Zawhana 20
Thyuheina (Mt 28:1-10; Mk 16:1-8; Lk 24:1-12)
1 Noh sarinoh noh hmiatua chaipa liata my ta, khih a pavâ hlâta, Mari Madali cha thlâ lâna chata vawh ta, alô cha thlâ tawhta pasiepa ta hmô ta.
2 A râ ta, Saimaw Pity nata pachupa hropa, Zisu ta kyh a pachâpa lâna chata a vy ta, ama hnohta, “Thlâ tawhtapa kha Abeipa cha ama siekhei haw, ama sona pahno tlôh pi va,” tah ta.
3 Chatanachata Pity cha pua ta, pachupa hropa chhaota, thlâ lâ pangai ei ta.
4 A râ khoh ei ta, pachupa a hropa chata Pity chhao ta, thlâ cha tlô tua ta;
5 a bôh ta, moh ta, poh rih dipazy cha a y thlâ hapa ta hmô ta, châhrasala a chhôh lâ a ngia vei.
6 Saimaw Pity chhao a hnôh lâta vaw tlô ta, thlâ chhôh lâ a ngia ta; poh rih dipazy cha a y thlâh hapa nata
7 a luh liata ahruna poh a ypa cha, poh rih dipazy hry liata y leipa ta, chaty chiehpa ta su hro lâta a ypa hmô ta.
8 Chatanachata pachupa hropa thlâ a tlô tuapa chhao cha a ngia hra ta, hmô ta, zo ta;
9 athihpa hry tawhtapa a thyu heih awpa a châ tahpa, Khazohpa châ bie kha pahno tlôh ei va.
10 Chatanachata pachupazy cha ama o lâ a di ha ei ta.
Zisu, Mari Madali hnohta aluahna(Mk 16:9-11)
11 Châhrasala Mari cha khôtho lâ thlâ kiapâh liata chana chôta a duah ta, chana chôta a bôh ta thlâ chhôh lâ moh ta;
12 vâlyuhchâpa pano poh ngyupa a bupa ta, Zisu ri paziana su liana chata, pakha a luh lâta, pakha a phei lâta atyuhpa hmô ta.
13 Âmo chata a hnohta, “Chanô, khazia na cha?” tah ei ta. Ano chata ama hnohta, “Ei beipa siekhei haw ei ta, ama sona ei pahno leipa vâta,” tah ta.
14 Cha hawhta a reipa ta nahta a hnôh lâ a heih ta, Zisu a duahpa hmô ta, Zisu a châ tahpa pahno tlôh leipa ta.
15 Zisu ta a hnohta, “Chanô, khazia na cha? Ahy na tlua?” tah ta. Ano chata sahdô mokhâhtuhpa khiah ma tah ta, a hnohta, “Pâpuh y, ano he tawhtapa na siekheipa ta a châ khiahtala, na sona na chho teh, ei la thei nawpa ta,” tah ta.
16 Zisu ta a hnohta, “Mari,” tah ta. Ano cha a heih ta a hnohta Hebrai reih ta, “Rabawni!” tah ta. (Cha cha pachutuhpa tahna a châ).
17 Zisu ta a hnohta, “Na patu khâ, atahmâ taih chhaota Paw lâta kiah mâh va na; anodeikuacha ei unawhpazy lâ vawh la, ama hnohta, ‘Ei Paw nama Paw, ei Khazohpa nama Khazohpa lâ ei kiah aw,’ a tah na tah teh,” tah ta.
18 Mari Madali cha vawh ta, “pachupazy hnohta, “Abeipa cha ei hmô haw,” tah ta; a hnohta bie a reipazy chhao cha chho ta.
A pachupazy hnohta Zisu a luahna(Mt 28:16-20; Mk 16:14-18; Lk 24:36-49)
19 Cha noh, noh sarinoh noh hmiatuapa liata zâlâ ta, Zuzy chipa vâta pachupazy yna ochhizy cha ama khaw tawhna chata, Zisu a vy ta ama hryta a vaw duah ta, ama hnohta, “Nama chô liata thlahlôhna y mawh sy,” tah ta.
20 Cha a rei khai nahta a ku nata a kâ ama hnohta pamosa ta. Chatawhcha Abeipa cha ama hmô nahta pachupazy cha aly haw ei ta.
21 Zisu ta ama hnohta, “Nama chô liata, thlahlôhna y mawh sy. Paw ta kei eina tuapa hawh hra ta, ei cha tuah ei hih,” tah heih ta.
22 Cha biezy cha a rei khai nahta, ama chô liata a hu so ta, ama hnohta, “Thlahpa Pathaihpa hnei teh u.
23 Ahy moleipa rai namâ ngiahthaipa maih, ngiahthaipa a châ aw; ahy moleipa rai namâ ngiahthai leipa maih, ngiahthai leipa a châ aw,” tah ta.
Thawma zo leina
24 Zisu a vy nona khata pahrawhleinozy hryta a hlao hrapa, Thawma (Maphi ama tahpa cha), ama hnohta y leipa ta.
25 Chatanachata pachupa hropazy chata a hnohta, “Abeipa cha eima hmô haw,” tah ei ta. Châhrasala ano chata ama hnohta, “A ku liata thua khaina hmahdawpazy kha hmôpa ta, thua khaina hmahdawpazy liata ei ku ta hriapa ta, a kâ liata ei ku ta ei chapao leipa ta cha, zo aw va na,” tah ta.
26 Noh charie tawhta a pachupazy cha o chhôh liata y heih ei ta. Thawma chhao ama hnohta y hra ta. Chatawhcha Zisu a vy ta, ochhizy cha a khawpa châ tlôh ta, ama hryta a vaw duah ta, ama hnohta, “Nama chô liata thlahlôhna y mawh sy,” tah ta.
27 Chatawhcha Thawma hnohna chata, “Na kudy ta vaw hria la, ei kuzy moh teh; na ku vaw paza la, ei kâ liata chapao tua; zo leipa ta y leipa la, zo teh,” tah ta.
28 Thawma ta a hnohta, “Ei Beipa nata Khazohpa na châ!” tah ta a chhy ta.
29 Zisu ta a hnohta, “Nâ ta eina hmôpa vâ chi ta a ngiapâpa na châ, hmô leipa ta a ngiapâpa maih cha ama nohlao na,” tah ta.
Châbu ta â chhuahpa
30 Zisu ta pachupazy hmiakô liana chata pahnona hropa hluhpi tao ta, chazy cha he châbu liana heta ropa châ vei;
31 châhrasala hezy he Zisu cha Krista Khazohpa Sawchapawpa a châ tahpa namâ ngiapâ nawpa nata a ngiapâpa ta a moh liata hro nama hnei nawpa ta ropa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |