Mara Holy Bible: 1 Kawrini Mozy

Showing posts with label 1 Kawrini Mozy. Show all posts

1 Kawrini Mozy 1

Anaona

1 Pawla, Khazohpa khona zieta Zisu Krista apôstôl ta awpa nata eima unawhpa Sôstheni chata-

2 Kawrini khih liata Khazohpa awnanopazy a ypa, Krista Zisu pananopa, mopathaihpa châ awpa ta a awpazy hnohta nata râh to lia eima Beipa Zisu Krista moh, eima Beipa cha ama Beipa hawh hrata a pado hrapa zydua hnohta:

3 Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

Thlahpa hmosaipiepazy vâta alyna hlâna

4 Krista Zisu liata Khazohpa ngiachhiena nama hnohta piepa vâna chata nâmo kyh liata Khazohpa lâta alynabie khâ ei reih tyh,

5 ato liata biereina to rai liata nata pahnona to rai liata ano liana chata parôhnahsapa ta nama ypa kyh liana khata,

6 cha hawhna chata Krista bie eima pahnosapa cha nâmo liata pa-isapa ta a ypa kha.

7 chatanachata eima Beipa Zisu Krista aluahna hâpa ta, hmopiepa liata a phahlapa ta y veih ei chi;

8 ano chata eima Beipa Zisu Krista noh liana chata reipasipasuana y leipa ta nama y thei nawpa ta a chhâna taihta a cha pa-isa hra aw ei.

9 Khazohpa a Sawchapawpa Zisu Krista eima Beipa akaona liata cha awtuhpa ei kha, Khazohpa ngâ a chhih na.

Awnanopa liata a pachhaihna

10 Unawh saih u, nama zydua ta bie miakha ta reipa ta, nama hry liata a chhaihna rai a y lei nawpa ta, palôhrupa su kha nata pachâna su khata a sia ngâsâpa ta khâchâ namâ pazao nawpa ta, eima Beipa Zisu Krista mohta ei châ haw ei.

11 Ei unawh saih u, nâmo kyh liata nama hry liata a einazy a y tahpa Klawi chhôhkhazy chata maniah chho ei ta.

12 He he ei reipa cha a châ, chyhsa tota, “Kei la Pawla py ei châ,” “Kei la Apôlôsa py ei châ,” “Kei la Sifasa py ei châ,” “Kei la Krista py ei châ,” tah chyu eichi ta.

13 Krista cha pachhaihpa ta a y ma? Pawla nama vyuhpa ta khaipâpa ta a y ma? Cha leipa khiahtala, Pawla mohta bâti châpa ta nama y haw ma?

14 Krispa nata Kaia leipa ta cha nama hry liata ahyhmah ta ei cha bâti leipa vâ ei ta Khazohpa lâta alynabie ei reih tyh;

15 chata leipa khiahtala chyhsa ta keima mohta bâti nama châ tahpa ama reih pathlei aw na.

16 Stiphanasa chhôhkhapa deikua cha bâti hra na ta. Cha leipa ta cha chyhsa hropa ei bâti tlyma pahno va na.

17 Krista chata bâti pachâsa awpa ta na tuah tlôh leipa ta, Thâtihpha chho awpa ta tlao eina tuah, chyhsa sona hmâpa ta chho leipa ta, chata leipa ta la Krista kraws cha khâpahrao leipa ta ama pachâsa pathlei aw na.

Krista Khazohpa hmotaotheina nata sona

18 Kraws bie cha leidia haipazy châta hruna châ tlôh ta, keimo pachha haipazy châta deikua cha Khazohpa hmotaotheina tlao a châ.

19 Khazohpa châ bie ta, “A sopazy sona cha pahleipadia aw na ta, novâh theipazy novâhna cha ei thy aw,” tah tlôh ta.

20 Chyhsa sopa cha khataihta e? Ryhpa pachutuhpa cha khataihta e? He khizaw liata a eituhpa cha khataihta e? Khazohpa ta khizaw sona he hruna a châ tahpa pahnosa haw vei mâ?

21 Khazohpa sona liana chata khizaw ta sona hmâpa ta, Khazohpa ama pahno thei khao vei tawhta, bie chhona hrupa hmâpa ta a ngiapâtuhpazy pachhana cha Khazohpa ta a pha tah kaw tlôh ta.

22 Zuzy châta ngianazy a hnaw tyh ei ta, Krika mozy ta sona ama tlua tyh hra.

23 keimo deikua chata Krista khaipâna bie eima chho tyh hih, cha cha Zuzy châta cha paona, Zenitaizy châta hruna châ ta,

24 châhrasala Zuzy rai châ hra ei sala, Krikazy rai châ hra ei sala, awpazy châta la Krista, Khazohpa hmotaotheina nata Khazohpa sona cha a châ.

25 Khazohpa hruna cha chyhsa hlâta so via tlôh ta, Khazohpa thatlô leina chhao cha chyhsa hlâta a tha tlô via hra tlôh ta.

26 Unawh saih u, a cha awna ei he pachâ teh u; sapa lâta a sopa hluhpi zy, thatlôpa hluhpi zy, chyhsa phapa hluhpi zy, awpa ama châ leinazie he;

27 châhrasala Khazohpa ta khizaw hmo hrupazy cha tlao a tlyh ta, a sopazy cha a pamaohphyu thei nawpa ta, Khazohpa ta khizaw hmo chieh leipazy cha a tlyh ta, âmo thatlôpazy cha a pamaophyu thei nawpa ta.

28 khizaw hmo chhiepa nata hmo mohnao chhihpazy, hmo a y leipazy chhao Khazohpa ta a tlyh ta, hmo a ypazy cha khâpahrao leipa ta a tao thei nawpa ta,

29 chatanachata Khazohpa hmiakô liata ahyhmah a palai thei aw veih ei.

30 Nâmo deikua cha ano zawhzi ta Krista Zisu liana chata nama y, ano cha Khazohpa tawhtapa eima châta sona ta taopa a châ, siana liata zy, pathaihna liata zy, chatlaina liata zy chhao;

31 chavâta Khazohpa châ reipa hawhna khata, A palaipa maih Abeipa a palaikhei mawh sy.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 2

Khaipâpa Krista thâtih chhona

1 Unawh saih u, kei cha Khazohpa bieru cha chho awpa ei ta, nâmo lâ ei vy nona khata bie reipa rônahpa nata sona rônahpa chhao a hmâhpa châ va na.

2 Zisu Krista ano tlai khaipâpa ta a ypa kyh dei leipa ta cha nama hryta khâpahmah pahno ei chhuah leipa kha.

3 Chileipa nata chipa ta thata chalyuna chôta nama hry liata y na ta;

4 chatawhcha namâ ngiapâna cha chyhsapa sona liata a pahnieh leipa ta, Khazohpa hmotaotheina liata a pahniehpa ta a y thei nawpa ta,

5 ei reikah puapa nata ei bie chhopazy cha sona bie ta reipasaona ta châ leipa ta, Thlahpa nata hmotaotheina pahnosapa ta tlao a châpa kha.

