Ahaba ta Suria mo a pahnie
1 Suria beipa Benhada ta a pheisaih sahlao zydua pakhy khai ta; abei sythôh nata pano a hlao ei ta, arâ nata talaili zy chhao khy ei ta; Samari lâ khy ta, padô ta, a dyuh ta.
2 Izarel beipa Ahaba lâna chata khihpi chhôh lâta chyhsa tuah ta, a hnohta, “Benhada ta he tana heta a tah,
3 ‘Na tâkâ nata na ngôh zy kha kei eih a châ; na lahpinô zy nata na sawzy a phapa maih kei eih a châ,’ tahpa ta,” tah ta.
4 Izarel beipa chata a vaw chhy ta, “Hy abeipa ei zibeipa y, na reipa hawhna chata a châ mâ tâh, keima nata ei hneipa zydua cha nâma eih a châ na,” tah ta.
5 A chyhsa tuapa zy cha vaw heih ei ta. “Benhada ta he tana heta a tah; “Na hnohta: Na tâkâ zy, na ngôh zy, na lahpinô zy na sawzy cha eina pie awpa chi na a châ,” tahpa ta chyhsa vaw tuah ta;
6 châhrasala mylâ atahmâ ti liana heta ei chyhsa zy nâ lâta vaw tuah aw na ta, na o nata na chyhsa zy o cha ama vaw hrao aw. Chatawhcha ama khopa maih cha la aw ei ta, amâ vykhei khai aw,’ tahpa ta,” tah ta.
7 Chatanachata Izarel beipa chata a râh liata machâ sahlao zydua cha aw ta. “Vaw pahno teh u, he chyhsa heta hmo pha lei ngaitapa tao a chhuahna zie he; kei lâta chyhsa vaw tuah ta, ei lahpinô zy, ei saw zy, ei tâkâ zy, ei ngôh zy a vaw haw ta. Ei eipa chhao châ tlôh va,” tah ta.
8 Chatawhcha machâ sahlao zydua nata zawpi sahlao zydua chata a hnohta, “Nahthlie khoh khâ, paryhsa hra khâ,” tah ei ta.
9 Chatanachata Benhada chyhsa a tuapa hnohna chata, “Abeipa ei zibeipa hnohna chata, ‘Na chakaotuhpa lâta chyhsa tuahpa ta na vaw tuapa zydua hawhna khata cha tao aw na ta; anodeikuacha he he la tao thei aw va na, a tah na,’ tah teh u,” tah ta. Chatawhcha a chyhsa a tuapa zy cha sie haw ei ta, cha bie cha kei tlôkhei heih ei ta.
10 Benhada ta ano lâta chyhsa tuah heih ta, “Na zituhpa zydua heta Samari khih buhchado pazah kha chyu rai ama hmô thei awpa khiahtala khazoh zy ta âmo tao ta tao ei sala, cha hlâta tha via chhaota,” tah ta.
11 Izarel beipa chata a chhy ta, ‘Chyhsa chariah chhaichhi a tobi no ta, a chariah chhaichhi a tobina pahluh hawpa hawhta a palai beih veih ei,’ tahpa ta kei chho teh u,” tah ta.
12 Ano nata abei zy ta byureih liata hmaohkha ta sahhma ama do no ta, cha bie cha Benhada ta vaw thei ta, a chyhsa zy hnohta, “A chhuah teh u,” tah ta. Chatanachata khih adyuh awpa ta a chhuah haw ei ta.
13 Chatawhcha hrohsopa pakha ta Izarel beipa Ahaba a kei hnia ta, “ABEIPA ta he zawpi hluh ngaitapa he na hmô ma? Atanoh na ku liata ei pie aw; chatanachata kei he ABEIPA ei châ tahpa na pahno aw, tahpa ta,” tah ta.
14 Ahaba ta, “Ahy hmâpa ta maw?” tah ta. Ano chata, “ABEIPA ta râh kha zy liata hyutuhpa zy satlia sahlao hmâpa ta tahpa ta,” tah ta. Chatanachata ano chata, “Adyuhna ahyma a thao aw?” tah ta. Ano chata a chhy ta, “Nâma ta,” tah ta.
15 Chatanachata ano chata râh kha zy liata hyutuhpa zy satlia sahlao cha pakhy ta, za no nata sythôh nata pano châ ei ta; cha chyhsa zy khai tawhna chata chyhsa zydua, Izarel pathla zydua cha pakhy ta, sâh sari châ ei ta.
16 Nohchhô locho no ta pua ei ta. Benhada nata abei sahlao ano a baotuhpa abei sythôh nata pano deikua cha byureih liata parina taihta doh ngâ ei ta.
17 Râh zy liata hyutuhpa zy satlia sahlao cha kei pua tua ei ta. Benhada ta chyhsa tuah ta. Âmo chata, “Samari khih tawhta a vaw puapa ama y ha,” tahpa ta chho ei ta.
18 Ano chata, “Ady chhuahpa ta a vypa ama châ khiahta, a hropa ta patu ula, adyuh a chhuahpa ta a vypa ama châ khiahtala, a hropa thlyu ta patu hra teh u,” tah ta.
19 Chatanachata cha sahlao râh zy liata hyutuhpa zy satlia sahlao nata a vaw zituhpa pheisaih sahlao zy cha khih tawhtapa pua ei ta.
20 Amâ dyuhpa chyu cha thie ei ta; Suria sahlao cha a râpai haw ei ta. Izarel sahlao chata a chadai ei ta, Suria beipa Benhada cha arâ kiapa ta arâ a kiahpa chyhsa zy chhaota a râ haw ei ta.
21 Izarel beipa cha kei pua ta, arâ nata talaili zy cha a kei dyuh ta, Suria sahlao cha thata thie ta.
22 Hrohsopa chata Izarel beipa cha a kei hnia ta, a hnohta, “Na tha a patlô rili la, na taozie awpa pachâ teh; hâkô la Suria beipa chata a châ vaw dyuh heih aw,” tah ta.
23 Suria beipa hyutuhpa zy chata a hnohta, “Ama khazoh he tlâh zy khazoh châ ta, chavâta keimo hlâta ama tha a tlô via; bypi liata adyuh ei sih la, âmo hlâta eima tha a tlô via thlyu aw na.
24 He hawhna heta tao mah y; abei sahlao he ama zydua ta pasie khai la, ama vyuhpa ta râh a vaotuhpa zy soh la;
25 pheisaih sahlao arâ nata talaili zy na pahlei hawpa hluhna zie tlai kha pheisaih sahlao padua pathi heih mah y; bypi liata adyuh aw pi ta, âmo hlâta cha eima tha a tlô via thlyu aw na,” tah ei ta. Chatawhcha ama bie cha a pyh ta, cha hawhna chata tao ta.
26 A kô heihpa liana chata Benhada ta Suria sahlao cha pakhy ta, Izarel sahlao adyuh awpa ta Aphe khih lâta khy ta.
27 Izarel pathlazy cha a pahmaohpakhy ei ta, ama niepa zy paly ei ta, adyuh awpa ta pua haw ei ta; Izarel pathlazy chata mie taw a chyhta hri no tah hawhna heta ama hmiakô liata a kei ri ei ta. Suria sahlao deikua cha a râh dua ta bie thlâh haw ei ta.
28 Khazohpa chyhsa chata Izarel beipa cha a kei hnia ta, bie a chho ta, a hnohta, “ABEIPA ta he tana heta a tah, “Suria sahlao ta, “ABEIPA cha tlâh zy khazoh châ ta, saikao zy khazoh châ leipa ta,” ama tah, chavâta he zawpi hluhpi zy he na ku liata ei pie aw, chatanachata kei he, ABEIPA cha ei châ tahpa nama pahno aw,’ tahpa ta,” tah ta.
29 Chatawhcha noh sari chhôh cha âmo dady ta a rie ei ta. Izarel pathlazy chata Suria mozy cha noh kha ta phei ta a siepa pheisaih thy sykha thie ei ta.
30 Mo hropa zy deikua cha Aphe liata khihpi chhôh lâta a râ ei ta; a laibâhpa zy cha chysa thyno nata sâh sari kuh chopa ta vi sao ta.Benhada cha a râ ta, khihpi chhôh liata chhôhpadâhpa chhôh chaipa liata a ngia ta.
31 Chatawhcha a chakaotuhpa ta a hnohta.” Izarel chhôhkha hry liata abei zy he chyhsa a ngiachhie thei ngaitapa abei ama châ tahpa thei pi ta; latho poh a saipa ta eima luh liata khawhri a bupa ta Izarel abei lâta pua suh vy; ano chata a cha pahlôh khoh ngyu aw,” tah ei ta.
32 Chatanachata latho poh a saipa ta, ama luh liata khawhri ta a buhpa ta, Izarel beipa lâna chata vawh ei ta, “Na chakaotuhpa Benhada ta, ’Ngiachhiepa ta na pahlôh mawh sy,’ a tah na,” tah ei ta. Ano chata, “A hroh thlâh ha mâ? Ei unawhpa a châ mâ tâh,” tah ta.
33 Cha chyhsa zy chata palôh tlâhpata ta, a palôhrupa bie hmeihseihpa a reipa a châ aw tahpa pangiasapa ta, “Na unawhpa Benhada a châ na,” thlai tah ei ta. Chatanachata ano chata, “Vawh ula, a vaw chhi teh u,” tah ta; chatawhcha Benhada cha vaw pua ta; ano lâta sie ta; Ahaba chata ano talaili liata vaw pakiasa ta.
34 Chatawhcha Benhada chata a hnohta. “Ei pâ ta, na paw tawhta khih a vaw la hawpa zy kha cha pakua heih aw na ta: ei pâ ta, Samari khih liata sôhdaona su a taopa hawhna khata Damaska khih liata na sôhdaona su awpa na tao hra aw,” tah ta. Ahaba chata, “Cha hawhta bie a hraihpa ta ei cha pasiesa aw,” tah ta. Chatanachata a hnohta bie hraih ta, pasiesa haw ta.
35 Chatawhcha hrohsopa sawchapawpa zy hry liatahpa pakha ta ABEIPA bie ta a viasapa hnohta, “Na vaw tu tua,” tah ta. Châhrasala cha chyhsa chata tu khoh leipa ta.
36 Chatanachata a hnohta. “ABEIPA bie nâ ngiah leipa vâta, eina siesai pata nah chi ta chakeibarôhneipa ta a cha vaw tai aw,” tah ta. Chatawhcha a siesai pata nahta chakeibarôhneipa ta vaw hmô ta, tai haw ta.
37 Chatanachata chyhsa hropa kei hmô heih ta, “Na vaw tu tua,” tah ta, cha chyhsa chata vaw tu ta, hmah paphao haw ta.
38 Chatanachata hrohsopa cha sie ta, lâpi liata abeipa a vaw bykhâh ta, a khih hraina liata a mo a khupa ta a panano ta.
39 Chatawhcha abeipa a vaw tlô nahta, abeipa cha vaw aw ta. “Na chakaotuhpa he adyuhna rupa su lâta vawh na ta, chyhsa pakha a vaw heih ta, kei lâta chyhsa pakha a vaw chhi ta. ‘He chyhsa he vaw vaih teh; â râ khiahtala ano hrona vyuhpa ta na hrona pahlei aw chi ta, a châ vei khiahtala tâkâ talent miakha na pie awpa a châ,’ tah ta.
40 Chatawhcha na chakaotuhpa he a tyhreipa ta ei ypa vâta a vaw sie syulyu haw,” tah ta. Izarel beipa chata a hnohta, “Cha hawhna tlai cha a châ; na chô liata bie a tlupa cha nâma ta na za pathla haw cha zaw,” tah ta.
41 Chatawhcha ano chata a mokhaoh tawhtapa â khuna hraina cha thlai la ta; Izarel beipa chata hrohsopa zy hry liatahpa a châ tahpa pahno haw ta.
42 Ano chata a hnohta, “ABEIPA ta he tana heta a tah, ‘Pahleipadia awpa ta chyhsa ei raopa na ku tawhta na papua hawpa vâta, ano hrona vyuhpa ta na hrona, a chyhsa zy vyuhpa ta na chyhsa zy na pahlei aw,’ tahpa ta,” tah ta.
43 Chatawhcha Izarel beipa cha pachâ chhie ngaitapa nata palôh châ lei ngaitapa ta a di ta. Samari lâta sie haw ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 |