1 He he paraopa hlâna ryhpa yzie awpa châ ta. Hmo pathaih ngaitapa a châ;
2 raopa hlâna ama thie tyhna liata paraopa chhao cha ama thie awpa a châ, a thisaih chata maisâh cha a hie awpa a châ.
3 chatawhcha a thaw zydua cha a hlâ awpa a châ, a lahmei thawh ngaitapa zy, a chhôrih thaw zy,
4 a lôpo miano nata a pahlypa thaw, a pato liatahpa nata a pathi a pahlypa lôpozy chhaota la aw ta;
5 theihthaipa chata ABEIPA châta mei ta hmohlâpata maisâh chô liata a rao awpa a châ; cha cha paraona hlâna a châ.
6 Chapaw theihthaipa zydua ta cha cha nie aw ei ta; su pathaihpa liata nie awpa a châ; cha cha hmo pathaih ngaitapa a châ.
7 Hmo paraopa hlâna cha moleina hlâna hawhta châ ta, ryhpa miakha a châ; cha liata aryhna a taotuhpa theihthaipa chata cha cha a hnei awpa a châ.
8 Theihthaipa chyhsa ahyrai raopa hlâna a hlâtuhpa theihthaipa tlai chata raopa hlâna ta a hlâpa vo cha a bohlo awpa a châ.
9 Chatawhcha lômathu liata chhopa niepa hlâna maih chateina beih ta chateipa nata beih ta chhopa zydua cha a hlâtuhpa theihthaipa châta a châ aw.
10 Niepa hlâpa zydua cha sathaw ta nypa chhao, a hipa chhao a hropa hawh hrata Arawna sawchapawpa zydua ta amâ rai awpa a châ.
11 “Chatawhcha he he chyhsa ta ABEIPA lâta a hlâ awpa adyhna hlâna atheihna ryhpa yzie awpa a châ.
12 Alyna bierei nawpata a hlâ khiahtala alyna bie reina atheihna liana chata sathaw ta nypa thinô pahlao leipa viahchhâ nata sathaw hniapa thinô pahlao leipa viahchhâ a pahpazy nata sathaw ta nypa viahchhâ, viadie di ngaitapa a tly khaipa a hlâpa awpa a châ.
13 Alyna bierei nawpata adyhna hlâna atheihna liana chata viahchhâ thinô pahlaopa a hlâ awpa a châ.
14 Cha tawhtapa cha hmohlâpa to liatahpa ABEIPA chata chaluahpa hlâna châta miakha saita hlâ aw ta; adyhna hlâna thisaih ta a hietuhpa theihthaipa châta a châ aw.
15 Chatawhcha alyna bierei nawpata adyhna hlâna atheihna sa cha, hmohlâpa a hlâ no tlaita nie khai awpa châ ta; a mylâ taihta khâpahmah a soh awpa châ vei.
16 Anodeikuacha a hmohlâpa atheihna cha bietaipa tlyma, amo lôhthai ta hlâpa tlyma a châ khiahtala atheihna a hlâ no tlai chata a nie awpa châ ta, nie bâhpa cha a mylâ ta nie awpa a châ;
17 anodeikuacha atheihna sa a noh thôh noh taihta a ypa cha mei ta rao awpa a châ.
18 Adyhna hlâna atheihna sa cha noh thôh noh taihta ama nie khiahtala a pyhpa châ leipa aw ta, a hlâtuhpa chhao cha hlâpata pachâpa châ hra aw vei, hmo pasichhihpa châ aw ta. Ahyrai ta a niepa maih ta ama hmo paraona maoh cha ama phaoh aw.
19 “Sa pathaih leipa ta a hriapa cha nie awpa châ vei; mei ta rao awpa a châ. A pathaihpa maih chata sa cha nie aw ei ta,
20 adyhna hlâna atheihna sa ABEIPA chata cha chyhsa pathaih leina chôta a nietuhpa deikua cha, a chiheizy hry tawhta pathluapata a y awpa a châ.
21 Ahyrai ta hmo pathaih leipa rai, chyhsa pathaih leipa tlyma, sahroh pathaih leipa tlyma, hmo pasichhipa pathaih leipa rai hriapata, adyhna hlâpa atheihna sa ABEIPA châta a nie khiahtala, cha chyhsa cha a chiheizy hry tawhta pathluapata a y awpa a châ, tahpata, Arawna nata a sawchapawpazy cha chho teh,” tahpa ta.
22 ABEIPA chata Mawsi chho ta,
23 “Viahchao tlyma, mietahkupa tlyma, mie tlyma, thaw nama nie awpa châ vei.
24 Ano kho ta a thipa thaw nata sa taipa thaw cha, hmo hropa khâpa ta raita hmâ theipa châ aw ta. Anodeikuacha nama nie chacheita awpa châ vei.
25 Ahyrai ABEIPA châta mei ta hmohlâpa ama hlâpa sathaw a niepa cha, cha chyhsa a nietuhpa cha a chiheizy hry tawhta pathluapata a y awpa a châ.
26 Nama pahrâna maihta cha thisaih rai nama nie awpa châ vei, pavaw tlyma, lyurâhpa sa tlyma rai châ sala.
27 Ahyrai châ sala thisaih a niepa cha, cha chyhsa cha a chiheizy hry tawhta pathluapata a y awpa a châ, tahpa ta Izarel pathlazy chho teh,” tahpa ta.
28 ABEIPA chata Mawsi chho ta,
29 “ABEIPA lâta adyhna hlâna atheihna a hlâpa maih chata ABEIPA châta a hlâpa cha adyhna hlâna atheihna tawhta a vaw hlâ awpa a châ.
30 ABEIPA châta mei ta hmohlâpa cha ano ku tlaita vaw cheih aw ta; a thaw cha a palôh duata a vaw cheih awpa a châ, a palôh cha ABEIPA hmiakô liata hipa hlâna ta hipa a châ thei nawpata. Theihthaipa ta maisâh liata a thaw cha mei ta rao aw ta, a palôh deikua cha Arawna nata a sawchapawpazy châta a châ aw.
32 A phei chachâh lâ cha adyhna hlâna atheihna tawhtapa chaluapa hlâna ta theihthaipa nama pie awpa a châ;
33 Arawna sawchapawpazy hry liata adyhna hlâna thisaih nata thaw a hlâtuhpa chata a tovyuh châta a phei chachâh lâ a hnei awpa a châ.
34 A palôh nata a phei ama hlâ tyhpa cha Izarel pathlazy amâ dyhna hlâna atheihnazy tawhtapa cha la na ta, Izarel pathlazy chhâzaw ta taonazie awpa châta theihthaipa Arawna nata a sawchapawpazy ei pie, tahpa ta Izarel pathlazy hnohta reih teh, tahpa ta.
35 Amo sathaw a thu nota Izarel pathlazy ta ama pie awpa ta ABEIPA ta bie a piepa theihthaipa rai hriapa ta ABEIPA chakao awpa ta,
36 a hlâ noh rakha tawhta ABEIPA chata mei ta hmohlâpa tawhtapa Arawna tovyuh nata a sawchapawpazy tovyuh awpa cha a châ; he he chhâzaw ta ama pathlazy taihta ama taonazie awpa a châ,” tahpa ta.
37 He he Sinai râhpathohpa liata Izarel pathlazy ta hmohlâpa ABEIPA lâta hlâ awpata bie a pie nota Sinai Tlâh liata ABEIPA ta Mawsi bie a piepa,
38 raopa hlâna zy, niepa hlâna zy, moleina hlâna zy, paraopa hlâna zy, pananona zy, adyhna hlâna atheihna ryhpazy cha a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 | Bo 8 | Bo 9 | Bo 10 |
|---|---|---|---|---|---|---|---|---|---|
| Bo 11 | Bo 12 | Bo 13 | Bo 14 | Bo 15 | Bo 16 | Bo 17 | Bo 18 | Bo 19 | Bo 20 |
| Bo 21 | Bo 22 | Bo 23 | Bo 24 | Bo 25 | Bo 26 | Bo 27 |