1 Abeizy 1

1 Abeizy 1

Abishaka ta Davi a chakaona

1 Davi cha machâ ta pawpi kaw ha ta; pohzy bu tyh ei ta, châhrasala lalôh thei hlei leipa ta.

2 Chavâta a chakaotuhpa zy ta a hnohta, “Eima zibeipa abeipa châta laihsa tluapata châ sala, abeipa kiapâh liana heta y thlâh ha sala, a mohôhna hâ ta; na kalachhôh liata a zia sala eima zibeipa abeipa he a lalôh thei aw,” tah ei ta.

3 Chatanachata Izarel râh zydua liana chata laihsa chhithaipa tlua ei ta, Shuna chyhsa Abishaka hmô ei ta, abeipa lâta a chhi ei ta.

4 Cha laihsa cha chhithai kaw ta; abeipa cha mohôh ta, chakao tyh ta; châhrasala abeipa chata a ziakhei vei.

Adônizah ta abei châna a la

5 Hakitha sawchapawpa Adônizah chata, ”Keima ei bei aw,” tahpa ta a pasâhsa kaw ta; talaili nata arâ a kiahpa chyhsa zy sypangawh a hmiako liata a râ awpa zy chhaota a chhuahnoh ta.

6 A paw hra chata khati no hmahta, “Khazia he hawna heta na tao?” tahpa ta palôh châ leipa ta y beih tlôh lei khâ ta. Ano he hmi pha ngaitapa châ hra ta; Absalaw a pazipa a châ.

7 Ano chata Zeruia sawchapawpa Zôaba nata theihthaipa Abiatha cha a chhohia ta; âmo cha Adônizah chhâh châ ei ta, bao tyh ei ta.

8 Theihthaipa Zadôka zy, Zehôiada sawchapawpa Benai zy, hrohsopa Natha zy, Shimei zy, Rei zy nata Davi sahlao chyhsa riahphapa zy deikua cha Adônizah chhâh châ leipa ei ta.

9 Adônizah chata mietahkupa zy, viahchao tôhpa zy, sahroh pasapa thawpa zy, Zôhele Alô liata thie ta, cha cha Enrôkel kiapâh liata a ypa a châ, abeipa sawchapawpa a unawhpa zydua nata Zudah râh liata abeipa nôpawpa sahlao zydua cha hrua ta,

10 hrohsopa Natha zy, Benai zy, chyhsa riahphapa sahlao nata a unawhpa Sawlawmaw deikua cha hrua vei.

11 Chatanachata Natha ta Sawlawmaw nô Basheba hnohta, “Hakitha sawchapawpa Adônizah he eima zibeipa Davi pahno leipa ta a bei haw tahpa pahno va chi mâ?

12 Atahmâ nâma a bohna awpa nata na sawchapawpa Sawlawmaw a bohna awpa ei cha chho tua aw.

13 Abeipa Davi lâta a kei ngia la, a hnohta, ‘Hy Abeipa, ei zibeipa y, na seichanônô hnohta, “Na sawchapawpa Sawlawmaw he, kei hnôh lâta a vaw bei tlai aw ta, ano he ei beidyuchhai liana heta a tyu aw?” tahpa ta chhie sa va chi mâ. Khazia e Adônizah he abei ta a y haw tly?’ tah mah y.

14 Abeipa bie na chho no tlaita kei chhao cha vaw zi aw na ta, na bie reipa cha ei cha vaw pa-ikhei aw,” tahpa ta reih ta.

15 Chatawhcha Basheba cha abeipa lâta chhôhpadâhpa liana chata a kei ngia ta; abeipa cha machâ kaw haw ta, Shuna chyhsa Abishaka chata abeipa cha chakao ta.

16 Basheba chata abeipa cha â bohpa ta a naoh ta, abeipa chata, “Khâpa na khoh?” vaw tah ta.

17 Ano chata, “Ei zibeipa y, ABEIPA na Khazohpa moh reipa ta na seichanônô hnohta, ‘Na sawchapawpa Sawlawmaw he keima hnoh lâta a bei tlai aw ta, ano he ei abeidyuchhai liata â tyuh aw,’ tahpa ta chhie sa haw chi ta.

18 Chahrasala Adonizah a bei hawh, ei zibeipa, abeipa chi heta pahno tlôh lei khâh chi ta.

19 Viahchao tôhpa zy, sahroh pasapa thawpa zy, mietahkupa zy thata thie ta, abei sawchapawpa zydua hrua ta, na chakaotuhpa Sawlawmaw deikua cha hrua vei.

20 Chavâta ei zibeipa, abeipa hnoh lâna heta a abeidyuchhai liata ahyma a tyuh aw tahpa na chho nota Izarel sahlao zydua mokhaoh he nâma ei zibeipa, abeipa chô liata â tawpa thlâh haw.

21 Chata leipa ta la he hawhna he cha aw ta, ei zibeipa, abeipa he a mahpaw zy hnohta a mô hra tita cha kei nata ei sawchapawpa Sawlawmaw he hmoparaotuhpa ta maniah ama rao aw,” tah ta.

22 Abeipa bie â chho ngâ hai nona chata, hrohsopa Natha cha a kei ngia ta.

23 “Moh teh, hrohsopa Natha â vy,” tahpa ta abeipa chho ei ta. Abeipa kiapâh a kei tlô nahta, abeipa hmiakô liata a khu lâta pao ta,

24 Natha chata, “Hy abeipa, ei zibeipa y, ‘Ei hnoh lâta Adônizah he a bei aw ta, ei abeidyuchhai liata a tyuh aw, na tah ma?’

25 Atanoh he zu ta, viahchao tôhpa zy, sahroh pasapa thawpa zy, mietahkupa zy thata thie ta, abei sawchapawpa zydua, pheisaih hyutuhpa zy, theihthaipa Abiatha zy hrua ta; nie nata do ta y ei ta, Khazohpa ta abeipa Adônizah he hrôbieh mawh sy,’ ama tah.

26 Anodeikuacha kei na chakaotuhpa tlai nata theihthaipa Zadôka nata Zehôiada sawchapawpa Benai nata na chakaotuhpa Sawlawmaw cha maniah hrua vei.

27 He he abeipa ei zibeipa bie ta a taopa a châ tlôh khiahta cha abeipa ei zibeipa heta a hnoh lâta abeidyuchhai liata atyuh awpa he ahyma a châ tahpa na chakaotuhpa zy he na vaw chho leipa ma a châ aw?” tah ta.

Sawlawmaw abeipa a châ

28 Chatanachata abeipa Davi chata a chhy ta, “Basheba na aw pa teh u,” tah ta. Chatawhcha abeipa kiapâh lâna chata vawh ta, abeipa hmiakô liata a kei duah ta.

29 Abeipa chata chhie sa ta, “Nôpona zydua liata ei hrona a pabohtuhpa ABEIPA moh reipa ta,

30 na hnohta, ABEIPA Izarel zy Khazohpa moh reipa ta, ‘Na sawchapawpa Sawlawmaw cha ei hnoh lâta â vaw bei tlai aw, kei vyuhpa ta ei abeidyuchhai liana heta â tyuh aw,’ tahpa ta chhie ei sapa hawhna tlai khata atanoh tlai liana chhao heta ei tah aw,” tah ta.

31 Basheba cha â khu lâta pao ta, abeipa cha a naoh ta, “Ei zibeipa, abeipa Davi he, chhâzaw ta hroh mawh sy;” tah ta.

32 Abeipa Davi ta, “Theihthaipa Zadôka nata hrohsopa Natha nata Zehôiada sawchapawpa Benai na aw pa teh u,” tah ta. Abeipa hmiakô lâna cha vawh ei ta.

33 Abeipa ta ama hnohta, “Nama zibeipa chakaotuhpa zy a chhi ula, ei sawchapawpa Sawlawmaw he keima alâ tlai chô liata pakiasa ula, Kihaw su lâta za chhihtha teh u;

34 theihthaipa Zadôka nata hrohsopa Natha ta cha liana chata Izarel zy abei châta sathaw za thu mawh sy; chiahmie tô ula, ‘Khazohpa ta abeipa Sawlawmaw hrôbieh mawh sy!’ tah teh u.

35 Ano cha kaw zi aw eichi ta, ei abeidyuchhai liata â tyuh aw; ano he kei vyuhpa ta a bei awpa châ tlôh ta; ano he Izarel râh nata Zudah râh hyutuhpa châta ei rao,” tah ta.

36 Chatawhcha Zehôiada sawchapawpa Benai chata abeipa cha a chhy ta, “Amen; ABEIPA cha ei zibeipa, abeipa hnohta a y tyhpa hawhta Sawlawmaw hnohta chhao y lymâ hra sala, ei zibeipa abeipa Davi abeidyuchhai cha parôhnahsa via mawh sy,” tah ta.

38 Chatanachata theihthaipa Zadôka zy, hrohsopa Natha zy, Zehôiada sawchapawpa Benai zy, Khere mozy, Pele mozy cha zu ei ta, Kihaw su lâta a chhi ei ta.

39 Theihthaipa Zadôka chata poh-o tawhtapa sathaw sona ki la ta, Sawlawmaw thu ta. Chiahmie tô ei ta; chyhsa zydua ta, “Khazohpa ta abeipa Sawlawmaw hrôbieh mawh sy!” tah ei ta.

40 Chatawhcha zawpi sahlao zydua chata ano cha kaw zi ei ta, zawpi zy chata ramo zy tô ei ta, thata aly ei ta, ama pyu chata alei chalyu ta patlaw ta.

41 Adônizah nata hruapa sahlao a hnohta a ypa zydua chata ama kyhchhi a pai nahta thei ei ta. Zôaba ta chiahmie tôpa a thei nahta, “Khihpi chhôh liata pyu kalihpi a to ngâpa cha kheihtazie ta ma a châ tly?” tah ta.

42 Chahawhta a rei nona tlai chata theihthaipa Abiatha sawchapawpa Zawnatha vawh ta; Adônizah chata, “A vy tua, nâ cha chyhsa siapa châ chi ta, thâtihphapa na vaw tlôkhei thlyu aw,” vaw tah ta.

43 Zawnatha chata a chhy ta Adônizah hnohta, “Tlôkhei va na, eima zibeipa, abeipa Davi ta Sawlawmaw abeipa ta a tao haw;

44 ano hnohta theihthaipa Zadôka zy, hrohsopa Natha zy, Zehôiada sawchapawpa Benai zy, Khere mozy, Pele mozy, abeipa ta tuah ta; abeipa alâ chô liata ama pakiasa haw;

45 theihthaipa Zadôka nata hrohsopa Natha ta Kihaw su liata abei châta sathaw thu haw ei ta, cha tawhna chata thapha ngaitapa ta a khy ei ta, cha chata khihpi chhôh a khaipalie ngâ. Cha cha a pyu nama theipa cha a châ.

46 Sawlawmaw cha khihnarâh abeidyuchhai liana chata a tyuh haw ta.

47 Abeipa chakaotuhpa zy cha, ‘Na Khazohpa ta na moh hlâta Sawlawmaw moh cha papha via sala, na abeidyuchhai hlâta a abeidyuchhai cha parôhnahsa via mawh sy,’ tahpa ta eima zibeipa, abei Davi a lykhei awpa ta thata sie hra ei ta. Chatawhcha abeipa cha a rakhô liata a bôh ta.

48 Chatawhcha abeipa chata he tana heta a tah, ‘ABEIPA Izarel zy Khazohpa atanoh tlai ta, ei abeidyuchhai liata atyuh awpa a vaw raotuhpa cha reithaipa ta y mawh sy, ei mo tlaita a hmô haw hih,’ tahpa ta,” tah ta.

49 Adônizah chyhsa hruapa zydua chata chi haw ei ta, thyu ei ta, âmo lâpi chyu lâta sie khai haw ei ta.

50 Adônizah chata Sawlawmaw cha chi ta; thyu ta, maisâh kizy kei patu haw ta?

51 Adônizah ta abeipa Sawlawmaw chi ta, ‘Abeipa Sawlawmaw heta a chakaotuhpa he zaozi ta a thie lei awpa ta kei lâta chhiesa mawh sy,’ tahpa ta maisâh ki a patu,” tahpa ta Sawlawmaw cha chho ei ta.

52 Sawlawmaw chata, “Chyhsa ngâchhihpa a châpa a palâsa khiahtala, a sâbu miakha hmah alei liata tla aw vei; anodeikuacha hmoparaopa a hnei tahpa pahnona a y khiahtala a thi aw,” tah ta.

53 Chatanachata Abeipa Sawlawmaw chata chyhsa tuah ta, maisâh tawhtapa cha a zâ chhi ei ta. Chatawhcha vawh ta abeipa Sawlawmaw cha a naoh ta; Sawlawmaw chata a hnohta, “Na o lâ a di teh,” tah ta. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

1 Abeizy 2

1 Abeizy 2

Sawlawmaw hnohta Davi biepiepa

1 Davi thi daihti a vaw hnia haw ta, a sawchapawpa Sawlawmaw cha bie pie ta,

2 Leilô zydua ryhpa hawhta ei sie hra aw. Thatlô ngaitapa ta y la, paw tloh ngaitapa ta y teh,

3 na hmotaopa maih nata nâ heina lâ maihta thlaochhipa ta na y thei nawpa ta Mawsi ryhpa liata a rohpa hawhta ABEIPA na Khazohpa ta a lâpi zy a chhih awpa nata a bieraopa zy, a biepiepa zy, a pachiapa zy nata a biepahnosapa zy a pyh awpa ta bie a piepa zy he zyh teh;

4 ABEIPA ta keima kyh liata, ‘Na pathlazy ta ama pathipalôh hmeihseihpa nata ama palôhrupa hmeihseihpa ta ei mohmô liata hmeihseihpa ta y awpa ta ama yzie liata amâ chado khiahtala Izarel zy abeidyuchhai liata atyuh awpa chi aw veih ei,” tahpa ta a reipa kha a pa-i aw.

5 Zeruia sawchapawpa Zôaba eina tahna zie Izarel zy pheisaih hyutuhpa pano, Nera sawchapawpa Abne nata Zethe sawchapawpa Amasa zy a tahna zie tlai kha na pahno na, kha hawhta thiepa ta a dy nota adyuhpa thisaih palopa hawhta palo ta, a chai liata a chaisaihna liata a pheiky a kypa liata adyuhna thisaih a pahlaona zie zy kha.

6 Chavâta ryhpaohna na pahnona zie hawhta tao la, a luh liata a sâ pawhpa he thlâ lâta thlahlôh ngaitapa ta pasiesa khah y.

7 Kilia chyhsa Barzilai sawzy chô liata deikua cha ngiachhiena palâsa la, na tlâhkhai liata pati a dôhtuhpa ta pahlao hra mah y; na unawhpa Absalaw tawhta ei râ nona khata ei hnohta a vy tlôh ei ta.

8 Bahuri khihpa Benzami pathla Kera sawchapawpa Shimei he na hnohta y ta, ano chata Mahanai su lâ ei sie nona khata chhiesana pha lei ngaitapa ta chhie na sapa ta; anodeikuacha Zawdah liata eina dy awpa ta a zu ta, cha liana chata, ‘Zaozi ta cha thie aw va na,’ tahpa ta ABEIPA moh reipa ta a hnohta chhie sa haw na ta,

9 ‘Chavâta thai châpa ta pathlie khâ, chyhsa a sopa châ tlôh chi; a chô liata kheihta na tao awpa ma a châ tahpa pahno aw chi ta, a luh liata a sâ pawhpa cha thisaih chhaota thlâ lâta na pasiesa aw,” tah ta.

Davi thina

10 Davi cha a mahpaw zy hnohta â mo hawh hra ta, Davi a bei chhôh cha kô sypalih a châ; Hebraw khih liata kô sari a bei ta, Zerusale khih liata kô sythôh nata kô thôh a bei ta.

12 Sawlawmaw cha a paw Davi abeidyuchhai liata a tyuh ta; chatanachata a khihnarâh cha thata pa-ipa ta vaw y haw ta.

Sawlawmaw ta ano khihnarâh a padua

13 Hakitha sawchapawpa Adônizah cha Sawlawmaw nô Basheba lâta vawh ta. Ano chata, “Phana lâ kyh ta a vypa ma na châ tly?” tah ta. Ano ta, “Phana lâ kyh ta a châ,” tah ta.

14 Ano chata “Na hnohta khâpa tlyma reih awpa ei hnei,” tah ta. Ano chata, “Reih teh,” tah ta.

15 Ano chata, “Râh he kei eih a châ haw tahpa nata Izarel sahlao zydua chhao heta keima he abei châta eina sai thlâh haw ei tahpa pahno chi ta; châhrasala râh cha ei unawhpa chata tlao a vaw palie haw ta, ABEIPA a vaw raona zie ta ano eih châ rai ta.

16 Atahmâ he hmo miakha ei cha hiah awpa hnei na ta; â ryh tah leipa ta y chachei ta khah y,” tah ta. Ano chata a hnohta, “Reih teh,” tah ta.

17 Ano chata, “Ngiachhie ngaitapa ta abeipa Sawlawmaw na chhopa la, na bie cha ei tlôh lei khâh aw ta, Shuna chyhsa Abishaka lahpinô ta na pahneisa mawh sy,” tah ta.

18 Basheba chata, “A phana; abeipa cha ei cha vaw chho pa aw,” tah ta.

19 Basheba cha Adônizah chho pa awpa ta abeipa Sawlawmaw lâta vawh ta. Chatawhcha abeipa cha a no a vaw ly awpa ta thyu ta, a hmiako liata a bôh ta; a abeidyuchhai liana chata a tyuh ta, abeipa nô châta abeidyuchhai palasa ta; a chachâh lâta a tyuh ta.

20 Ano chata, “Hmo miakha a chyhpa ta ei cha hiah aw, â ryh tah leipa ta y chachei ta khah y,” tah ta. Abei chata a hnohta, “Hiah mah y, ei nâ y, â ryh tah leipa ta y chachei ta aw va na,” tah ta.

21 Ano chata, “Shuna chyhsa Abishaka he na unawhpa Adônizah lahpinô châta pahneisa teh,” tah ta.

22 Abeipa Sawlawmaw chata achhy ta, a nô hnohta, “Kheihta zie ta Shuna chyhsa Abishaka he Adônizah châta a hiahpa ma na châ tly? Râh chhao he hiapa lâlao châ chih; ano cha ei uhta a châ mâ tâh, ano châta nata theihthaipa Abiatha nata Zeruia sawchapawpa Zôaba châta chhao hiah châ chi,” tah ta.

23 Chatanachata Abei Sawlawmaw chata, “ABEIPA moh reipa ta Adônizah hmo hiapa heta ano chô liata thina kyh a reipa a châ hlei leipa khiahtala, Khazohpa ta a taopa hawhta na tao sala, cha hlâta tha via chhaota!

24 Chatanachata ABEIPA a bie taipa hawhta na pa-i ta, ei paw Davi abeidyuchhai liata na patyusa ta, chhôhkhana paduatuhpa hrona reipa ta ei reih, Adônizah he atanoh heta thie awpa a châ,,” tahpa ta chhie sa haw ta.

25 Chatanachata Abei Sawlawmaw chata Zehôiada sawchapawpa Benai cha tuah ta; ano chata tu sao ta, thie haw ta.

26 Chatawhcha theihthaipa Abiatha hnohta abeipa ta, “Anathô khih liata na o lâta a di teh; a thi tlâh châ chi ta. Châhrasala ei paw Davi hmiakô liata Abeipa KHAZOHPA Byh nâ sy tyhpa vâta nata ei paw riethei taona zydua liana chata na vaw taokhei haw tyhpa vâta atahmâ la cha thie mâh aw va na,” tah ta.

27 Sawlawmaw chata Abiatha cha ABEIPA theihthaipa a châna pabâsa haw ta, ABEIPA ta Shilôh khih liata Eli chhôhkha zy kyh a reipa kha a patlôsa thei nawpa ta.

28 Cha kyh cha Zôaba ta vaw thei ta, Zôaba cha Absalaw chhâh a châ lei tarawpa ta Adônizah chhâh a châpa châ tlôh ta, chatanachata Zôaba cha ABEIPA poh-o lâta a râ ta, maisâh kizy cha patu haw ta.

29 “ABEIPA poh-o lâta Zôaba a râ ta, maisâh thaby liata a y,” tahpa ta Abeipa Sawlawmaw chho ei ta, chatanachata Sawlawmaw chata Zehôiada sawchapawpa Benai cha, “Khy hnao teh,” tahpa ta tuah ta.

30 Chatawhcha Benai cha ABEIPA poh-o lâta khy ta a hnohta, “Abeipa ta, ‘Pua mawh sy’ a cha tah na,” tah ta. Ano chata, “Châ bao va, he liana heta thi lavâ na,” tah ta. Cha bie cha Benai chata abeipa lâta tlôkhei heih ta.

31 Abeipa chata a hnohta, “A reipa hawhna chata kaw tao la, tusao la, pabu teh; a chhâpa y leipa ta Zôaba ta thisaih a palona tawhtapa kha, kei nata ei paw chhôhkha zy he na pathaisa thei nawpa ta.

32 Ano hlâta chyhsa sia viapa nata pha viapa pano, Nera sawchapawpa Abne Izarel zy pheisaih hyutuhpa nata Zethe sawchapawpa Amasa Zudah zy pheisaih hyutuhpa kha, ei paw Davi pahno leipa ta siehnao ta, zaozi ta a thiepa vâta ABEIPA ta a thisaih cha ano luh chô liata tlai a vaw palie aw.

33 Chatanachata ama thisaih cha Zôaba luh chô liata nata a pathlazy luh chô liata chhâzaw ta a lie aw ta; Davi chô liata zy, a pathlazy chô liata zy, a chhôhkha chô liata zy, a abeidyuchhai chô liata zy deikua cha ABEIPA tawhtapa thlahlôhna chhâzaw ta a y thlâh ha aw,” tah ta.

34 Chatanachata Zehôiada sawchapawpa Benai cha khy ta, tusao ta, thie haw ta; râhpathohpa liata ano o liana chata pabu haw ei ta.

35 Abeipa ta Zehôiada sawchapawpa Benai cha pheisaih sahlao chô liata a vyuhpa ta paysa ta, theihthaipa Zadôka cha abeipa ta Abiatha vyuhpa ta paysa ta.

36 Chatawhcha abeipa ta Shimei cha pa-awsa ta a hnohta, “Zerusale liana heta o sa la, cha liana chata y la, cha tawhtapa cha khataih lâ hmah pua khâ.

37 Na pua no, Kidraw chavah na chaka no tlaita na thi aw tahpa pahno teh; na thisaih cha nâma luh chô lia tlaita a y aw,” tah ta.

38 Shimei chata abeipa hnohta, “Â do na; abeipa ei zibeipa ta a reipa hawhna chata na chakaotuhpa ta a tao lymâ aw,” tah ta. Shimei cha Zerusale liana chata bohpi y ta.

39 Châhrasala kô thôh tawhna chata Shimei seizy hry liata pano cha Katha khih abeipa Maaka sawchapawpa Akisa lâta a râ ei ta, “Na seizy cha Katha khih liata ama y,” tahpa ta Shimei cha chho ei ta.

40 Shimei cha thyu ta, alâ ky padia ta, a seizy tlua awpa ta Katha khih lâ Akisa lâna chata sie haw ta; Shimei chata Katha khih tawhtapa a seizy cha kei dy haw ta.

41 Shimei Zerusale khih tawhtapa pua ta, a vaw tlô haw heih, tahpa Sawlawmaw cha chho ei ta,

42 abeipa chata Shimei cha pa-awsa ta a hnohta, “Na pua no, râh hro lâ na pua no tlaita na thi aw,” tahpa ta ABEIPA moh reipa ta chhie cha pasasapa ta cha pahnosa haw vana mâ? Chatawhcha nâ chhaota ei hnohta, ‘Na bie reipa ei theipa he a pha na,’ na tah kha zaw.

43 Khâpa vâta ABEIPA chhiesapa nata bie ei cha piepa kha na patlô vei?” tah ta.

44 Abeipa chata Shimei hnohta, “Na pathipalôh chhôh moleizie ei paw Davi chô liata na taona ziezy kha pahno khai chi ta; ABEIPA ta na moleina he nâma luh chô liata tlai a vaw palie aw.

45 Abeipa Sawlawmaw deikua cha byhnâ awpa ta y aw ta, Davi abeidyuchhai cha ABEIPA hmiakô liata chhâzaw ta pa-ipa ta a y aw,” tah ta.

46 Chatanachata abeipa chata Zehôiada sawchapawpa Benai cha bie pie ta; ano cha pua ta, tusao ta, thie haw ta. Chatanachata khihnarâh cha Sawlawmaw ku liata pa-ipa ta y haw ta. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

1 Abeizy 3

1 Abeizy 3

Sawlawmaw ta Phirao sawchanônô a hnei

1 Sawlawmaw ta Izi beipa Phirao nata a zao khina tao ta; Phirao sawchanônô hnei ta, ano o nata ABEIPA o a sa hlâta nata Zerusale kuh ta a padôh hlâ lei cha Davi khihpi liata paysa ta.

2 Zawpi sahlao zy cha su a sâhpa zy liata atheihna hlâ tyh ei ta, cha hlâta cha ABEIPA moh châta o sâhpa a y mâh leipa vâta.

Sawlawmaw ta sona hnei awpa ta thlah a chhâna

3 Sawlawmaw chata ABEIPA kyh pachâ ta, a paw Davi bieraopa zy cha zyh tyh ta; su sâhpa zy liata atheihna hlâ tyhpa ta rohpahâhpa zy a rao thlâh ha tyh tarawpa ta,

4 abeipa cha atheih awpa ta Kibia khih lâ sie ta, cha cha su sâhpa rôhnah ngaitapa châ tlôh ta; Sawlawmaw chata cha maisâh chô liana cha raopa hlâna sâh kha tlai hlâ ta.

5 Kibia khih liana chata ABEIPA cha Sawlawmaw lâta zâ ta a mâ lâta a vaw luah ta; Khazohpa ta, “Hiah teh, khâpa ei cha pie aw,” tah ta.

6 Sawlawmaw chata, “Na chakaotuhpa ei paw Davi kha na mohmô liata hmeihseihna liata nata siana liata nata pathipalôh do ngaitapa phaohpa ta a ypa lymâ hawhna khata nâma ta a hnohta ngiachhiena thata paluahsa chi ta; nâma ta he ngiachhiena hluh ngaitapa he ano châta sopa chi ta, nâma ta a abeidyuchhai liata atyuh awpa sawchapawpa pie chi ta, atanoh ta a vaw ypa tlai hawhna heta.

7 Chatanachata hy ABEIPA Khazohpa y, nâma ta na chakaotuhpa he ei paw Davi vyuhpa ta abei ta tao haw chi ta, kei la hawtipa dei châ na ta; bie a vyna lâ nata vawna lâ chhao he pahno thai leipa na ta.

8 Na chakaotuhpa he na chyhsa zy nâ tlypa sahlao chyhsa hluhpi ama hluhpa vâta reitiah leipa nata a hluhzie pahno tiah leipa zy hry liana heta y ta.

9 Na chyhsa zy ryurei pana awpa ta na chakaotuhpa he novâhna pathipalôh pie mah y, a chhie nata a pha ei pahrua thei nawpa ta; na chyhsa he zie zydua he ahy e ryureih thei aw?” tah ta.

10 Sawlawmaw ta cha hmo cha a hiahpa vâta cha bie reipa chata ABEIPA palysa ngaita ta.

11 Khazohpa ta a hnohta, “Nâ ta na châta hro pasihna hiah leipa chi ta, he hawhpa he tlao na hiapa vâta nata na châta hneirôhna zy chhao hiah leipa chi ta, na khakhaipa zy thina chhao hiah leipa chi ta, na châta ryurei thaina tlao na hiapa vâta,

12 na hiapa hawhta tao haw na ta. Sona nata novâhna pathipalôh ei cha pie, chatanachata na hmia lâta nâma hawhpa rai ahyhmah y leipa ei ta, na hnôh lâta chhao nâma hawhpa rai cha ahyhma y khao hra aw veih ei.

13 Na hiah leipa hneirôna nata rôhnahna chhao ei cha pie hra, chatanachata na hro chhôhta abei hry liata nâma hawhpa rai y aw veih ei.

14 Na paw Davi ta â ngiapa hawhta ei bie raopa zy nata ei biepiepa zy a pyh awpa ta ei lâpi zy nâ chhih khiahtala, na hro ei pasihsa hra aw,” tah ta.

15 Sawlawmaw cha a vaw thei ta, a amâ vaw châ ta. Zerusale lâ vawh ta, ABEIPA Biehraina Byh hmiakô liata a duah ta, raopa hlâna nata adyhna hlâna zy hlâ ta, a chakaotuhpa zydua châta kyhchhi tao ta.

Sawlawmaw ryureina sopa

16 Chatawhcha chanô pano sihryhpa, abeipa lâna chata vawh ei ta, a hmiakô liata a duah ei ta.

17 Chanô pakha chata, “Hy ei zibeipa y, he chanô nata o miakha liata y pi ta; cha o liata ei y nona chata saw sa na ta.

18 Chatawhcha saw ei sa tawhta noh thôh tawhna chata he chanô chhao heta saw sa hra ta; hmaohkha ta a ypa châ pi ta; cha o liata a ypa keimo pano dei leipa cha cha o liata ahyhmah ta khichhai y leipa ei ta.

19 Chatawhcha he chanô saw he zâ ta thi ta, a hnieh saopa a châ.

20 Chatanachata zâcho ta thyu ta, na seichanônô he â mô chhôhta ei sawchapawpa ei kiapâh liatahpa cha la ta, a pyh ta, a saw a thipa cha nâ papyhsa ta.

21 A mylâ myta ei saw sâhpi pie awpa ta ei vaw thyu nahta, a thipa a vaw châ thlâh haw; châhrasala my ta ei vaw moh pasia nahta, sawchapawpa ei sapa kha châ leipa ta,” tah ta.

22 Châhrasala chanô hropa chata, “Châ vei, a hrohpa he ei sawchapawpa châ ta, a thipa he na sawchapawpa a châ,” tah ta. Pakha chata, “Châ vei, a thipa he na sawchapawpa châ ta, a hrohpa he ei sawchapawpa tlao a châ,” khâchâ tah hra ta. Cha hawhna chata abeipa hmiakô liana chata reih rairieh ei ta.

23 Chatanachata abeipa chata, “Pakha ta, ‘A hrohpa he ei sawchapawpa câa ta, a thipa he na sawchapawpa a châ,’ tah ta; pakha ta, ‘Châ vei, a thipa he na sawchapawpa châ ta, a hrohpa he ei sawchapawpa tlao a châ,’ tah hra tlôh eichi ta,” tah ta.

24 Chatawhcha abeipa chata, “Zaozi na vaw pie teh u,” tah ta. Chatanachata zaozi cha abeipa hmiakô liana chata vaw cheih ei ta.

25 Chatawhcha abeipa chata, “Hawti a hrohpa kha bo no lâta tai ula, a khophie pakha pie ula, a khophie cha pakha pie teh u,” tah ta.

26 Chatanachata hawsaih a hrohpa nô chata, a saw cha a tha pasa ngaita tlôh ta, abeipa hnohta, “Hy ei zibeipa y, hawsaih a hropa he anô cha pie thlâh ha teh, thie cheita khâ,” tah ta. Pakha deikua chata, “Kei eih châ hlei kha sa, nâ eih châ hlei hra kha sa; tai pachhô thlâh ha teh,” tah ta.

27 Chatanachata abeipa chata achhy ta, “Hawsai a hrohpa kha a hmiatuapa chanô hnohta pie teh u, thie cheita kha u, ano tlai kha a nô a châ,” tah ta.

28 Izarel sahlao zydua chata cha kyh liata abeipa ryureina zie cha thei ei ta; abeipa cha chi ngaita ei ta, ryurei nawpa ta Khazohpa sona cha ano liana chata a y tahpa pahno haw tlôh ei ta. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

1 Abeizy 4

1 Abeizy 4

Sawlawmaw chakaotuhpa zy

1 Abeipa Sawlawmaw cha Izarel sahlao zydua abei ta y haw ta,

2 hezy he a molaipa sahlao hneipa zy cha ama châ; Zadôka sawchapawpa Azariah cha theihthaipa châ ta;

3 Shisa sawchapawpa Elihôre nata Ahiah zy cha chârohtuhpa châ ei ta; Ahilu sawchapawpa Zehôsapha cha thâtih rohtuhpa châ ta;

4 Zehôiada sawchapawpa Benai cha pheisaih hyutuhpa châ ta; Zadôka nata Abiatha cha theihthaipa châ ei ta;

5 Natha sawchapawpa Zabu cha theihthaipa nata abei viasa cha pahly ta;

6 Ahisa cha ochhôh lâta hyutuhpa châ ta; Abada sawchapawpa Adônira cha rai pahriasapa zy hyutuhpa a châ.

7 Sawlawmaw chata Izarel sahlao zydua chô liata hyutuhpa pahrawhleino hnei ta, cha sahlaozy chata abeipa châta nata a chhôhkha zy châta niepa pachâ tyh ei ta; chyhsa pakha ta kô kha ta thla kha lymâ niepa pachâ awpa a châ.

8 Hezy he ama moh zy cha a châ: Ephrai tlâh râh liata Benhu;

9 Makaza khih liata zy, Bendeka khih liata zy, Shaalbi khih liata zy, Elôbehana khih liata zy, Besheme khih liata zy;

10 Aruba râh liata Benhese, ano chata Sôkô nata Hepha râh zydua topa ta;

11 Dawh khih tlâh sâhpa râh zydua liata Benbinada, (ano chata Sawlawmaw sawchanônô Tapha lahpinô ta hnei ta);

12 Tana khih nata Mekidô liata zy, Zezrel khih nohdi Zarethana khih kiapâh liata a ypa Besia kao zydua zy, Besia tawhta Abelmehôlah liata zy, Zôkania râhri taihta Ahilu sawchapawpa Bana;

13 Ramôkilia khih liata Benkeba, ano chata Manase sawchapawpa Zaira khih Kilia râh liata a ypa zy cha topa ta. Basana râh liata Arkôba khih rôhnah ngaitapa khih sycharu kuh nata a hraina dawh thuatlai a hneipa zy chhao topa ta;

14 Mahanai khih liata Idô sawchapawpa Ahinada;

15 Nathalai râh liata Ahimaza, ano chhao chata Sawlawmaw sawchanônô lahpinô ta hnei ta;

16 Asera nata Belô khih liata Husai sawchapawpa Banah;

17 Iskara râh liata Paruah sawchapawpa Zehôsapha; 18 Benzami râh liata Elah sawchapawpa Shimei;

19 Amawri mo beipa Sihaw nata Basana beipa Ôka Kilia râh liata Uri sawchapawpa Keba, cha râh liata hyutuhpa ano deita a y.

Sawlawmaw sona nata hneirôna

20 Zudah zy nata Izarel zy cha tilaipi ngiakâh leisadi zie tlaita hluh ei ta; niepa ta doh ei ta, thapha ngaitapa ta y tyh ei ta.

21 Sawlawmaw chata Euphrate tawhta Philistina mo râh nata Izi râhri taihta râh zydua chô liana chata ryu reih ta, lymâ zy vaw cheih tyh ei ta, Sawlawmaw hro chhôh zydua ta chakao tyh ei ta.

22 Sawlawmaw noh kha nie khi cha viahdie di ngaitapa panuana hmo sythôh nata viahdie panuana hmo sycharu châ ta,

23 viahchao tôhpa thawh ngaitapa pô hrawh zy, mietahkupa za kha zy chhaota, cha leipa chhao cha zuneipa zy, sakhih zy, sasu zy, aw thawpa zy chhao.

24 Euphrate haosa lâ râh zydua Tiphasa tawhta Kaza taihta chavah haosâ khô lâta abei sahlao zydua chô liana chata a bei ta; a chheipâh liatahpa zydua chhao chata thlahlôhpa ta y chyu ei ta.

25 Sawlawmaw hro chhôh zydua chata Zudah sahlao nata Izarel sahlao cha Dana tawhta Besheba khih taihta chyhsa to âmo krezôh kiapâh liata nata âmo theiku kiapâh liana chata thlahlôh ngaitapa y chyu ei ta.

26 Sawlawmaw chata a talaili a daophituhpa arâ pasyna thy palih nata arâ a kiahpa chyhsa thy kha nata sâh no hnei ta.

27 Chazy hyutuhpa zy chata âmo topa thla lymâ liata abeipa Sawlawmaw nata abeipa Sawlawmaw tlâhkhai liata a vaw dôhtuhpa zydua niepa cha pachâ tyh ei ta; pie paki leipa hnei beih veih ei.

28 Chyhsa to ta ama tao awpa raopa lymâ hawhta a yna awpa su liana chata arâ zy nata sahroh chahra ngaitapa zy chata bali sâh nata sâh kôzy vaw soh tyh ei ta.

29 Khazohpa ta Sawlawmaw cha sona nata novâhna thata nata palôhrupa kawhna tilaipi kiah liata leisadi hawh tlaita pie ta,

30 Sawlawmaw sona chata nochhi lâ saw zydua sona nata Izi mozy sona zydua cha khô khai ta.

31 Chyhsa zydua hlâta a so, Mahôla sawzy Ezra chyhsa Etha zy, Hima zy, Kalkôla zy, Darda zy hlâta chhaota; chatanachata a chheipâh pho zydua hry liana chata a moh pathâh haw ta.

32 Bieso sâh thôh reih ta; a hlazy cha sâh kha nata miapangawh a châ.

33 Tho thâtih zy chhao Lebanaw liata sidy tho tawhta kuh liata a thaopa hisaw taihta reih tyh ta; sa thâtih zy, pavaw thâtih zy, alyh thaipa thâtih zy, nga thâtih zy chhao reih tyh ta.

34 Chatanachata Sawlawmaw sona thâtih a theipa maih cha khizaw abei sahlao zydua tawhta chi to liata chyhsa a sona nahthlie awpa ta a vy tyh ei ta. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

1 Abeizy 5

1 Abeizy 5

Sawlawmaw nata abeipa Hirama ama viasana

1 Tyre beipa Hirama ta Sawlawmaw lâta a chyhsa zy tuah ta, a paw vyuhpa ta abei châta sathaw ama thu tahpa vaw thei haw tlôh ta; Hirama cha Davi a pasô kawpa châ ta.

2 Sawlawmaw chata Hirama hnohta,

3 “Ei paw Davi khata ABEIPA ta a pheipazah ry liata a so hlâ lei kha cha a chheipâh to liata adyuhna zy vâna kha ABEIPA a Khazohpa moh châta o sa thei vei tahpa pahno chi ta.

4 Atahmâ deikua cha ABEIPA ei Khazohpa ta su to liata thlahlôhna maniah pahneisa haw ta; khakhaipa zy y khao leipa ei ta, vâchhiena chhao y khao hra vei.

5 ABEIPA ta ei paw Davi hnohta, ‘Na sawchapawpa na vyuhpa ta na abeidyuchhai ei patosa awpa chata ei moh châta o cha a sa aw tahpa ta a vaw rei hawpa hawhna khata ABEIPA ei Khazohpa moh châta o sa a chhuah na ta.

6 Chatanachata Lebanaw liatahpa sidy thozy na thlupa awpa ta bie pie la; ei chakaotuhpa zy chhao na chakaotuhpa zy hry liata a vaw hlao aw ei ta, na chakaotuhpa zy hlao cha na reipa maih hawhta ei cha pie lymâ aw; Sidaw mozy hawhta tho a thlu thaipa eima hry liata ahyhmah y veih ei tahpa pahno tlôh chi ta,” tahpa ta chyhsa tuah ta.

7 Hirama ta Sawlawmaw bie a thei nahta aly ngaita ta, “He chyhsa hluh ngaitapa chô liata ryurei awpa ta sawchapawpa so ngaitapa Davi a pietuhpa ABEIPA cha atanoh liana heta reithaipa ta y mawh sy,” tah ta.

8 Hirama ta Sawlawmaw hnohta, “Bie eina tapa chi cha vaw thei na ta; sidy tho kyh nata meisa tho kyh cha na byuhpa maih ei tao aw na.

9 Ei chakaotuhpa zy ta Lebanaw tawhta tilaipi taihta vaw cheih aw ei ta; a su maniah na raopa awpa tilaipi lâta cha soh awpa ta chahrysa aw na ta, cha su liana chata pathlâsa aw na ta, nâma ta na vaw la aw; chatawhcha nâ chhao ta ei chhôhkha zy nie a topa ta ei byuhpa na pachâ aw,” tahpa ta chyhsa tuah ta.

10 Chatanachata Hirama chata sidy tho nata meisa tho cha Sawlawmaw cha a byuhpa maih pie ta,

11 Sawlawmaw ta Hirama chhôhkha zy nie awpa ta uit sâh panuana thy no nata sathaw chariehpa panuana thy no pie ta, cha cha Sawlawmaw ta kô chareih ta Hirama a pie tyhna zie cha a châ.

12 Chatawhcha ABEIPA ta a taihpa haw tlaita Sawlawmaw cha sona pie ta; Hirama nata Sawlawmaw likawh liata adyhna y ta; ama pano ta bie a hraih rairieh ei ta.

13 Abeipa Sawlawmaw chata Izarel sahlao zydua hry liata rai pahriasapa py tao ta, rai pahriasapa py cha chyhsa thy thôh ama châ.

14 Lebanaw liata thla kha ta a thla lymâ pata thy kha tuah tyh ta; thla kha Lebanaw liata y ei ta, thla no ama o liata ama y; Adônira cha rai pahriasapa zy hyutuhpa a châ.

15 Sawlawmaw chata hmo phaohpa thy sari nata alô a daihpa thy charie tlâh zy liata hnei ta,

16 chazy cha rei leipa ta Sawlawmaw chata a raihria chô liata hyutuh viapa raihria a vaihtuhpa sâh thôh nata za thôh hnei hra ta.

17 Chatawhcha abeipa biepiepa ta lôbôpa cha alô daih chiehpa ta paryh awpa ta alô laipapi, alô ma ru ngaitapa zy vaw cheih ei ta.

18 Chatawhcha o satuhpa sahlao Sawlawmaw chyhsa zy nata Hirama chyhsa zy nata Keba mozy chata alô zy cha daih ei ta, o sana awpa ta tho nata alô zy cha a chhuahnoh ei ta. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

1 Abeizy 6

1 Abeizy 6

Abeipa O Sawlawmaw ta a sa

1 Izarel pathlazy Izi râh tawhta ama pua rakha tawhta kô za palih nata sychariena kô, Izarel sahlao zy chô liata Sawlawmaw a beina kô palihna, Ziva thla, thla nona liata ABEIPA o sapa cha pathao ta.

2 Abeipa Sawlawmaw ta ABEIPA châta o a sapa cha a doh lâ dy sycharu châ ta, a hâ lâ dy syno châ ta, a sâhna lâ dy sythôh a châ.

3 Cha achhyna-o hmia lâta aika cha a hâ lâ hawhta dy syno a seihpa châ ta, a o hmia lâta pa a doh lâ cha dy hrawh a châ.

4 Chatawhcha o chata opy a buahpa ta a vâchapiapa ypa ta tao ta.

5 A o pâhchhô a dopa ta, achhyna-o pâhchhô nata achhyna su pâhchhô a dopa ta chhao, cha o pâhchhô pasusapa ta o a chhâh a hneipa sa ta; chatanachata a dopa ta chhôhpadâhpa tao ta.

6 A chhâh a hnai chaipa cha a hâ lâ dy pangawh châ ta, a liah liah tahpa cha a hâ lâ dy charu châ ta, a miathôhna cha a hâ lâ dy sari a châ; khâpia zy cha o pâhchhô liata chahrao byuh leipa ta, khôtho lâta o pâhchhô liana chata a hniena tao tlôh ta.

7 Chatawhcha o cha ama sa nota alô a chaona su liata daih chiehpa saita sapa a châ, chatanachata ama sa chhôh zydua cha syulô pyu zy, ahrei pyu zy, thua chhaichhi pyu rai zy cha o liana chata theipa châ vei.

8 Chhôhpadâhpa liahliah chaipa zy chhikao cha, cha o chachâh lâchhâh ta y ta; a liah liah tahpa liana chata a kiana ta kiah ei ta, a liah liah tahpa tawhna chata a miathôhpa lâta.

9 Chatanachata o cha sa ta, palo haw ta; o cha sidy pakô nata a thophia ta khu ta.

10 A chhâh a hneipa zy cha a o pasusapa ta dy pangawh chyu a sâhpa ta sa ta, chazy cha o nata sidy tho ta pazaopa a châ.

11 ABEIPA bie cha Sawlawmaw hnohta vaw tlô ta,

12 “He o na sa haipa kyh he, ei bieraopa zy a pyhpa ta, ei ryureina zy a ngiahpa ta, ei biepiepa zydua a ngiah awpa ta nâ pyh khiahtala, na paw Davi hnohta ei rei hawpa ei bie kha na chô liata ei pa-i aw.

13 Chatawhcha Izarel pathlazy hry liata pahrâ aw na ta, ei chyhsa Izarel sahlao zy he pathlua aw va na,” tahpa ta.

14 Chatanachata Sawlawmaw chata o cha sa ta, palo haw ta.

15 O chhôh lâ pâhchhô cha sidy thophia ta khu ta; siphiah tawhta a chôlô vâphuh taihta a chhôh lâ cha tho bai khai ta; a siphia chata meisa thophia phaw hra ta.

16 O chhôchâ lâ dy syno cha a siphia tawhta a vâphuh taihta sidy thophia sai ta chhô ta; a chhôh lâ cha supathaihpa su pathaih chaipa châta hmâh ta.

17 O a chhyna supathaihpa patypa cha a doh lâ dy sypalih a châ.

18 O chhôh lâta sidy tho liana chata pawpi pabyuhpa nata a paw pakaipa nohthlahpa taopa sai châ ta; a zydua ta sidy tho sai châ ta, alô rai a la vei.

19 ABEIPA Biehraina Byh sona awpa ta cha o liata a chhôh liata supathaihpa liana chata a su a chhuahnoh ta.

20 Cha supathaihpa chhôh cha a doh lâ dy syno, a hâ lâ dy syno, â sâhna lâ dy syno châ ta; cha cha ngôh suapa ta pahu ta. Sidy maisâh cha pahu hra ta.

21 Chatawhcha Sawlawmaw chata cha o chhôh cha ngôh suapa ta pahu ta, supathaihpa hmialâ cha ngôh bâlia zy ta chhô ta.

22 O cha a palohna taihta a pôhpalôhpa ta ngôh ta pahu lymâ ta, supathaihpa liata maisâh chhao cha ngôh ta pahu ta.

23 Supathaihpa liana chata dy hrawh rairieh a sâhpa ta cherubi sâno ôli tho ta tao ta.

24 Cherubi mathlaw miakha cha dy pangawh châ ta, cherubi mathlaw hiakhalâ cha dy pangawh a châ hra; a mathlaw miakha pawhmao tawhta mathlaw hiakha lâ pawhmao taihta dy hrawh a châ.

25 Cherubi miakha chhao cha dy hrawh châ ta; cherubi zy cha â khopa nata yzie alyu rairiehpa a châ.

26 Cherubi miakha a sâhna lâ cha dy hrawh châ ta, cherubi miakha chhao cha cha sa hra cha a châ.

27 Cherubi zy cha o chhôh chaipa liana chata soh ta; cherubi zy mathlaw cha a pakaipa châ ta, miakha mathlaw chhaota pâhchhô hiakha lâ hria ta, cherubi miakhapa mathlaw chhaota pâhchhô hiakha lâ cha hria hra ta; cha o liahliah liana chata ama mathlaw cha a tyh ta.

28 Chatawhcha cherubi zy cha ngôh ta pahu ta.

29 O pâhchhô zydua cha â dopa ta cherubi zy, thiahra kô nata pawpi pakaipa nohthlahpa zy, angiapâ ta taopa ta, a chhôh lâ nata khôtho lâta tao ta.

30 A o siphiah cha a chhôh lâ nata khôtho lâta ngôh ta pahu ta.

31 Supathaihpa a ngiana châta ôli tho ochhi tao ta; chhikao luh chô nata chhikao tôh zy cha a pâhchhô su pangawh ta pachhaih ta su kha tluta a châ.

32 Ôli tho ta ochhi miano tao ta, cha liana chata cherubi zy thiahra kô nata pawpi pakaipa nohthlahpa zy tao ta; chazy cha ngôh ta pahu ta, cherubi zy nata thiahra kô zy cha ngôh ta khu ta.

33 Chatawhcha achhyna-o a ngiana châta a pâhchhô su palih ta pachhaih ta su kha tluta ôli tho chhikao tôh zy tao hra ta,

34 meisa tho ochhi miano chhaota; ochhi miakha liata thophia miano cha thlâkadi theipa châ ta, ochhi miakhapa liata phia no chhao cha thlâkadi theipa a châ.

35 Chazy liana chata cherubi zy, thiahra kô nata pawpi pakaipa nohthlahpa zy tao ta, cha taopa cha a mih ngaitapa ta ngôh ta pabu ta.

36 Achhyna-o dôhpachhôh tlyhmia chhôh chaipa cha alô daipa chhâh thôh nata sidy tho tlâ chhâh kha ta tao ta.

37 A kô palihna Ziva thlâ liana chata ABEIPA o lôbôpa cha paryhpa châ ta.

38 Chatawhcha kô hrawhleikhana Bula thla, thla chariena liana chata o cha patopatiana zy haw tlai ta, a to cha paloh khaipa châ ta, Kô sari tlai a sa. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

1 Abeizy 7

1 Abeizy 7

Sawlawmaw ta O hropa a sapa zy

1 Sawlawmaw chata ano o cha kô hrawhleithôh sa ta, a o cha paloh khai ta.

2 Lebanaw Thothi O sa ta; sidy to tlâh palih, o tôh chôlâ sidy tlâhzy chô liana chata sa hra ta, a doh lâ cha dy za kha châ ta, a hâ lâ cha dy sypangawh châ ta, a sâhna lâ cha dy sythôh a châ.

3 Cha cha o tôh sypalih nata miapangawh tlâh kha liana chata miahrawhleipangawh lymâ chô lâna chata sidy thophia ta khupa châ ta.

4 Tlâh thôh ta opy y ta, a khaihpa nata a khaihpa zy cha tlâh thôh ta a dady sai ta.

5 Ochhi nata o tôh zydua cha thophiapa ta ki palih ta taopa châ ta, a khaihpa zy cha tlâh thôh ta a dady khai ta.

6 Chatawhcha aikah cha a tôh a hneipa ta tao ta; a doh lâ dy sypangawh châ ta, a hâ lâ dy sythôh châ ta; cha hmia lâna chata aikah tao ta, otôh zy nata a hmia lâta a ngiana kiana zy chhaota.

7 Chatawhcha a ryureina awpa abeidyuchhai aikah, ryureina aikah cha tao ta; cha cha siphia tawhtapa palaih taihta sidy tho ta khupa a châ.

8 Ryureina aikah hnôh lâ dôhpachhôh tlyhmia liata a ypa cha a pahrâna awpa o cha cha hawh hra ta taopa a châ. Phirao sawchanônô Sawlawmaw ta lahpinô ta a hneipa cha, cha aikah hawhna hra chata a o sapa hra ta.

9 Cha zydua cha alô sôh ngaitapa, alô a supa ta daipa tho-âna ta âpa ta sapa châ ta, a chhôh lâ chhao, khôtho lâ chhao, alô bôna tawhta a pawhmao taihta, cha hawhna hra chata khôtho lâta dôhpachhôh tlyhmia kawh ngaitapa taihta.

10 Lôbôpa cha alô sôh ngaitapa, alô laipapi alô dy hrawhpa zy, alô dy chariepa zy ta, paryhpa châ ta.

11 Cha chôlâ cha alô sôh ngaitapa, alô a supa ta daipa nata sidy tho châ ta.

12 A dopa ta dôhpachhôh tlyhmia kawh ngaitapa cha alô daipa chhâh thôh nata sidy thophia thokha ta dôhpa a châ; abeipa o dôhpachhôh tlyhmia chhôh chaipa nata o aikah hawhna kha ta.

Achhyna-o liata Hirama raihriapa

13 Abei Sawlawmaw ta chyhsa tuah ta, Tyre khih tawhta Hirama aw ta.

14 Cha chyhsa cha Nathalai pho nôhmei sawchapawpa châ ta, a paw cha Tyre khihpa, dawh a daih thaipa châ ta; ano cha dawh daina kyh liata cha a sopa, aryhna a pahno thaipa, zôthai ngaitapa châ ta. Abei Sawlawmaw lâta vawh ta, a raihria zydua cha hriapa khai ta.

15 Ano ta dy hrawhleicharie a sâhpa dawh tôh miano tao ta, a padona ri cha dy hrawhleino rairieh châ ta.

16 A tôh pawhmao liata patao awpa dawh leihpa pabyuhpa miano ta; abyuhpa miakha a sâhna lâ cha dy pangawh châ ta, abyuhpa miakha a sâhna lâ cha dy pangawh châ ta.

17 Otôh pawhmao byuhpa châna chata a chapaicharupa a chamihpa zy he y ta; abyuhpa miakha châna chata miasari, abyuhpa miakhapa chôta chhao miasari hra.

18 Chahawhta otôh zy cha tao ta; cha otôh pawhmao liata abyuhpa zy pahlyna awpa ta a chapaicharupa miakha chô liata a dopa ta tlâh no y ta; cha hawhna hra chata abyuhpa miakha chô liata chhao paysa hra ta.

19 Chatawhcha aikah liata otôh pawhmao liata byuhpa liana chata lilih paw nohthlahpa he a choh ta, dy palih a châ.

20 Otôh miano pawhmao liata abyuhpa zy liana chata a tlâh liata a chapaicharupa kiapâh liana chata pawmikranat y hra ta; pawmikranat cha cha abyuhpa zy liana chata zâ no rairieh a tlâh ta y ta.

21 Achhyna-o aikah liana chata a tôh zy cha padua ta; chachâh lâ tôh cha padua ta, a moh ta Zakhi bi ta; chavei lâ tôh cha padua ta, a moh ta Bôza bi ta.

22 Chatawhcha otôh pawhmao liana chata lilih paw nohthlahpa a choh ta. Cha hawhna chata otôh lâ raihria cha palohpa châ haw ta.

23 Chatawhcha dawh ta ti pa-ona laipa dy hrawh a tlapa, â sâhna lâ dy pangawh leih ta, a tlâh cha dy sythôh a hlôpa a châ.

24 A tlâh ry liana chata pawpi pachhaohpa nohthlahpa ta padô ta, dy sythôh châ ta; ti pa-ona liana chata y ta, cha a pachhaohpa zy cha tlâh no ta y ta, leih pâpa a châ.

25 Cha cha viahchao tôhpa pô hrawhleino chô liata a pahnieh ta, pô thôh ta maw lâ a heih ta, pô thôh ta notla lâ a heih ta, pô thôh ta chho lâ heih ta, pô thôh ta nochhi lâ a heih ta; ti pa-ona cha ama chô liata a patyu ta, a chhôh lâ ama chao chhy ei ta.

26 A chhâna zie cha pazah tie châ ta, a tlâh cha lilih pawpi hawhta nyu tlâh hawhta taopa châ ta; bath sâh no a tlôhpa a châ.

27 Ano ta patyuna miahrawh dawh ta tao ta; patyuna miakha seihna lâ cha dy palih châ ta, a hâ lâ cha dy palih châ hra ta, â sâhna lâ cha dy thôh a châ.

28 He he patyuna taona zie cha a châ, chazy chata pakaohpa zy hnei ta, a pakaohpa zy cha a lâzy likawh liata y ta,

29 a tlâh zy likawh a pakaohpa zy liana chata chakeibarôhneipa zy, viahchao tôhpa zy, cherubi zy a choh ta. A tlâh chô zy liana chata patyuna y ta, chakeibarôhneipa zy nata viahchao tôhpa zy hry liana chata pangiapalina chhao y hôlô ta.

30 Cha patyuna zy chata dawh talailih phei miapalih nata dawh hrei pakhâpa y chyu ta; a ki palih zy liana chata a siena beih a hnieh na y chyu ta.

31 Beih patyuna chhôh cha dy kha a tlapa châ ta; a rao cha beih patyuna hawhta a hlôhpa châ ta, dy kha nata khophie a châ. A rao tlâh cha â ngiapa ta chapaipa châ ta; a pakaohpa zy cha ki palihpa châ ta, a hlôh vei.

32 Chatawhcha talailih phei miapalih zy cha a pakaohpa zy ry lâta y ta; talailih phei hrei pakhâhpa zy cha patyu hniepa ta y ta; talailih phei a sâhna lâ cha dy kha nata a khophie a châ.

33 Cha talailih phei zy taonazie cha arâ talailih phei taona zy hawhta châ ta; a hreipakhâpa zy, a patyuna zy, a hraina zy, a liabyuhpa zy châ leihpa sai a châ.

34 Patyuna ki palih chyu liana chata ahnieh na miapalih y ta; cha a hniehna zy cha patyuna nata miakhapa sai a châ.

35 Chatawhcha patyuna chô liata a tlâh hlôpa dy khophie a sâhpa y ta; patyuna chô liata a patyuna pheizy nata a pakaopa zy cha miakha sai a châ.

36 A patyuna phei zy liata nata a pakaopa zy liana chata a kawhna zie hawhta âpa ta cherubi zy, chakeibarôhneipa zy, thiahra kôzy pachoh sa ta, a dopa ta, a pahnieh na a y.

37 Cha hawhna sai cha patyuna miahrawh zy cha tao ta; a zydua chata miakha ta leihpa châ chyu ta, â khopa sai taozie alyupa sai a châ.

38 Chatawhcha a sina beih miahrawh dawh ta tao ta; a sina beih miakha cha bath sypalih a tlôh ta, a sina beih cha dy palih chyu a châ, patyuna miahrawh chô liana chata a sina beih miakha a patyuh chyu ta.

39 Chatawhcha patyuna zy cha o chachâh lâchhâh ta miapangawh patyuh ta. o chavei lâchhâh ta mia pangawh ti pa-ona cha o chachâh lâchhâh ta nochhi lâta chho lâ heih ta patyuh ta.

40 Hirama chata a sina beih zy, buhchâh lina zy, rahô zy tao ta. Chatanachata Hirama cha ABEIPA o châta Sawlawmaw a tao papa zydua cha paloh khai haw ta;

41 a tôh miano zy, a tôh pawhmao liata beih hawhta a byuhpa miano zy, a tôh pawhmao liata beih hawhta a byuhpa miano pahlyna chapaicharupa miano zy;

42 cha pahlyna chapaicharupa miano chata pawmikranat za palih zy, a tôh pawhmao liata bei hawhta a byuhpa miano pahlyna awpa a chapaicharupa rairieh châta pawmikranat tlâh no zy kha;

43 patyuna miahrawh nata patyuna chô liata a sina beih miahraw zy,

44 ti pa-ona miakha nata ti pa-ona ry liata viahchao tôhpa miahrawhleino zy,

45 beih zy nata buhchâh lina zy nata rahô zy chhaota, cha hmobaoh zydua ABEIPA o châta Hirama ta abeipa Sawlawmaw a tao papa cha dawh pathliepa ta taopa sai a châ.

46 Zawdah bypi liata Sukô nata Zareta likawh beih lei su liata abeipa chata a leih.

47 Sawlawmaw chata cha hmobao zydua cha a hluh ngaitapa vâta khopathlia leipa ta soh thlâh ha ta, dawh khopathliana hluh zie cha pahno tiah rimâ awpa châ vei.

48 Sawlawmaw chata ABEIPA o hmobaoh zydua cha tao ta; ngôh maisâh nata viahchhâ sopa yna tlâhkhai cha ngôh ta tao ta,

49 supathaihpa hmiakô dady meiôh sona chachâh lâta miapangawh nata chavei lâta miapangawh cha ngôh suapa ta; pawpi zy, meiôh zy nata chaikie zy cha ngôh ta,

50 nyu zy, meiôh lao chakiena zy, rahô zy, phiathla zy, mei lana zy, ngôh suapa ta; o chhôh chaipa, su pathaih chaipa ochhi liatahpa zy nata o achhyna-o chhikao patuna zy cha ngôh ta tao ta.

51 Cha hawhna chata Abeipa Sawlawmaw ta ABEIPA o châta a taopa zydua cha paloh khai ta. Sawlawmaw ta a paw Davi a vaw hlâ haw chiehpa tâkâri zy, ngôh zy, hmobaoh zy cha a ngiakhei ta, ABEIPA o liata ryu zy hry liata soh ta. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22

1 Abeizy 8

1 Abeizy 8

Sawlawmaw ta Khazohpa Byh achhyna-o liata a soh

1 Chatanachata Sawlawmaw chata Izarel machâ sahlao zy ama pho pawhrâhpa zydua zy, Izarel pathla sahlao chhôhkha pawhrâhpa zydua cha Zerusale khih liata abeipa Sawlawmaw lâna cha Davi khihpi Zaio tawhta ABEIPA Biehraina Byh a kaw sy awpa ta pakhy chaimâh ta.

2 Izarel mo zydua cha Ethani thla, thla sarina liana chata kyhchhina liata Abei Sawlawmaw lâta a pakhy chaimâh ei ta.

3 Chatawhcha Izarel machâ sahlao zydua cha a vy ei ta, theihthaipa zy chata Byh cha a sy ei ta.

4 ABEIPA Byh nata achhyna poh-o nata poh-o liata hmobaoh pathaihpa zydua a sy ei ta; chazy cha theihthaipa zy nata Livai chizy chata a kaw sy ei ta.

5 Chatawhcha Abei Sawlawmaw nata Izarel sahlao ahmaohpakhypa zydua, ano lâta a vaw pakhypa zy cha Byh hmiakô liata hmaohkha ta y ei ta, mietahkupa nata viahchao tôhpa a hluhna rei tiah leipa ta atheih ei ta.

6 Chatanachata, theihthaipa zy chata ABEIPA Biehraina Byh cha a yna awpa lâta a ngiakhei ei ta, o chhôh lâta supathaihpa, su pathaih chaipa liata cherubi zy mathlaw ry liana chata.

7 Cherubi zy chata Byh yna chô dady liana chata ama mathlaw pakai thlâh ha tlôh ei ta, cherubi zy chata Byh nata alâ zy cha khu khai ei ta.

8 Chatawhcha a lâzy cha seih kaw ta, a lâ pawhmao zy cha achhyna su hmiakô supathaihpa tawhna chata hmô theipa châ ta; anodeikuacha khôtho lâta cha a lâ vei; atahmâ taihta cha liana chata a y thlâh haw.

9 Izi râh tawhtapa puapa ta ABEIPA ta Izarel pathla zy hnohta bie a hraih no ta, Mawsi ta Hawriba liata alôphiapa miano a sopa dei leipa khata cha cha Byh chhôh liana chata khâpa hmah a hropa y vei

10 Chatawhcha theihthaipa sahlao zy cha su pathaihpa tawhta ama vaw pua pata nahta ABEIPA o cha ameih chata bie khai haw ta,

11 chatanachata ameih vâna chata theihthaipa zy cha chakaotuhpa ta y thei khao leipa ei ta; ABEIPA rôhnahna ta ABEIPA o cha pabie khai ha tlôh ta.

Achhyna-o hlâna

12 Chatanachata Sawlawmaw ta bie reih ta,“Hy ABEIPA avâ liata noh a paysatuhpa, châhrasala zohna chhakalupa cha na pahrâna châta a tlyh chi ta.

13 Na pahrâna awpa o chhâzaw ta na pahrâna awpa cha ei cha sapa haw,”tah ta.

14 Chatawhcha abeipa cha a vaw heih ta, Izarel sahlao ahmaohpakhypa zydua cha byhnâ awpa ta, chatanachata Izarel sahlao ahmaopakhypa zydua cha aduah ei ta.

15 Chatawhcha ano chata, “ABEIPA Izarel zy Khazohpa, ei paw Davi hnohta, ano pakah tlaita,

16 ‘Izi râh tawhtapa ei chyhsa Izarel zy ei chhihtha no tawhta, Izarel sahlao pho hry liata kheihawhpa khih he hmahta ei moh yna awpa o sa nawpa ta atlyh beih leipa na ta; anodeikuacha ei chyhsa Izarel zy hyutuhpa chata Davi he ei tlyh,’ tahpa ta a vaw reih tuhpa, ano ku tlai ta a vaw deichhytuhpa he reithaipa ta y mawh sy.

17 Ei paw Davi khata Izarel zy Khazohpa ABEIPA moh châta o sa a palôhrupa ta a chhuah tyh ta.

18 Châhrasala ABEIPA ta ei paw Davi hnohta, ‘Na palôhrupa ta ei moh châta o sa nâ chhuahpa tyh chi ta, he hawhpa palôhrupa na phaopa he a pha na;

19 châhrasala nâ ta la o cha sa aw va chi, na sawchapawpa na sa awpa chata ei moh châta o cha tlao a sa aw,’ vaw tah haw chi ta.

20 Atahmâ ABEIPA ta a bie reipa cha pa-i haw ta; ABEIPA bie â vaw taih hawpa hawh tlaita, ei paw Davi su cha vaw pahrâ haw na ta, Izarel abeidyuchhai liana chata atyuh haw na ta, Izarel zy Khazohpa ABEIPA moh chata o cha vaw sa haw tlai na ta.

21 Cha liana chata Byh yna awpa su cha vaw rao haw na ta, cha liana chata Izi râh tawhtapa a chhihtha nota eima mahpaw zy hnohta bie a vaw hraipa ABEIPA biehrai cha y ta,” tah ta.

22 Chatawhcha Sawlawmaw cha ABEIPA maisâh hmiakô Izarel ahmaohpakhypa sahlao zydua hmiakô liata a duah ta, avâ lâ pazapa ta a ku pazawh ta;

23 “Hy ABEIPA Izarel zy Khazohpa y, na chakaotuhpa ama pathipalôh zydua ta na mohmô liata a phapa ta a ypa zy hnohta biehrai patlôpa ta ngiachhiena a palâsa tyhpa;

24 na chakaotuhpa ei paw Davi hnohta bietai a patlôtuhpa; a chô lâ avâ liata nata ary lâ alei liana heta nâma hawhpa he Khazohpa hropa rai y veih ei; chatatlyh, nâ ta na pakah ta bie reih chi ta, na ku ta patlôsa chi ta, atanoh ta a vaw y hawpa hawhna tlai heta.

25 Chavâta hy ABEIPA Izarel zy Khazohpa y, na chakaotuhpa ei paw Davi hnohta, ‘Na pathlazy cha ei mohmô liata na ypa hawhta ei mohmô liata y hra awpa ta ama yzie liata amâ chado khiahtala ei mohmô liata Izarel zy abeidyuchhai liata atyuh awpa chi aw veih ei,’ tahpa ta bie nâ vaw taih hawpa kha patlô mah y.

26 Chatanachata hy Izarel zy Khazohpa y, nâma ta na chakaotuhpa ei paw Davi hnohta bie na vaw rei hawpa kha ngiachhiepa ta patlôsa tlai mah y.

27 “Châhrasala Khazohpa cha alei liana heta a pahrâ hmeihseih tlai aw ma? Avâ nata avâzy, avâ liata chhao nâ tlôh leipa châ ta; he o ei sapa liana heta nâ tlôh lei pachaih aw dia!

28 Chatana chôta hy ABEIPA ei Khazohpa y, atanoh na chakaotuhpa ta a cha awna nata thlah a chhâpa he nahthliepa ta, na chakaotuhpa thlahchhâna nata hiana he vaw pachâ mah y;

29 he su lâ heipa ta na chakaotuhpa heta thlah a chhâ awpa cha nahthliepa ta, nâma ta, ‘Cha liana chata ei moh cha a y aw,’ na tahna su tlai o lâna heta chhô nata zâ ta na mo na khaih thlâh ha tyh thei nawpa ta.