Khazohpa Thlahpa tawhta pahnosana

6 Anodeikuacha pitlohpazy hry liana chata biesopa cha eima reih tyh, châhrasala he khizaw biesopa châ vei, he khizaw ryureituhpa a leidia haipazy biesopa châ hra vei.

7 Khazohpa bieso bieru cha tlao eima reih tyh, bieso a nyupa eima rônah nawpa ta Khazohpa ta khizaw y hlâta a rao chhielie hawpa cha.

8 Cha cha he khizaw ryureituhpazy heta pahno veih ei; pahno ei sala rônahna Beipa cha khaipâ aw veih ei.

9 Châhrasala Khazohpa châ bie ta, “Mo ta hmô beih leipa, nah ta thei beih leipa, chyhsapa palôhrupa liata a ngia beih leipa, Khazohpa ta a kyh a pachâtuhpazy châta a chhuahnohpa maih cha,” tahpa ta a reipa hawhna khata.

10 Keimo deikua cha chazy cha Khazohpa ta Thlahpa ta maniah a pahnosa. Thlahpa chata ato pasia khai tlôh ta, Khazohpa hmo athupazy taih chhaota.

11 Chyhsapa pachânazy cha chyhsapa palôhrupa chhôh liata a ypa lilaw leipa ta cha chyhsapa hry liata ahy a pahno aw? Cha hawhna hra chata Khazohpa pachânazy cha Khazohpa Thlahpa lilaw leipa ta cha ahyhmah ta pahno veih ei.

12 Chatanachata a saipa ta Khazohpa ta hmo maniah a piepazy cha eima pahno thei nawpa ta, keimo la khizaw thlahpa châ leipa ta, Thlahpa, Khazohpa tawhtapa cha tlao eima hmô.

13 Chyhsapa sona pachupa bie ta reih leipa ta Thlahpa pachupa bie ta tlao reipa ta, thlahpa lâ biezy cha, Thlahpa lâ chyhsazy hnohta chhopasiapa ta, cha hmozy maniah a piepa kyhzy chhao cha eima reih tyh.

14 Khizaw chyhsa chata Khazohpa Thlahpa lâ hmozy cha aly tyh vei, ano pachâ ta cha hrupa châ tlôh ta. Thlahpa ta pahnopasiapa a châpa vâta pahno thei hra vei.

15 Thlahpa chyhsa deikua chata hmo ato pahno pasia tyh ta, ano hra cha ahyhmah ta pahno pasia tlôh lei khâh ei ta.

16 “Ahy e Abeipa palôhrupa pahno ta ano cha a pachu thei aw?” Keimo deikua chata Krista palôh eima phaoh.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 3

Khazohpa châta hrialâhpazy

1 Hmeiseihpa ta cha unawh saih u, Thlahpa chyhsazy hnohta reipa hawhta nama hnohta bie reih thei leipa na ta, sapa chyhsazy hnohta reipa hawhta tlao ei reipa kha, Krista liata hawsaizy hnohta reipa hawhna tlaita

2 sâh châ leipa ta, sâhpiti ta ei cha pasapa ei kha; sâh nama nie thei leipa vâna khata; atahmâ chhao nie thei to vei eichi.

3 sapa chyhsa khâ nama châpa vâta. Nama hry liata a hnâchhaona nata a eina a y tyhpa vâna heta sapa chyhsa châpa ta, chyhsapa hawhta nama ypa châ vei mâ?

4 Chyhsa pakha ta, “Kei Pawla py ei châ,” mohropa ta, “Kei Apôlôsa py ei châ,” nama tah chhôhta la chyhsapa châ veih eichi mâ?

5 Apôlôsa cha khâpa ma a châ? Pawla chhao cha khâpa ma a châ? Chakaotuhpa nâmo châ pangiapâsatuhpa deita ama châ mâ tâh, cha chhao cha Abeipa ta a piepa rairie hawhta deita a châ.

6 Kei ta loh na ta, Apôlôsa ta ti bao ta, châhrasala Khazohpa ta a palaiseihsa.

7 Chatanachata a palaisatuhpa Khazohpa dei leipa ta, ti a baotuhpa chhao cha khâpahmah châ hra vei.

8 A lohtuhpa nata ti a baotuhpa cha miakhasai ama châ; châhrasala âmo hriapasazie lymâ hawhta âmo lymâ ama hmô rairie aw.

9 Keimo cha Khazohpa rai a hrialâhpazy châ tlôh pi ta; nâmo Khazohpa lyu châ eichi ta, Khazohpa o sapa cha châ hra eichi ta.

10 Khazohpa ngiachhiena eina piepa lymâ hawhta o sapa hyutuh chaipa so ngaitapa hawhta, keima ta lôbô bô na ta, mohropa ta a chô liata o sa ei ta. Châhrasala chyhsa to a chô liata ama sanazie awpa liata a chado chyu ei se.

11 Lôbô bô haw chiehpa dei leipa ta cha, lôbô hropa ahyhmah ta bô thei khao tlôh lei khâh ei ta, cha lôbô cha Zisu Krista cha a châ.

12 Châhrasala lôbô chô liana chata ahyrai ta ngôh ta tlyma, tâkâri ta tlyma, alô sôhpa ta tlyma, tho ta tlyma, sipopa ta tlyma, sawphao ta tlyma o sa sala,

13 Krista Noh liana chata ama hrianazie cha a lâ pasia aw, cha Noh cha mei ta a luah tlôh aw ta, mei tlai chata chyhsa to raihria cha kheihawhpa a châ tahpa a pasia aw.

14 Ahy raihriapa rai cha a y thlâh ha khiahtala, cha chyhsa chata lymâ a hmô aw.

15 Ahy raihriapa rai a kâ khiahtala, cha chyhsa chata a pahlei aw, ano tlai deikua cha pachhapa ta a y aw, anodeikuacha mei liata a sie pahliepa hawh tlaita.

16 Khazohpa o nama châpa nata Khazohpa Thlahpa nâmo liata a y thlâh haw tahpa pahno veih eichi mâ

17 Ahyrai ta Khazohpa o cha a parao khiahtala, cha chyhsa cha Khazohpa ta a parao aw. Khazohpa o cha pathaih tlôh ta, cha o cha nâmo nama châ.

18 Ahyhma ta âmosasy ta a dô khah ei se. Nama hry liata ahyrai he khizaw liana heta a sopa ta a pachâ khiahtala, a vaw so thei nawpa ta ahrupa lâta a lie mawh sy.

19 He khizaw sona he Khazohpa pachâ ta hruna châ tlôh ta. “Ano chata chyhsa sopazy cha âmo sona piepiena ta a pa-ao tyh,” tahpa ropa châ tlôh ta.

20 “Abeipa chata chyhsa sopazy pachânazy cha khâpahrao leipa a châ tahpa a pahno,” tahpa ropa châ heih ta.

21 Chavâta ahyhmah ta chyhsazy a palaikhei kha se. Ato he nâmo eih châ khai tlôh ta,

22 Pawla ma, Apôlôsa ma, Sifasa ma, khizaw ma, hrona ma, thina ma, hmo y chiehpa ma, hmo a vaw y awpa ma a zydua ta nâmo eih sai a châ; nâmo chhao Krista eih châ eichi ta; Krista chhao cha Khazohpa eih a châ.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 4

Lyuhchâpazy chakaona

1 Keimo he Krista chakaotuhpa ta nata Khazohpa bieru mokhâhtuhpa ta maniah pachâ teh u.

2 He liana heta mokhâhtuhpa cha chyhsa ngâchhihpa châ a byuh hra.

3 Châhrasala nâmo ta eina pasiana nata chyhsapa pachâna ta eina pasiana chi cha ei châta hmo chyhpa ta a châ. Keima sasyh chhao a pasia beih hra va na.

4 Ei chhie nata pha pahnona cha a sia, châhrasala cha chata thai na pachâsa hlei vei. Na pasiatuhpa cha Abeipa tlao a châ.

5 Chatanachata a daihti tlô hlâna heta khâpahmah pasia kha u, Abeipa a vy hlâ lei la, ano chata zohna liata hmo nyupazy cha khaihna lâta puakhei aw ta, pathipalôh liata a chhuahpazy chhao cha a palâsa aw. Cha tina chata chyhsa to ta Khazohpa liana chata âmo tovyu chyu liata reithaina ama hlao aw.

6 Unawh saih u, bie ropazy cha nama khô lei nawpa ta keimo liana heta namâ chu thei nawpa ta cha biezy cha nama pha nawpa ta nama hry liata ahyhmah ta pakha a palaikheipa ta pakha chôta namâ palai lei nawpa ta kei nata Apôlôsa cha maniah pachâ teh u.

7 Nâ, ahyma a nanopa ta cha hmô tly? Na to leipa cha khâpa na hnei? Na to tlôh khiahta cha khazia to leipa hawhta nâ palaikhei tly?

8 Atahmâ bawlaw ta lôhrâtlôpa ta y eichi ta! Atahmâ bawlaw ta hneirôh haw eichi ta! Eimâ hlao leipa ta abeizy cha haw eichi ta! Abeizy cha hmeiseih ula ei khoh, keimo chhaota nâmo nata abeizy eima châ thei nawpa ta.

9 Khazohpa ta keimo apôstôlzy pi he thi awpa ta rao chiehpa hawhta a hnôh chaita maniah a taopa ta ei pachâ; khizaw zy nata vâlyuhchâpazy nata chyhsapazy mohmô liata mo awpa ta taopa ta eima ypa he.

10 Keimo la Krista vâta ahrupa châ pi ta, nâmo deikua cha Krista liana chata sopa tlao nama châ. Keimo chiehleipa châ pi ta, nâmo deikua cha thatlôpa nama châ. Nâmo palyupalihpa ta y eichi ta, keimo deikua cha chyhsa mohnaopa ta tlao eima y.

11 Atahmâ taih chhao heta eima no dipa ta eima dâh phi ta, chysia maniah vao leipa ta, chyhsa papuapa châ pi ta, yna ziana hnei leipa pi ta.

12 keimo ku ta hriapa ta eima hriapasa kaw ta. Chyhsa rapa ta y pi ta, byhnâ eima awpa tyh; chyhsa ta maniah taola ei ta; tao lyliah tyh pi ta;

13 chyhsa ta maniah leih ei ta, reih phapa ta eimâ chhy tyh; atahmâ taih chhao heta khizaw pahnypakhawpa hmo zydua pualeipa hawhta chyhsa ta maniah tao ei ta.

14 Nama noza nawpa ta he biezy he roh leipa na ta, ei saw kho ngaitapazy hawhta chhoreipa ta tlao ei roh.

15 Krista liana chata pachutuhpa thy kha hnei hra ula, Paw la a hluhpi hnei veih ei chi, keima ta Krista Zisu liata Thâtihpha ta ei cha sa ei.

16 Chatanachata keima yzie nâ chupa châ awpa ta ei châ haw ei.

17 Chavâta Timawthy, Abeipa liata ei saw kho ngaitapa nata ngâchhih kawpa cha nama hnohta ei vaw tuah, ano chata Krista liata ei yzie râh to liata awnanopa sahlao to liata ei pachu tyhpa hawhpa he a cha pahnosa heih aw ei.

18 Chatawhcha kei nama hnohta a vy khao lei awpa hawhta thokha pachâ eichi ta, namâ palai.

19 Châhrasala Abeipa ta â ryh a tah khiahtala bohpi leipa rakha tawhta nama hnohta ei vy aw. Chatanachata a palaipazy bie cha châ leipa ta, ama hmotaotheina cha tlao ei pahno aw.

20 Khazohpa Khihnarâh cha bie liata y leipa ta hmotaotheina liata tlao a y.

21 Khâpa e nama khoh via? Sôsi nahta ma nama hnohta a vy aw na ta, kyhpachâna nata ngiachhiena palôhrupa phaohpa ta ma?

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 5

Yzie chhiena pachiana

1 Nama hry liata apheina a y tahpa kyh thata pathâh ta, cha hawhpa apheina cha Zenitaizy hry liata chhao a y beih leipa; nama hry liata chyhsa pakha ta a paw lahpinô a hneipa kha.

2 Chatawhcha cha hmo a taotuhpa cha nama hry tawhta papua nawpa ta pachârôh ngaitapa ta y cha rei leipa ta tlao a palai eichi ta.

3 Keima tlai he pôhpa liata ei hlao lei tarawpa ta, thlahpa liata deikua cha a hlao na ta.

4 hmo cha tlatluta a taotuhpa cha atahmâ chhao tlai Abeipa Zisu mohta nama hry liata a hlaopa hawh tlaita ei pachia khai haw, nâmo nata ei thlahpa eima Beipa Zisu hmotaotheina liata a pakhypa ta.

5 cha hawhpa chyhsa cha a thlahpa Abeipa Noh liana chata pachhapa ta a y thei nawpa ta a sapa pahleipadia nawpa ta Sâtâ hnohta pie muh vy, ei tah.

6 Namâ palaina he pha vei. Thinô chyhta ta viahchhâ tlâ a rô khai haw tahpa pahno veih eichi ma?

7 Thinô a hlao leipa nama châpa hawhta viahchhâ tlâ thiehpa nama vaw châ thei nawpa thinô parohpa cha pathai teh u. Eima Zawpakhô Mietahkupa taw chhao thie haw tlôh ei ta, Krista tlai chuh.

8 Cha vâna chata kyhchhi ei suh u, thinô parohpa liata châ leipa ta, nôchhie nata moleina thinô liata châ hra leipa ta, hmeiseihna nata a dona viahchhâ thinô pahlao leipa ta tlao châ se.

9 Ei cha paphaona liana khata aphei hmâhpazy a pahlao lei awpa ta nâmo lâta ei ropa kha;

10 he khizaw liata aphei a hmâhpazy tlyma, khohleikhona nata a vyuhnazy tlyma, nohthlahpa a chhytuhpazy tlyma la a pahlao chachei lei awpa ei tahpa la châ vei, cha hawhpa châ sala khizaw tawhta a pua thlyu awpa châ tlôh aw eichi ta.

11 Atahmâ deikua cha ahyrai unawh moh phaoh tlôh ta, apheipa tlyma, khohleikhopa tlyma, nohthlahpa a chhypa tlyma, ra a hmâhpa tlyma, sahma a paripa tlyma, phi a hmâhpa tlyma châ sala a pahlao lei awpa ta nama hnohta ei roh, cha hawhpa chyhsa hnohna chata nie chhao nie lei awpa ta.

12 Khôtho lâta chyhsazy cha keima ta ei pachia nawpa khâpa e a y? Nâmo ta a chhôh lâta chyhsazy nama pachiapa châ vei ma?

13 Khôtho lâ chyhsa deikua cha Khazohpa ta a pachia tyhpa châ vei ma? Cha moleipa cha nama hry tawhta papua teh u.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 6

Ngiapâ leipazy hmiakô ta akhona

1 Nama hryta ahyrai ta chyhsa chô liata biepeipa hnei ula, mopathaihpazy hmiakô liata tlôkhei leipa ta, a sia leipazy hmiakô liata nama tlôkhei ngâh aw ma?

2 Cha khiahtala mopathaihpazy chata khizaw ryu ama reih aw tahpa pahno veih eichi ma? Khizaw hmahta ryu nama reih awpa khiahta cha hmo chyh chaipa chhao cha ryurei tlâh lei awpa nama châ ma?

3 He hro chhôh khihsatôhtuna kyhzy rei leipa ta, vâlyuhchâpazy lâ chhao taih ryu eima reih aw tahpa pahno veih eichi mâ?

4 Chatanachata he hro chhôh khihsatôhtu kyhzy ryureih awpa ta hnei eichi ta, awnanopa sahlao hry liata a nawh chaipazy cha ryu nama pareisa tyh ma?

5 Nâmo noza nawpa ta ei reih. A unawhpazy likawh liata bie pathlu theipa chyhsa a sopa pakha chhâ nama hry liata hmô thei veih eichi ma?

6 Unawhpa ta a unawhpa ryureina liata tlao a tlôkhei tyh, ngiapâ leipa ryureituhpa hmiakô liata châ bailai heih tlôh ta.

7 He he nama siapaki leina miakha cha a châ tlai, biepeipa nama hnei tyhpa hih. Khazia a do lei ngaitapa ta taopa cha tlao nama mao-oh vei? Khazia e a su leipa cha pasa nama tao vei?

8 Châhrasala nâmo tlaita nama unawhpazy chô liata chhao pado leipa ta su leina nama tao.

9 Cha khiahtala, a sia leipazy chata Khazohpa Khihnarâh to aw veih ei, tahpa pahno veih eichi mâ? Dôpa ta y khah u; a parâpazy tlyma, nohthlahpa a chhytuhpazy tlyma, aphei hmâhpazy tlyma, chao haopazy tlyma,

10 paru hmâhpazy tlyma, khohleikhopazy tlyma, sahma pari hmâhpazy tlyma, chyhsa ra hmâhpazy tlyma, phihmâhpazy tlyma ta Khazohpa Khihnarâh to aw veih ei.

11 Nâmo thokha cha hawhta nama y tyhpa kha. Châhrasala Abeipa Zisu Krista moh liata nata eima Khazopa Thlahpa liata pasipa châ haw eichi ta, pathaipa ta nama châ haw, thai châpa ta nama y haw.

12 “Hmo ato taopa ei châta âna vei,” châhrasala hmo ato taopa pha hlei vei, “Hmo ato taopa ei châta âna vei,” châhrasala khâpa sei ta hmah apasaih va na.

13 “Niepazy cha py châta châ ta, py cha niepazy châta a châ,” châhrasala Khazohpa ta a pahleipadia rairie aw. Chatawhcha pôhpa he aphei nawpa ta châ leipa ta, Abeipa châta tlao a châ, Abeipa chhao cha pôhpa châta a châ.

14 Khazohpa ta Abeipa cha pathyu ta, keimo chhao a hmotaotheina ta maniah a pathyu hra aw.

15 Nama pôhpa cha Krista pachiahpazy a châ tahpa pahno veih eichi ma? Krista pachiahpazy cha lapa ta sihrypa pachiahpazy ta ei tao aw mâ? Châ bao va!

16 Cha khiahtala, sihrypa a pazaopa cha ano nata pôh kha ama châ tahpa pahno veih eichi mâ? “Ama pano ta pôh kha ama châ ha aw,” tah tlôh ta.

17 Abeipa apazaopa deikua cha ano nata Thlahpa pôh kha ama châ.

18 Apheina he a râsai teh u. Chyhsapa hmo paraopa hropa to he pôhpa khôtho lâ a châ; chyhsa aphei hmâhpa deikua chata ano pôhpa chô liata hmo a parao.

19 Cha khiahtala, nama pôhpa cha nama chhôh liata a ypa Khazohpa tawhtapa nama hmôpa, Thlahpa Pathaihpa o a châ tahpa pahno veih eichi mâ? Nâmo eih châ leipa eichi ta;

20 mâ ta chaleipa nama châ haw mâ tâh. Chavâta nama pôhpa liana chata Khazohpa palyupalih teh u.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 7

Nôvahna thâtih

1 Chatawhcha nama hmo ropa kyhzy kha cha. Chapaw chata chanô hria leipa a pha.

2 Châhrasala apheinazy a y tyhpa vâta chapaw ta lahpinô chyu hnei sala, chanô chhaota vahpa chyu hnei mawh sy.

3 Vahpa chata a lahpinô lâta a tovyu awpa rakha cha pie mawh sy, cha hawhna hra chata lahpinô chhaota a vahpa lâta a tovyu awpa rakha cha pie hra mawh sy.

4 Lahpinô chata ano pôhpa chô liata bie hnei leipa ta, a vahpa chata bie tlao a a hnei; cha hawhna hra chata vahpa chhaota ano pôhpa chô liata bie hnei leipa ta, a lahpinô chata bie tlao a hnei.

5 Thlahchhâpa ta namâ pie thei nawpa nata namâ kaolâh heih thei nawpa ta bohpi leipa chata a ryh nama tah rairiepa dei leipa khiahtala, ahypa raita a pakyh kha u; chata leipata la namâ sohsi thei leina vâta Sâtâ ta a cha reipasao pathlei aw ei na.

6 Châhrasala he kyh he biepiepa lâta rei leipa na ta, pasaina kyh lâta tlao ei reih.

7 Châhrasala chyhsa zydua keima hawhna tlai heta y khai ei sala ei khoh. Anodeikuacha chyhsa to ta Khazohpa tawhtapa hmo piepa ama hmôpa ama hnei chyu, pakha ta kyh hropa ta, pakha ta kyh hropa ta.

8 Dyh a châ leipazy nata nôhmeizy hnohna chata he tana heta ei tah, keima hawhna tlai heta y ei sala ama châta a pha aw.

9 Châhrasala sohsi theina ama hnei tlôh leipa khiahta deikua cha a hnei ei se. Parâpa hlâta a hneipa cha pha via tlôh ta.

