Thlahpa lâ hmopiepa kyh rei viana
1 Kyhpachâna he namâ chhuahna chaipa châ sala, thlahpa lâ hmopiepazy chhao khochhei ha teh u, biechhona he khoh pachai teh u.
2 Rei nanopata bie reina he cha chyhsa hnohta biereipa châ leipata, Khazohpa hnohta biereina tlao a châ; ahyhma ta a reipa cha pahno tlôh lei khâh ei ta, Thlahpa liata bierupa a reipa a châpa vâta.
3 Biechhona deikua he chyhsazy hnohta ama taopathina nata pasyuna bie zy, thlahpalôna bie zy a reih tyh.
4 Reih nanopata bie reina cha ano deita a taopathi tyh, biechhona deikua cha awnanopazy a taopathi tyh.
5 Nama zydua ta reih nanopata bie rei theina nama hneipa cha khokhei ei na ta, châhrasala biechhona nama hneipa ei cha khokhei via heih ei. Awnanopazy ta ataopathina ama hmô thei nawpata a chhopasia vei khiahtala, biechhona he reih nanopata bie reina hlâta a rônah viapa rai a châ.
6 Atahmâ he unawh saih u, reih nanopata bie reipata nama hnohta a vypa châ sala, pahnosana lâ tlyma, pahnona lâ tlyma, biechhona lâ tlyma, pachuna lâ tlyma nama hnohta reih tlôh leipa aw sala, khâpa e ei cha paphahnai sa aw ei?
7 Hro hnei leipa chhaichhi, siaramo tlyma, totâ tlyma he a yzie chybia ahnei leipata a paro khiahta cha, khâpa hla ma topata ama pasasa tahpa kheihta e ama pahno thei aw?
8 Chiahmie he chybia hnei leipata a paro khiahtala, ahy e chariah ka awhpata a chhuahdy aw?
9 Cha hawhna hra chata nâmo chhaota paleih heta reih novâh thei awpata nama reih leipa khiahtala, khâpa bie nama reih tahpa kheihta e ama pahno thei aw? Aruapa liata a reihpa nama châ aw mâ tâh.
10 Khizaw liana heta reih nanopa chi hluhpi y thei aw ta, châhrasala yzie a hnei leipa rai y tlôh lei khâh ta;
11 a reih yzie deikua cha ei pahno tlôh leipa khiahta cha. Kei he a reihtuhpa châta reih nanopa châ aw na ta, a reihtuhpa chhao keima châta rei nanopa a châ hra aw.
12 Chatanachata nâmo chhaota Thlahpa lâ hmopiepazy kyh liata phahnai namâ ngiahpa vâna heta awnanopa sahlao taopathina awpata nama hnei hluh nawpata tlua teh u.
13 Chavâta reih nanopazy ta bie a reihpa chata a chhopasia thei nawpata thlahchhâ mawh sy.
14 Reih nanopazy ta thlah ei chhâ khiahta cha, ei thlahpa ta cha thlahchhâ tlai ta, ei palôhrupa châta deikua cha phahnai hlei vei.
15 Kheihta a châ aw tly? Thlahpa ta thlahchha aw na ta, pahno theina chhaota thlah ei chhâ hra aw; thlahpa ta hla sa aw na ta, pahno theina chhaota ei sa hra aw.
16 Chata leipata cha, thlahpa ta byhnâ aw pa hra la, a pahno leipazy yna liata a ypa chata nâ lynabie reina liana chata kheihta e, “Amen,” a tah thei aw, na bie reipa cha pahno tlôh leipata?
17 Nâma ta la alynabie na reipa pha kaw tlai ta, mo hropa deikua cha taopathi hlei tlôh va.
18 Nâmo zydua hlâta reih nanopazy ta a hluh via ei reipa vâta Khazohpa lâta alynabie reih na ta;
19 châhrasala awnanopa sahlao apakhyna liana chata reih nanopazy bie thy kha reipa hlâta, mo hropazy ei pachu thei nawpata ei pahno theina ta bie miapangawh deita reipa tlao ei khoh via.
20 Unawh saih u, palôhrupa lâta hawti khah u; anodeikuacha moleina kyh liata hawsaih ula, palôhrupa lâta deikua cha pitlo teh u.
