ awpata ei cha pie aw ei’. Kei he ABEIPA nama Khazohpa, pho hropazy tawhtapa cha pananotuhpa ei ei châ.

25 Chavâta sa pathaihpa nata pathaih leipa, pavaw pathaihpa nata pathaih leipa panano aw eichi ta; sa tlyma, pavaw tlyma, alei liata alyhpa chi rai tlyma nama châta pathaih leipata ei pananopazy chata nama hrona pasichhihpa ta nama tao awpa châ vei. 

26 Ei châta chyhsa pathaihpa nama châ awpa a châ: Kei ABEIPA cha pathaih tlôh na ta, kei eih nama châ nawpata, pho hropazy tawhtapa ei cha panano haw ei.

27 Chapaw rai, chanô rai lyurâhripa pachao thaipa tlyma, apeihpa tlyma, dyuthaipa tlyma cha thie thlyu awpa a châ, alô ta ama vawh awpa a châ, ama thisaih cha ama chô liata a y awpa a châ, tah heih teh,” tahpa ta. 

Theihthaina (Leviticus)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27