30 Chatawhcha na chakaotuhpa nata na chyhsa Izarel zy heta he su lâ a heipa ta thlah ama chhâ tita ama hiana zy vaw nahthliepa tyh mah y; na pahrâna su avâ tawhta vaw nahthlie la, vaw nahthliepa ta a ngiathaih mah y.

31 “Chyhsa ahyrai ta a vaihzy chô liata hmoparaopa ta chhie pasasana taihta vaw byuh sala, he o liata na maisâh hmiakô liata vaw reih sala,

32 nâma ta avâ tawhta vaw nahthlie la, thyu la, moleipa cha ano luh chô lia tlaita a yzie pahniehpa ta thai lei pachâsapa ta, chyhsa siapa cha a siana hawhta pahlaosapa ta thai pachâsapa ta na chakaotuhpa zy ryurei pa mah y.

33 “Na chyhsa Izarel zy heta na chô liata hmo ama paraopa vâta khakhaipa zy liata pahniepa ta ypa ta, nâ lâ a vaw heihpa ta, na moh reithaipa ta, he o liata thlahchhâpa ta ama vaw hiah khiahtala;

34 nâma ta vâ tawhta vaw nahthliepa la, na chyhsa Izarel zy moleina cha a ngiahthai la, ama mahpaw zy râh na piepa lâna chata chhihtha heih mah y.

35 “Na chô liata hmo ama paraopa vâta avâ popa ta vâsua zy a vaw suah vei tina chata he su lâ a heihpa ta, thlahchhâpa ta na moh reithaipa ta âmo rie na patheipa vâta ama moleina zy amâ rôh khiahtala,

36 nâma ta avâ tawhta vaw nahthlie la, na chakaotuhpa zy nata na chyhsa Izarel zy moleina he a ngiahthai la, ama siena awpa lâpi phapa pahno tlôh aw chi ta; na chyhsa zy ama ryuto châta na piepa râh liana heta avâ pasuasa mah y.

37 “Eima râh liana heta chakâhna zy vaw tlôpa ta, hri zy chareipa ta, chawhkaraina tlyma, khawsu tlyma, chângyu tlyma vaw ypa ta; ama khakhaipa zy ta ama khihpi chheipâh zy liata vaw chadôpa ta, hri kheihawhpa rai, pasana kheihawhpa rai a vaw tlô khiahtala;

38 na chyhsa Izarel zydua hry liata âmo pathipalâh ta hri a ypa ta pahnopa ta, he o lâ a heihpa ta ku a vaw pazawhpa maih ta, thlahchhâna nata hiana ama vaw hlâpa maih cha,

39 na pahrâna avâ tawhta nahthlie la, a ngiahthai la, na ama pathipalôh a pahnotuhpa, chyhsa to ama yzie lymâ hawhta pahmôsa mah y, (nâ la, nâ deita he chyhsa saw zydua pathipalôh a pahnotuhpa châ tlôh chi ta)

40 eima mahpaw zy na piepa râh liata ama y chhôh zydua heta ama cha chi thei nawpa ta.

41 Na chyhsa Izarel zy a châ leipa pho hropa chyhsa na moh vâta, râh hlapapi tawhta a vypa chyhsa zy kyh chhao he

42 (na moh rôhnah ngaitapa zy, na ku thatlô ngaitapa zy, na bâh na pazawhna kyh zy he thei chyu tlôh aw ei ta), chazy chata he o lâ a heihpa ta thlah ama chhâ tita,

43 nâ ta na pahrâna avâ tawhta vaw nahthlie la, pho hropa chyhsa chata a cha hiapa maih cha vaw taopa mah y; na chyhsa Izarel zy hawh hra ta khizaw liata pho to ta na moh pahnopa ta cha chipa ta, he ei o sâhpa heta na moh a phaoh tahpa ama pahno thei nawpa ta.

44 “Na chyhsa zy ta ama khakhaipa zy cha na tuana lâ maih liata a vaw dyuh ei sala, na khihpi a tlypa lâ a heihpa nata na o châta o ei sapa lâ a heihpa ta ABEIPA lâta thlah ama chhâ khiahtala,

45 ama thlahchhâna nata ama hiana cha nâma ta avâ tawhta vaw nahthlie la, ama bie liata y mah y.

46 “Na chô liata hmoparaopa ta, (ahyhmah ta hmo a parao leipa y tlôh lei khâh ei ta) ama chô liata na pathi-iapa ta, khakhaipa ku liata piepa ta, khakhaipa râh hlapapi lâta tlyma, a hniapa lâta tlyma rai, sei ta a chhipa ta;

47 seichâna ta amâ chhina râh liata a pahnopa ta, angiapachhipa ta, ‘Hmoparao pi ta, a do lei ngaitapa nata molei ngaitapa ta eima tao haw,’ tahpa ta seichâna ta a chhituhpa zy râh liata ama cha hiah khiahta cha;

48 ama khakhaipa seichâna ta a chhituhpa zy râh liata ama pathipalôh hmeihseihpa nata ama palôhrupa hmeihseihpa ta nâ lâ a vaw heipa ta, ama mahpaw zy na piepa râh lâ nata na khihpi a tlypa lâ nata na moh châta ei o sâhpa lâ a heipa ta nâ lâ a heipa ta, na lâta thlah ama chhâ khiahtala;

49 ama thlahchhâna nata ama hiana cha nâma ta na pahrana avâ tawhta nahthlie la, ama bie liata y mah y,

50 chatawhcha na chyhsa na chô liata hmo a paraotuhpa zy nata nâ liata ama parao hapa kyh liata ama paraona zydua cha a ngiahthai la, seichâna ta a chhituhpa zy chata ama ngiachhie thei nawpa ta ngiachhiena pahneisa mah y,

51 na chyhsa, na ryuto, Izi râh tawhtapa thua patisana chhôh tawhtapa na chhithapa zy châ tlôh ei ta.

52 Ama cha padona maihta na vaw nahthlie awpa ta na chakaotuhpa hiana nata na chyhsa Izarel hiana lâta na mo na padeih thei nawpa ta.

53 Hy Abeipa KHAZOHPA y, eima mahpaw zy Izi râh tawhta na chhitha nota, na chakaotuhpa Mawsi hmâpa ta na reipa hawhta na ryuto châta khizaw pho to hry tawhtapa na pananopa châ tlôh ta,” tah ta.

54 Sawlawmaw ta ABEIPA lâta thlahchhâna nata hiana zydua a rei khai nahta, ABEIPA maisâh hmiakô liata pakhu paneihpa ta avâ lâ pazapa ta, ku pazawhpa ta a ypa cha thyu ta;

55 a duah ta, ao paro ngaitapa ta,

56 “A bietaipa zydua lymâ hawhta a chyhsa Izarel zy pahâna a pietuhpa ABEIPA cha reithaipa ta y mawh sy; a chakaotuhpa Mawsi hmâpa ta a bietaipa phapa zydua kha bie miakha hmah khâpa hrao leipa ta y vei.

57 ABEIPA eima Khazohpa cha eima mahpaw zy hnohta a ypa hawhna khata eima hnohta y sala; maniah siesaipa ta maniah pathlua kha se;

58 chatanachata a lâpi zydua a chhih awpa nata eima mahpaw zy bie a vaw pie hawpa hawhta a biepiepa zy, a bieraopa zy, a pachiapa zy a pyh awpa ta eima pathipalôh zy ano lâta a paheisa thei nawpa ta.

59 ABEIPA he Khazohpa châ ta, ahy hropa hmah y veih ei, tahpa khizaw pho to ta ama pahno thei nawpa ta a chakaotuhpa kyh liata nata a chyhsa Izarel zy kyh liata a châna zie awpa lymâ hawhta a tao thei nawpa ta;

60 he ei bie reipa zy ABEIPA hmiakô liata hiana ei tlôkheipa zy he, chhô nata zâ ABEIPA eima Khazohpa hmiakô liana heta y thlâh ha mawh sy.

61 A bieraopa hawhta y awpa nata a biepiepa zy zyh awpa ta ABEIPA eima Khazohpa lâna chata nama pathipalôh zy pha paki mawh sy, atanoh hawhna heta,” tahpa ta Izarel zy ahmaohpakhypa sahlao zydua cha byhnâ aw pata.

62 Chatawhcha abeipa nata Izarel sahlao zydua chata ABEIPA hmiakô liana chata hmaokha ta atheihna hlâ ei ta.

63 Sawlawmaw ta ABEIPA châta a hlâpa adyhna hiana atheih nawpa ta viahchao tôhpa thy no nata sâh no, mietahkupa thy sykha nata thy no hlâ ta. Cha hawhna chata abeipa nata Izarel pathla zydua chata ABEIPA o hlâ ei ta.

64 Cha noh ualua liana chata abeipa ta ABEIPA hmiakô liata dawh maisâh cha raopa hiana zy, niepa hiana zy, adyhna hiana sathaw zy so nawpa ta a chyh tupa vâta raopa hiana zy, niepa hiana zy, adyhna hiana sathaw zy hlâ tlôh ta.

65 Cha nona chata Sawlawmaw nata Izarel sahlao zydua zawpi ahmaohpakhypa hluh ngaitapa Hama khih a ngiana tawhta Izi chavah taihta chyhsa zy cha ABEIPA eima Khazohpa hmiakô liana chata noh sari chhôh tlai, kyhchhi ei ta.

66 A noh charie noh liana chata zawpi sahlao cha papaisa ta; abeipa cha byhnâ aw pa ei ta, chatanachata ABEIPA ta a chakaotuhpa Davi nata a chyhsa Izarel zy chô liata cha tluta a phana palâsapa vâna chata palôhrupa thaphapa nata aly ngaitapa ta ama o lâta a di haw ei ta. 

1 Abeizy (1 Kings)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22