Arawna ta atheihnazy hlâ ta
1 A noh charie noh chata Mawsi ta, Arawna nata a sawchapawpazy nata Izarel machâ sahlaozy cha aw ta;
2 Arawna hnohta, “Molei atheih nawpata viahchao taw chapawpa nata raopa hlâna châta mietahkupa tôhpa seina a hnei leipa rairieh a chhi la, ABEIPA hmiakô liata hlâ teh.
3 Izarel pathlazy hnohta, ‘Molei atheih nawpata mie tôhpa, raopa hlâna châta viahchao taw nata mietahkupa taw kô khapa rairieh, seina a hnei leipa
4 nata viahchao tôhpa nata mietahkupa tôhpa ABEIPA hmiakô liata adyhna hlâna ta, hlâ awpata a vaw chhi ula, chatawhcha sathaw ta nypa, niepa hlâna chhaota, atanoh he nama hnohta ABEIPA â vaw luah aw,’ tahpa ta chho teh,” tah ta.
5 Mawsi ta bie a piepa hawhna chata ahmaohpakhyna poh-o tlyhmia liata a vaw chhi ei ta; chyhsa zydua ta a kei hnia ei ta, ABEIPA hmiakô liata a duah ei ta.
6 Mawsi ta, “He he nama tao awpata ABEIPA ta bie a cha piepa ei kha a châ, ABEIPA rôhnahna cha nama hry liata â vaw luah aw,” tah ta.
7 Mawsi ta Arawna hnohta, “Maisâh cha a vaw hnia la, na molei hlâna zy, na raopa hlâna zy hlâ la, nâma châta nata zawpizy châta aryhna tao teh, chatawhcha zawpizy hmohlâpa cha hlâ la, ama châta aryhna tao teh, ABEIPA biepiepa hawhta,” tah ta.
8 Arawna chata maisâh cha a kei hnia ta, ano chata moleina hlâna viahchao taw cha thie ta.
9 Arawna sawchapawpazy chata thisaih cha a hnohta hlâ ei ta, thisaih liana chata a kudy ny ta, maisâh kizy liana chata hnia ta, thisaih cha maisâh thaby liata patlai ta;
10 moleina hlâna thaw zy, a lôpo zy, a pathi a pahlypa thaw zy deikua cha maisâh chô liata rao ta, ABEIPA ta Mawsi bie a piepa hawhna khata.
11 A sapa nata a vo cha ariena su khôtho lâta mei ta rao ta.
12 Chatawhcha raopa hlâna cha thie ta; Arawna sawchapawpazy cha a thisaih pie ei ta, ano ta maisâh cha hie ta.
13 Raopa hlâna sa cha a tlaw a tlaw ta a luh chhao pie ei ta; ano chata maisâh liata rao ta.
14 A chhôrih zy, a phei zy pasi ta, maisâh liata a raopa hlâna chô liana chata rao ta.
15 Chatawhcha zawpizy hmohlâpa cha hlâ ta, zawpizy molei hlâna mie cha a chhi ta, thie ta, a hmialâtahpa hawhna khata molei hlâna châta hlâ ta.
16 Chatawhcha raopa hlâna cha hlâ ta, a yzie lymâ hawhta a hlâ.
17 Chatawhcha niepa hlâna cha hlâ ta, cha liatahpa cha pazah kha la ta, my ta raopa hlâna leipa chhao cha maisâh liata rao hra ta.
18 Zawpizy chata adyhna hlâna atheihna viahchao tôhpa nata mietahkupa tôhpa cha thie hra ta, Arawna sawchapawpazy chata a thisaih cha pie ei ta, maisâh cha hie ta;
19 viahchao tôhpa thaw nata mietahkupa tôhpa thaw zy, a lahmei thawh ngaitapa zy, a rihri zy, a lôpo zy, a pathi a pahlypa thaw zy pie hra ei ta;
20 a thaw cha a palôh chô liata soh ei ta, ano chata a thaw cha maisâh liata rao ta,
21 a palôh nata a phei chachâh lâ cha Arawna ta ABEIPA hmiakô liata hiepa hlâna ta hie ta, Mawsi biepiepa hawhna khata.
22 Chatawhcha Arawna chata zawpi lâta a kuzy pazawh ta, byhnâ aw ta; moleina hlâna nata raopa hlâna nata adyhna hlâna a hlâ khai nata za chô ta.
23 Mawsi nata Arawna cha ahmaohpakhyna poh-o liata a kei ngia ei ta; vaw pua hei ei ta, zawpizy cha byhnâ aw pa ei ta, ABEIPA rôhnahna cha chyhsa zydua chô liata a vaw luah ta.
24 ABEIPA hmiakô tawhna chata mei vaw pua ta, raopa hlâna nata thawzy cha maisâh liana chata kâ khai haw ta; cha cha zawpi zydua ta ama hmô nahta thata awh ei ta, â khu lâta pao ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 | Bo 8 | Bo 9 | Bo 10 |
|---|---|---|---|---|---|---|---|---|---|
| Bo 11 | Bo 12 | Bo 13 | Bo 14 | Bo 15 | Bo 16 | Bo 17 | Bo 18 | Bo 19 | Bo 20 |
| Bo 21 | Bo 22 | Bo 23 | Bo 24 | Bo 25 | Bo 26 | Bo 27 |