Mara Holy Bible: 2 Samuel

Showing posts with label 2 Samuel. Show all posts

2 Samuel Bo 1

Sawla thina thâtih Davi ta a pahno

1 Davi cha Amale mo kei pahnie ta, a vaw kua tawhta Zikla khih liata noh no y ta,

2 a noh thôh nohna chata Sawla a thi ha tawhta chyhsa pakha ama riehmo tawhtapa a pohzy hriepa ta a luh liata alei â hlaopa he a vy ta. Davi lâta a vaw tlô nahta alei liata akhupa ta a naoh ta.

3 Davi chata a hnohta, “Khataih tawhta â vypa e na châ?” tah ta. Ano ta a hnohta “Izarel mozy riehmo tawhta ei vaw râ,” tah ta.

4 Davi chata a hnohta, “Kheihta e hmo yzie? Na chho tua,” tah ta. Ano chata, “Adyuhna tawhta chyhsa zy cha a râpai ei ta, chyhsa hluhpi pao ei ta, thi ei ta; Sawla nata a sawchapawpa Zawnatha chhao kha ama thie hra,” tah ta.

5 Chatawhcha Davi chata a chhotuhpa satlia hnohna chata, “Kheihta e, Sawla nata a sawchapawpa Zawnatha cha ama thie tahpa na pahno?” tah ta.

6 A chhotuhpa satlia chata, “Kheihtazie ta tlyma Kilbô Tlâh liata vaw y na ta; Sawla cha a asei hniepa ta â duapa hmô na ta; talailih zy nata arâ a kiahpa chyhsa zy chata a vaw hnia ei ta.

7 Chatawhcha a hnôh lâ a vaw heih ta, na vaw hmô ta, na vaw aw ta. Chatawhcha kei ta, ‘He liata ei y,’ tahpa ta a chhy na ta.

8 Chatawhcha ei hnohta, Ahy e na châ?’ na tah ta. Chatawhcha kei ta, Amale chyhsa ei châ,’ tahpa ta a chhy na ta.

9 Ano chata ei hnohta, ‘Ei kiapâh liana heta a vaw duah la, na vaw thie tua; hroh thlâh ha tlôh na ta, nôpona ta na tla thlu tlôh ta,’ tah ta.

10 Chatanachata a kiapâh liata a duah na ta, cha hawhta liahsa a pao tawhna cha hroh thei aw vei tahpa ei pahnopa vâta thie na ta; a luh liata beilakho nata a bâh liata lâkyu cha la na ta ei zibeipa lâta he liana heta ei vaw cheih,” tah ta."

11 Chatanachata Davi chata a chysia zy cha patu ta, hrie haw ta: cha hawhna hra chata a hnohta a ypa zydua chata tao ei ta;

12 Sawla nata a sawchapawpa Zawnatha nata ABEIPA chyhsa zy nata Izarel chhôhkhapa zy chata mâchhiesa ei ta, chakhei ei ta, zâlâ taihta nie leipa ta y ei ta, zaozi ta thiepa ama châ hawpa vâta.

13 Chatawhcha Davi chata a chhotuhpa satlia hnohna chata, “Khataih lâta chyhsa e na châ?” tah ta. Ano chata, “Râh hropa chyhsa Amale chyhsa sawchapawpa ei châ,” tah ta, a chhy ta.

14 Davi chata a hnohta, “ABEIPA sathaw thupa pahleipadia awpa ta a chô liata ku pathlapa cha kheihta zie ta a chi leipa e na châ?” tah ta.

15 Chatanachata Davi chata satliapa pakha aw ta. “A kei hnia la, thie teh,” tah ta. Chatawhcha chhawh ta, thie haw ta.

16 Davi chata a hnohta, “Na thisaih cha nâma luh chô tlai liata y mawh sy; nâma pakah tlaita, ‘ABEIPA sathaw thupa cha ei thie,’ tahpa ta cha phuah tlôh ta,” tah ta.

Davi ta Sawla nata Zawnatha chôta mâchhie a sana

17 Davi chata Sawla nata a sawchapawpa Zawnatha cha he chaphôh heta chakhei ta,

18 chatawhcha châtai kana hla cha Zudah pathlazy pachu awpa ta bie pie ta, Zasa Châbu liata ropa a châ.

19 Hy Izarel, na rôhnahna cha na su sâhpa zy liata thie ei ta! Molaipa zy ama pao haw hih!

20 Katha lâna cha chho leipa ula. Askelaw othliah zy liana cha phuah khah u, chata leipata la Philistina sawchanô zy aly aw ei ta, chopawtai leipa sawchanô zy thaphapa ta ama awh pathlei awh na.

21 Nâmo Kilbô tlâh zy saih u, nama chô liata diati nata vâsua tla khah se; hmohlâ awpa zy papua hra kha se! Cha liana chata molaipa vyhphao cha pasichhihpa ta thy tlôh ei ta. Sawla vyphao, sathaw thu leipa chyhsa vyhphao hawh tlai ta.

22 Thiepa zy thisaih tawhta nata moleipa thaw tawhta, Zawnatha libaw cha kua leipa ta, Sawla zaozi cha khâpa hrao leipa ta kua beih vei.

23 Sawla nata Zawnatha hrozie cha kho a chhih ta, a ngia ta! Ama thipa chhaota a chhaih veih ei, pahmôpi hlâta chatlie via ei ta, chakeibarôhneipa zy hlâta ama tha a tlô via.

24 Nâmo Izarel sawchanôzy saih u, Sawla cha chakhei teh u, poh saipa a ngiapa zy cha pabu ei ta, nama pohzy liata ngôh ta pangiana zy cha tobituhpa châ.

25 Adyuh locho ta molaipa zy ama pao hawhpa rimâ cha! Na su sâhpa zy liata Zawnatha ama thie haw.

26 Ei unawhpa Zawnatha, na kyh liana heta ei nô a po na; ei chô liata pha ngaita tyh chi ta, kyh eina pachâna chi cha noâh a chhih ta, chanô kyhpachâna a khô.

27 “Molaipa zy pao ei ta, Adyuhna chhaichhi zy chhao a leidia khai haw!”

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 2

Davi Zudah beipa ta ama pachasa

1 Cha hnôh lâna chata Davi chata, “Zudah khihzy a kheihawhpa lâ ma ei sie aw?” tahpa ta ABEIPA a chhohia ta. ABEIPA chata a hnohta, “Sie teh,” tah ta. Davi chata, “Khataih lâ e ei sie aw?” tah ta. Chatawhcha ano chata, “Hebraw lâ,” tah ta.

2 Chatanachata Davi cha cha lâna chata sie haw ta, a lahpinô pano Zezrel chyhsa Ahinô nata Kamel chyhsa Naba panôhmeisapa Abikai zy chhao ta.

3 Chatawhcha a hnohta chyhsa ypa zydua a chhi ta, chyhsa to ama chhôhkha zy chyu chhaota; Hebraw khihzy liana chata pahrâ ei ta.

4 Chatawhcha Zudah râh liata chyhsa zy vawh ei ta, cha liana chata Davi cha Zudah chyhsa zy chô liata abei chata sathaw thu ei ta. Sawla a pabutuhpa zy cha Zebesakilia mozy ama châ,” tahpa ta Davi cha chho ei ta,

5 Zabesakilia mozy hnohna chata Davi ta chyhsa tuah ta, ama hnohta, “Nama zibeipa Sawla cha nama ngiachhie zie palâsapa ta nama pabupa vâta ABEIPA ta byhnâ cha pie ei se.

6 Chatanachata ABEIPA chata nama chô liata nôphana nata hmeihseihna palâsa sala! He hmo nama taopa vâna heta kei chhaota nama nôphana ty cha ei cha thô aw ei.

7 Chavâta nama kuzy cha thatlôpa ta y sala, riahpha ngaitapa ta y teh u; nama zibeipa Sawla cha thi haw tlôh ta, Zudah chizy chata ei chô liata abei châta sathaw na thu haw hra ei ta,” tah ta.

8 Nera sawchapawpa Abne, Sawla pheisaih zy hyutuhpa chata Sawla sawchapawpa Isabôse cha Mahanai lâta a chhi ta;

9 Kilia chô liata zy, Ashura mo chô liata zy, Zezrel chô liata zy, Ephrai chô liata zy, Benzami chô liata zy, Izarel zydua chô liata zy abei ta tao haw ta.

10 Sawla sawchapawpa Isabôse cha Izarel chô liata ryu a rei pathao nona chata kô sypalihpa châ ta, kô no ryu reih ta; châhrasala Zudah chyhsa zy chata Davi cha a pyh via ei ta.

11 Davi ta Hebraw liata Zudah chizy chô liata ryu a vaw reihna cha kô sari nata thla charu châ haw ta.

12 Nera sawchapawpa Abne nata Sawla sawchapawpa Isabôse chakaotuhpa zy cha Mahanai tawhtapa pua ei ta, Kibia lâta sie ei ta.

13 Chatawhcha Zeruia sawchapawpa Zôaba nata Davi chakaotuhpa zy cha pua ei ta, Kibia tipo liata a tyh ei ta; chatanachata hlao kha cha tipo haosâ lâ a tyuh ei ta, hlao kha cha tipo heisâ lâ.

14 Abne chata Zôaba hnohta. “Satlia zy cha vaw pua ei sala eima hmiakô liata adyuh tua ei se,” tah ta. Zôaba chata, “Vaw thyu ei se,” tah ta.

15 Chatanachata thyu ei ta, a hluh zie a raopa rakha ta papua ei ta, Benzami nata Sawla sawchapawpa Isabôse chhâh a châpa pahrawhleino; Davi chakaotuhpa pahrawhleino.

16 Ama dyuhpa chyu ta ama luh ta a patu ei ta, â mo a supa zy cha zaozi ta ama kâ liata a dy ei ta; chatanachata pao khai haw ei ta. Chavâta cha su cha Helkahazuri* ama bi haw, cha cha Kibia liata a y.

17 ‘Cha noh liata amâ dyuhna cha ru ngâsâ ta; Abne nata Izarel mozy cha Davi chakaotuhpa zy chata pahnie haw ei ta.

18 Cha liana chata Zeruia sawchapawpa zy pathôh, Zôaba zy, Abisai zy, Asahel zy y ei ta, Asahel cha sakhih hawh tlaita a chahrapa a châ.

19 Chatanachata Asahel chata Abne cha a chadai ta, Abne a chadaipa cha chachâh lâ tlyma, chavei lâ tlyma tlei leipa ta, a chadai lymâ ta.

20 Chatanachata Abne cha a vaw heih ta, “Nâma mâ na châ, Asahel?” tah ta. Ano chata a chhy ta, “Keima na ei châ,” tah ta.

21 Abne chata a hnohta. “Na chachâh lâ tlyma, na chavei lâ tlyma kha tlei teh, satlia pakha kha patu la, a chariah chhaichhi lapa teh,” tah ta. Châhrasala Asahel chata ano a chadaipa cha tleisai khoh leipa ta.

22 Chatawhcha Abne chata Asahel hnohta, “Na tleisai teh; khazia e ei cha dy sao aw? Na unawhpa Zôaba hmia ei hmô ngâh aw mâ?” tah heih ta.

23 Châhrasala tleisai khoh hlei leipa ta; chavâta Abne chata asei a ry lâta a py liata dy ta, asei cha a hnôh lâta chhi pahlie ta; cha liana chata pao ta, cha su liana chata thi haw ta. Chatawhcha Asahel a paona a thina su a vaw tlôpa maih cha cha liana chata a duah lymâ ei ta.

24 Châhrasala Zôaba nata Abisai chata Abne cha a chadai lymâ ei ta; Kibia râhpathohpa lâpi lâ kiah a daih lâ Amah tlâh ama tlô nahta noh tla haw ta.

