Zerôbaw rao nawpa ta Ahizah chhochhieliena
1 Cha nona chata Zerôbaw sawchapawpa Abizah tlâh leipa ta.
2 Zerôbaw chata a lahpinô hnohta, “Thyu la, Zerôbaw, lahpinô a châ tahpa ama cha pahno lei nawpa ta a panano la, Shilôh lâ vawh teh; cha liana chata hrohsopa Ahizah, he chyhsa zy chô liata abei ta ei y awpa ei thâtih a reihtuhpa kha a y na.
3 Viahchhâ miahrawh nata viahchhâ chyhpa zy nata kheihti ôh kha phaoh la, ano lâta vawh teh; hawti yzie awpa cha a cha vaw chho aw,” tah ta.
4 Zerôbaw lahpinô chata cha hawhna chata tao ta, thyu ta; Shilôh lâna chata vawh ta, Ahizah o lâna chata sie haw ta. Ahizah chata hmô thei khao leipa ta, a machâpa vâta a mo cha zoh haw tlôh ta.
5 ABEIPA ta Ahizah hnohta, “Zerôbaw lahpinô, a sawchapawpa kyh liata a chhohia awpa ta â vy; a tlâh leipa châ ta. He hawhna heta chho mah y, a vaw ngia tina chata chanô hropa alyu ngaitapa ta a vaw tao aw,” tah ta.
6 Chatawhcha Ahizah ta cha hawhta chhikao liata a vaw ngia no ta, a phei pyu a thei pata nahta, “Nâ, Zerôbaw lahpinô y, a vaw ngia teh; kheihta zie ta mo hropa ta a taopa ma na châ? Thâtih pha lei ngaitapa cha chho awpa ta tuapa ei châ mâ tâh.
7 Va sie la, Zerôbaw hnohta, ‘ABEIPA Izarel zy Khazohpa ta he tana heta a tah; “Zawpi zy hry tawhtapa cha pasâhsa na ta, ei chyhsa Izarel zy chô liana heta hyutuhpa ta cha tao na ta,
8 Davi chhôhkha zy khihnarâh cha chhupa na ta, cha cha chapie na ta; châhrasala nâ la ei chakaotuhpa Davi hawhta y leipa chi ta, ano lâ ei biepiepa zy a pyh ta, ei mohmô liata hmo phapa deita tao a chhuahpa ta, a pathipalôh zydua ta na zi tyh ta,
9 nâ deikua cha nâma hlâ tahpa chyhsa zydua hlâta hmo parao pachaih chi ta, ei pathi-ia nawpa ta khazoh hropa zy nata nohthlahpa leipa zy tao chi ta; na heisai haw chi ta;
10 chavâta Zerôbaw chhôhkha chô liana heta hmo pha leipa vaw patlôsa aw na ta, Zerôbaw tawhna heta chapaw maih cha Izarel khihnarâh liatahpa sei a châpa nata khotalaipa chhao pahleipadia aw na ta, chyhsa ta ie a phipa hawhna tlai heta Zerôbaw chhôhkha he amua khai hlâ lei cha ei phih aw.
11 Zerôbaw chhôhkha hry liatahpa khihpi liata a thipa maih cha, i ta chaih aw ta; chatawhcha lyurâhpa liata a thipa maih cha pavaw zy ta ama dyh aw,” cha cha ABEIPA ta a reih haw,’ tah mah y.
12 Chatanachata thyu la, na o lâ a di teh. Khihpi chhôh na tly pata nahta hawti cha a thi aw.
13 Chatanachata Izarel sahlao zydua ta mâchhie sa aw ei ta, ama pabu aw; Zerôbaw chhôhkha hry liana chata ano deita cha thlâ liata soh awpa châ tlôh aw ta, Zerôbaw chhôhkha hry liana heta ano deita liana heta ABEIPA Izarel zy Khazohpa chô liata phana kheihawhpa tlyma a lapa vâta.
14 Chatawhcha ABEIPA ta atahmâ tlaita Zerôbaw chhôhkha vaw pahleipadiatuh awpa Izarel zy chô liata ano chata abei ta a tao aw. Atahmâ chhao heta kheihta ma a châ aw tly.
15 ABEIPA chata ti liata lothi a chalyu ngâpa hawh tlaita Izarel zy cha vaw chalyu aw ta, chatanachata ABEIPA pathipa-iapa ta ama Ashera zy cha ama taopa vâta ama mahpaw zy a vaw pie hawhpa he râh pha ngaitapa tawhtapa he Izarel sahlao zy cha phia khai aw ta, chavah khô lâna chata a papai khai aw.
16 Chatawhcha Izarel sahlao zy hmo a paraosapa a tahpa Zerôbaw moleina zy vâta Izarel sahlao zy cha â heisai aw,” tah ta.
17 Zerôbaw lahpinô cha thyu ta, pua haw ta, Tirzah khih cha kei tlô ta. Chatawhcha o chhikao kiapâh a kei tlô pata nahta, hawti cha thi haw ta.
18 ABEIPA ta a chakaotuhpa hrohsopa Ahizah hmâpa ta, bie a vaw rei hawpa hawhna tlai khata Izarel sahlao zydua chata pabu ei ta, mâchhiesa haw ei ta.
19 Zerôbaw thâtih hropa, a chariah adyuhna kyh zy, a ryureina kyh zy cha Izarel abei zy abei no tahpa kyh rona châbu liata a roh ta.
20 Chatanachata Zerôbaw ryureina chhôh cha kô syno nata kô no a châ; a mahpaw zy hnohta a mô ta, a sawchapawpa Nada cha ano vyuhpa ta ryureih haw ta.
Rehôbaw abeina
21 Sawlawmaw sawchapawpa Rehôbaw cha Zudah râh liata a bei ta. A bei tua nota Rehôbaw cha kô sypalih nata kô khapa a châ, ABEIPA ta a moh paysa nawpa ta Izarel pho zydua hry liata a tlypa khihpi Zerusale liana chata kô sari a bei ta. Ano moh cha Namah, Amawna chyhsa a châ.
22 Zudah sahlao chata ABEIPA mohmô ta hmo moleipa tao ei ta, ama mahpaw zy hmotaopa zydua khôpa ta ama moleipa zy chata a hia patliasa ei ta.
23 Tlâh sâhpa to liata nata tho hropa to ry liata lôbô zy bôpa ta, su sâhpa zy nata Ashera zy tao tlôh hra ei ta;
24 cha râh liana chata sihryhpa chhao y ei ta. Izarel pathla zy hmiakô liata ABEIPA ta a papua hawhpa phozy hmotaopa pasichhihpa to hawhpa cha tao hra ei ta.
25 Abeipa Rehôbaw a beina kô pangawh kô liana chata Izi beipa Shisaka ta Zerusale cha a dyuh ta;
26 ABEIPA o liata ryu zy nata abei o liata ryu zy cha la ta; a zydua ta la khai haw ta. Sawlawmaw ngôh vyhphao taopa zydua cha lapa khai ta;
27 Abei Rehôbaw chata chazy vyuhpa ta dawh vyhphao zy tao ta, abeipa o chhikao vaihtuhpa hyutuhpa pavaosa ta.
28 Chatawhcha abeipa cha ABEIPA o lâ a ngiana maihta vaihtuhpa zy chata chaba ei ta, vaihtuhpa zy chhôhpadâhpa liata soh heih tyh ei ta.
29 Rehôbaw thâtih hropa zy nata a hmotaopa zydua cha Zudah abei zy amâ bei no tahpa ky rona châbu liana chata ropa ta y vei mâ?
30 Rehôbaw nata Zerôbaw cha adyuh ngâthlâh ha ei ta.
31 Chatawhcha Rehôbaw cha a mahpaw zy hnohta a mô ta, Davi khihpi liata a mahpaw zy hry liana chata pabu haw ei ta. A nô moh cha Namah Amawna chyhsa a châ. Chatawhcha a sawchapawpa Abiza cha a vyuhpa ta a bei haw ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 |