21 Ryhpa châbu liana chata, “Reih nanopa chyhsazy paka ta nata râh hropa chyhsazy hmôpata he chyhsazy liana heta bie reih aw na ta; chatana chhao chata na nahthlie hlei aw veih ei. Abeipa ta a tah,” tahpa ta ropa a châ.
22 Chavâta reih nanopazy he ngiapâ leipazy châta ngiana châ leipata ngiapâpazy châta tlao a châ; bie chhopa deikua cha ngiapâpazy châta ngiana châ leipata ngiapâ leipazy châta tlao a châ.
23 Chavâta awnanopa sahlao zydua namâ pakhyna nata nama zydua ta reih nanopazy ta bie nama reih khiahta cha, a pahno leipazy tlyma, ngiapâ leipazy tlyma a vaw ngia ei sala, ahrupata cha reih aw veih ei mâ?
24 Nama zydua ta bie namâ chho khiahta deikua cha, ngiapâ leipa tlyma, a pahno leipa tlyma a ngia sala, a thai leizie nama zydua ta palâsapa châ ha aw ta, nama zydua ta hiahri pasiapa a châ ha aw.
25 a pathipalôh liata nyupa cha palâsapata a y ha aw; chatanachata â khu lâta paopata Khazohpa a naoh aw ta. Khazohpa nama hry liata a y hmeiseih tlai tahpa a phuah aw.
Hmo zydua a mihthawhpata tao awpa
26 Unawh saih u, kheihta ma a châ aw tly? Nama vaw pakhy nahta reithaina hla tlyma, bie pachupata tlyma, pahnosana tlyma, reih nanopazy tlyma, chhopasiana tlyma hnei chyu tyh eichi ta. Ato tao pathi nawpata taopa châ mawh sy.
27 Ahyrai reih nanopazy ta bie a reih khiahtala, pano ta tlyma, a hluh chaipata pathôh ta tlyma châ sala, a thla lymâpata châ hra mawh sy.
28 Chhopasiatuhpa ama y leipa khiahta deikua cha, awnanopa sahlao pakhyna liata a thlih thlâh hapata y sala, âmo nata Khazohpa lâta reih mawh sy.
29 Biechhotuhpazy chhaota pano ta tlyma, pathôh ta tlyma reih ei sala, mo hropazy chata pakhâtata pachâ mawh sy.
30 Anodeikuacha a kiapâh liata a tyupa mo hropa lâta pahnosana bie piepata a vaw y khiahtala, a hmiatuapa cha a thlih thlâh mawh sy.
31 Chyhsa zydua ta amâ chu thei nawpata nata chyhsa zydua thlahlôhpata ama y thei nawpata nama zydua ta pakha lymâ ta bie chho thei tlôh eichi ta;
32 chhochhielietuhpazy thlahpazy cha chhochhie-lietuhpazy rei sai ta ama y.
33 Khazohpa cha atymâna Khazohpa châ leipata, adyhna Khazohpa tlao châ tlôh ta. Mopathaihpa awnanopa sahlao zydua liata a ypa hawhna heta.
34 awnanopa sahlao apakhyna liana chata chanô sahlao cha a thlih thlâh hapata y mawh sy. Âmo lâ bie rei pasaipa châ tlôh lei khâh ei ta, ryhpa châbu ta a reipa hawhna khata, bie zyhpata tlao y ei se.
35 Chatawhcha khâparai amâ chu khoh khiahtala, o lâta ama vahpa hiahri ei se. Awnanopa sahlao apakhyna liata chanô bie reipa he nozachhihpa châ tlôh ta.
36 Khazohpa bie he nâmo tawhta a puapa a châ ma? A châ vei khiahtala, nâmo lâ deita ta a vaw tlôpa a châ ma?
37 Ahyrai chhochhielietuhpa ta tlyma, thlahpa chyhsa ta tlyma, anosasy ta a pachâ khiahtala, nama hnohta bie ei ropa he, Abeipa biepiepa a châ tahpa vaw pahno mawh sy.
38 Châhrasala ahyrai ta a pahno vei khiahtala pahno leipata y thlâh ha mawh sy.
39 Chatanachata unawh saih u, chhochhieliepa he phahnai khoh ula, reih nanopazy ta bie reipa chhao he pakhâ khah u;
40 châhrasala ato angia ngaitapa nata a siapatata taopa châ mawh sy.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | |||||