25 Benzami pathlazy cha Abne hnohta a pahmaoh ei ta, hlao khata a tao ei ta, tlâh laki liata a kei duah haw ei ta.

26 Chatanachata Abne chata Zôaba aw ta, “Zaozi ta a chhawh ngâthlâh ha awpa ma? A chhâna lâta cha pachârôh a chhi ngaita aw tahpa pahno va chi mâ? Khachâ e, zawpizy cha ama unawhpa zy chadaipa ta pakuasa nawpa ta chho leipa ta na y aw tly?” tah ta.

27 Zôaba chata, “Khazohpa hrona reipa ta ei reih, khâpahmah ta na vaw rei leipa khiahtala, my tawhna khata zawpi zy cha sie ha aw ei ta, ama unawhpa zy cha amâ chadai lei awpa tlai,” tah ta.

28 Chatanachata Zôaba chata chiahmie cha tô ta; zawpizy cha a duah ei ta, Izarel mozy cha a chadai khao leipa ei ta, a dyuh khao veih ei.

29 Abne nata a chyhsa zy cha Arabah sie palâhpa ta cha zâ chata zâkhihdei sie ei ta; Zawdâh chaka ei ta, a noh noh y sie heihpa ta, Mahanai tlô ei ta.

30 Zôaba cha Abne a cha daipa cha kua haw heih ta; zawpi zydua a pakhy khai nahta Davi sahlao zy pahrawhleichaki nata Asahel cha a ki khao leipa ei ta.

31 Davi sahlao zy deikua chata Benzami mozy nata Abne mozy cha za thôh nata sycharu thie ei ta.

32 Asahel ri cha la ei ta, Bethlehe liata a paw thlâ liata pabu ei ta. Chatawhcha Zôaba nata a chyhsa zy cha zâkhihdei sie ei ta, Hebraw ama tlô nahta khih dei ta.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 3

1 Sawla chhôhkhapa zy nata Davi chhôhkhapa zy cha bohpi adyuh ei ta; Davi cha a thatlô rili ta, Sawla chhôhkha zy deikua cha ama tha zei rili ta.

Hebraw liata Davi sawchapaw a pihpa zy.(1Tr 3:1-4)

2 Davi chata Hebraw khih liata sawchapaw zy hnei ta; a saw a pih tuapa cha, Amnaw, Zezrel chyhsa Ahinô liata a sapa châ ta;

3 a panonapa cha Khilia, Kamel chyhsa Naba panôhmeipa Abikai liata sapa a châ; a pathôhna cha Absalaw, Kesu beipa Talmai sawchanônô Maakha sawchapawpa châ ta;

4 a papalihna cha Adônizah, Haki sawchapawpa châ ta; a papangawhna cha Shephatiah, Abita sawchapawpa châ ta;

5 a pacharuna cha Itharia, Davi lahpinô Eklah liata a sapa châ ta. Hezy he Davi saw Hebraw liata a pihpa zy cha ama châ.

Abne ta Davi biehraina taopa â chhuah

6 Sawla chhôhkha zy nata Davi chhôhkha zy likawh liana chata adyuhna y lymâ ta. Abne cha Sawla chhôhkha liana cha a duana su pasâh lymâ ta.

7 Sawla chata nôtho hnei ta, Rizpah châ ta, Aiah sawchanônô châ ta; Isabôse chata Abne hnohta, “Khazia, ei pâ nôtho lâta na vawh?” tah ta.

8 Chatanachata Isabôse bie reipa chata Abne cha a pathi-ia ngaita ta, “Zudah sahlao i luh ma ei châ tly? Atanoh taihta na paw Sawla chhôhkha zy nata a unawhpa zy nata a viasa zy chô liata nôphana palâsa na ta, Davi ku liata cha hlâ leipa na ta; châhrasala nâma ta he chanô chô liata a moleipa ta na bai chi ta.

9 Sawla chhôhkha zy tawhtapa khihnarâh cha lapa ta, Izarel nata Zudah chô liata Dana tawhta Besheba taihta Davi abeidyuchhai padua awpa ta,

10 ABEIPA ta Davi hnohta a chhie a sapa hawhta ei tao vei khiahtala, Khazohpa ta Abne cha ano tao ta tao sala, cha hlâta tha via chhaota,” tah ta.

11 Chatanachata Isabôse cha a chipa vâta a chhy rai a chhy ngâh khao leipa ta.

12 Abne chata ano vyuhpa ta Davi lâta chyhsa tuah ta, “He khihnarâh he ahy eih e a châ? Ei hnohta bie hraih teh, Izarel chyhsa zydua nâma lâta na chhâ châ awpa ta ei ku cha na chhâh a châ aw,” tahpa ta reih ta.

13 Davi chata, “A pha na; na hnohta bie ei hraih aw na; anodeikuacha nâ liata hmo miakha ei hnaw aw; cha cha he he a châ, na hmô awpa ta nâ vy tita Sawla sawchanônô Mikhal na vaw chhi leipa khiahtala ei hmia na hmô thei aw va chi,” tah ta.

14 Chatawhcha Davi chata Sawla sawchapawpa Isabôse hnohna chata, “Philistina mozy chopaw vo za kha ta ei chaleipa, ei lahpinô Mikhal cha na vaw pie teh,” tahpa ta chyhsa tuah ta.

15 Isabôse chata chyhsa tuah ta, a vahpa Laisha sawchapawpa Paltiel hnoh tawhtapa cha a chhi haw ei ta.

16 Châhrasala a vahpa cha ano lâta vawh ta chana chôta sie ta, Bahuri taihta zi ta. Chatanachata Abne ta a hnohta, “Sie la, kua heih teh,” tah ta; kua haw heih ta.

17 Chatanachata Abne ta Izarel mozy machâ sahlao cha bie a chho ta, “Kha hlâna khata Davi cha nama beipa châta khoh tyh eichi ta.

18 Atahmâ he tao teh u; ABEIPA ta Davi kyh liana chata, ‘Ei chakaotuhpa Davi ku ei chyhsa Izarel zy cha Philistina mozy ku tawhtapa nata ama khakhaipa zydua ku tawhtapa ei pachha aw tahpa ta a reih,” tahpa ta.

19 Abne chata Benzami mozy nahkhao theina liata reih hra ta. Abne cha Izarel mozy nata Benzami chhôhkha zydua ta a pha ama tahpa maih hawhta Hebraw liata Davi nahkhao theina liata reih awpa ta sie hra ta.

20 Abne cha Hebraw liata Davi lâta chyhsa syno chhaota â vy nona chata, Davi chata Abne nata a hnohta chyhsa a ypa châta kyhchhi tao ta.

21 Abne chata Davi hnohta, “Thyu aw na ta, na hnohta bie ei hraih thei nawpa nata na khopa hawhta ryu na reih thei nawpa ta Izarel mo zydua ei beipa hnohta pakhy awpa ta ei sie aw na,” tah ta. Chatawhcha Davi chata Abne cha pasiesa ta; thlalôh ngaitapa ta sie haw ta.

Zôaba ta Abne a thie.

22 Davi chyhsa zy nata Zôaba hrâsiepa cha vaw kua ei ta, hraona sôh hluhpi vaw phaoh ei ta. Châhrasala Abne cha Hebraw liata Davi hnohta vaw y khao vei, vaw pasiesa haw tlôh ta, ano chhao thlalôh ngaitapa ta a si haw.

23 Zôaba nata a hnohta zawpi zydua ama vaw tlô nahta, “Nera sawchapawpa Abne cha abeipa lâta a vy ta, ano chata pasiesa haw heih ta, thlalôh ngaitapa ta a sie haw,” tahpa ta Zôaba cha chho ei ta.

24 Chatanachata Zôaba cha abeipa lâta a vy ta, “Na hmotaopa zie he kheihta zie ta e a châ tly? Abne cha nâ lâta a vy ta; khazia ma pasiesa chi ta, a sie syulyu ha tly?

25 Nera sawchapawpa Abne cha pahno chi ta, nama cha dô awpa ta na puana lâ nata nâ ngiana lâ nata na hmotaopa maih pahno a chhuapa ta â vy,” tah ta.