10 A hnei chiehpazy hnohna chata bie ei pie, keima piepa deikua châ leipa ta, Abeipa piepa tlao a châ, lahpinô chata a vahpa a chhaih kha se.

11 a chhaih daidao khiahtala vahpa hnei khao leipa ta y mawh sy, a châ vei khiahtala a vahpa nata a ryh heih mawh sy, chatawhcha vahpa chata a lahpinô ma kha se.

12 Mo hropa hnohta deikua cha, Abeipa châ leipa ta, keima ta ei reih, unawh ahyrai ta lahpinô ngiapâ leipa chyhsa hnei sala, ano chata ano hnohta y thlâh ha awpa a khoh khiahtala, ma kha se.

13 Chatawhcha chanô, vahpa ngiapâ leipa chyhsa a hneipa chata, a vahpa ta a hnohta y thlâh ha awpa a khoh khiahtala, a chhaih kha se.

14 Vahpa ngiapâ leipa chyhsa cha a lahpinô zawhzi ta pathaisapa ta y ta, lahpinô ngiapâ leipa chyhsa chhao cha a vahpa zawhzi ta pathaisapa ta y tlôh hra ta. Chata a châ vei khiahtala, nama sawzy cha pathaih aw veih ei; châhrasala ama pathaih thlâh ha na.

15 Châhrasala a ngiapâ leipa chata a chhaih sala, a chhaih thlâh ha se; cha hawhpa liata cha unawhpa tlyma, sietanô tlyma hraipa cha khao veih ei. Khazohpa deikua chata aryhna ta maniah a aw.

16 Hy lahpinô y, na vahpa na pachha awpa nata pachha lei awpa kheihta e na pahno? Hy vahpa y, na lahpinô na pachha awpa nata pachha lei awpa kheihta e na pahno?

Abeipa ta hrozie a hnawpa

17 Khâparai châ sala, Abeipa chata chyhsa to hnohta a piepa chyu hawhta nata Khazohpa ta chyhsa to a awna chyu liata y mawh sy. Cha hawhna chata awnanopa sahlao zydua liata ei rao tyh.

18 Chopawtai chiehpa ta awpa ama y ma? A chopawtai na cha pasi kha se. Chopawtai leipa ta a ypâ awpa ama y ma? Chopawtai kha se.

19 Khazohpa biepiepazy a pyhpa dei leipa ta cha, chopawtaipa he khâpahmah châ vei, chopawtai leipa chhao he khâpahmah châ hra vei.

20 Chyhsa to awpa ta ama y nota ama topa ualua liana chata y thlâh ha chyu mawh sy.

21 Sei ta na y nota awpa na châ ma? Cha cha a papeisa khâ. Khotalaipa ta ryhpaona na hmô khiahtala a pyh teh.

22 Sei ta a ypa Abeipa awpa cha Abeipa mohmô ta khotalaipa châ tlôh ta, cha hawhna hra chata sei châ leipa ta a ypa awna cha. Krista sei châ ta.

23 Mâ ta chaleipa nama châ haw; chyhsazy sei ta a ngia kha u.

24 Unawh saih u, chyhsa to awpa ta nama y nota nâmo topa ualua liana chata, Khazohpa liata y thlâh ha teh u.

Dyhchâ leipa nata nôhmeizy

25 Chatawhcha dyh châ leina kyh liata, Abeipa biepiepa rai hnei leipa na ta, châhrasala ngâchhihpa ta y awpa ta Abeipa tawhtapa ngiachhiena a hmôpa ei châpa vâta ei pachâzie ei reih aw.

26 Atahmâhlâ rietheina vâna heta he he a pha nahta ei pangiasa, chyhsa ama y tyhpa hawhta y thlâh hapa hih.

27 Lahpinô liata hraipa na châ ma? Pathlana tlua khâ. Lahpinô liata hrai leipa na châ ma? Lahpino tlua khâ.

28 Châhrasala lahpinô a hneipa châ la hmo parao va chi, laihsakôpa chhaota vahpa hnei sala hmo parao hra vei. Anodeikuacha cha hawhpa chyhsazy chata sapa liata riethei ama tao aw, châhrasala kei tala riethei pataosa leipa ei khoh.

29 Anodeikuacha unawh saih u, he tana heta ei tah, atahmâ tawhta la lahpinô hneipazy cha hnei leipa hawhta ama y thei nawpa nata,

30 a chapazy cha cha leipa hawhta ama y thei nawpa nata, alypazy cha aly leipa hawhta ama y thei nawpa nata, a chaleituhpazy cha hnei leipa hawhta ama y thei nawpa nata,

31 khizaw a hmâhtuhpazy cha hmâh leipa hawhta ama y thei nawpa ta daihti he pachyusapa ta a y. He khizaw yzie he a leidia hai.

32 Châhrasala khihsatôhtuna saiheina hnei leipa ta nama y awpa ei cha khokhei ei. Lahpinô a hnei leipa chata Abeipa palysa theinazie awpa pachâpa ta, Abeipa lâ hmo cha a saihei tyh;

33 lahpinô a hneipa deikua chata a lahpinô palysa theinazie awpa pachâpa ta khizaw lâ hmo cha a saihei tyh.

34 chatawhcha vahpa a hneipa nata laihsakôpa cha a lyu hra veih ei. Vahpa a hnei leipa chata a pôhpa nata a thlahpa liana cha pathaihpa ta a y thei nawpata Abeipa lâ hmo cha a saihei tyh; vahpa a hneipa deikua chata a vahpa palysa theinazie awpa pachâpa ta khizaw lâ hmo cha a saihei tyh.

35 Chazy cha nama phana awpa ta ei reih, ei cha parao thei nawpa ta rei leipa na ta, yzie angiapâ rakha ta nama y theina awpa nata Abeipa chakaona rai cha atymâ leipa ta nama chakao thei nawpa ta tlao ei reih.

36 Ahyrai ta a laihsakôpa a palai rei tuna kyh liata a do leipa ta a pangiasa khiahtala, ano cha a locho no châ ta, a byuh tlôh khiahtala, a tao khopa cha tao se; moleina châ vei, pahneisa thlâh mawh sy.

37 Châhrasala ahyrai ta a byuh tah leipa ta, ano khona zie papitlohsa theipa ta, a laihsakôpa cha khâchâ a vao chhuahpa cha a tao pha via.

38 Vahpa pahneisatuhpa cha a tao pha na; châhrasala a pahneisa leipa cha a tao pha via.

39 Lahpinô cha a vahpa hro chhôhta cha chahrypa châ ta, a vahpa thi tawh deikua cha a khopa maih a hnei heih thei aw, anodeikuacha Abeipa liata a ypa chyhsa a châ awpa a châ.

40 Châhrasala keima pachâna ta cha hnei khao leipa ta y sala, â ly via awpa ta ei pachâ. Kei chhaota Khazohpa Thlahpa cha hnei hrapa ta ei pahno.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 8

1 Chatawhcha nohthlahpa achhyna sa niena kyh cha: “eima zydua ta pahnona eima hnei chyu,” tahpa eima pahno. “Pahnona” heta chyhsa apalaisa tyh ta, kyhpachâna deikua ta chyhsa a tao pathi tyh.

2 Ahyrai ta hmo khâpa tlyma pahnopa ta araopa cha, a pahno awpa hawhpa cha pahno mâh vei.

3 Châhrasala chyhsa ta Khazohpa kyh a pachâ khiahtala, cha tlai cha ano ta a pahnopa cha a châ.

4 Chatanachata nohthlahpa liata sa niena kyh liana chata, “nohthlahpa cha hrona a hnei lei zie” nata “pakha dei leipa ta cha Khazohpa hropa rai a y lei zie” cha eima pahno.

5 Avâ liata tlyma, alei liata tlyma, “khazohzy” moh phaohpa y hôlô hra sala, cha hawhpa “khazohpa” hluhpi nata “abeipa” hluhpi y tlôh ei ta,

6 keimo châta deikua cha Khazohpa pakha deita. Paw cha y ta, ano tawhta ato pua ta, keimo chhao ano châta a ypa eima châ. Abeipa pakha deita, Zisu Krista cha y hra ta, ano vâta ato y ta. keimo chhao ano vâ hra ta a ypa eima châ.

7 Anodeikuacha cha pahnona cha chyhsa zydua ta hnei veih ei. Chyhsa thokha ta a tlia taih khata khazoh nohthlahpa achhy tyhpa ama châpa vâta khazoh nohthlahpa liata atheihna hmo hawhta pachâpa ta ama nie tyh; ama ngiaryhna ryh leina cha a tha a tlô leipa vâta a vaw pualei haw tyh.

8 Châhrasala niepa heta Khazohpa moh maniah patlôsa hlei aw vei. Nie vei hra ei sihla rao hlei hra ma pi, nie hra ei sihla pha hlei hra ma pi.

9 Châhrasala a chado teh u, chata leipata la khopa hawhta nama y theina khâpa tlyma taopa ta chyhsa chieh-leipazy châta ahluana a châ pathlei aw na.

10 Nâ, pahnona ahneipa chi, ahyrai ta khazoh nohthlahpa achhyna-o liata pati dôhpa ta ama cha hmô tlôh khiahta cha, âmo cha chyhsa chieh-leipa vaw châ ei sala, ama ngiaryhna ryh leina chata khazoh nohthlahpa liata atheihna sa nie vaw ngâh aw vei mâ?

11 Chatanachata na pahnona vâna chata chyhsa chieh-leipa, unawhpa a thi vyuhpa ta Krista a thi pâpa cha a leidia aw.

12 Unawhzy chôta cha hawhpa hmo paraopa ta ama ngiaryhna ryh leina cha a tha a tlô leipa bailai ta hmah nama paphaopa heta. Krista chôta hmo a paraopa nama châ.

13 Chavâta niepa heta ei unawhpa a pahluasa khiahta cha, ei unawhpa ei pahluasa lei nawpa ta chhâzaw ta sa rai nie khao aw va na.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 9

Lyuhchâpa biehneina

1 Khotalaipa châ vana mâ? Apôstôl châ vana mâ? Eima Beipa Zisu hmô haw vana mâ? Nâmo sahlao cha Abeipa liata ei raihria châ veih eichi mâ?

2 Mo hropazy châta apôstôl châ vei hra aw sala, nâmo châ chhâ tala ei châ; Abeipa liata ei apôstôl châna ngiana cha nâmo he nama châ mâ tâh.

3 Na pasiatuhpazy ei chhyna cha he he a châ.

4 Nie nata do awpa ta biehnei mapi mâ?

5 Apôstôl hropazy nata Abeipa unawhzy nata Sifasa hawhna khata lahpinô ngiapâpa a chhi awpa ta biehnei mapi mâ?

6 Cha vei khiatala, raihria lei awpata kei nata Banaba ta biehnei hlei leipa ma eima châ?

7 Pheisaih ahyma anosasy apasapata chariah a ka beih tly? Ahyma a thei nie tlôh leipata kresadô a tao beih tly? Cha vei khiahla, ahyma sahroh zaw sâhpizy nie tlôh leipata sahro a mohôh beih tly?

8 Cha biezy cha chyhsapa biehneina ta ei reih tlyma, ryhpa bie chhaota cha tlai cha reih hra vei ma?

9 Mawsi ryhpa châbu liana chata, “Viahchao tôhpa ta sâh a tly nota a hmao hi kha y,” tahpa ropa châ tlôh ta. Khazohpa ta viahchao tôhpa châta dei ma a pachâpa hlei tly?

10 Keimo châta a reipa châ vei ma? A châ na, keimo châta na ama roh; aleipalietuhpa chata hnabeiseina hneipata palie awpa hnabeiseipata a hria awpa châ hra tlôh ta.

11 Keimo ta thlahpa kyh lâ hmozy cha nama hnohta eima tu haw tawhta cha, nama sapa lâta hmozy cha hria hra ei sihla, hmo a thôh kawpa ma a châ aw tly?

12 Mo hropa hmahta nama chô liata biehneina cha ama to khiahta cha, keimo he a to via pachai awpa châ mapi mâ? Châhrasala cha biehneina cha hmâh ma pi, Krista Thâtihpha eima pakhâ leina awpata ato tlao eima tao lyliah.

13 Hmo ziepa a chhuahnohtuhpazy chata Khazohpa achhyna-o liatahpa hmo ama niepa nata maisâh chakaotuhpazy chata maisâh chhao tovyu ama hnei tahpa pahno veih eichi mâ?

14 Cha hawhna hra chata, Abeipa ta thâtihpha chhotuhpazy cha thâtihpha cha ama nie hmôna châta a rao.

15 Châhrasala kei la cha hawhpa zydua cha tao va na, ei chô liata nama tao awpata ei reipa châ hra vei. Ahyrai ta ei palaikheipa he khâpahrao leipata ama taopa hlâta cha, tlao thi sala cha cha ei khoh via.

16 Thâtihpha ei chhopa chhao heta apalai nawpa hnei va na. Tao lei thei leipata ei chôta a pahnieh tlôh ta. Thâtihpha ei chho vei khiahtala ei hu a po aw!

17 Cha cha keima khona zie hawhta ei tao khiahtala lymâ ei hnei; châhrasala keima khona zie châ leipata ei tao khiah deikua cha, thâtihpha pavaosapa tlao ei châ aw.

18 Cha khiahla ei lymâ cha khâpa e a châ aw? Thâtihpha liata ei biehneina cha hmâh khai leipata, cha thâtihpha cha hlao leipata ei chakao theina he a châ.

19 Ahy sei hmahta châ vei hra sala, chyhsa hluhpi ei pahnie thei nawpa ei ta; chyhsa zydua sei ta ei tao.

20 Zuzy ei pahnie thei nawpa ei ta, Zuzy lâta Zu hawhta ei y tyh; ryhpa ryta a ypazy hnohta ei pahnie thei nawpa ei ta, ryhpa ryta ei y hra, ryhpa-ryta y tlôh leipa ta.

