Zawhana 11
Lazara thina
1 Chyhsa pakha, Mari nata a narônô Martha yna khih Bethani liata, Lazara tlâh leipa ta y ta.
2 Mari sathaw ropahâhpa Abeipa hnia ta a sâ ta a phei a hrutuhpa kha, kha rilâhpa Lazara a châ, a tlâh leipa cha.
3 A sietanôzy ta Zisu hnohta, “Abeipa, na kyhpachâpa kha tlâh vei,” tahpa ta chyhsa tuah ei ta.
4 Zisu ta cha cha a thei nahta, “He pasana he thina awpa châ vei. Khazohpa rônahna châta tlao a châ, Khazohpa Sawchapawpa cha he vâna heta a rônah nawpa a châ,” tah ta.
5 Zisu ta Martha zy, a narônô zy, Lazara zy kyh pachâ ta.
6 Lazara tlâh leipa thâtih a thei nahta a yna liata noh no y ta.
7 Cha khai tawhna chata a pachupazy hnohta, “Zudia râh lâta sie heih suh u,” tah ta.
8 Pachupazy chata a hnohta, “Rabai, a tlia na khata Zuzy ta alô ta vaw ama châ chhuahpa kha, cha lâna chata na sie heih aw ma?” tah ei ta.
9 Zisu ta, “Nohchhô ta dawh hrawhleino y vei ma? Chyhsa nohchhô ta a charei khiahtala a chapia beih vei, he khizaw khaihpa he a hmôpa vâta.
10 Anodeikuacha chyhsa zâ ta a charei khiahtala a chapia tyh, ano liata khaihna a y leipa vâta,” tah ta a chhy ta.
11 Cha biezy cha reih ta, cha tawhna chata ama hnohta, “Eima viasa Lazara cha a mô ha ta, a môpa pahra awpa ta ei sie aw,” tah ta.
12 Pachupazy chata a hnohta, “Abeipa. a mô haw khiahtala a tlâh heih aw,” tah ei ta.
13 Zisu ta athipa kyh a reipa châ ta, châhrasala âmo chata a pahâ chhôhta a môpa kyh a reipa khiah ma, tahpa pachâ ei ta.
14 Chatanachata Zisu ta a siapa ta ama hnohta reih ta, “Lazara a thi haw;
15 cha liata ei y leipa cha ei châ lykhei ei, namâ ngiapâ thei nawpa ta. Châhrasala ano lâ vawh ei suh u,” tah ta.
16 Thawma, Maphi ama tahpa chata a pachupazy hnohta, “A thina liata thi hra awpa ta sie ei su u,” tah ta.
Zisu thyuheina nata hrona
17 Zisu ta a tlo nata Lazara cha noh palih thlâ liata a y haw tahpa pahno ta.
18 Bethani khih cha Zerusale khih kiapâh châ ta, me no daihmâ a hlapa a châ.
19 Chatanachata ama rilâhpa thipa vâta thlahpalôh awpa ta Zuzy hluhpi Martha nata Mari lâta a vy ei ta.
20 Martha chata Zisu a vy aw tahpa a theipa ta nahta kei dy ta, Mari deikua cha o liata a tyuh thlâh ha ta.
21 Martha chata Zisu hnohta, “Abeipa y, he liata a ypa châ la ei rilâhpa a thi lei awpa tlai.
22 Atahmâ chhao Khazohpa lâta nâ hawpa maih, Khazohpa ta a cha pie aw tahpa ei pahno na,” tah ta.
23 Zisu ta a hnohta, “Na rilâhpa a thyu heih aw,” tah ta.
24 Martha chata a hnohta, “Noh ki nota thyuheina liana chata a thyuhei aw tahpa ei pahno na,” tah ta.
25 Zisu ta a hnohta, “Kei he thyuheina nata hrona cha ei châ; ahyrai nâ ngiapâpa cha, thi hrasala a hroh thlâh ha aw,
26 ahroh pa maihta nâ ngiapâpa cha chhâzaw ta thi aw vei. Cha bie cha nâ ngiapâ ma?” tah ta.
27 Ano chata a hnohta, “Abeipa y, Mesia Khazohpa Sawchapawpa khizaw liata a vy awpa cha na châ tahpa ei ngiapâ na,” tah ta.
Zisu chana
28 Cha bie cha a rei khaipa ta nahta sie ta, a narônô Mari cha a ru lâta aw ta, “Pachutuhpa he liata y ta a cha aw,” tah ta.
29 Ano chata cha cha a theipa ta nahta thyu parah ta, ano lâ vawh ta.
30 Zisu cha khih liata a ngia leipa ta, Martha ta a kei dy nota a yna ualua liata y ta.
31 O chhôh liata thlah a palôhtuhpa a ylâhpa Zuzy chata Mari thyu parah ta a puapa ama hmôpa ta nahta, thlâ lâ cha awpa ta vaw khiah ma, tahpa ta zi ei ta.
32 Mari chata Zisu yna kei tlô ta, a hmôpa ta nahta a phei thaby liata a khu lâta pao ta a hnohta, “Abeipa y, he liata a ypa châ la, ei rilâhpa a thi lei awpa tlai,” tah ta.