26 Davi tawhtapa Zôaba a pua nahta Abne a chadai awpa ta Zôaba ta chyhsa tuah ta, Sirah tikhaohreipa tawhta vaw kuakhei ei ta; châhrasala Davi chata pahno vei.

27 Chatawhcha Abne cha Hebraw a vaw tlô nahta, Zôaba chata kuh ochhi liata a ru lâta bie chho awpa ta ânano lâta a chhi ta, a unawhpa Asahel thisaih palopa viarithô nawpa ta a py liata a chô ta, thi haw ta.

28 Cha hnôh lâna chata Davi ta a thei nahta, “Nera sawchapawpa Abne thisaih palopa kyh liana chata kei nata ei khihnarâh cha ABEIPA mohmô ta chhâzaw ta pathaih aw pi ta.

29 Zôaba luh chô liata tla sala, a paw chhôhkha zydua chô lia chhaota; Zôaba chhôhkha zy hry liana chata thi lohpa tlyma, phawhpa tlyma, chôhchahrei a chhypa ta a ypa tlyma, zaozi ta a thipa tlyma, chakâna tlyma vaw y leipa ta y khah se!” tah ta.

30 Chatanachata ama unawhpa Asahel cha Kibia liata adyuhna liata a thipa vâta Zôaba nata a unawhpa Abisai chata Abne cha thie haw ei ta.

31 Chatawhcha Davi chata Zôaba nata a hnohta zawpi a ypa zydua hnohna chata, “Nama pohzy cha hrie ula, latho poh a bu ula, Abne mâchhiesa teh u,” tah ta. Chatawhcha Abei Davi chata ri a syna cha zi ta.

32 Abne cha Hebraw liana chata pabu ei ta; abeipa chata aoh tlili ta Abne thlâ liana chata cha ta; zawpi zydua chhao cha ei ta.

33 Chatawhcha abeipa chata Abne chakhei ta,'Abne cha a hrupa thi ta a thi aw mâ?

34 Na ku cha chahrypa châ leipa ta, na phei keihraih daipa châ hra vei: hmoparaopa sawzy hmiakô liata chyhsa a paopa hawhta na pao thlâh ha tly, tah ta. Chatawhcha chyhsa zydua chata chakhei heih ei ta.

35 Chatanachata nohchhô a châ nota Davi cha pati paniesa awpa ta chyhsa zydua a vy ei ta; châhrasala Davi chata, “Noh tla hlâta pati tlyma, hmo hropa tlyma rai ei nie khiahtala Khazohpa ta a taopa hawhta na tao mawh sy, cha hlâta a tha via chhaota!” tahpa ta chhie sa ta.

36 Cha cha chyhsa zydua ta ama thei nahta aly ngaita ei ta; abei hmotaopa maih chata zawpi zydua cha palysa lymâ ta.

37 Chatanachata zawpi zydua nata Izarel chyhsa zydua chata cha noh liana chata Nera sawchapawpa Abne thipa cha abeipa bie châ vei tahpa vaw pahno haw ei ta.

38 Chatawhcha abeipa chata a chyhsa zy hnohta, “Atanoh he Izarel molaipa, chyhsa rôhnah ngaitapa a thi tahpa nama pahno tla maw?

39 Abeipa chata sathaw thupa châ hra aw sala, atanoh he ei thlahlôh vei; chatawhcha he chyhsa Zeruia sawchapawpa zy he ei châta tao a ru tu haw. ABEIPA ta hmo pha leipa a taotuhpa cha a molei zie lymâ hawhta viarithô mawh sy!” tah ta.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 4

Isabôse ama thiena

1 Sawla sawchapawpa Isabôse ta Hebraw liata Abne a thi tahpa a vaw thei nahta a ku zy tha tlô khao leipa ta, Izarel mo zydua cha nôpopa ta y haw ei ta.

2 Sawla sawchapawpa Isabôse chata pheisaih sahlao hyutuhpa pano hnei ta; pakha moh cha Baana châ ta, a hropa moh cha Rekhaba a châ, Benzami pathla Berô mo Rimô sawchapawpa zy châ ei ta, (Berô cha Benzami râh ta pachâpa châ tlôh ta;

3 Berô khih liata chyhsa zy cha Kitai lâta a râ ei ta. Atanoh taihta cha liana chata y haw ei ta).

4 Sawla sawchapawpa Zawnatha chata sawchapawpa pheisypa hnei ta. Zezrel tawhta Sawla nata Zawnatha thâtih ama vaw thei nota kô pangawhpa châ ta; chatanachata a mokhâhtuhpa chata a pyh ta, a râkhei ta; a râ awpa ta â parahna liata pathla ta, a phei sy haw ta. A moh cha Miphibôse a châ.

5 Berô chyhsa Rimô sawchapawpa zy Rekhaba nata Baana cha sie ei ta, Isabôse o liana chata nohchhô noh sah locho ta, a pahâ nota a ngiahnao ei ta.

6 Ochhivaihtuhpa cha sâh chaneipa ta y ta, châhrasala vaw tla-uah haw ta, Rakheba nata a unawhpa Baana cha a ngia lymâ ei ta.

7 A ziana chhôhpadâhpa liata a rakhô liata a ziapa cha dy ei ta, thie ei ta, a luh tai ei ta. A luh cha la ei ta, Arabah sie palâhpa ta zâkhihdei ta sie ei ta,

8 Isabôse luh cha Hebraw liata Davi lâta vawh cheih ei ta. Abeipa hnohna chata, “Nama thie châ chhuahpa na khakhaipa Sawla sawchapawpa Isabôse luh, ABEIPA chata ei beipa phuh cha atanoh he Sawla nata a pathla tawhtapa a lapa haw,” tah ei ta.

9 Châhrasala Davi chata Berô chyhsa Rimô sawchapawpa Rekhaba nata a unawhpa Baana cha a chhy ta ama hnohta, “ABEIPA ei nôpona zydua tawhtapa na pachhatuhpa hrona reipa ta ei reih,

10 “thâtih phapa a vaw tlôkheipa ta a pachâpa ta, ‘Sawla cha a thi haw,’ tahpa ta chyhsa pakha ta na vaw chho ta, ano cha patu na ta Zikla liata thie na ta, cha cha a thâtihpha a vaw tlôkheipa ty ta ei piepa cha a châ.

11 Chyhsa siapa ano ochhôh liata a rakhô tlai liatahpa, moleipa ta ama thiepa thisaih ty cha nâmo liata a hnawpa ta alei tawhtapa he cha pahleipadia thlyu aw veih ei na mâ?” tah ta.

12 Chatanachata Davi chata a satliapa zy bie pie ta, âmo chata thie ei ta, ama ku nata ama phei tai ei ta, Hebraw liata tipo kiah liana chata bangie ei ta. Isabôse luh deikua cha la ei ta, Hebraw liata Abne thlâ liata pabu haw ei ta.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 5

Davi Izarel beipa a vaw châna zie (1Tr 11:1-3)

1 Chatanachata Izarel chi zydua cha Hebraw liata Davi lâta a vy ei ta, “Na rupa nata na sapa zy châ pi ta.

2 Cha hlâta Sawla eima chô liata abei nota Izarel zy chhihthapa nata a kuakheituhpa châ tyh chi ta; ABEIPA chata na hnohta. ‘Ei chyhsa Izarel zy cha pasa aw chi ta, Izarel zy chô liata hyutuhpa ta na y aw.’ tah ta,” tah ei ta.

3 Chatanachata Izarel machâ zydua cha Hebraw liata abei lâta sie ei ta; Abei Davi chata Hebraw liana cha ABEIPA hmiakô liata ama hnohta bie hraih ta, Davi cha Izarel zy chô liata abei châta sathaw thu ei ta.

4 Davi cha a bei tua nota kô sythôhpa châ ta, kô sypalih a bei ta.

5 Hebraw liana chata Zudah zy chô liata kô sari nata thla charu a bei ta; Zerusale liata Izarel zy nata Zudah zydua chô liata kô sythôh nata kô thôh a bei ta.