21 Ryhpa a hnei leipazy ei pahnie thei nawpa ei ta, ryhpa leipata y na ta, Khazohpa ryhpa zyh leipata y tlôh leipata Krista ryhpa cha tlao zyhpata.

22 Chieh-leipazy ei pahnie thei nawpa ei ta, chieh-leipazy hnohta chieh-leipata y na ta. Kheihawhta chhâma taopata thokhazy ei pachha thei nawpa ei ta, chyhsa zydua hnohta ato ei tao haw.

23 Thâtihpha vâta ato tao tyh na ta, byhnâ ei hmô thei nawpata.

24 Râpasuapazy cha ama zydua ta a râ ei ta, châhrasala pakha deita ta lymâ a hmô tyh tahpa pahno veih eichi mâ? Nama hmô thei nawpata, cha hawhna tlai chata a râ teh u.

25 Ahyrai ataopasuanazy liana chata a tao hualuapa maih cha, ato liata amâ sohsi tyh. Âmo ta cha abeilakho a rao theipa hmô awpata tei ei ta, keimo deikua chata abeilakho a rao thei leipa hmô awpata.

26 Cha hawhna tlai chata râpasuana chhâpa pahno leipata y leipata ei râ tyh, cha hawhna tlai chata a ruapa liata a tupa châ leipata ei tu tyh;

27 ei pôhpa a tu tyh na ta, sei ta tlao ei tao tyh, chata leipata cha mo hropazy lâta tlâh ei awhkhei tawh chhaota, keima tlai he thy pathlapata ei y pathlei aw na.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 10

Nohthlahpa achhyna liata zikyurâna

1 Unawh saih u, hezy he nama pahno leipa khoh va na, eima pathlatuhpa zydua meido ry liata y khai ei ta, ama zydua ta Tilaipi Saihpa chhao chaka khai ei ta,

2 ama zydua ta meido liata bâtipata y khai ei ta,

3 ama zydua ta thlahpa lâ niepa miakha chhao nie chyu ei ta,

4 ama zydua ta thlahpa lâ dopa miakha ta ama do chyupa kha. Âmo a zituhpa thlahpa lâ Lôpanô liatahpa kha doh chyu tlôh ei ta, cha Lôpanô cha Krista a châ.

5 Châhrasala ama hryta chyhsa hluh via chô liana chata Khazohpa a palôh châ leipa ta; râhpathohpa liana khata paosaopata y tlôh ei ta.

6 Chazy cha eima châta pamosana a châ, hmo moleipa ama khopa hawhna khata eima khoh hra lei nawpata.

7 Ama hry liata thokha nohthlahpa a chhytuhpa ama châpa hawhna khata nohthlahpa a chhytuhpa châ hra khah u; “Chyhsa zawpi cha niepa nata do awpata a tyuh chyu ei ta, la awpata thyu heih ei ta,” tahpa ropa hawhna khata.

8 Ama hry liata thokha ta laihsa liata aphei ei ta, noh kha ta thy no nata sâh thôh ta ama paosao pâpa hawhna khata aphei hra khah u.

9 Ama hry liata thokha ta Abeipa pasia ei ta, parih liata pahleipadiapata ama y pâpa hawhna khata Abeipa cha pasia hra khah ei suh u;

10 ama hry liata thokha ta paphôh ei ta, pahleipadiata ama y pâpa hawhna khata, paphôh hra khah u.

11 Chazy cha pamosana awpata ama chô liata a vaw tlôpa a châ khaw, keimo daihti chhâna vaw tlônapazy he maniah chhoreina awpata ama ropa châ hra ta.

12 Chavâta a duah awpata a pangiasapa cha a chado mawh sy, chata leipa khiahtala a pao pathlei aw na.

13 Chyhsa pasa tao theina hawhpa dei leipata cha reipasaona rai nama chô liata tlô beih vei. Khazohpa la ngâ a chhihpa châ ta, ano chata nama tao theina rakha khô lâta reipasaona namâ tyh awpata pasaih aw vei, nama pasa tao theina awpa reipasao nona chata a râ nawpa lâpi thlai a tao pâ aw.

14 Chavâta ei kho ngaitapazy saih u, nohthlahpa achhyna he a râsai teh u.

15 Chyhsa sopazy hnohta reipa hawhta ei reih, ei bie reipa he pachâ teh u.

16 Byhnâ awna nyu byhnâ eima awpa tyh hih, Krista thisaih a hlykheina châ vei mâ? Viahchhâ eima pachhaih tyhpa he Krista pôhpa a hlykheina châ vei mâ?

17 Keimo chyhsa hluhpi ta he viahchhâ tlâ kha, pôhpa miakha eima châ hih, eima zydua ta viahchhâ miakha liatahpa to chyu tlôh pi ta.

18 Sapa lâta Izarel sahlao cha moh teh u; atheihna sa a nietuhpazy chata maisâh cha a hlykhei veih ei mâ?

19 Khâpama ei reih tly? Nohthlahpa liata atheihna cha hmo khâpama châ ta, nohthlahpa cha hmo khâpa tlyma a châ ei tah ma?

20 Zenitaizy atheihna cha Khazohpa lâta châ leipa ta, ahripa lâta amâ theih tyh tahpa tlao ei reih. Nâmo la ahripa cha namâ hlykhei awpata cha khokhei veih ei na.

21 Abeipa nyu nata ahripa nyu cha do khoh thei veih eichi. Abeipa tlâhkhai nata ahripa tlâhkhai chhao chakao khoh thei hra aw vei eichi.

22 Cha khiahtala Abeipa cha a hiapa-tliasapata pathyu eimâ chhuah ma? Ano hlâta eima thatlô via ma?

23 “Ato zydua taopa âna vei,” châhrasala ato taopa pha hlei vei. “Ato zydua taopa âna vei,” châhrasala ato zydua taopa ta chyhsa tao pathi vei.

24 Ahyrai ta âmo pha nawpa tlua leipata mo hropa pha nawpa tlao tlua se.

25 Sa zuana liata ama zuapa cha chhie nata pha pahnona vâta khâpahma hiahri leipata nie thlâh ha teh.

26 “Alei liata hmo to zydua he Abeipa eih châ tlôh ta”

27 Angiapâ leipazy hrytahpa chyhsa ta pati nie cha hrua sala, na khoh tlôh khiahtala, chhie nata pha pahnona vâta hiahri leipata a cha piepa cha nie thlâh ha teh.

28 Châhrasala ahy tlyma ta, “He he atheihna ta hlâpa a châ,” tahpata a cha chho ha khiahtala, a cha chho hapa vâta nata chhie nata pha pahnona vâta nie khâ

29 nama chhie nata pha pahnona tah leipa nata chyhsa hropa chhie nata pha pahnona chu.) Khazia mo hropa chhie nata pha pahnona ta ei khotalaina cha a reipachhie?

30 Ei niepa vâta Khazohpa lâta alyna bie ei reih khiahta cha, alyna bie ei reipa vâta mo hropata khazia eina reipachhie aw?

