Bethani liata Zisu sathaw thuna (Mt 26:6-13; Mk 14:3-9)
1 Zawpakhô kyhchhina awpa noh charu byuh ta, Zisu ta athihpa hry tawhta a pathyupa Lazara yna, Bethani khih cha vaw tlô ta.
2 Cha liana chata ano châta kyhchhina tao ei ta; Martha ta chakao ta, Lazara deikua cha a pati dôlâhtuhpa pakha châ ta.
3 Mari ta khopathliana khophie spina thaw ropahâh ngaitapa vaw cheih ta, Zisu phei liata hnia ta, a sâ ta a pheizy cha hru ta, cha thaw ropahâhpa chata o cha bie ha ta.
4 Châhrasala Zuda Iskari a pachupa pakha, a patusatuh awpa chata,
5 “He sathaw ropahâhpa he tâkâ za thôh ta zuapa ta chyhsa dyhchhiepazy hnohta tlao ama pie vei?” tah ta.
6 Chyhsa dyhchhiepazy a pachâpa vâta cha bi cha a reipa châ leipa ta, a parupa châ ta, tâkâ sahria a vao ta, a chhôh liata sopazy cha a la tyhpa vâta tlao a châ.
7 Zisu ta, “Ei na pabuna noh châta a khai se.
8 Chyhsa dyhchhiepazy cha chhâzaw ta nama hnohta a ypa châ veih ei ma? Kei deikua cha chhâzaw ta nama hnohta a y awpa châ va na,” tah ta.
Lazara ama leih-na
9 Zisu cha liana chata a y tahpa Zu zawpizy ta ama vaw pahno nahta, a vy ei ta, Zisu deita amâ vy chhâna châ leipa ta athihpa hry tawhta a pathyupa Lazara chhao kha, hmô ama khohpâ hra.
10 Chatawhcha theihthaipa abeizy cha Lazara chhao thie hra awpa ta a paraoh ei ta,
11 ano vâta Zuzy a hluhpi ta puasai ei ta, Zisu amâ ngiapâpa vâta.
Zerusale rônahpa ta â ngiana(Mt 21:1-11; Mk 11:1-11; Lk 19:28-40)
12 A mylâpa chata kyhchhina liata a vypa zawpi hluhpi ta, Zisu Zerusale khih liata a vy aw tahpa thei ei ta.
13 Thiahra kuahzy a cheipa ta dy awpa ta pua ei ta, “Haozana! Abeipa moh ta Izarel Beipa a vypa cha reithaipa ta y se!” tahpa ta aw ei ta.
14 Zisu ta alâ taw hmô ta, a chô liata kiah ta;
15 “Chi khah y, Zaio sawchanônô y; moh teh, na Beipa cha alâ taw chô liata kiapa ta â vy aw na!” tahpa ta ropa hawhna khata.
16 Chazy cha hmia lâta a pachupazy ta pahno veih ei; châhrasala Zisu parônahsapa ta a y tawhna khata a thâtih liata cha biezy cha ropa a châ tahpa nata a chô liata cha hmozy cha ama vaw tao tlai tahpa thei haw ei ta.
17 Lazara thlâ tawhta a awpa athihpa hry tawhta a pathyu nota a hnohta zawpi a ypazy khata a bie cha pahnosa lymâ ei ta.
18 Cha vâna chata zawpizy chhao chata ano cha kei dy ei ta. Cha hmonoâhpa cha a tao tahpa pahno tlôh ei ta.
19 Pharisaizy chata, “Pahno teh u, khâpahma nama tao thei vei hih; moh teh u, khizaw ta ano ama zi haw hih,” tah ei ta.
Krika chyhsa thokha ta Zisu ama tlua
20 Chatawhcha kyhchhina liata Khazohpa achhy awpa ta a khypazy hryta Krika mo ahyzy tlyma y ei ta.
21 Chazy cha Kalili râh liata Besaida khihpa Phili la a vy ei ta, a hnohta, “Pâpuh, Zisu eima hmô khoh,” tah ei ta a haw ei ta.
22 Phili chata Adru vaw chho ta; Adru nata Phili chata Zisu vaw chho ei ta.
23 Zisu ta a chhy ta ama hnohta, “Chyhsa Sawchapawpa parônahsapa ta a yna daihti a tlô haw.
24 Hmeiseihta ta, hmeiseihta ta, ei cha chho ei chuh, sâh hmô alei liata tla leipa ta a thi leipa khiahta cha miakha deita ta a y thlâh ha tyh; a thi khiahta deikua cha a hluhpi a pathei tyh.
25 Ahyrai a hro a tlaichhaipa chata a pahlei tyh, ahyrai he khizaw liana heta a hrona a panawhpa chata chhâzaw ta hrona awpa a vao thlâh ha aw.
26 Ahyrai ta eina chakao khiahtala na zi tlai mawh sy; ei yna liata na chakaotuhpa ta a y aw; ahyrai ta eina chakao khiahtala ano cha Paw ta a palyupalih aw.
Chyhsa Sawchapawpa cha chaluahpa a châ aw
27 “Atahmâ ei palôhrupa nô a po. Kheihta ei tah aw? ‘Ei Paw y, he daihti liana heta na pachha teh,’ ei tah aw ma? Châ vei, khâparai châ sala heta châ awpa heta he daihti taihna heta ei y chhâpa a châ.
28 Ei Paw y, na moh palyupalih teh”, tah ta. Chatanachata avâ tawhta ao vaw pua ta, “Ei palyupalih haw, ei palyupalih heih aw,” tah ta.
29 Zawpi a kiapâh ta aduahpazy chata cha cha thei ei ta, tôkalôpa na a thua, tah ei ta. Mo hropazy ta, “Vâlyuhchâpa ta ano bie â chho,” tah ei ta.
30 Zisu ta a chhy ta, “Cha ao cha kei châta a puapa châ vei, nâmo châta tlao a châ.
31 Atahmâ he khizaw he pachiapa a châ, atahmâ he khizaw abei he thypa a châ aw;
32 chatawhcha kei, alei tawhta chaluahpa ta ei y khiahtala, chyhsa zydua kei lâta ei sy aw,” tah ta.
33 Cha bie cha a thinazie awpa pahnosa nawpa ta a reih.
34 Zawpi chata a hnohta, “Mesia cha chhâzaw ta a y aw tahpa, ryhpa châbu liata eima pahno. Nâma ta Chyhsa Sawchapawpa chaluahpa ta a y awpa a châ, kheihtazie ta a tahpa ma na châ? Cha Chyhsa Sawchapawpa cha ahyma a châ?” tah ei ta a chhy ei ta.
35 Zisu ta ama hnohta, “Khaihpa buakha ta nama hry ta a y chy. Khaihpa nama hnei chhôhna heta charei teh u, zohna ta a cha pachhaih lei nawpa ta; ahyrai zohna liata a chareipa chata a siena chy pahno tyh vei.
36 Khaihpa nama hnei chhôhta, khaihpa he ngiapâ teh u, khaihpa sawzy nama châ thei nawpa ta,” tah ta.
Zunawh ngiapâ leina
Cha biezy cha Zisu ta reih ta, sie ta, ama hmô lei nawpa ta a nyu ha ta.
37 Ama hmiakô liata cha hawhpa hmonoâhpa hluhpi tao hrasala ano a ngiapâ veih ei;
38 “Abeipa, eima bie reipa ahyma a ngiapâ,Abeipa ku chhao ahy hnohta ma â luah?” tahpa hrohsopa Isai bie reipa kha a tlô nawpa ta.
39 He vâna heta ama ngiapâ thei vei, Isai ta,
40 “Ano ta ama mo pachao ta,ama pathipalôh pahru ta,chata leipa ta la ama mo ta hmô pathlei aw ei ta,ama pathipalôh ta pahno pathlei aw ei ta,chatawhcha a heih pathlei aw ei ta,kei ta âmo ei patlâh pathlei aw na,” tahpa a rei heipa vâna heta.
41 Isai ta a rônahzie a hmôpa nata a thâtih a reipa vâta cha biezy cha a reih.
42 Châhrasala hyutuhpazy thokha a hluhpi ta Zisu a ngiapâ ei ta; anodeikuacha Pharisaizy vâta a phuah veih ei, chata leipa ta cha a pakhyna-o tawhta topa ta ama y aw:
43 Khazohpa lâta rônahna hlâta cha, chyhsa lâta rônahna khoh via tlôh ei ta.
Zisu kyhpachâna
44 Zisu aw ta, “Ahyrai nâ ngiapâpa cha kei nâ ngiapâpa châ vei, na tuahtuhpa a ngiapâpa tlao a châ.
45 Ahyrai na hmôpa cha nâ tuahtuhpa a hmôpa a châ. 46 Khizaw khaituhpa ta a vypa ei châ, ahyrai nâ ngiapâpa maih zohna liata a y lei nawpa ta,
47 ahyrai ei bie reipa theipa ta a ngiah vei hrasala keima ta pachia va na; khizaw pachia awpa ta a vypa châ leipa na ta, khizaw pachha awpa ta a vypa châ tlôh na ta.
48 Ahyrai nâ khoh leipa ta ei bie reipazy a ngiah leipa chata, pachiatuhpa pakha a hnei, ei bie reipa kha, kha bie tlai khata noh ki noh liana chata ano cha a pachia aw.
49 Keima tao chhypa ta rei va na; Paw nâ tuahtuhpa chata ei rei awpa nata ei chho awpa he bie tlao eina pie.
50 Ano biepiepa cha chhâzaw hrona a châ tahpa ei pahno. Cha vâna chata bie ei reipa he, Paw eina chhopa lymâ hawhta ei reih,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |