Mara Holy Bible: Zawhana

Showing posts with label Zawhana. Show all posts

Zawhana 1

Bie sapa lâta a vaw liena

1 A thaona liata Bie a y, Bie cha Khazohpa hnohta a y, Bie cha Khazohpa a châ.

2 Ano cha a thaona tawhta Khazohpa hnohta pahrâ ta.

3 Ato zydua ano zawhzi ta Khazohpa ta tao ta; ano leipa ta khâpahmah ta Khazohpa ta a taopa y vei.

4 Bie liata hrona y ta, cha hrona cha chyhsazy khaihna a châ.

5 A khaihpa cha zohna liata khaih ta; a zohna chata khaihna cha pachhai thei beih vei.

6 Khazohpa tuapa chyhsa pakha y ta, a moh cha Zawhana a châ.

7 Ano cha chyhsazy hnohta khaihna bie pahnosa awpa ta a vy ta, âmo pahnosa ta, a bie vâta amâ ngiapâ thei nawpa ta.

8 Zawhana cha khaihna châ leipa ta, khaihna bie pahnosa awpa ta a vypa tlao a châ.

9 Khaihna hmeiseihpa chyhsa to pakhaihsa awpa cha khizaw liata a zu ta.

10 Bie cha khizaw liata a y, Khazohpa ta ano zawzi ta khizaw cha tao ta; châhrasala khizaw ta ano cha pahno vei.

11 Ano râh lia tlaita a zu ta; châhrasala ano chyhsazy ta aly tlôh ei va.

12 Châhrasala thokha ano alypa, ano liata angiapâpazy cha Khazohpa sawzy châ thei nawpa biehneina a pie ei.

13 Chazy cha chyhsa pienazie hawhta Khazohpa saw a châpa châ leipa ei ta; chyhsapa paw ta a sapa sawzy hawhta châ hra veih ei; Khazohpa tlai cha ama Paw tlao châ tlôh ta.

14 Bie cha chyhsa hrohpa lâta a vaw lie ta, eima hry liata a pahrâ. A rônahna hmô haw pi ta, ngiachhiena nata hmeiseihna ta a bie. Cha rônahna cha Paw Sawchapawpa matlupa rônahna a châ.

15 He he Zawhana ta ano a pahnosana cha a châ, “He chyhsa he he hawhta a thâtih ei reipa kha a châ, ‘Ei hnôh lâta a vypa he, keima hlâta tlao rônah via ta’, ano cha ei pie hlâta a y hapa châ tlôh ta,” tah ta.

16 A pakina tawhta ngiachhiena eima to chyu, ngiachhie chôta ngiachhie pachhuahna chhao.

17 Khazohpa ta ryhpa cha Mawsi hmâpa ta pie ta, ngiachhiena nata hmeiseihna deikua cha Krista zawhzi ta a vaw ypa a châ.

18 Ahyhmah ta Khazohpa hmô beih veih ei, Sawchapawpa matlupa, Paw ku chachâh lâta atyuhpa ta, ano a paluahsa tyh.

Bâtituhpa Zawhana pahnosana(Mk 3:1-12; Mk 1:1-8; Lk 3:1-17)

19 Zuzy ta, ‘Ahy na châ?” tahpa ta hiahri awpa ta Zerusale khih tawhta ano lâta theihthaipazy nata Livaizy ama tua nona khata, hezy he Zawhana bie pahnosapa cha a châ.

20 A phih leipa ta, a palâhâh ta, “Mesia châ va na,” tahpa ta.

21 Cha khiahcha, ‘Ahy e na châ? Elaiza na châ ma?” tahpa ta âmo chata hiahri ei ta. Ano chata “Châ va na,” tah ta. “Hrohsopa kha na châ ma?” tah ei ta. Ano chata, “Châ va na,” tah ta a chhy ta.

22 Âmo chata a hnohta, “Cha khiahla ahy e na châ? Maniah tuahtuhpazy eimâ chhy thei nawpa ta maniah chho teh. Na thâtih rai kheihta e na reih aw?” tah ei ta.

23 Zawhana chata, “He he ei châ: Abeipa lâthlôh paraih teh u! tahpa ta râhpathoh liata awhtuhpa ao khawh,’ cha cha hrohsopa Isai ta a vaw rei hapa hawhna khata,” tah ta.

24 Ama tuapazy cha Pharisaizy tawhtapa châ ei ta.

25 Âmo chata a hnohta, “Mesia tlyma, Elaiza tlyma, Hrohsopa tlyma chhâh na châ tlôh leipa khiahta cha, khazia e na bâti tyh tly?” tahpa ta hiahri ei ta.

26 Zawhana ta ama hnohta, “Keima ta ti ta ei cha bâti tyh ei, nama hry liata: chyhsa pakha nama pahno leipa â duah,

27 ano cha ei hnôh lâta a vypa châ ta, a pheiky ri pathlâ tlâh chhao châ va na,” tah ta a chhy ta.

28 Cha hmozy cha Zawdah haosâ Bethani khih liata Zawhana ta a bâtina liana khata a vaw tlô.

Khazohpa Mietahkupa Taw

29 A mylâ ta Zawhana ta Zisu ano lâta a vypa hmô ta, ano ta, “Moh teh u, Khazohpa Mietahkupa Taw khizaw molei siekheituh awpa huh!

30 He chyhsa he he hawhta a thâtih ei reipa kha a châ: ‘Ei hnôh lâta a vypa he, keima hlâta tlao rônah via ta’, ano cha ei pi hlâta a y hapa châ tlôh ta.

31 Ano cha ahyma a châ pahno va na, châhrasala he he ei vyna chhâpa cha a châ, ti ta bâti awpa ta, ano cha Izarelzy hnohta a pahnosa thei nawpa ta,” tah ta.

32 He he Zawhana ta pahnosana bie a reipa cha a châ; “Thlahpa vachhuh hawhta avâ tawhta za chôpa hmô na ta, a chô liata a choh ta.

33 Ano cha pahno to leipa na ta; châhrasala Khazohpa ti ta bâti awpa ta na tuahtuhpa khata ei hnohta, ‘Ahy chô liata rai Thlahpa a za chôpa ta a chô liata a ypa na hmôpa cha, ano cha Thlahpa Pathaihpa ta bâtituh awpa cha a châ,’ na tah ta.

34 Cha cha hmô ha na ta, he he Khazohpa Sawchapawpa a châ tahpa nama hnohta ei pahnosa,” tah ta.

Zisu pachupa hmia tuachaipazy

35 A mylâpa ta Zawhana a duah ta, a pachupazy pano chhaota;

36 Zisu a khiekhâ nota hmô ta, “Moh teh u, Khazohpa Mietakupa Taw huh!” tah ta.

37 A pachupa pano chata a bie reipa cha thei ei ta, Zisu zi haw ei ta.

38 Zisu a heih ta, ama vaw zipa hmô ta, ama hnohta, “Khâpa nama tlua?” tah ta. Âmo chata, “Rabai” (cha cha Pachutupa tahna a châ), “Khataih liata ma na y?” tah ei ta.

39 Ano ta ama hnohta, “A vy ula, nama hmô aw,” tah ta. Chatanachata vawh ei ta, a yna cha hmô ei ta; cha nona chata ano hnohta y thlâh ha ei ta, zâlâ dawh palih rachhôh châ ta.

40 Zawhana bie reipa cha theipa ta Zisu a zituhpazy pano hryta pakhapa cha Adru, Saimaw Pity unawhpa a châ.

41 Ano chata a hmiatuata a unawhpa Saimaw hmô ta a hnohta, “Mesia eima hmô haw,” tah ta, (cha cha Krista tahna a châ).

42 Chatanachata Zisu lâta a vaw chhi ta, Zisu ta ano cha vaw moh ta, “Zawhana, sawchapawpa Saimaw na châ, Sifasa bipa na châ aw,” tah ta, (cha cha Pity tahna châ ta a yzie cha Lôpanô tahna a châ.)