31 A châ na, nama niepa rai ta, nama dopa rai ta, nama taopa maih liata chhao Khazohpa rônahna awpa saita tao teh u.

32 Keima ta kei phahnaina tlua leipata pachhapa ama châ thei nawpata chyhsa hluhpi phahnaina tlao tluapata, chyhsa zydua ato liata ei palysapa hawhna tlai heta.

33 Zuzy châta chhao, Krikazy châta chhao, Khazohpa awnanopa sahlao châta chhao, ama paona awpa rai khâpahma tao khah u.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16

1 Kawrini Mozy 11

1 Ei hâ nâ latuhpazy châ teh u, kei chhaota Krista hâ a latuhpa ei châpa hawhna hra heta.

Chanô luhzy khuna

2 Ato liata eina pahno thlâh hapa vâ eichi nata bie ryuhipa ei cha chhopa hawhna tlai ta khâchâ nama vaopa vâta ei cha reithai ei.

3 Anodeikuacha ato luhpa cha Krista a châ. Chanô luhpa cha chapaw a châ, Krista luhpa cha Khazohpa a châ tahpa nama pahno awpa ei khoh.

4 Chapaw luh khupa chôta thlah chhâpa tlyma, bie a chhopa tlyma maihta, ama luh amâ pamaophyu;

5 anodeikuacha chanô luh a khu leipata thlah a chhâpa tlyma, bie a chhopa tlyma maihta ama luh ama pamaophyu, a pôlôpa nata miakhasai châ tlôh ta.

6 Chanô luh khu leipata a y tlôh khiahtala, ngyu lâlao mawh sy; anodeikuacha chanô to luh ngyupa tlyma, papôlôpa tlyma, a no a za tlôh khiahtala luh tlao khu mawh sy.

7 Chapaw cha Khazohpa lyupa nata rônahna a châpa vâta luh a khu awpa châ tlôh leipata; chanô deikua cha chapaw rônahna a châ.

8 Chapaw he chanô tawhta taopa châ leipata, chanô deikua cha chapaw tawhta taopa tlao châ ta.

9 Chapaw he chanô châta taopa châ hra vei, chanô deikua cha chapaw châta taopa tlao a châ.

10 Cha vâna chata vâlyuhchâpazy vâta chanô ta chapaw biehneina ngiana a khu awpa a châ.

11 Châhrasala Abeipa liana chata chanô he chapaw leipata y thei leipata, chapaw chhao he chanô leipata y thei hra vei;

12 chanô he chapaw tawhta a puapa a châpa hawhta, chapaw chhao he chanô tawhta a pihpa châ tlôh ta. Anodeikuacha ato he Khazohpa tawhta a puapa sai a châ.

13 Nâmosasy ta a pachia teh u; chanô ta luh a khu leipata Khazohpa lâta thlahchhâpa he a ngiah ma?

14 Chapaw heta sâ seihpa a hnei khiahtala ano châta nozachhihpa a châ tahpa nama pathipalôh pikheipa chhaota cha pahnosa veih ei ma?

15 Chanô deikua chata sâ seihpa a hnei khiahtala ano châta rônahna tlao a châ. A sâ cha a khuna awpata piepa châ tlôh ta.

16 Khâparai châ sala ei cha chho ei chuh, ahyrai ei khoh hra sala, taozie hropa rai hnei leipa pi ta, Khazohpa awnanopa sahlaozy chhaota hnei hra veih ei.

Abeipa tlâhkhai dôhna liata hmo puapa

17 Anodeikuacha he bie ei cha chhopa liana heta ei cha reipachhie na, nama pha via nawpa lâ châ leipata, nama rao via nawpa lâta namâ pakhy tyhpa vâna heta.

18 A hmiatua ta awnanopa sahlao ta namâ pakhy nahta nama hry liata a pachhaihna a y tyh tahpa chyhsa reipa thei tlôh na ta; ei zo bâ thlâh haw.

19 Nama hryta a hmeiseihpazy cha a luah thei nawpata nama hry liata ngiapâna nanopa chhao a y hra awpa rai a châ.

20 Namâ pakhy nahta Abeipa zâpati nie theipa rimâ châ vei.

21 Chyhsa to ta a nie chhiechhu tyh eichi ta. chatanachata mo pakha a no di ta, mo pakha pari tlôh ta.

22 Kheihtazie ta e! Nie nata do nawpata o hnei veih eichi mâ? Châ vei khiahtala, Khazohpa awnanopa sahlao mohnaopata, khâpahma a hnei leipazy cha maoh nama paphyusa mâ? Nama hnohta khâpa ei reih aw? He kyh liana heta ei cha reithai aw ei mâ? Cha reithai thei veih ei na.

Abeipa tlâhkhai dôhna(Mt 26:26-29; Mk 14:22-25; Lk 22:14-20)

23 Nama hnohta ei cha piepa ei kha Abeipa tawhta ei hmôpa châ tlôh ta. Abeipa Zisu chata patusapata a y zâ ta, viahchhâ la ta.

24 alyna bie a rei khai nahta ei chheih ta, “He he ei pôhpa nama vyuhpata pie awpa cha a châ. Einâ thei thlâh ha nawpa eichi ta he he tao tyh muh vy,” tah ta.

25 Cha hawhna hra chata zâpati nie khai nahta nyu chhao cha la ta, “He nyu he ei thisaih liata biehrai thiehpa cha a châ. Nama dona maihta einâ thei thlâh ha nawpa eichi ta he he tao tyh muh vy.” tah ta.

26 He viahchhâ he nama nie nata nyu cha nama dona maihta a vy heih hlâ lei cha Abeipa thina cha nama pamosa tyhpa châ tlôh ta.

Ngâchhih leina chôta Abeipa tlâhkhai dôhna

27 Chavâta ahyrai nie tlâh châ leipata viahchhâ cha niepata tlyma, Abeipa nyu a dopa tlyma maih cha Abeipa pôhpa nata thisaih ta thai lei a châ aw.

28 Chyhsa to âmo ta tlao a pasia chhy ei se, cha hawhna chata viahchhâ cha niepata, nyu cha doh mawh sy.

29 A niepa nata a dopa chata Abeipa pôhpa cha pakhâtata a pachâ tlôh leipa khiahtala, âmo chôta pachia nawpata niepata a doh tyhpa châ tlôh ta.

30 Chavâta nama hryta chyhsa hluhpi chieh-leipa nata tlâh leipata nama y, a hluhpi nama thi hra.

31 Châhrasala keimosasy ta liahsa a pasia ei sih la, ryurei pâpata y aw ma pi.

32 Ryurei pâpata eima ypa chhaota khizaw nata thai lei châpata eima y lei nawpa ta. Abeipa chhoreipata tlao eima y.

33 Chavâta unawh saih u nie awpata namâ pakhy tita, a hâ pakhy teh u-

34 ahyrai a nodi khiahtala o liata nie se, cha leipata cha nama pakhyna cha thai lei pachâsapata nama châ pathlei aw na. Hmo hropa kyh cha ei vy tita ei tao pasia khai aw.

1 Kawrini Mozy (1 Corinthians)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16