1 Chyhsapa nata vâlyuhchâpa reihzy ta bie reih hra aw sala, kyhpachâna ei hnei tlôh leipa khiahtala, dawh paro thlâhthlipa tlyma, paotlâ paro thlâhthlipa tlyma ei châ aw.
2 Chhochhielie theina hneipata, bieru zydua nata novâhna zydua pahno khai hra aw sala, tlâhzy pasie theina taih ngiapâna pakipa hnei hra aw sala, kyhpachâna ei hnei tlôh leipa khiahtala, khâpahma châ aw va na.
3 Sipasapazy pasa nawpata ei sôh zydua pie khaipa ta, ei pôhpa mei liata a raopata a pie hra aw sala, kyhpachâna ei hnei tlôh leipa khiahtala ei châta khâpahma phahnai aw vei.
4 Kyhpachâna ta dao thei ta, a nô pha hra ta; kyhpachâna ta hiatlia leipata, kyhpachâna ta anosasy ta a reithai leipata, a palai leipata;
5 a ngia leipata y leipata. Ano phana dei pachâ leipata; pathi-iapata y khoh leipata, moleina lâ pachâ leipata;
6 sia leina liata aly leipata, bie hmeiseihpa deikua cha alykhei tyh ta.
7 Ato pasa tao lyliah ta, ato a ngiapâ ta, ato hnabeiseih ta, ato pasa a tao patlô tyh.
8 Kyhpachâna he khati ta hmah chhâ beih aw vei; anodeikuacha chhochhielienazy he y hra sala lei aw ta; reih nanopata reih theina zy he y hra sala lei aw ta; pahnona he y hra sala a lei aw.
9 A ki leipata pahno pi ta; a ki leipata eima chhochhielie tyh hra;
10 a pakipa a vaw tlô tita deikua cha, a ki leipa he pahleipa a châ ha aw.
11 Ei hawti nota, hawti reih cheih na ta, hawti pahnona ta pahno na ta, hawti pachâna ta ei pachâ tyh; atahmâ ei vaw machâ tawhna heta hawti taozie cha ei bâhsai haw.
12 Atahmâ cha thlalâ liata vivâh deita eima hmô, cha tina deikua cha hmia nata hmia achhypata a châ ha aw. Atahmâla a ki leipata pahno pi ta; cha tina deikua chata eima pahno pakipa hawhna heta eima pahno paki ha aw.
13 Chatanachata he miathôhpa angiapâna zy, hnabeiseina zy, kyhpachâna zy he a y thlâh ha aw; hezy hryta a rônah chaipa cha kyhpachâna he a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||