Phili nata Nathanael Zisu ta a awna

43 A mylâpa ta Zisu chata Kalili râh lâ sie a chhuah ta*Phili hmô ta, a hnohta, “Na zi teh,” tah ta.

44 Phili cha Besaida khihpa a châ, cha cha Adru nata Pity yna a châ.

45 Phili chata Nathanael hmô ta, a hnohta, “A thâtih Mawsi ta ryhpa châbu liata a ropa nata hrohsopazy ta ama ropa kha, ano cha eima hmô haw, Nazari Zisu, Zawsi sawchapawpa cha,” tah ta.

46 Nathanael chata a hnohta, “Nazari khih tawhta hmo phapa a pua thei ma?” tah ta. Phili chata a hnohta, “A vy la, mo tua,” tah ta.

47 Zisu ta Nathanael ano lâta a vy haipa hmô ta, a thâtih reih ta, “Mo teh u, Izarel chyhsa hmeiseihpa, haidihaiduana rai a hnei leipa huh!” tah ta.

48 Nathanael chata a hnohta, “Nâ ta kheihta e eina pahno chi?” tah ta. Zisu ta a hnohta, “Phili ta a cha aw hlâta, theiku thaby liata na y nona khata, ei cha hmô mâ tâh,” tah ta a chhy ta.

49 Nathanael ta a hnohta, “Rabai, Khazohpa Sawchapawpa na châ! Izarelzy Beichaipa na châ!” tahpa ta a chhy ta.

50 Zisu ta a hnohta, “Theiku thaby liata ei cha hmô mâ tâh, ei cha tahpa vâta nâ ngiapâ ma? Hezy hlâta hmo rônah viapa na hmô aw,” tah ta a chhy ta.

51 Zisu ta a hnohta, “Hmeiseihta ta, ei cha chho ei, a vâ a pahypa nata Khazohpa vâlyuhchâpazy Chyhsa Sawchapawpa chô liana heta chôpa nata kiahpa nama hmô aw,” tah ta.

Zawhana (John)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Zawhana 2

Kena liata ahneina

1 Noh thôh noh ta Kalili râh liata Kena khih liana cha ahneina y ta, cha liana chata Zisu nô a y;

2 Zisu nata a pachupazy chhao ahneina a hlao awpa ta hrua ei ta.

3 Chatawhcha kresawti cha a daih khao leipa ta, Zisu nô chata a hnohta, “Kresawti amâ phahla ha na,” tah ta.

4 Zisu ta a hnohta, “Ei nâ, nama pachâpa cha, keima pachâpa châ vei? Ei daihti tlô mâh vei,” tah ta.

5 A nô ta chakaotuhpazy hnohta, “Nama hnohta a reipa maih cha tao lymâ muh vy,” tah ta.

6 Zuzy pasi pathaina yzie hawhta lô beirai miacharu, khô sypalih su no tlyma, su thôh tlyma a tlôh chyupa cha liana chata patyu ei ta.

7 Zisu ta ama hnohta, “Lô beiraizy ti pabie teh u,” tah ta. Chatawhcha a kiah â chipa ta pabie chyu ei ta.

8 Ama hnohta, “Atahmâ thaih ula, chôtlapa hyutuhpa lâta vawkhei teh u,” tah ta. Chatawhcha vawkhei ei ta.

9 Chôtlapa hyutuhpa chata ti kresawti lâta a liepa cha pachâ ta, a puanazie pahno leipa ta, ti a thaituhpa chakaotuhpazy deikua chata pahno ei ta, lahpinô a hnei awpa cha aw ta,

10 a hnohta, “Chyhsa to ta hmiatua ta kresawti phapa ama papua tyh; a hluh via ama doh tawhta a pha lei viapa ama papua tyh; nâ cha atahmâ taihta kresawti phapa na khai thlâh hapa he,” tah ta.

11 Zisu ta he a hmonoâhpa tao pathao tuana he Kalili râh Kena khih liata tao ta, a rônahzie palâsa haw ta; a pachupazy chata ano cha a ngiapâ ei ta.

12 Cha tawhna chata Kapynia khih lâta zu ta, ano nata a nô nata a unawhzy nata a pachupazy chhaota; cha liana chata noh chyhta y ei ta.

Achhyna-o pathaina(Mt 21:12-13; Mk, 11:15-18; Lk, 19:45-46)

13 Zuzy Zawpakhô kyhchhi a hnia ha ta, Zisu Zerusale khih lâ khy ta.

14 Khazohpa achhyna-o liata viahchaozy, mietahkupa zy, vachhuh zy a zuahtuhpa sahlao nata tâkâ a rituhpa sahlao atyupa hmô ta.

15 Chatawhcha khawhri charipa ta chheina tao ta, mietahkupa nata viahchao, a zydua ta Khazohpa achhyna-o tawhta papua ta; tâkâ rituhpazy tâkâ cha leitha ta, ama tlâhkhaizy chati pa thlah hra ta.

16 Chatawhcha vachhuh a zuahtuhpazy hnohna chata, “He hmozy he he tawhna heta siekhei teh u’ ei Paw o sôhdaona o ta tao khah u,” tah ta.

17 “Na o liata ei phahnaikhôna ta eina nie khai aw,” tahpa ropa a châ tahpa a pachupazy chata thei ei ta.

18 Zuzy ta a hnohta, “He hmozy na taopa he pahnona khâpa maniah na pahmôsa thei,” tah ei ta.

19 Zisu ta ama hnohta, “He o he parao ula, noh thôh chhôhta ei padua aw,” tah ta a chhy ta.

20 Zuzy chata, “He o he kô sypalih nata kô charu sapa a châ, nâ ta noh thôh chhôhta na padua aw ma?” tah ei ta.

21 Châhrasala ano pôhpa achhyna-o kyh a reipa tlao a châ.

22 Chavâta athihpa hry tawhta a thyu nahta cha kyh cha a rei haw tahpa a pachupazy ta a thei ei ta; Khazohpa châ bie nata Zisu bie reipa cha ama ngiapâ haw.

Zisu ta chyhsa zydua a pahno

23 Zawpakhô kyhchhi liata Zerusale khih liata a y nona chata, a hmonoâhpa taopazy hmô ei ta, chyhsa hluhpi ta ano a ngiapâ ei ta.

24 Châhrasala Zisu cha âmo liata a nopei vei,

25 chyhsa zydua pahno ta, chyhsapa kyh ahyhmah chhopasia a byuh leipa vâta; ano ta chyhsapa pathipalôh liata a ypa maih cha pahno tlôh ta.

Zawhana (John)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Zawhana 3

Zisu nata Nikadima

1 Pharisaizy hry liatapa chyhsa pakha a moh Nikadima, Zuzy hyutuhpa a y.

2 Cha chyhsa cha zâ ta Zisu lâ a vy ta, a hnohta, “Rabai, Khazohpa tawhta pachutuhpa ta a vypa na châ tahpa eima pahno; Khazohpa a chô liata a y leipa khiahtala he hmonoâhpa na taopa hawhpazy he ahyhmah ta tao thei aw veih ei,” tah ta.

3 Zisu ta a chhy ta a hnohta, “Hmeiseihta ta, hmeiseihta ta, ei cha chho, chyhsa ahyrai chôlâ tawhta a pihpathi leipa khiahtala Khazohpa Khihnarâh hmô thei aw veih ei,” tah ta.

4 Nikadima ta a hnohta, “Chyhsapa a pawpi tawhta kheihta e a pih thei aw? A nô chhi liata ei no a ngiapa ta a pih thei aw ma?” tah ta.

5 Zisu ta a chhy ta, “Hmeiseihta ta, hmeiseihta ta, ei cha chho, chyhsa ahyrai ti ta nata Thlahpa ta ama pih leipa khiahtala Khazohpa Khihnarâh liata a ngia thei aw veih ei.

6 Sapa ta a pihpa maih sapa a châ, Thlahpa ta a pihpa maih thlahpa a châ.

7 ‘Na pih pathi awpa a châ,’ ei cha tahpa he na noâh khah se.

8 Thlih khataih lâ rai a khona maihta a pathli tyh, a pyu na thei, châhrasala khataih tawhta a vypa ma, khataih lâ a sie aw tahpa pahno tlôh chi va; ahyrai Thlahpa ta a pihpa cha, cha hawhta ama y,” tah ta.

9 Nikadima ta a chhy ta, “Cha hmo cha kheihta e a y thei aw?” tah ta.

10 Zisu ta a chhy ta, “Izarelzy pachutuhpa châ tlôh chi ta, chazy cha na no a vâh vei ma?

11 Hmeiseihta ta, hmeiseihta ta, ei cha chho, keimo ta eima pahnopa cha eima reih tyh, eima hmôpa cha eima pahnosa tyh; châhrasala eima bie pahnosapa zo tyh tlôh veih eichi.

12 Khizaw hmo ei cha chhopa hmahta nama zo leipa he, avâ hmozy cha chho aw ei sala kheihta e nama zo aw?

13 Avâ lâ ahyhmah kiah beih veih ei, avâ tawhta a za chôpa Chyhsa Sawchapawpa dei leipa ta cha.

14 Mawsi ta râhpathohpa liata parih a chaluahpa hawhna khata, Chyhsa Sawchapawpa he chaluahpa ta a y hra awpa a châ,

15 ahyrai a ngiapâpa maihta ano vâta chhâzaw hrona ama hnei nawpa ta.

16 Khazohpa ta khizaw kyh pachâ ngaita ta, chatanachata a Sawchapaw matlupa pie ta, ano cha ahyrai a ngiapâpa maih leidia leipa ta, chhâzaw hrona tlao ama hnei nawpa ta.

17 Khizaw thai lei pachâsa nawpa ta Khazohpa ta a Sawchapawpa khizaw liata a tuapa châ vei, khizaw ano vâta pachhapa ta a y thei nawpa ta a tuapa tlao a châ.

18 Ahyrai ano a ngiapâpa cha thai lei pachâsapa ta y aw vei; ahyrai a ngiapâ leipa cha atahmâ bawlaw ta thai lei pachâsapa ta a y; Khazohpa Sawchapaw matlupa moh a ngiapâ leipa vâta.

19 He he thai lei pachâsana a châ, khaihpa cha khizaw liata a vy ta, châhrasala chyhsazy ta khaihpa hlâta zohpa ama khoh via, ama hmotaopazy a moleipa vâta.

20 Ahyrai hmo a paraopa maih ta khaihpa a hao tyh, khaihpa lâta chhao a vy vei, chata leipa ta cha a hmotaopazy a la aw.

21 Anodeikuacha ahyrai a dopa ta a taopa maih, a hmotaopazy Khazohpa vâta a taopa a châ tahpa a lâ nawpa ta khaihpa lâta a vy tyh,” tah ta.

Zisu nata Zawhana

22 Cha tawhna chata Zisu a pachupazy chhaota Zudia râh lâ sie ei ta; cha liana chata Zisu ama hnohta y ta, bâti pachâsa ta.

23 Zawhana chhaota Anawna liata Sali khih kiapâh liata bâti pachâsa hra ta, cha liana chata ti a hluhpa vâta; chatawhcha zawpi a hnohta a vy ei ta, bâti âmo pachâsa ta.

24 Cha nona chata Zawhana cha patâhna o liata khôpa cha ma tlôh lei khâh ta.

25 Zawhana pachupazy nata Zu chyhsa pakha pasipathaina kyh liata a eina hnei ei ta.

26 Zawhana lâ a vy ei ta, a hnohta, “Rabai, Zawdâh haosâ ta na hnohta a ypa a thâtih na pahnosapa khata, chyhsa bâti pachâsa ta, chyhsa zydua ano lâta amâ vy,” tah ei ta.

27 Zawhana ta a chhy ta, “Chyhsapa ta khâpahmah hnei thei veih ei, avâ lâtahpa piepa a châ vei khiahtala.

28 Kei Mesia châ va na, a hmia lâta tuapa ei châ, ei tahpa kha, nâmo tlai na pahnokheituhpazy nama châ.

29 Myuhneituhpa cha a vahpa cha a châ; châhrasala vahpa viasa a duahpa chôta a bie a theipa cha, vahpa ao vâta aly ngaita tyh; chavâta ei lyna a tlô haw hih.

30 Ano cha a pathâh rili awpa a châ, kei deikua cha a nawh awpa ei châ,” tah ta.

Avâ tawhta a zupa

31 Chôlâ tawhta a zupa cha chyhsa zydua hlâta chônô chaipa a châ; alei liata a pihpa cha alei chyhsa châ ta, alei kyh a reih tyh; avâ tawhta a zupa cha chyhsa zydua hlâta chônô chaipa a châ.

32 A hmôpa nata a theipa maih a pahnosa tyh; ahyhmah ta a bie pahnosapa zo veih ei;

33 a bie pahnosapa a zopa chata. Khazohpa cha a do ngaitapa a châ tahpa ta a moh chahnaopa ta a ro.

34 Khazohpa tuapa chata Khazohpa bie a reih tyh, ano chata panua cheingeipa ta Thlahpa pie tlôh lei khâh ta;

35 Paw ta Sawchapawpa kyh pachâ ta, a ku liata ato zydua a pie haw.

36 Ahyrai Sawchapawpa a ngiapâpa maihta chhâzaw hrona a hnei haw; châhrasala ahyrai Sawchapawpa bie a zo leipa maihta hrona hnei aw veih ei, Khazohpa hiehâhna a chô liata tlao a y,” tah ta.

Zawhana (John)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Zawhana 4

Zisu nata Samari chanô

1 Zisu ta Zawhana hlâta pachupa hluh via a taopa nata bâti a pachâsapa Pharisaizy ta ama thei tahpa Abeipa chata a pahnopata nahta,

2 (châhrasala Zisu tlaita bâti pachâsa vei, a pachupazy ta bâti tlao ama pachâsa tyh),

3 Zudia râh cha siesai ta, Kalili râh lâta kua heih ta.

4 Samari râh a sie pahlie awpa a châ.

5 Chatanachata Samari râh khih miakha Saika ama tahpa cha vaw tlô ta. Zakaw ta a saw Zawsi hnohta su a piepa kiapâh liana cha.

6 Zakaw tikhaorei chhao cha liana chata a y, chatanachata Zisu cha a sie rietheipa vâta tikhaorei kiah liana chata a tyu ta. Nohchhô nota châ ta.

7 Samari chanô pakha ti thaihpa ta a vy ta. Zisu ta a hnohta, “Do awpa na pie teh,” tah ta.

8 A pachupazy cha niepa chalei awpa ta khih lâ sie haw tlôh ei ta.

9 Samari chanô chata a hnohta, “Nâ, Zu chyhsa châ chi ta, kei Samari chanô châ tlôh na ta, kheihtazie ta e do awpa eina hia chi?” tah ta. Zuzy ta Samari chyhsazy khâpa ta hmah hmâh beih tlôh lei khâh ei ta.

10 Zisu ta a chhy ta a hnohta, “Khazohpa hmopiepa nata, ‘Do awpa na pie teh,’ cha tahtuhpa he a pahnopa châ la, nâma ta a hnohta tlao nâ hia awpa châ ta, ano ta ti hrohpa a cha pie ha bâ awpa a châ,” tah ta.

11 Chanô ta a hnohta, “Pâpuh, thaina khâpahmah hnei tlôh lei khâh chi ta, tikhaorei a thuh thlâ bao nahta; khataih liatahpa ma ti hrohpa cha na hmô?

12 Eima mahpaw Zakaw hlâta na rônah via ma? Ano chata he tikhaorei he maniah pie ta, ano chhaota doh ta, a sawchapawpazy, a sahrohzy chhaota,” tah ta.

13 Zisu ta a chhy ta a hnohta, “Ahyrai he ti a dohpa maih a dâh a phi heih aw,

14 ahyrai a hnohta ei pie awpa ti a dohpa maih deikua cha a dâh phi khao aw vei; kei ta a hnohta ti ei pie awpa cha, a chhôh liata tihnawh y aw ta, chhâzaw hrona taihta a kaw palih aw,” tah ta.

15 Chanô chata a hnohta, “Pâpuh, cha ti cha na pie teh, ei dâh a phi lei nawpa nata he tiaparâh ti thaih awpa ta ei vy tyh lei nawpa ta,” tah ta.

16 Zisu ta a hnohta, “Na vahpa kei aw la, he lâ a vy heih mah y,” tah ta.

17 Chanô chata a hnohta, “Vahpa hnei va na,” tah ta a chhy ta. Zisu ta a hnohta, “Vahpa hnei va na,” na tahpa he na reipa â do na;

18 vahpa papangawh na hnei haw, atahmâ ta na hneipa he na vahpa a châ leipa raina a châ; he bie he na reipa â do na,” tah ta.

19 Chanô chata a hnohta, ‘Pâpuh, hrohsopa na châ tahpa ei pahno haw.

20 Keimo pathlatuhpazy chata he tlâh liana heta Khazohpa amâ chhy tyh; châhrasala nâmo tala chyhsapa ta Khazohpa amâ chhyna su awpa cha Zerusale khih liata a y, nama tah tyh,” tah ta.

21 Zisu ta a hnohta, “Chanô, ei bie zo teh, he tlâh cheingei leipa liata chhao, Zerusale khih cheingei leipa liata chhao, Paw namâ chhyna daihti a tlô aw.

22 Nâmo ta nama pahno leipa namâ chhy tyh; keimo tala eima pahnopa cha eimâ chhy tyh, pachhana Zuzy tawhta vaw pua tlôh ta.

23 Châhrasala a daihti a tlô daihmâ, atahmâ chhao a tlô haw, cha tina chata Khazohpa achhytuhpa hmeiseihpazy ta thlahpa nata hmeiseihpa ta Paw amâ chhy aw, Paw ta cha hawhpa cha achhytuh awpa ta a tlua.

24 Khazohpa cha Thlahpa a châ, achhytuhpazy ta thlahpa nata hmeiseihpa ta amâ chhy awpa a châ,” tah ta.

25 Chanô chata a hnohta, “Mesia (Krista ama tahpa cha) a vy aw tahpa ei pahno; ano cha a vy tita ato maniah a chho aw,” tah ta.

26 Zisu ta a hnohta, “Keima bie châ chhotuhpa na he ano cha ei châ mâ tâh,” tah ta.

27 Cha nona chata a pachupazy cha a vy ei ta. Chanô bie a chhopa cha ama noâh kaw ta, châhrasala ahyhmah ta, “Khâpa na khoh?” tlyma “Khazia chanô bie nâ chho?” tlyma tah veih ei.

28 Chatawhcha chanô chata a ti beih-rai siesai ta, khih lâ sie ta, chyhsazy hnohta,

29 “Ei hmotaopa maih na chho lymâtuhpa chyhsa pakha y ta a vy ula, moh teh u. Mesia a châ thei aw tlyma?” tah ta.

30 Chatawhcha âmo cha khih tawhtapa cha vaw pua ei ta, ano lâ pangai ei ta.

31 Cha chhôhna chata pachupazy chata a hnohta, “Pachutuhpa y, nie teh,” tah chaimâh ei ta.

32 Châhrasala ano chata ama hnohta, “Pati nama pahno leipa nie awpa ei hnei na,” tah ta.

33 Chatawhcha pachupazy chata âmo nata âmo liata, “A nie awpa chyhsa ta ama vaw cheipa tlyma?” a tah ei ta.

34 Zisu ta ama hnohta, “Nâ tuahtuhpa khopa taopa nata a raihria paloh awpa he ei pati a châ.

35 Nâmo ta, ‘Sâh hria a daih nawpa ta thla palih a byuh,’ tah veih eichi ma? Nahthlie teh u, ei cha chho ei hih, sai ula, lyuzy moh teh u, atahmâ hmahta hria awpa ta a maih haw.

36 A hriatuhpa ta hlao hmô tyh ta, chhâzaw hrona taihta a y awpa ta a theipa a hria tyh, a tutuhpa nata a hriatuhpa amâ ly rairie thei nawpa ta;

37 ‘Pakha ta tu tyh ta, mo hropa ta a hria tyh,’ tahpa bie he cha liana chata a do kawpa a châ.

38 Nama hria pasa leipa hria awpa ta ei cha tuapa ei kha; mo hropa ta hria ei ta, nâmo ta ama hria chiehpa cha nama pazao,” tah ta.

39 Chanô ta, “Ei hmotaopa maih eina chho lymâ,” tahpa ta a pahnosapa vâna khata, cha khih liata a ypa Samari chyhsa hluhpi ta Zisu angiapâ ei ta.

40 Chatanachata Samari chyhsazy cha Zisu lâ a vy ei ta, ama hnohta a y awpa ta a haw chaimâh ei ta; cha liana chata noh no châh ta.

41 Chatawhcha mo hropa hluhpi ta ano bie vâta a ngiapâ hra ei ta.

42 Âmo chata chanô hnohta, “Atahmâ la na bie reipa vâta angiapâpa châ khao ma pi, keimo tlaita a bie thei pi ta, he he khizaw Pachhatuhpa a châ tlai tahpa eima pahno haw,” tah ei ta.

Zisu ta molaipa saw a patlâhna

43 Noh no a y tawhna chata cha tawhta pua ta. Kalili râh lâ sie ha ta.

44 Zisu tlaita hrohsopa cha ano khih liata palyupalihpa ta y beih vei tahpa pahnosa tyh tlôh ta.

45 Chatanachata Kalili râh a vaw tlô nahta, Kalili chyhsazy ta a vaw ly ei ta, Zerusale khih liata Zawpakhô kyhchhi nota a hmotaopa zydua ama hmôpa vâna khata, âmo chhao cha kyhchhina lâna chata sie tlôh hra ei ta.

46 Kalili râh liata Kena khih, ti kresawti lâta a pachâsana kha vaw tlô heih ta. Machâ ahy tlyma y ta, a sawchapawpa Kapynia khih liata tlâh leipa ta.

47 Zisu Zudia râh tawhta Kalili râh lâ a vy tahpa a theipa ta nahta ano lâ sie ta, a sawchapawpa vaw patlâh awpa ta a haw chaimâh ta, thi daihmâ tlôh ta.

48 Zisu ta a hnohta, “Pahnosanazy nata hmonoâhpazy nama hmô vei khiahtala ngiapâ chachei aw veih eichi,” tah ta.

49 Machâ chata a hnohta, “Pâpuh y, ei saw a thi hlâta a zu mah y,” tah ta.

50 Zisu ta a hnohta, “Vaw thlâh ha teh, na sawchapawpa cha a tlâh haw,” tah ta. Cha chyhsa chata Zisu ta a hnohta bie a reipa cha zo ta sie ha ta.

51 A zu hai nota, a seizy ta vaw dy ei ta, a sawchapawpa cha a tlâ hawpa chho ei ta.

52 Ano chata ama hnohta a tlâh tuana daihti hiahri ta, âmo chata a hnohta, “Zâhia zâlâ dawh khapa ta a chasipa a lei,” tah ei ta.

53 A paw ta Zisu ta a hnohta, “Na sawchapawpa a tlâ haw,” a tah nona tlai cha a châ tahpa pahno ha ta; ano nata a chhôhkhazy ta ama zydua ta angiapâ haw ei ta.

54 Cha cha Zisu ta a hmotao noâhpa a taopa ei nona a châ, Zudia râh tawhta Kalili râ lâ a vy nota.

Zawhana (John)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Zawhana 5

Tipo liata patlâhna

1 Cha hmozy hnôh lâna chata Zuzy kyhchhi miakha y ta, Zisu Zerusale khih lâ khy ta.

2 Zerusale liana chata Mietahkupa O-chhi kiapâh liata tipo y ta, cha cha Hebrai reih ta Bezatha* tah ei ta, oka miapangawh a hneipa châ ta.

3 Chazy liana chata tlâh leipa hluhpi mochaopa zy, pheisypa zy, asihpa zy a zia ei ta. [Ti chatlaopa hâ thlâh ei ta;

4 Abeipa vâlyuhchâpa tipo liata a zuna maihta, ti cha chatlaosa ta. A tlâh leipa cha ti a chatlao tawhta tipo lâ a vaw tuachaipa maih kheihawhpa pasana tawh raita patlâpa châ lymâ ei ta.]

5 Cha liana chata kô sythôh nata kô charie a pasapa chyhsa ahy tlyma y ta.

6 Zisu ta a ziapa cha hmô ta, cha hawhta bohpi a y hawpa pahno ta, a hnohta, “Patlâh na khoh ma?” tah ta.

7 Chyhsa tlâhleipa chata, “Pâpuh y, ti a chatlao nahta tipo liata na sohtuhpa hnei leipa na ta, ei sie chhôh ta mo hropa ta eina chhao ha tyh ei,” tahpa ta chho ta.

8 Zisu ta a hnohta, “Thyu la, na hmophaw la la, phei ta sie teh,” tah ta.

9 Chatawhcha sôkha ta cha chyhsa cha tlâhpâ ha ta, a hmophawh cha la ta, sie ha ta. Cha noh cha pahânoh châ ta.

10 Chatanachata Zuzy ta a tlâh hapa hnohna chata, “Pahânoh a châ he, na hmophaw la hrao aw va chi,” tah ei ta.

11 Ano chata ama hnohta, “Na patlâhtuhpa tlaita ei hnohta, ‘Na hmophaw la la, phei ta sie teh,’ eina tah,” tah ta a chhy ta.

12 Âmo chata a hnohta, “Na hmophaw la la, phei ta sie teh,’ cha tahtuhpa cha ahy maw?” tahpa ta hiahri ei ta.

13 Châhrasala a tlâhpa chata ahyma a châ tahpa pahno leipa ta, cha liana chata zawpi ama ypa vâta, Zisu sie ha tlôh ta.

14 A noh hropa ta Zisu ta ano cha Khazohpa achhy-o liata hmô ta, a hnohta, “Pachâ teh, na tlâh ha hih! Hmo parao khao khâ, chata leipa ta la hmopha lei pachaipa na chô liata a tlô pathlei aw na,” tah ta.

15 Cha chyhsa cha sie ta. Zuzy hnohna chata a patlâhtuhpa cha Zisu a châ tahpa chho ta.

16 Chatanachata pahânoh ta cha hawhpa hmozy cha a taopa vâta Zuzy ta Zisu taola ei ta.

17 Châhrasala Zisu ta âmo cha chho ta, ama hnohta, “Ei Paw ta atahmâ taih chhaota rai a hria tyh, kei chhaota ei hria tyh,” tah ta.

18 He vâna heta Zuzy ta thie a chhuah pachai heih ei ta, pahânoh a paraopa vâta dei chhao châ leipa ta, Khazohpa cha a Paw ta reih ta Khazohpa tluta a taopa vâ chhaota a châ.

Sawchapawpa biehneina

19 Zisu ta ama hnohta, “Hmeiseihta ta, hmeiseihta ta, ei cha chho ei, Sawchapawpa ta ano deita khâpahmah tao thei vei, Paw hmotaopa a hmôpa dei leipa ta cha; hmo a taopa maih cha, Sawchapawpa chhaota a tao tyh hra.

20 Paw ta Sawchapawpa kyh pachâ ta, a hmotaopa maih a pamosa tyh; hezy hlâta hmotao rônah viapa he a pamosa aw, nama noâh nawpa ta.

21 Paw ta athihpazy pathyu ta a pahro tyhpa vâta, Sawchapawpa chhaota a khopa maih a pahro tyh.

22 Paw ta ahyhmah pachia beih vei, bie zydua Sawchapawpa tlao a pachiasa,

23 chyhsa zydua ta Paw ama zapa hawhta Sawchapawpa chhao ama za nawpa ta. Ahyrai Sawchapawpa a za leipa cha, Paw a tuahtuhpa chhao a za leipa a châ.

24 Hmeiseihta ta, hmeiseihta ta, ei cha chho ei, ahyrai ei bie thei ta, nâ tuahtuhpa a ngiapâpa cha chhâzaw hrona a hnei haw; thai lei pachâsapa châ leipa ta thina tawhtapa pua ta hrona liata tlao â ngia.

25 “Hmeiseihta ta, hmeiseihta ta, ei cha chho ei, a daihti a vaw tlô daihmâ, atahmâ chhao a tlô haw, cha tina chata athihpazy ta Khazohpa Sawchapawpa ao thei aw ei ta, a theipa maihta ama hroh aw.

26 Paw ta anosasyh ta hrona hnawh a châpa hawhta, cha hawhna hra chata Sawchapawpa cha hrona hnawh châ hra awpa ta a tao,

27 Chyhsa Sawchapawpa a châpa vâta a hnohta pachiana biehneina a pie.

28 Hezy he nama noâh khah u; a daihti a tlô daihmâ, cha tina chata thlâ liata a ypa zydua ta a ao thei aw ei ta,

29 ama pua khai aw, hmophapa a taotuhpazy cha hrona topa ta thyu aw ei ta, moleina a taotuhpazy cha thai lei pachâsapa ta ama thyu aw.

Zisu a pahnosatuhpazy

30 “Keima kho ta khâpahma tao thei va na; nahkhao ta ei theipa lymâ hawhta ei pachia tyh, ei pachiapa cha â do, keima reisai ta y a chhuah leipa na ta, na tuahtuhpa reisai ta y tlao ei chhuah tyhpa vâta.

31 Keima thâtih pahnosa aw sala, ei bie pahnosapa a do aw vei;

32 ei thâtih pahnosatuhpa cha mo hropa a châ, ano chata ei thâtih a pahnosapa cha a do tahpa ei pahno"

33 Nâmo ta Zawhana lâ chyhsa tua eichi ta, ano chata a hmeiseihna thâtih a vaw pahnosa.

34 Bie pahnosapa ei pyhpa deikua cha chyhsapa bie châ vei; châhrasala pachhapa ta nama y nawpa ta he biezy he ei reih.

35 Cha Zawhana cha meiôh pakhaihpa nata khaih ngaitapa cha a châ, a khaihpa liana chata thaphapa ta y awpa nama khopa kha.

36 Châhrasala pahnosana ei hneipa he Zawhana pahnosana bie hlâna khata a rônah viapa a châ.

37 Paw na tuahtuhpa chata ei thâtih a pahnosa haw. Nâmo ta khati nota hmah a ao thei beih leipa eichi ta, a hmia chhao hmô beih hra veih eichi;

38 a bie chhao nama palôhrupa liata a vao veih eichi, a tuapa namâ ngiapâ leipa vâta.

39 Khazohpa cha bie nama rei tyh, a chhôh liata chhâzaw hrona a ypa ta nama pangiasapa vâta; cha Khazohpa châzy cha ei thâtih pahnosatuhpa châ tlôh ta;

40 châhrasala hrona hnei awpa ta keima lâ a vy khoh tlôh eichi va.

41 Chyhsapa palyupalina a pyh va na.

42 Nâmo ei cha pahno ei, Khazohpa kyhpachâna nama palôhrupa liata hnei veih eichi.'

43 Ei paw moh ta a vypa ei châpa he, nâmo ta nâ ly tlôh eichi va; mo hropa ano moh ta a vy sala, ano cha namâ ly aw.

44 Nâmosasyh ta a palyuhpalih rairiepa alypazy saih u, kheihta e namâ ngiapâ thei aw, Khazohpa hmeiseihpa dei tawhta a puapa palyupalihna cha tlua tlôh eichi va?

45 Keima ta Paw lâta ei cha leipa ei pangiasa khah u; nâmo châ leihtuhpa a y, namâ ngâchhapa Mawsi hih.

46 Mawsi namâ ngiapâ khiahtala kei chhao einâ ngiapâ awpa eichi a châ, ano chata keima thâtih ro tlôh ta.

47 Châhrasala bie ropa cha namâ ngiapâ tlôh vei khiahta cha, kheihta e ei bie namâ ngiapâ thei aw?” tah ta.

Zawhana (John)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Zawhana 6

Sâh pangawh rih a pabie (Mt 14:13-21; Mk 6:30-44; Lk 9:10-17)

1 Cha hmozy hnôh lâna chata Zisu cha Kalili Tipo, Taibiria Tipo ama tahpa haosâ lâna chata sie ta.

2 Tlâh leipazy chôta hmonoâhpa a taopazy ama hmôpa vâta zawpi hluhpi ta ano zi ei ta.

3 Zisu cha tlâh lâ khy ta, cha liana chata a pachupazy hnohta a tyuh ta.

4 Zuzy Zawpakhô kyhchhi cha a hnia ha ta.

5 Zisu mohmia pasaih ta, zawpi hluhpi ano lâ ama vaw pangaipa hmô ta, Phili hnohta, “He sahlao nie awpa viahchhâ khataih tawhtapa e eima chalei aw?” tah ta.

6 Cha bie cha ano pasia nawpa ta a reipa a châ, a tao awpa cha ano ta pahno thlâh ha tlôh ta.

7 Phili chata a hnohta, “Chyhsa tota a chyhta ama to chyu awpa chhao tâkâ za no mâ viahchhâ ta a daih aw vei,” tah ta a chhy ta.

8 Pachupazy hryta pakha Saimaw Pity unawhpa Adru chata a hnohta,

9 “Bâli viahchhâ tlâ pangawh nata ngasa miano a hneipa chapaw hawti pakha he liata a y; châhrasala he zydua hry liana heta chazy cha khâpa didâh a châ aw?” tah ta.

10 Zisu ta, “Chyhsazy cha patyusa teh u,” tah ta. Cha su liana chata sibiepa hluhpi a y, chatanachata zawpizy cha atyuh ei ta, ama hluhna lâ cha chapaw pitlopa sâh pangawh rachhôh châ ei ta.'

11 Zisu ta viahchhâzy la ta, alyna bie a rei khai nahta atyupa sahlaozy hnohna chata rai ta; cha hawhna hra chata ngasazy chhao ama khozie ta rai hra ta.

12 Ama rih a bie tawhta, a pachupazy hnohna chata, “Khâpahmah a lei lei awpa ta a laibâhpa a zôpazy cha a huah teh u,” tah ta.

13 Chatanachata a huah ei ta, bâli viahchhâ tlâ pangawh a nietuhpazy nie bâhpa a zôpazy cha hrabyh miahrawhleino pabie ei ta.

14 Chyhsazy chata hmonoâhpa a taopa cha ama hmô nahta, he chyhsa he hrohsopa khizaw liata a vy awpa kha a châ tlai hih!” tah ei ta.

15 Chatanachata ano cha abei ta tao awpa ta patu raruah a chhuahpa ta amâ vy aw tahpa Zisu ta pahno ta, tlâh lâta ano deita ta sie ha ta.

Ti chô liata Zisu a sie(Mt 14:22-27; Mk 6:45-52)

16 A vaw zâlâ nahta a pachupazy cha tipo lâna cha zu ei ta,

17 balyh kiah ei ta, tipo liana chata Kapynia khih pangai ei ta. Chatawhcha zoh ha ta, Zisu hra cha ama hnohta vaw tlô mâh va.

18 Thlihpi ru ngaitapa a pathlipa vâta ti chatlaopa a sâh via ngâ tlôh ta.

19 Pachupazy cha me thôh tlyma, me palih tlyma ama hia nahta Zisu cha tipo chô liana chata phei ta siepa ta balyh a vaw hniapa hmô ei ta, chi ei ta,

20 châhrasala ano chata ama hnohta, “Keima na ei châ; chi kha u,” tah ta.

21 Chatanachata balyh liata pakiasa awpa khoh ei ta, sôkha ta balyh chata ama pangaipa râh cha tlôpâ ha ta.

Zawpi ta Zisu ama tluapa

22 A mylâ ta cha tipo haosâ lâta zawpi aduahpazy chata balyh miakha leipa ta cha balyh hropa y leipa ta, a pachupazy âmo deita ama sie tahpa pahno ei ta.

23 Châhrasala Abeipa ta alyna bie a rei khai nahta viahchhâ ama niena su kiapâh liana khata Taibiria khih tawhta balyhzy vaw tlô tlôh ta.

24 Chatanachata zawpi chata Zisu nata a pachupazy ama y khao leipa ama pahno nahta âmo chhao balyhzy liata kiah ei ta, Zisu tluapa ta Kapynia khih vaw tlô ei ta.

Zisu hrona viahchhâ

25 Tipo haosâ liata ama vaw hmô nahta a hnohta, “Rabai, khatita helâ na vaw tlô?” tah ei ta.

26 Zisu ta ama hnohta, “Hmeiseihta ta, hmeiseihta ta, ei cha chho ei, hmonoâhpazy nama hmôpa vâta na tluapa châ leipa eichi ta, viahchhâ nama py a bipa vâna khata tlao a châ hih.

27 Pati a leilô theipa teipa ta hriapasa khah u, chhâzaw hrona taihta a y thlâh ha awpa pati, Chyhsa Sawchapawpa ta a cha pie awpa cha tlao tei teh u; Paw Khazohpa ta ano cha pahnosa haw tlôh ta,” tah ta a chhy ta.

28 Chatawhcha âmo chata a hnohta, “Khazohpa rai eima hria thei nawpa ta hmo khâpa eima tao aw?” tah ei ta.

29 Zisu ta ama hnohta, “Khazohpa raihria cha he he a châ, a tuapa he a ngiapâ ula,” tah ta a chhy ta,

30 Âmo chata a hnohta, “Pahnona khâpa na tao aw, hmô ei sihla eima châ ngiapâ thei nawpa ta? Hmo khâpa na tao aw?

31 Maniah pathlatuhpazy ta râhpathohpa liata mana kha ama nie tyh; ‘Avâ tawhna chata ama hnohta viahchhâ niepa a pie,’ tahpa ropa hawhta,” tah ei ta.

32 Zisu ta ama hnohta, “Hmeiseihta ta, hmeiseihta ta, ei cha chho ei, avâ tawhta viahchhâ nama hmôpa kha Mawsi ta a cha piepa ei châ vei; ei Paw deikua chata avâ tawhta viahchhâ hmeiseihpa a cha pie ei hih.

33 Khazohpa viahchhâ cha avâ tawhta a zupa, khizaw lâta hro a pietuhpa he a châ,” tah ta.

34 Âmo chata ano hnohta, “Abeipa, cha viahchhâ cha khâ maniah pie mah y,” tah ei ta.

35 Zisu ta ama hnohta, “Kei he hrona viahchhâ cha ei châ; ahyrai ei hnohta a vypa cha a no di aw vei, nâ ngiapâpa cha khatita hmah a dâh phi aw vei.

36 Châhrasala nâmo ta na hmô eichi ta, nâ ngiapâ tlôh eichi va, tahpa ei cha chhopa ei kha.

37 Paw ta eina piepa maih ei hnohta amâ vy khai aw; ahyrai ei hnohta a vypa cha papua cheita aw va na.

38 Keima khopa tao awpa ta avâ tawhta a zupa châ leipa na ta, nâ tuahtuhpa khopa tao awpa ta a zupa tlao ei châ;

39 he he nâ tuahtuhpa khopa cha a châ, ano ta eina piepa zydua khâpahmah pahlei leipa aw sala, noh chhâna noh liata tlao pathyu aw sala.

40 He he ei Paw khonazie a châ, ahyrai Sawchapawpa hmô ta a ngiapâpa maihta chhâzaw hrona hnei sala; kei ta noh chhâna noh liana chata ano ei pathyu aw,” tah ta.

41 “Avâ tawhta viahchhâ a za chôpa cha ei châ,” a tahpa vâta Zuzy cha a chô liata paphôh ei ta.

42 “He he Zawsi sawchapawpa Zisu châ vei mâ, a nô nata a paw eima pahnopa he? ‘Avâ tawhta a za chôpa ei châ,’ tahpa ta kheihtazie ta a tahpa ma a châ tly?” tah ei ta.

43 Zisu ta ama hnohta, “Nâmo nata nâmo liata paphôh ngâ khah u,

44 Paw nâ tuahtuhpa ta a sy vei khiahtala ahyhmah kei lâ a vy thei aw veih ei; keima ta noh chhâna noh liana chata a vypa cha ei pathyu aw.

45 Hrohsopazy châbu liata, ‘Khazohpa pachupa ta ama y khai aw,’ tahpa ropa a châ. Chyhsa to Paw bie thei ta, achupa maih cha kei lâ amâ vy tyh.

46 Ahyhmah ta Paw hmô beih veih ei, Khazohpa tawhta a za chôpa dei leipa ta cha; ano chata Paw cha a hmô.

47 Hmeiseihta ta, hmeiseihta ta ei cha chho ei, ahyrai a ngiapâpa chata chhâzaw hrona a hnei haw.

48 Kei he hrona viahchhâ ei châ.

49 Nama pathlatuhpazy ta râhpathohpa liata mana kha ama nie tarawpa ta, thi ei ta.

50 He he avâ tawhta viahchhâ a za chôpa cha a châ, chyhsa ta niepa ta a thi lei nawpa ta.

51 Kei he avâ tawhta viahchhâ hropa a za chôpa cha ei châ; ahyrai ta he viahchhâ he a nie khiahtala chhâzaw ta a hroh thlâh ha aw; khizaw hro nawpa ta ei pie awpa viahchhâ cha ei sapa he a châ,” tah ta.

52 Cha chata Zuzy cha âmosasyh liata bie a eipa ta, “He chyhsa heta kheihta ma a sapa nie awpa ta maniah a pie thei aw?” tah ei ta.

53 Zisu ta ama hnohta, “Hmeiseihta ta, hmeiseihta ta, ei cha chho ei, Chyhsa Sawchapawpa sapa niepa ta a thisaih nama doh hra leipa khiahtala, nâmo ta hrona hnei veih eichi;

54 ahyrai ei sapa nie ta ei thisaih a dohpa chata chhâzaw hrona a hnei haw, noh chhâna noh liata ano cha ei pathyu aw.

55 Ei sapa he pati hmeiseihpa châ ta, ei thisaih he dopa hmeiseih châ tlôh ta.

56 Ahyrai ei sapa niepa ta ei thisaih a dohpa cha keima liata a y thlâh ha tyh, kei chhao ano liata ei y thlâh ha tyh.

57 Paw zawhzi ta a hropa ei châpa hawh hra ta, ahyrai na niepa cha keima zawhzi ta ano chhao a hroh aw.

58 He he avâ tawhta viahchhâ a za chôpa cha a châ, chi pathlatuhpazy chata viahchhâ nie ei ta, ama thi hawpa kha châ vei; ahyrai he viahchhâ a niepa he cha chhâzaw ta a hroh thlâh ha aw,” tah ta.

59 Cha biezy cha apakhyna-o lâta reih ta, Kapynia khih liata a pachu nona khata.

Tlyzaw hrona biezy

60 A pachupazy a hluhpi ta cha cha ama thei nahta, “He he bie ru ngaitapa a châ, ahyma a tao thei aw?” tah ei ta.

61 Châhrasala cha kyh liana chata a pachupazy ama paphôhpa Zisu ta a palôhrupa ta pahno ta ama hnohta, “He kyh heta palôh châ leipa ta nama y ma?

62 Chyhsa Sawchapawpa he hmiata a yna tyhpa liata kiapa ta nama hmô khiahtala kheihta e nama tah aw?

63 Pahrotuhpa cha Thlahpa a châ, sapa cha khâpa lâta hmahta dyutlai vei; nama hnohta bie ei reipazy he, Thlahpa a châ, hrona chhao a châ.

64 Châhrasala nama hry liata thokha ngiapâ leipa nama y na,” tah ta. Zisu ta a ngiapâ leipazy nata a patusatuh awpa cha, cha hlâ tawhta pahno thlâh ha tlôh ta.

65 Chatawhcha ano chata hnohta, “Cha vâna chata nama hnohta Paw ta a bao leipa ta cha ahyhma ta kei lâ a vy thei aw veih ei, ei tahpa kha a châ,” tah ta.

66 Cha khai nah chata a zituhpa thokha hluhpi ta kuasai ei ta, ano a pahlao khao leipa ei ta.

67 Zisu ta pahrawhleinozy hnohna chata, “Nâmo chhaota na siesaipa nama khoh hra ma?” tah ta.

68 Saimaw Pity ta a hnohta, “Abeipa, ahy lâ ma eima sie aw, nâ ta chhâzaw hrona bie na hnei mâ tâh;

69 nâ, Khazohpa Mo Pathaihpa cha na châ tahpa zo haw pi ta, eima pahno ha hra,” tah ta a chhy ta.

70 Zisu ta ama hnohta, “Nâmo pahrawhleinozy chi he, keima a tlypa châ vei eichi ma? Châhrasala nama hry liata pakha ahripa a châ,” tah ta.

71 Iskari, Saimaw sawchapawpa Zuda, pahrawhleinozy hry liata a hlao hrapa kyh kha a reih, ano cha a patusatuh awpa châ tlôh ta.

Zawhana (John)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Zawhana 7

Zisu unawhpazy zo leina

1 Cha khai tawhna chata Zisu ta Kalili râh chahry ta, Zuzy ta ano thie amâ chhuahpa vâta Zudia râh cha chahry khoh leipa ta.

2 Zuzy Byurei kyhchhi cha a hnia ha ta.

3 Chatanachata a unawhpazy ta “Zudia râh lâ vawh teh, na pachupazy chhaota na hmotaopa he ama hmô thei nawpa ta.

4 Ahyhmah ta a ru lâta hmo khâpahmah tao vei, ano moh pathâh a khoh tlôh khiahta cha. He hmozy he na tao tlai khiahtala khizaw lâta a pamosa teh,” tah ei ta.

5 A unawhzy chhaota ano a ngiapâ tlôh lei khâh ei ta.

6 Zisu ta ama hnohta, “Ei daihti tlô mâh vei, nâmo daihti deikua cha chhâzaw ta a tlô thlâh haw.

7 Khizaw ta nâmo châhao thei veih ei, kei deikua cha einâ hao tyh, ama hmotaopazy a moleipa ei chhopasia tyhpa vâta.

8 Nâmo kyhchhina lâ khy teh u; kei la atahmâ ta kyhchhi liana heta khy mâh aw va na, ei daihti a tlô mâh leipa vâta,” tah ta.

