Thlahpa lâ hmopiepazy
1 Chatawhcha unawh saih u. Thlahpa hmopiepazy kyh liata nama pahno leipa khoh va na.
2 Zenitaizy nama châ nona khata nohthlahpa reihpathlie thei leipazy lâna chata chhihthapata y eichi ta, ama châ chhina lia maihta paviasapata nama y tahpa nama pahno.
3 Chatanachata ahyhma ta Khazohpa Thlahpa chhihthapata ypa ta, “Zisu cha chhiesapa a châ!” tah beih veih ei. Ahyhma ta Thlahpa Pathaihpa chhihthana leipata cha. “Zisu cha Abeipa a châ.” tah thei hra veih ei.
4 Thlahpa lâ hmopiepazy chi hluhpi a y. Chahrasala Thlahpa pakha tawhta a châ;
5 chakaona chi hluhpi a y. Châhrasala Abeipa cha pakha a châ;
6 raihriana chi hluhpi a y, châhrasala Khazohpa pakha tawhta a châ, chyhsa zydua hnohta hriatuhpa cha.
7 Chyhsa to hnohta hmahsie nawpata Thlahpa pie chyupa a châ.
8 Chyhsa pakha hnohta Thlahpa liata sona piepa châ ta, chyhsa hropa hnohta Thlahpa lia lilawta pahnona piepa a châ.
9 Chyhsa hropa hnohta Thlahpa lia lilaw chata angiapâna piepa a châ. Chyhsa hropa hnohta Thlahpa lia lilawta patlâh theina hmopiepa piepa a châ.
10 Chyhsa hropa hnohta hmonoâhpa tao theina piepa a cha. Chyhsa hropa hnohta biechho theina piepa a châ. Chyhsa hropa hnohta Thlahpa hmopiepazy pahnopasia theinazy piepa châ ta, mo hropa hnohta rei nanopata bie rei theinazy piepa châ ta, mo hropa hnohta cha reih nanopata reipazy chhopasia theina piepa châ tlôh ta.
11 Châhrasala cha zydua cha Thlahpa pakha chata chyhsa to hnohta a khozie lymâ hawhta rai chyupata a hria tyh.
Pôhpa miakha pachiahpa zydua
12 Pôhpa he miakha châ ta, pachiahpa hluhpi hnei ta, pôhpa pachiahpa zydua cha hluh hra sala, pôhpa miakha châ tlôh ta, Krista cha cha hawhna hra cha a châ.
13 Eima zydua ta Zuzy tlyma, Krikazy tlyma, sei tlyma, sei leipa tlyma, pôhpa miakha ta y awpata Thlahpa pakha deita liata bâtipata y chyu tlôh pi ta, Thlahpa pakha deita maniah padosa chyu hra ta.
14 Pôhpa he pachiahpa miakha deita châ leipata. pachiahpa hluhpi tlao a châ.
15 Pheipazah heta, “Ku eih châ leipa vâta pôhpa liata a hlaopa châ va na,” tah sala, cha vâna chata pôhpa liata a hlao leipa châ hlei vei.
16 Chatawhcha nahkhao heta, “Mo eih châ leipa vâta pôhpa liata a hlaopa châ va na,” tah sala, cha vâna chata pôhpa liata a hlao leipa châ hlei vei.
17 Pôhpa tlokhuh he mo châ khai sala theina cha khataih liata a y aw? Pôhpa tlokhuh ta theina châ khai sala, roh theina cha khataih liata a y aw?
18 Châhrasala Khazohpa ta pachiapa to he, pôhpa liana heta a khona maih liata a paysa chyu.
19 Cha zydua cha pachiahpa miakha deita châ sala, pôhpa he khataih liata a y aw?
20 Anodeikuacha pachiahpa hluhpi tlao châ ei ta, châhrasala pôhpa miakha deita châ tlôh ta.
21 Chatawhcha mo heta ku hnohta, “Khâpa ta hmah cha khoh va na,” tah thei vei, luh chhao heta pheipazahzy hnohta, “Khâpa châta hmahta cha khoh va na,” tah thei hra vei.
22 Cha cha rei leipata pôhpa pachiahpa chi leipata a lapa chhao he ama phahnai ngâsâ,
23 pôhpa pachiahpa palyupalih tlâh leipata eima raopazy he palyupalih viapa tlao ama châ. chatanachata eima pôhpa pachiapa angia leipazy heta angiana tlao ama hmô tyh,
24 eima pôhpa pachiahpa angiapazy he cha pa ngiasapa byuh vei. Châhrasala Khazohpa ta pôhpa he a pachhaihna rai y leipata amâ baokhâ chyu awpata,
25 angiana a hnei leipa pachiahpazy cha palyupalih viapata pôhpa he paryhpakhypa a châ.
26 pachiahpa miakha ta pasa a tao khiahtala, pachiahpa zydua ta ama tao tyh, pachiahpa miakha palyupalihpata a y khiahtala pachiahpa zydua ta amâ lykhei tyh.
27 Chatanachata nâmo cha Krista pôhpa nama châ, a pachiahpa chhao nama châ khai hra.
28 Chatawhcha Khazohpa ta awnanopazy hryta ypa ta a miakhana liata apôstôlzy, a mianona liata hrohsopazy, a miathôna liata pachutuhpazy rao ta, chatawhcha hmonoâhpa taopazy, patlâhtuhpazy, baotuhpazy, ryureituhpazy, reih nanopa hluhpi ta bierei theituhpazy.
29 Ama zydua ta apôstôl ama châ khai ma? Ama zydua ta hrohsopa ama châ khai ma? Ama zydua ta pachutuhpa ama châ khai ma? Ama zydua ta hmonoâhpa ama tao khai ma?
30 Patlâhna hmopiepa ama hnei sai ma? Ama zydua ta reih nanopazy ta reih theina ama hnei sai ma?
31 Châhrasala hmopiepazy rônah viapa cha tlao byuh via teh u.
Kyhpachâna
Chatawhcha kyh pha viapa ei cha pamosa aw ei.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||