Arawna nata a sawchapawpazy pananona (Pu 29:1-37)
1 ABEIPA ta Mawsi chho ta,
2 Arawna cha a sawchapawpazy chhaota a chhi la, chysiazy, sathaw thupa zy, molei hlâna viahchao tôhpa zy, mietahkupa tôhpa pô nozy, viahchhâ thinô pahlao leipa byh kha chhaota, chei hra la;
3 chyhsa zydua cha ahmaohpakhyna poh-o chhikao chheipâh liata paysa teh,” tahpa ta.
4 Mawsi chata ABEIPA ta bie a piepa haweta tao ta; chyhsa zydua cha ahmaohpakhyna poh-o chhikao chheipâh liana chata y pakhy ei ta.
5 Mawsi ta ahmaohpakhypa sahlao hnohna chata, “He he ABEIPA ta tao awpata bie a piepa cha a châ,” tah ta.
6 Mawsi ta Arawna nata a sawchapawpazy cha a vaw chhi ta, ti ta ama ngai pasi ta.
7 Viahpakao cha pakysa ta, chaisaihna chata saih ta, viahpakao pasihpa paky ta, theihthaipa viahpakao cha paky ta, theihthaipa viahpakao chaisaihna zôthai ngaitapata sapa cha a saih ta, cha chata a chai saih ta.
8 Chachôhna a baipa cha bai ta, chachôhna baipa liana chata Urim nata Thumim soh ta.
9 Lakhu cha pakhusa ta, chatawhcha lakhu kâ hmialâna chata ngô phiapa pananopa pahnosana pathaihpa cha bai ta, ABEIPA ta Mawsi bie a piepa hawhna khata.
10 Chatawhcha Mawsi ta sathaw thupa cha la ta, achhyna byureih nata a chhôh liata hmo a ypa zydua thu ta, pathaisa ta.
11 Cha chata ei sari maisâh cha hie ta, maisâh nata a hmobao zydua zy, rahô nata a patyunazy cha pathaisa awpata thu ta.
12 A pathaisa nawpata sathaw a thupa cha Arawna luh liata bao ta, thu ta.
13 Mawsi ta Arawna sawchapawpazy cha a vaw chhi ta, viahpakao pakysa ta, chaisaihna ta saih ta, lakhu pakhusa ta, ABEIPA ta Mawsi bie a piepa hawhna khata.
14 Chatawhcha moleina hlâna viahchao tôhpa cha a vaw chhi ta; Arawna nata a sawchapawpazy chata moleina hlâna viahchao tôhpa luh chô liana chata ama ku pahnieh ei ta.
15 Thie ta, Mawsi ta thisaih cha la ta, cha cha aryhna maisâh chata tao nawpata a kudy ta maisâh kiapâh liana chata patlai ta, pathaisa ta.
16 A rihri zydua zy, a pathi a pahlypa thaw zy, a lôpo miano nata a thaw zy la ta, maisâh liata Mawsi ta rao ta.
17 Viahchao tôhpa deikua cha a vo zy, a sapa zy, a ie zy chhaota ariena su khôtho liata rao ta, ABEIPA ta Mawsi bie a piepa hawhna khata.
18 Chatawhcha raopa hlâna mietahkupa tôhpa cha hlâ ta; Arawna nata a sawchapawpazy chata mietahkupa tôhpa luh chô liana chata ama ku pahnieh ei ta.
19 Mawsi chata thie ta, maisâh cha thisaih ta hie ta.
20 Mietahkupa tôhpa cha pachhaih ta, Mawsi ta a luh nata a sapa zy nata a thaw zy rao ta.
21 A chhôrih nata a pheizy cha pasi ta, mietahkupa tôhpa cha maisâh liata a zydua ta rao khai ta, cha cha rohpahâhpa châta raopa hlâna châ ta, ABEIPA châta mei ta hlâna a châ, ABEIPA ta Mawsi bie a piepa hawhna khata.
22 Chatawhcha mietahkupa tôhpa hropa pananona mietahkupa tôhpa hlâ heih ta; Arawna nata a sawchapawpazy chata mietahkupa tôhpa luh chô liana chata ama ku pahnieh ei ta.
23 Mawsi chata thie ta, a thisaih cha la ta, Arawna nahkao chachâh lâ pawhmao liata zy, a ku chachâh lâ kupi liata zy, a phei chachâh lâ pheipi liata zy hnia ta.
24 Mawsi chata Arawna sawchapawpazy cha a chhi ta, ama nahkao chachâh lâ pawhmao liata zy, ama ku chachâh lâ kupi liata zy, ama phei chachâh lâ pheipi liata zy hnia ta; maisâh cha thisaih chata hie ta.
25 Chatawhcha a thaw zy, a lahhmei thawh ngaitapa zy, a rihri zydua zy, a pathi a pahlypa thaw zy, a lôpo miano nata a thaw zy nata a phei chachâh lâ la ta;
26 ABEIPA hmiakô liata viahchhâ thinô a pahlao leipa hrâbyh tawhtapa cha viahchhâ miakha nata viahchhâ a pahpa miakha la ta, a thaw chô liata nata a phei chachâh lâ chô liana chata soh ta;
27 a zydua ta Arawna ku pazah chô liata nata a sawchapawpazy ku pazah chô liata soh ta, ABEIPA hmiakô liata hipa hlâna ta hi ta.
28 Mawsi ta ama ku tawhtapa cha la ta, raopa hlâna chô liata maisâh liata rao ta, cha cha rohpahâhpa châta pananona a châ, ABEIPA châta mei ta hlâpa a châ.
29 Chatawhcha Mawsi ta a palôh cha la ta, ABEIPA hmiakô liata hipa hlâna ta hi ta, pananona mietahkupa tôhpa liata Mawsi tovyuh a châ, ABEIPA ta Mawsi bie a piepa hawhna khata.
30 Mawsi chata sathaw a thupa tawhtapa nata maisâh liata thisaih liatahpa la ta, cha chata Arawna nata a chysia hi ta, a sawchapawpazy nata a sawchapawpazy chysiazy chhao, Arawna nata a chysia cha pathaisa ta, a sawchapawpazy nata a sawchapawpazy chysiazy chhao.
31 Mawsi ta Arawna nata a sawchapawpazy hnohta, “Ahmaohpakhyna poh-o chhikao kiapâh liata sa cha chhoh ula, ‘Arawna nata a sawchapawpazy ta ama nie awpa a châ,’ tahpa ta bie ei piepa hawhna khata, cha liana chata pananona hrâbyh liata viahchhâ chhaota nie teh u;
32 sa nata viahchhâ nie bâhpazy cha mei ta nama rao awpa a châ.
33 Nama pananona noh â ki hlâ lei cha ahmaohpakhyna poh-o chhikao cha puasai leipata noh sari nama y awpa a cha, noh sari cha panano tlôh aw ei ta.
34 Atahmâta taopa hawhna heta aryhna cha taopa awpa ta ABEIPA ta tao awpa ta bie a pie.
35 Ahmaohpakhyna poh-o chhikao kiapâh liana chata noh sari chhôh nata zâ y thlâh ha aw eichi ta, nama thi lei nawpata, ABEIPA biepiepa cha nama zyh awpa a châ; cha hawhta bie piepa cha ei châ,” tah ta.
36 ABEIPA ta Mawsi hmâpata bie a piepa zydua cha Arawna nata a sawchapawpazy chata tao ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 | Bo 8 | Bo 9 | Bo 10 |
|---|---|---|---|---|---|---|---|---|---|
| Bo 11 | Bo 12 | Bo 13 | Bo 14 | Bo 15 | Bo 16 | Bo 17 | Bo 18 | Bo 19 | Bo 20 |
| Bo 21 | Bo 22 | Bo 23 | Bo 24 | Bo 25 | Bo 26 | Bo 27 |