9 Cha biezy cha ama hnohta reih ta, Kalili râh liata y thlâh ha ta.

Byurei kyhchhi liata Zisu a ô

10 Châhrasala a unawhpazy kyhchhina lâ ama khy ha tawhna chata, ano chhao vâtlâh pahno leipa ta a ru lâta khy hra ta.

11 Zuzy ta kyhchhina liata ano cha tlua ei ta, “Khataih liata a y?” tah ei ta.

12 Chatawhcha a chô liata zawpizy hryta paphôh hôlô ei ta. Thokha ta, “Chyhsa phapa a châ,” tah ei ta, thokha ta, “Châ bao va, zawpi tlao a dô tyh,” tah ei ta.

13 Châhrasala Zuzy ama chipa vâta ahyma ta a thâtih a lâhâh ta reih veih ei.

14 Kyhchhi locho nota Zisu Khazohpa achhyna-o lâ vawh ta, pachu ta.

15 Zuzy ta; “He chyhsa heta a chu beih leipa ta kheihta ma a thai tly?” tah ei ta. Ama noâh kaw ta.

16 Zisu ta âmo a chhy ta, “Ei bie pachupa he kei eih châ leipa ta, nâ tuahtuhpa eih tlao a châ;

17 ahyrai ano khonazie a tao khohpa chata bie pachupa he Khazohpa papuapa ma, keima tao chhypa ma ei reih a pahno aw.

18 Ahyrai ano tao chhyhpa bie a reihpa cha ano rônahna a tluapa a châ; a tuahtuhpa rônahna a tluapa deikua cha, cha chyhsa cha chyhsa hmeiseihpa a châ, ano liana chata a do leina rai y vei.

19 Mawsi ta ryhpa cha nama hnohta cha pie veih ei ma? Châhrasala nama hry liata ahyhma ta ryhpa cha zyh tlôh eichi va. Nâmo ta khazia thie einâ chhuah ei chi?” tah ta.

20 Zawpi chata, “Ahripa a zopa na châ he! Ahy ma thie châ chhuah?” tah ei ta, a chhy ei ta.

21 Zisu chata a chhy ta ama hnohta, “Hmo miakha ei taopa kha, nâmo zydua ta noâhpa ta nama y.

22 He vâna heta Mawsi ta chopawtaina kyh kha cha pie ei ta (Mawsi papuapa châ tlôh leipa ta, pathlatuhpazy papuapa tlao châ tlôh ta), pahânoh chhaota chyhsa chopaw nama tai tyh.

23 Mawsi ryhpa parao lei nawpa ta pahânoh ta chhao chapaw ta chopaw a pataisa tlôh khiahta cha, kei ta pahânoh ta chyhsa ei patlâhpa vâta ei chô liata nama pathi a ia hlei ma?

24 A lâna hawhta pachia khah ula, a siapa ta tlao pachu teh u,” tah ta.

He he Mesia châ vei ma?

25 Zerusale khih liata chyhsa thokha ta, “He chyhsa he thie amâ chhuahpa cha châ vei ma?

26 Moh teh u, a lâhâh ta bie reih ta, a hnohta, khâpahma reih tlôh ei va! Ano he Mesia a châ tahpa hyutuhpazy ta ama pahno hmeiseih vâ ma-i?

27 He chyhsa he a vaw puana pahno tlôh pi ta, Mesia deikua cha a vaw tlô tita cha a puana ahyhma ta pahno aw veih ei,” tah ei ta.

28 Cha vâna chata Zisu ta Khazohpa achhyna-o liata a pachu nota awh ta, “Nâmo ta eina pahno eichi na, ei puana chhao nama pahno na? Châhrasala keima rei ta a vypa châ va na; nâ tuahtuhpa he hmeiseihpa a châ, ano cha pahno tlôh eichi va.

29 Kei deikua chata ano cha ei pahno, ano tawhta a vaw puapa châ na ta, ano cha na tuapa châ tlôh ta,” tah ta.

30 Chatanachata ano cha patu a chhuah ei ta; châhrasala a daihti a tlô leipa vâta ahyhma ta hria veih ei.

31 Zawpi thokha a hluhpi deikua chata ano cha a ngiapâ ei ta; “Mesia cha a vaw tlô tita he chyhsa taopa hlâta a hluh via hmonoâhpa a tao aw ma?” tah ei ta.

Molaipazy cha Zisu patu awpa ta ama tuah

32 Pharisaizy ta a chô liata zawpi paphôhparuna kyhzy cha thei ei ta, chatanachata theihthaipa abeizy nata Pharisaizy ta patu awpa ta hyutuhpazy tuah ei ta.

33 Zisu ta, “Buakhata nama hnohta y chy aw na ta, na tuahtuhpa lâ ei sie aw;

34 nâmo ta na tlua aw eichi ta, na hmô aw veih eichi; ei yna lâ chhao a vy thei aw vei eichi,” tah ta.

35 Zuzy chata âmosasyh ta, “Eima hmô thei lei nawpa ta he chyhsa he khataih lâ a sie aw? Krikazy hry liata a paihpa sahlao hnohta siepa ta Krikazy a pachu aw tlyma?

36 ‘Nâmo ta na tlua aw ei chi ta, na hmô leipa aw ei chi ta, tahpa he, khâpa a tahna ma a châ aw?” tah ei ta.

Hrona ti chavah zy

37 Kyhchhi chhâna noh, noh rônah chaipa liana chata Zisu a duah ta awh ta, “Ahyrai adâh a phi khiahtala kei lâ a vy sala.

38 Ahyrai nâ ngiapâpa cha doh mawh sy, Khazohpa châ bie reipa hawhta, ‘Ti hropa a chhôh tawhta a vaw loh aw,” tah ta.'

39 Cha biezy cha ngiapâtuhpazy ta Thlahpa ama hnei awpa kyh a reipa a châ; Thlahpa cha piepa châ mâh vei, Zisu cha parônahsapa ta a y mâh leipa vâta.

Vâtlâh hry liata a pachhaihna

40 Zawpi hryta thokha ta cha biezy cha ama thei nahta, “He he hrohsopa cha a châ tlai hih,” tah ei ta.

41 Thokha ta, “He he Mesia cha a châ,” tah ei ta. Thokha deikua chata, “Mesia cha ma Kalili râh tawhta a pua aw tly?

42 Mesia cha Davi pathlazy hry liata, Davi yna khih Bethlehe liata a pua awpa a châ, tahpa Khazohpa châ bie ta reih vei ma?” tah ei ta.

43 Chatanachata ano vâta zawpi cha a pachhaih ei ta.

44 Thokha chata patu khoh ei ta, châhrasala ahyhma ta hria veih ei.

Biehneituhpazy ngiapâ leina

45 Hyutuhpazy cha theihthaipa abeizy nata Pharisaizy hnohta a vy heih ei ta, âmo chata ama hnohta, “Khazia namâ vaw chhi vei?” vaw tah ei ta.

46 Hyutuhpazy chata, “Hao hawhna hao ta chyhsa ta bie reih beih veih ei!” tahpa ta a chhy ei ta.

47 Pharisaizy chata ama hnohta, “Nâmo chhao, dôpa ta nama y ha hra ma?

48 Hyutuhpazy nata Pharisaizy hryta ano a ngiapâpa ama y ha ma?

49 He ryhpazy a pahno leipa zawpizy he chhiesapa ama châ mâ tâh,” tahpa ta a chhy ei ta.

50 Nikadima, cha hlâta Zisu lâta a vypa cha ama hryta a hlao hrapa châ ta, ama hnohta,

51 “Ano pakah tlaita a bie theipa nata a hmotaopa pahno hlâta eima ryhpa ta chyhsa thai lei a pachâsa beih ma?” tah ta.

52 Âmo chata a hnohta, “Nâ chhao cha Kalili mo châ hra khiah chi? Tlua la Kalili râh liana chata, hrohsopa ahyhma a pua awpa ama y leipa pahno châh chi,” tahpa ta a chhy ei ta.

Zawhana (John)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21