Niepa hlânazy
1“Ahyrai ta hmohlâpa, niepa hlâpa, ABEIPA lâta a hlâ ti ta, a hmohlâpa cha viadie di ngaitapa a châ awpa a châ; sathaw bao aw ta, a chô liata deiryh soh hra aw ta.
2 Arawna sawchapawpa theihthaipazy lâta vawkhei aw ta. Chatawhcha ano ta pazah kha ta cha liata viadie di ngaitapa cha, a sathaw chhaota, a deiryh zydua chhao chata la aw ta; theihthaipa chata maisâh chô liata myleina ABEIPA châta rohpahâh ngaitapa, mei ta hlâpa chata a rao aw.
3 Chatawhcha niepa hlâna la bâhpazy cha Arawna nata a sawchapawpazy châta a châ aw; cha cha ABEIPA chata mei ta hlâpazy ta hmo pathaih ngaitapa a châ.
4 Niepa hlâpa lômathu liata chhopa hmohlâpa hlâ tita viadie di ngaitapa sathaw ta nypa thinô pahlao leipa viahchhâ tlyma, sathaw ta hniapa thinô pahlao leipa viahchhâ pâhpa tlyma, a châ awpa a châ.
5 Chatawhcha na hmohlâpa cha beih ta chhopa niepa hlâpa a châ khiahtala, thinô pahlao leipa sathaw ta nypa viahdie di ngaitapa a châ awpa a châ;
6 patlaw aw chi ta, sathaw ta na bao awpa a châ, cha cha niepa hlâpa a châ.
7 Na hmohlâpa cha chateina beih ta chateipa niepa hlâpa a châ khiahtala, viahdie di ngaitapa nata sathaw ta taopa a châ awpa a châ.
8 Cha hmozy ta taopa niepa hlâpa cha ABEIPA lâta vaw cheih aw chi ta; cha cha theihthaipa hnohta hlâpa châ aw ta, ano ta maisâh lâta a vykhei awpa a châ.
9 Chatawhcha theihthaipa ta niepa hlâpa tawhta myleina cha la aw ta, maisâh liana chata a rao aw, cha cha ABEIPA châta rohpahâh ngaitapa mei ta hmohlâpa a châ.
10 Chatawhcha niepa hlâpa la bâhpazy cha, Arawna nata a sawchapawpazy châta mei ta hmohlâpazy ta hmo pathaih chaipa a châ.
11 “Niepa hlâpa rai ABEIPA hnohta na hlâ awpa cha thinô pahlaopa ta tao awpa châ vei; ABEIPA chata mei ta hlâpa liana chata thinô tlyma, kheihti tlyma rai nama tao awpa châ vei.
12 Thei hmiatuapa hmohlâpa hawhta ABEIPA lâta hlâ aw chi ta, châhrasala rohpahâhpa châta maisâh liana chata soh awpa châ vei.
13 Na niepa hlâpa zydua cha alôh mia khai aw chi ta, na niepa hlâpa liana chata na Khazohpa biehrai alôh cha na my awpa châ vei, na hmohlâpa zydua liana chata alôh na hlâ hra awpa a châ.
14 “Thei hmiatuapa niepa hlâpa ABEIPA lâta na hlâ khiahtala, na sâh a daih tua chaipa liatahpa niepa hlâpa châta a su hropa mei ta na pahipa hlâ aw chi ta, sâh cha a su tawhta tly chiepa tlai cha.
15 Sathaw bao aw chi ta, a chô liata deiryh na soh awpa a châ; cha cha niepa hlâpa a châ.
16 Chatawhcha theihthaipa ta cha liata myleina sâh tly chiehpa bâhta nata sathaw bâhta nata deiryh zydua chhaota a rao awpa a châ; cha cha ABEIPA châta mei ta hlâpa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 | Bo 8 | Bo 9 | Bo 10 |
|---|---|---|---|---|---|---|---|---|---|
| Bo 11 | Bo 12 | Bo 13 | Bo 14 | Bo 15 | Bo 16 | Bo 17 | Bo 18 | Bo 19 | Bo 20 |
| Bo 21 | Bo 22 | Bo 23 | Bo 24 | Bo 25 | Bo 26 | Bo 27 |