Zudah hrohsopa zy ta Zerôbaw zikyu amâ râna
1 Zudah râh tawhta Khazohpa chyhsa ABEIPA bie ta Bethel lâ a vy ta. Zerôbaw cha maisâh kiapâh liata rohpahâhpa rao awpa ta a duah ta.
2 ABEIPA bie ta maisâh cha aw sao ta, “Hy maisâh, maisâh y! ABEIPA ta he tana heta a tah’ Pachâ teh, Davi chhôhkha zy hry liata sawchapawpa, a moh Zôsiah vaw pih aw ta; na chô liata rohpahâhpa a rao tyhpa su sâhpa theihthaipa zy he na chô liana heta a theih nawpa ta vaw hiah aw ta, na chô liana heta chyhsapa ruzy ama vaw rao aw’ tahpa ta,” tah ta.
3 Cha no ualua liana chata pahnosana pie ta, “He he ABEIPA ta pahnona châta a taopa cha a châ: ‘He maisâh he a patlaw chheih aw ta, a chô liata meipaoh zy he a leitha khai aw’ tahpa hih,” tahpa ta.
4 Chatawhcha Khazohpa chyhsa ta Bethel liata maisâh a aw saopa kyh abeipa ta a thei nahta, Zerôbaw chata, “Patu teh u,” tahpa ta maisâh tawhta a ku ta kei pazah ta. Chatawhcha patu a chhuahpa ta a pazahna ku cha vaw sy haw ta, chatanachata a ku cha a dao thei khao leipa ta.
5 Khazohpa chyhsa ta ABEIPA bie ta pahnona awpa a reipa hawhna khata maisâh chhao cha a patlaw chhei hra ta, maisâh liata meipaoh zy cha a leih khai haw ta.
6 Abeipa chata achhy ta, Khazohpa chyhsa hnohta, “Ei ku he a tlâh heih thei nawpa ta ABEIPA na Khazohpa ngiachhiena hiah la, thlah na chhâpa teh,” tah ta. Khazohpa chyhsa chata ABEIPA lâta hiah ta; abeipa ku cha vaw tlâ haw heih ta, a hmia lâtahpa hawhta vaw y haw heih ta.
7 Chatanachata abeipa chata Khazohpa chyhsa hnohta, “Ei o lâta ei hnohta a vy la, a vaw pahâ chy teh, lymâ ei cha pie aw,” tah ta.
8 Khazohpa chyhsa chata abeipa hnohta, “Na o khophie rai na pie awpa châ la, na hnohta a vy aw va na, he su liana heta viahchhâ niepa ta ti rai doh hra aw va na;
9 viahchhâ niepa ta, ti rai chhao doh kha la, na kei siena lâpi lâta chhao kua heih khao kha,’ tahpa ta ABEIPA bie ta tuapa ei châ mâ tâh,” tah ta.
10 Chatanachata lâpi hropa lâta sie ta, Bethel lâta a vyna lâpi lâna chata sie khao leipa ta.
11 Cha nona chata Bethel khih liana chata hrohsopa pawpipa pakha y ta. A sawchapawpa zy chata cha noh liata Bethel liata Khazohpa chyhsa hmotaopa zydua cha chho khai ei ta; abeipa hnohta bie a reipa zy chhao cha ama paw chho hra ei ta.
12 Chatawhcha ama paw chata ama hnohta, “Khataih lâpi lâta e a sie haw” tah ta. A sawchapawpa zy chata Zudah râh tawhta a vypa Khazohpa chyhsa kua heihna lâpi cha chho ei ta.
13 Ano chata a sawchapawpa zy hnohta, “Alâ ky na padiapa teh u,” tah ta. Chatanachata alâ cha ky padiapa ei ta, kiah ta.
14 Chatawhcha Khazohpa chyhsa cha a chadai ta, oaka tho ry liata a tyuhpa kei hmô ta; a hnohta, “Nâma he ma Zudah râh tawhta a vypa Khazohpa chyhsa chi cha?” tah ta. Ano chata, “Ei châ cha,” tah ta.
15 Chatanachata ano chata a hnohta, “Ei o lâ ei hnohta a vy la, viahchhâ vaw nie teh,” tah ta.
16 Ano chata, “Na hnohta a kua heih thei awpa châ leipa na ta, na hnohta a vy thei awpa chhao châ hra va na, he su liana heta na hnohta viahchhâ niepa ta ti rai chhao doh hra aw va na;
17 viahchhâ niepa ta ti rai chhao kei doh khah la, na kei siena lâpi lâta chhao vaw kua heih khah y,’ tahpa ta ABEIPA bie ta chhopa châ tlôh na ta,” tah ta.
18 Chatawhcha ano chata a hnohta, “Keima chhao nâma hawhta hrohsopa ei châ mâ tâh, vâlyuhchâpa ta ABEIPA bie ta, ‘Viahchhâ zy niepa ta, ti zy doh awpa ta na o lâta a chhi mah y,’ tahpa ta eina chho mâ tâh,” tah ta. Châhrasala a hnohta haipa a reipa a châ.
19 Chatanachata a hnohta kua hra ta, a o liana chata viahchhâ zy niepa ta ti zy doh haw ta.
20 Chatawhcha tlâhkhai ama dôh nota a vaw kua kheituhpa hrohsopa hnohna chata ABEIPA bie cha vaw tlô ta;
21 Zudah râh tawhta a vypa chyhsa hnohna chata, “ABEIPA ta heta na heta a tah, ‘ABEIPA bie a ngiah leipa chi ta, ABEIPA na Khazohpa ta bie a cha piepa nâ pyh leipa vâta nata,
22 vaw kua heih chi ta, “Viahchhâ niepa ta, ti rai chhao kei doh khah y,” a cha tahna su tlai liata viahchhâ nie chi ta, ti zy na dohpa vâta na ri he na mahpaw zy thlâ liata sopa châ aw vei,’ tahpa ta,” reih haw ta.
23 Viahchhâ zy nie ta, ti zy a doh khai tawhna chata hrohsopa a vaw kua kheituhpa chata alâ ky padiapa ta.
24 Chatawhcha a sie nahta lâpi liata chakeibarôhneipa nata a tyh ei ta, vaw sie sao haw ta. Chatawhcha a ri cha lâpi liata thypa ta y ta, alâ cha a kiapâh liata a duah ta; chakeibarôhneipa chhao cha a ri kiapâh liana chata a duah thlâh ha hra ta.
25 Chatawhcha chyhsa vawh ei ta, lâpi liata ri a thy thlâh hapa nata ri kiahpa liata chakeibarôhneipa a duah thlâh hapa cha hmô ei ta. Hrohsopa pawpipa yna khih lâna chata kei reih ei ta.
26 Chatawhcha lâ chô rakha tawhta a vaw kua kheituhpa hrohsopa chata cha bie a vaw thei pata nahta, “Khazohpa chyhsa ABEIPA bie reipa a ngiah khoh leipa kha a châ chu; ABEIPA ta a hnohta a reipa a bie hawh tlai ta, ABEIPA ta chakeibarôhneipa lâta pie ta, vaw chaphy chheih ta a sie sao ha chu,” tah ta.
27 Chatawhcha a sawchapawpa zy hnohta, “Alâ ky na padiapa teh u,” tah ta. Chatawhcha padiapa ei ta.
28 Chatawhcha sie haw ta, a ri lâpi liata athy thlâh hapa nata alâ nata chakeibarôhneipa, ri kiapâh liata a vaw duah thlâh hapa cha kei hmô ta. Chakeibarôhneipa chata a ri cha vaw nie leipa ta alâ chhao cha a hmah vaw paphao leipa ta.
29 Chatawhcha hrohsopa chata Khazohpa chyhsa ri cha la ta, alâ chô liana chata khaih ta, siekhei haw ta, a yna khih liana chata mâchhiesa awpa nata pabu awpa ta a ngia haw ta.
30 Chatawhcha a ri cha ano thlâ liata pazia ta; “A pei rimâ cha, unawh y,” tahpa ta chakhei ei ta.
31 A pabu khai tawhna chata a sawchapawpa zy hnohta, “Ei thi tita Khazohpa chyhsa pabuna thlâ liana heta na vaw pabu hra muh vy; a rupa kiapâh liata ei rupa zy he vaw soh muh vy.
32 Khazohpa bie ta Bethel liata maisâh nata Samari râh khihpi zy liata su sâhpa o zydua a aw saona bie kha a vaw tlô thlyu awpa châ tlôh ta,” tahpa ta reih ta.
33 Zerôbaw cha cha hmo hnôh lâ chhao chata a yzie a do leipa cha pathlei hlei leipa ta, vâtlâh hry liatahpa chyhsa su sâhpa theihthaipa châta khâ tao ta; su sâhpa theihthaipa zy ama y thei nawpa ta a khohpa maih panano tyh ta.
34 Cha hmo cha Zerôbaw chhôhkha moleina âmo a pamo tuhpa nata khizaw tawhtapa a pahleipadiatuhpa a vaw châ haw.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 |