Krista thyuheina
1 Chatawhcha unawh saih u, Thâtihpha ei cha chhopa ei kha, cha pahnosa heih aw ei na ta, cha Thâtihpha cha aly eichi ta, cha liana chata a duah heih eichi ta.
2 Bie ei cha chhopa ei kha namâ ngiapâ thlâh thlipa châ leipata, khâchâ namâ pyh khiahtala, cha liana chata pachha haipata nama y.
3 A hmiatua chaita ei hmô hrapa cha ei cha chho pachhuahpa ei kha; kha tawhta Krista cha Khazohpa châ bie lymâ hawhta eima moleinazy vâta thi ta, pabupata y ta, Khazohpa châ bie lymâ hawhta noh thôh nohta pathyupata y ta.
5 Pity hnohta a luahpa zy kha; cha hnôh lâna chata pahrawhleinozy hnohta a luah heih ta.
6 Cha tawhna chata unawh za pangawh hlâta hluh viapazy hnohta a luah heih ta, cha hry liata chyhsa hluh via cha atahmâ taihta ama hroh, thokha deikua cha a mô haw ei ta.
7 Cha hnôh lâna chata Zami hnohta a luah heih ta, cha hnôh lâna chata apôstôl zydua hnohta.
8 A chhâ chaina ta cha chyhsa hropa hawhta a pih lei chaipa châ hra aw sala, keima hnohta chhao a luah ta.
9 Kei la apôstôlzy hryta a chyh chaipa, Khazohpa awnanopa ei taolapa vâta, apôstôl ta bi tlâh a châ leipa châ tlôh na ta.
10 Châhrasala Khazohpa ngiachhiena vâta ei châpa hawhta ei châ haw, a ngiachhiena eina piepa cha khâpahrao leipata y leipata. Cha leipa chhaota, âmo zydua hlâta ei hriapasa viapa kha, châhrasala keima ta hria leipa na ta, Khazohpa ngiachhiena ei hnohta a ypa khata tlao a hria.
11 Khâparai châsala kei chhao, âmo chhao, kha hawhna khata chho tyh pi ta, kha hawhna khata nâmo chhao a ngiapâ hra eichi ta.
Athihpa thyuheina
12 Krista cha athihpa hry tawhtapa pathyupata a y tahpa ama chho tlôh khiahta cha, kheihtazie ta e nama hryta thokha ta athihpa thyuheina rai y vei nama tah tly?
13 Athihpa thyuheina rai a y tlôh leipa khiahtala, Krista chhao kha pathyupata y aw vei;
14 Krista kha pathyupata a y vei khiahtala, eima bie chhopa he khâpahrao leipa châ aw ta, namâ ngiapâna chhao khâpahrao leipa a châ hra aw.
15 Cha khiahtala, Krista cha thina tawhta a pathyu tahpata eima reipa vâna khata, Khazohpa lâ kyh liata pahnokheituhpa hai thaipa eima châ hra aw, ano chhao pathyupa châ vei tahpa he a do khiahtala, athihpazy pathyupata y aw veih ei.
16 Athihpazy pathyupata ama y vei khiahtala, Krista chhao cha pathyupata y aw vei.
17 ‘Chatawhcha Krista kha pathyupata a y vei khiahtala, namâ ngiapâna cha khâpahrao leipa châ aw ta, nama moleina liana chata khâ nama y thlâh hapa a châ aw.
18 Chata a châ khiahtala, Krista liata a môpazy kha ama leidia hawpa a châ aw.
19 Atahmâ hro chhôh deita ta Krista chôta hnabeiseina eima hnei khiahtala, chyhsa zydua liata ngiachhie chhi chaipa eima châ aw.
20 Châhrasala Krista cha athihpa hry tawhtapa pathyupata a y hmeiseihpa a châ, a môpazy thyuna hmia a sahtuhpa a vaw châ haw.
21 Chyhsapa vâta thina a vaw ypa vâta, chyhsapa vâ lilawta athihpa thyuheina a vaw y haw hra.
22 Adâh liana chata chyhsa zydua ama thi tyhpa hawhna heta, Krista liana, chata chyhsa zydua pahropata ama y hra aw.
23 Châhrasala âmo su chyu liata; Krista cha thyuheina hmia a sahtuhpa châ ta, cha hnôh lâta avy heihna liana chata Krista eih zy cha.
24 Cha hnôh lâna chata chhâna cha a vaw tlô aw; Krista ta ryureina zy, biehneina zy nata hmotaotheina zydua cha pahnie khai aw ta, Paw Khazohpa hnohta, Khihnarâh cha a pie aw.
25 A khakhaipa zydua a phei ry liata a soh khai hlâ lei cha. ano cha abei ta a y thlâh ha awpa rai châ tlôh ta.
26 Khakhaipa hnôh chaipa pahleipadiapata a y awpa cha, thina he a châ.
27 Châ pathaihpa ta, “Khazohpa chata a phei ry liata ato soh tlôh ta”. Châhrasala “Ato” tahpa liana heta Khazohpa cha anosasy ta a pahlao leipata, Krista ry liata ato a sopa tlao a châ.
28 Krista ryureina ry liata ato sopata a y tina chata, Sawchapawpa tlai chhao cha, a ry liata ato a sotuhpa Khazohpa ry liana chata sopata a y hra aw, Khazohpa cha ato liata ato a châ thei nawpata.
29 Cha hawhta a châ vei khiahta cha, athihpa chata bâti a châpazy cha kheihta ama tao aw? Athipazy pathyupata ama y chachei lei awpa khiahta cha, khâpawpa ma âmo chata bâti ama châ tyh?
30 Khâpa vâta ma keimo chhao he, dawh tato ta chichhihpata eima y tyh?
31 Unawh saih u, Krista Zisu eima Beipa liata ei châ palaikheina cha reipata, nohcharei ei thi tyh, ei tah!
32 Chyhsapa taopa hawhta Ephesi khih liata sahrâhpazy kha a tupa ei châ khiahtala, ei châta khâpa a phahnai aw? Athihpa pathyupata ama y lei awpa khiahta cha, “Niepata doh ei suh u, mylâ eima thi aw mâ tâh.”
33 Dôpata y khah u, “Viasa moleipazy chata nôchâ phapa ama parao tyh.”
34 Sia ngiatapata a hra ula, hmo parao khah u. Thokha chata Khazohpa pahnona rai hnei veih eichi. He he nama noza nawpata ei reih.
Thyuheina pôhpa
35 Châhrasala ahy tlyma ta, “‘Athihpazy cha kheihta e pathyupata ama y aw? Pôhpa kheihawhpa phaohpata ma amâ vy aw?” a tah ngyu aw.
36 Nâ, ahrupa y: Nâma tlaita alei liata chi na tu tyhpa chhao he a thi tua leipa khiahta cha pahropata y vei.
37 Chatawhcha na tu tyhpa he, a pôhpa a y awpa cha tu leipa chi ta, châhrasala a hmôpa dei na tu tyh, sâh hmôpa tlyma, chi hropa hmô tlyma a châ thei na.
38 Châhrasala Khazohpa ta ano khozie lymâ hawhta pôhpa a pi tyh. A hmôpa to hnohta âmo pôhpa chyu cha.
39 Sapa zydua he sapa chi kha châ leipa ei ta; chyhsa sapa a nano ta, sahro sapa a nano ta, pavaw sapa a nano ta, nga sapa chhao a nanopa a châ.
40 Avâ pôhpazy y heih ei ta, alei pôhpazy chhao; châhrasala avâ pôhpa rônahna cha a nano ta, alei pôhpa rônahna chhao a nanopa a châ.
41 Noh rônahna cha a nano ta, thlahpa rônahna cha a nano ta, awhsi zy rônahna chhao a nano ta; awhsi nata awhsi chhao rônahna liana chata a lyu veih ei.
42 He hawhna heta athihpa thyuheina chhao he a châ. Pôhpa cha pabu nota thu theipa châ ta; pathyu nota, thu thei leipa a châ.
43 Palyupalih leipata pabupata y ta, rônah kawpata pathyupata a y. Chi leipata pabupata y ta, hmotaotheina hneipata pathyupata a y.
44 Pabu nota chyhsapa lâ pôhpa châ ta. pathyu nota thlahpa lâ pôhpa a châ. Chyhsapa lâ pôhpa a y khiahta cha, thlahpa pôhpa chhao a y aw.
45 Cha hawhna chata Khazohpa châ bie ta, “Chyhsa hmiatua chaipa Adâh cha chyhsa hrohpa a vaw châ,” a tahpa kha; Adâh hnôh lâ tahpa cha hrona pietuhpa Thlahpa a vaw châ.
46 Châhrasala thlahpa lâ cha y tua leipa ta, chyhsapa lâ cha tlao a y tua, cha khai nah chata thlahpa lâ cha a y.
47 Adâh hmiatuapa cha alei liatahpa, doh-lei ta taopa châ ta; Adâh panona cha avâ tawhtapa a châ.
48 Doh-lei ta taopa chyhsa hawhna khata, alei liata chyhsazy chhao he châ ei ta; avâ tawhta chyhsapa hawhna khata, avâ liata chyhsazy chhao cha ama châ. Doh-lei ta taopa chyhsa lyuna kha eima bupa hawhta avâ tawhta chyhsapa lyuna cha eima bu awpa a châ.
50 Unawh saih u, he he ei cha chho aw ei: Sapa nata thisaih heta Khazohpa Khihnarâh cha to thei leipa aw ta, thi theipa heta thi thei leipa cha to hra aw vei. tahpa hih.
51 Nahthlie teh u, bie nyupa ei cha chho aw ei hih. Eima zydua ta amô cheingei leipa aw pi ta, châhrasala eima zydua ta chiahmie hnôh chaipa a paro tina chata.
52 sôkhata movi hlâta pananopata eima y khai ha aw. Chiahmie cha paro tlôh aw ta, athihpazy cha thu thei leipata pathyupata y aw ei ta, keimo chhao pananopata eima y ha aw.
53 He thu theipa he thu leina ta a pahly awpa châ ta, he thi theipa he thi thei leina ta a pahly hra awpa a châ.
54 Chatanachata he thu theipa he thu thei leina ta pahly tita, cha tina tlai chata: “Pahniena ta thina a palâ khai haw! tahpa bie ropa he a vaw tlô aw.
55 “Hy thina, na pahniena cha khataih lâ a y haw? Hy thina, na zâpa cha khataih lâ a y haw?
56 Thina zâpa cha moleina châ ta, moleina hmotaotheina cha ryhpa bie a châ.
57 Châhrasala eima Beipa Zisu Krista zawhzi ta pahniena maniah pietuhpa Khazohpa lâna chata alyna bie y mawh sy.
58 Chavâta ei unawh kho ngaitapa saih u, â ipata, a pih leipata. Abeipa raihria phahnai khoh ngaitapata khâ hriapata y teh u, nama hriapasana cha Abeipa liana chata khâpahrao leipa châ vei tahpa pahno tlôh eichi ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||