33 Zisu ta Mari chapa nata a vaw zipa Zuzy chapa cha hmô ta, a palôhrupa ta a rôh ta, a pachârôh ta;
34 “Ano cha khataih liata nama pazia?” tah ta. Âmo chata a hnohta, “Abeipa, a vy la, mo tua,” tah ei ta.
35 Zisu cha ta.
36 Zuzy chata, “Moh teh u, Lazara he a kyh a pachâ kaw dia!” tah ei ta.
37 Châhrasala thokha chata, “He chyhsa mochaopa mo a pavâsatuhpa heta he chyhsa chhao he thi leipa ta paysa thei vei tlyma?” tah ei ta.
Lazara hro heihna
38 Zisu cha a palôhrupa ta a rôh heih ta, thlâ tlô ta; cha thlâ cha lôpu châ ta, a pakah liana chata alô ta pamaipa a châ.
39 Zisu ta, “Alô he pasie teh u,” tah ta. A thipa sietanô Martha chata a hnohta, “Abeipa, atahmâ la a thu ha bâ aw, a thina noh palih châ ha tlôh ta,” tah ta.
40 Zisu ta a hnohta, “Nâ ngiapâ khiahtala Khazohpa rônahnazi na hmô aw, cha tah va na mâ?” tah ta.
41 Chatanachata alô cha pasie ei ta. Zisu avâ lâ ua ta, “Ei Paw y, ei bie na thei tyhpa vâta na chô liata ei ly kaw na.
42 Chhâzaw ta ei bie na thei tyh tahpa ei pahno thlâh haw, châhrasala zawpi aduahpazy vâta cha cha ei tah, nâma ta eina tuah chi tahpa amâ ngiapâ thei nawpa ta,” tah ta.
43 Cha hawhta a rei khaipa ta nahta ao paro ngaitapa ta, “Lazara vaw pua teh,” tahpa ta aw ta.
44 Athihpa cha a ku a phei ritopa pahlyna chôta a vaw pua haw, a hmia chhao ahruna poh ta pahlypa châ ta. Zisu ta ama hnohta, “Pathlâ ula, pasiesa teh u,” tah ta.
Zisu ama leih-na(Mt 26:1-5; Mk 14:1-2; Lk 11:1-2)
45 Cha vâna chata Mari thlahpalôhtuhpa Zisu hmotaopa a hmôpa Zuzy chata a hluhpi ta Zisu amâ ngiapâ haw;
46 châhrasala thokhazy cha Pharisaizy hnohta vawh ei ta, ama hnohta Zisu hmotaopazy cha chho ei ta.
47 Chatanachata theihthaipa abeizy nata Pharisaizy chata ryureituhpa sahlao awpakhy ei ta, “Kheihta e eima tao aw? He chyhsa heta noâhpa hluhpi tao tlôh ta.
48 He hawhta eima pathlie thlâh ha khiahta cha chyhsa zydua ta ano a ngiapâ aw ei ta, chatawhcha Rawma chyhsazy a vy aw ei ta, eima su pathaihpa nata eima chizy he maniah ama lapa aw,” tah ei ta.
49 Ama hryta chyhsa pakha Kaiapha, cha kô liana chata Theihthai Beichaipa cha ta, ama hnohta, “Nâmo ta khâpahma ta pahno veih ei chi;
50 eima chi zydua a leidia lei nawpa ta chyhsa zydua vyuhpa ta chyhsa pakha thi nama châta â ngiah tahpa pachâ hra veih eichi,” tah ta.
51 Cha bie cha ano tao chhypa ta reih vei, cha kô liana chata Theihthai Beichaipa cha ta, ama chizy vyuhpa ta Zisu a thi awpa a reih chhieliena tlao a châ,
52 cha chizy vyuhpa deita ta châ vei, Khazohpa sawzy khizaw liata a pai patlapa zydua hlao khata a chhi pakhyna awpa chhaota a châ hra.
53 Chatanachata cha noh rakha tawhna chata ano thie awpa ta a pachia tyh ei ta.
54 Chavâta Zisu cha Zuzy hry liata a lâhâhpa ta charei heih khao leipa ta, cha tawhtapa cha râhpathohpa daih lâta khih miakha, Ephrai ama tahpa lâna chata sie ha ta; cha liana chata pachupazy chhaota y thlâh ha ei ta.
55 Zuzy Zawpakhô kyhchhi cha a hnia ha ta; chyhsa hluhpi a pathaisa awpa ta lyurâhpa tawhta Zawpakhô kyhchhi hlâta Zerusale khih liata a vy ei ta. 56 Zisu tlua ei ta, Khazohpa achhyna-o liata a duah hmahta a chho ei ta, “Khâpa e nama pangiasa? Kyhchhina liata a vy aw vei ma?” a tah ei ta.
57 Theihthaipa beizy nata Pharisaizy ta ano cha ama patu thei nawpa ta, ahyrai ta a yna ama pahno khiahtala ama phuah awpa a châ, tahpa bie pie haw tlôh ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |