Sawlawmaw paosaina nata khakhaipa zy
1 Sawlawmaw chata Phirao sawchanônô dei leipa chhao pho hropa chanô hluhpi Môaba zy, Amawna zy, Edôma zy, Sidaw zy, Hiti mo chanô zy kyhpachâ ta,
2 cha pho sahlao kyh cha ABEIPA ta Izarel pathlazy hnohta, “Âmo hnei khah ula, âmo chhaota cha hnei khah ei se, ama khazoh zy lâta nama pathipalôh cha paheisa tlôh aw ei ta,” tahpa ta vaw reih haw ta; cha sahlao cha Sawlawmaw chata kyhpachâna ta khâchâ patu ta.
3 Ano chata lahpinô za sari, abei sawchanô hnei ta, nôtho za thôh chhaota; a lahpinô zy chata a pathipalôh paviasa haw ei ta.
4 Sawlawmaw cha a vaw machâ tawhna chata a lahpinô zy chata khazoh hropa zy lâta a pathipalôh paviasa haw ei ta; chatanachata a paw Davi pathipalôh hawhta ABEIPA a Khazohpa lâna chata a pathipalôh cha vaw pha paki khao leipa ta.
5 Sawlawmaw chata Sidaw sahlao khazoh nô Astarô nata Amawna sahlao khazoh pasichhih ngaitapa Milkô cha zi haw ta.
6 Chatawhcha Sawlawmaw chata ABEIPA mohmô liata hmo moleipa tao haw ta, a paw Davi hawhta ABEIPA cha zi leipa ta.
7 Chatanachata Sawlawmaw chata Zerusale chheipâh liata tlâh liata Môaba sahlao khazoh pasichhih ngaitapa Khemô châta nata Amawna pathlazy khazoh pasichhih ngaitapa Môle châta su sâhpa tao haw ta.
8 Cha hawhna chata pho hropa a lahpinô zydua ama khazoh zy lâta atheihna rohpahâhpa zy a hlâ tyhpa zy châta chhao taopa ta.
9 Chatanachata ABEIPA Izarel zy Khazohpa, a hnohta ei no lâta aluahpa ta, he kyh, khazoh hropa zy a zi awpa châ vei tahpa bie a pietuhpa cha,
10 a pathipalôh a heisai hawpa vâna chata Sawlawmaw chô liata ABEIPA pathi-ia haw ta, ABEIPA bie a piepa cha a pyh tlôh lei khâh ta.
11 Chavâta ABEIPA ta Sawlawmaw hnohta, “He hawhna heta y haw chi ta, ei biehraipa zy nata ei bieraopa zy a pyh awpa ta bie ei cha piepa he a pyh tlôh lei khâh chi ta, râh he cha chhu aw na ta, na chakaotuhpa ei pie aw.
12 Anodeikuacha na paw Davi vâta na hro chhôh ta cha tao mâh leipa aw na ta, châhrasala na sawchapawpa ei cha chhupa aw.
13 Râh zydua deikua cha chhu khai leipa aw na ta; châhrasala ei chakaotuhpa Davi vâta nata ei tlyhpa Zerusale vâna heta pho kha cha na sawchapawpa ei pie aw.” tah ta.
14 ABEIPA ta Edôma chyhsa Hada cha Sawlawmaw khakhaipa lâta vaw pachâsa haw ta; ano cha Edôma râh liata abei pathla a châ.
15 Davi, Edôma râh liata a y nota ama chyhsa thiepa zy pabu awpa ta pheisaih hyutuhpa Zôaba vawh ta, Edôma chyhsa chapaw saw maih cha a thie khai tawhna khata,
16 (Zôaba nata Izarel chyhsa zydua cha thla charu tlai Edôma râh liata chapaw zydua a thie khai hlâ lei cha y ei ta);
17 Hada cha a paw chakaotuhpa zy hry liata Edôma chyhsa thokha zy chhaota Izi râh lâ sie awpa ta a râ ei ta, Hada cha hawtita châ ta.
18 Midia râh tawhtapa pua ei ta, Paran lâ sie ei ta, Paran tawhta chyhsa a chhi ei ta, Izi râh abeipa Phirao lâta za tlô ei ta, ano chata ozy vaw pie ta, niepa zy pachâpa ta râh zy pie hra ta.
19 Hada cha Phirao mo a dy kaw ta, chatanachata a lahpinô narônô abeinô Tahpene narônô cha a lahpinô ta pahneisa ta.
20 Tahpene narônô chata sawchapawpa Kenuba sapa ta, Tahpene ta Phirao o liata a sâhpi pabasa ta; chatawhcha Kenuba cha Phirao o liata Phirao sawzy hry liana chata y haw ta.
21 Hada ta Izi râh tawhta Davi cha a mahpaw zy hnohta a mô haw tahpa nata pheisaih hyutuhpa Zôaba chhao a thi haw tahpa a thei nahta, Hada chata Phirao hnohta, “Eima râh lâta ei thei nawpa ta na papua mah y,” tah ta.
22 Châhrasala Phirao ta a hnohta “Kei hnohta na ypa heta phahlapa khâpa na hnei tly, cha hawhta nama râh lâ a di heihpa nâ chhuah hawpa cha?” tah ta. Ano chata, “Khâpahmah hnei va na, châhrasala na pasiesa teh,” tah ta.
23 Khazohpa ta a khakhaipa châta Eliada sawchapawpa Rezô, a zibeipa Hadadeza Zôba beipa tawhta a râ hawpa kha vaw padua heih ta.
24 Davi ta chyhsa zy a thie nona khata, ano chata a hnohta chyhsa zy a chhi ta, pheisaih hyutuhpa ta y haw ta; Damaska khih lâta sie ei ta, cha liana chata pahrâ ei ta; Damaska khih liana chata abei ta y haw ta.
25 Hada riepatheina baichhapa ta Sawlawmaw hro chhôh zydua Izarel zy khakhaipa châ tyh ta; Izarel zy a hao kaw ta, Suria râh chhôh liata ryu reih ta.
26 Neba sawchapawpa Zerôbaw, Zereda khih Ephrai chyhsa, Sawlawmaw chakaotuhpa, a nô moh cha Zerua châ ta, nôhmei châ ta, cha chhao chata abeipa chô liata aty hra ta.
27 Abeipa chô liata a ku a hy chhâna cha he hawhna he a châ. Sawlawmaw ta Milô sa ta, a paw Davi khih cha a raona zy taopathi ta.
28 Cha Zerôbaw chyhsa thatlôpa riahphapa cha ta, Sawlawmaw ta cha satlia cha chyhsa tiama ngaitapa a châpa ta a pahnopa vâta Zawsi chhôhkha zy raihriatuhpa zydua chô liata hyutuhpa ta tao ta.
29 Cha nona chata Zerôbaw Zerusale tawhta a puapa cha Silôni chyhsa hrohsopa Ahizah ta lâpi liata vaw hmô ta, Ahizah ta poh thiehpa a bu ta, âma pano deita ta sibiepa su liana y ei ta.
30 Ahizah chata a poh thiehpa a bupa cha la ta, hlai hrawhleino lâta hrie ta.
31 Zerôbaw hnohta, ”Hlai hrawh he la teh, ABEIPA Izarel zy Khazohpa ta he tana heta a tah, ‘He râh he Sawlawmaw chhu aw na ta, pho hrawh ei cha pie aw,
32 (châhrasala ei chakaotuhpa Davi nata Izarel pho zydua hry liata ei tlypa khihpi Zerusale vâna heta pho kha a hnei aw),
33 âmo chata na siesai ei ta, Sidaw mo khazoh nô Astarô zy, Môaba mo khazoh Khemô zy, Amawna mo pathlazy khazoh Milkô zy amâ chhy ha vâta nata ei mohmô liata hmo phapa tao awpa nata ei bieraopa zy nata ei pachiapa zy he a pyh awpa ta a paw Davi hawhta ei lâpi zy amâ chhih leipa vâta.
34 Anodeikuacha râh tlokhuh chhu aw va na; ei biepiepa zy nata ei bieraopa zy a pyhtuhpa ei tlypa ei chakaotuhpa Davi vâta a hro chhôhta cha abei ta ei paysa aw;
35 châhrasala râh he a sawchapawpa chhupa aw na ta, nâma he ei cha pie aw, pho hrawh zy cha.
36 Chatawhcha ei chakaotuhpa Davi ta ei mo paysa nawpa ta ei tlypa khihpi Zerusale liana heta ei hmiakô liata meiôh a hnei lymâ thei nawpa ta pho kha cha a sawchapawpa ei pie aw.
37 Nâma he cha rao aw na ta, na khopa hawhta ryurei aw chi ta, Izarel zy abei ta na y aw
38 Bie ei cha piepa maih a pyhpa ta, ei lâpi zy a chhihpa ta, ei chakaotuhpa Davi hawhta ei bieraopa zy nata ei biepiepa zy angiah awpa ta ei mohmô liata hmo phapa na tao khiahtala na hnohta y lymâ aw na ta, Davi a ipa ta ei paduapa hawhna khata chhôhkha â ipa ta cha paduapa aw na ta, Izarel zy he ei cha pie aw.
39 Cha vâna chata Davi pathla cha rie ei pathei aw, anodeikuacha chhâzaw ta la châ aw vei,’ a tah na,” tahpa ta.
40 Sawlawmaw chata Zerôbaw cha thie a chhuah ta; châhrasala Zerôbaw cha thyu ta, Izi râh liata Izi abeipa Shisaka lâta a râ ta, Sawlawmaw thi hlâ lei cha Izi râh liata y ta.
Sawlawmaw
41 Sawlawmaw thâtih hropa zy nata a hmotaopa zydua nata a sona zy cha Sawlawmaw hmotaopa rona châbu liata y vei mâ?
42 Sawlawmaw ta Izarel sahlao zydua chô liata ryu a rei chhôh cha kô sypalih a châ.
43 Chatawhcha Sawlawmaw cha a mahpaw zy hnohna chata a mô ta, a paw Davi khihpi liata pabu haw ei ta, a sawchapawpa Rehôbaw cha ano vyuhpa ta a bei haw ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 |