Davi ta Zaio a lana(1Tr 11:4-9)

6 Chatawhcha abei nata a chyhsa zy cha cha râh liata a pahrâpa sahlao Zebu mo chho awpa ta Zerusale lâta sie ei ta, cha sahlao chata Davi a vaw ngia thei lei awpa ta pangiasapa ta Davi hnohta, “He liana heta a vaw ngia chachei ta aw va chi mochaopa nata pheisypa zy ta ama cha pakhâ aw,” tah ei ta.

7 Châhrasala Davi chata Zaio kuh cha la haw ta, cha cha Davi khih a châ.

8 Chatawhcha Davi chata cha noh liana chata Zebu mo nâ dyuhtuhpa maih cha, ti lona lâta a khy ei sala, Davi a baotuhpa pheisypa nata mochaopa zy cha thie mawh sy,” tah ta. Chavâta, “Mochaopa nata pheisypa zy cha y taraw ei ta, o liata a ngia thei veih ei,” ama tah tyh.

9 Chatawhcha Davi cha kuh liana chata pahrâ ta, Davi khih bipa châ haw ta. Davi chata Milô tawhta â dôpa ta kuh tao ta. A chhôh lâ chhaota.

10 Chatanachata Davi cha vaw rôhnah via rili ta, ABEIPA Pheisaih zy Khazohpa cha a hnohta a y lymâpa vâta.

Hirama nata Davi ama pahnona(1Tr 14:1-2)

11 Chatawhcha Tyre beipa Hirama ta Davi lâta chyhsa tuah ta. Sidy thozy paphao ta, zôthaipa zy nata alô adaihtuhpa zy tuah hra ta, Davi o sapa ei ta.

12 Chatawhcha Davi chata ABEIPA ta Izarel mozy chô liata abeipa ta ano cha pa-i ta, a chyhsa Izarel zy vâta a khihnarâh cha a palyupalih tahpa pahno ta.

Zerusale liata Davi saw a pihpa zy(1Tr 3:5-9; 14:3-7)

13 Davi chata Hebraw a puasai tawhta Zerusale liatahpa nôtho nata lahpinô hnei chhi ta; Davi chata sawchapaw zy nata sawchanô zy sa lymâ ta.

14 Zerusale liata a sapa moh zy cha hezy he ama châ: Shamua zy, Shôba zy, Natha zy, Sawlawmaw zy,

15 Ibha zy, Elisua zy, Nephe zy, Zaphia zy,

16 Elisama zy, Eliada zy, Eliphale zy ama châ.

Davi ta Philistina mo a pahnie(1Tr 14:8-17)

17 Philistina mozy ta Davi cha Izarel mozy abeipa châta sathaw ama thu tahpa ama pahno nahta, Philistina mo zydua cha Davi tlua awpa ta khy ei ta; Davi chata vaw thei ta, kuh lâta zu ta.

18 Philistina mozy cha Rephai saikao liata a paziah ei ta.

19 Davi chata, “Philistina mozy adyuh awpa ta ei khy aw ma? Ei ku liata âmo sahlao cha na pie aw mâ?” tahpa ta ABEIPA a chhohia ta. ABEIPA chata Davi hnohta, “Khy teh, Philistina mozy cha na ku liata ei pie tlai aw,” tah ta.

20 Davi cha Baalperazi lâta sie ta, cha liana chata Davi ta âmo adyuh ta; “ABEIPA ta ei khakhaipa zy cha ti pa-sapa hawh tlaita ei hmiakô liata a papai haw,” tah ta. Chavâta cha su moh cha Baalperazi bi ta.

21 Cha liana chata ama khazoh nohthlapa zy siesai ei ta, Davi nata a chyhsa zy chata la ei ta.

22 Chatawhcha Philistina mozy cha khy heih ta, Rephai saikao liata a paziah heih ei ta.

23 Davi ta ABEIPA a chhohia nahta ano chata, “Khy aw va chi, ama hnôh lâta padô la, mulberi kô dady ta zy, a kei dyuh teh.

24 Chatawhcha mulberi kô kithlao liata siepa pyu hawhta a paro ngâpa na thei khiahtala adyuh teh; Philistina pheisaih zy adyuh awpa ta na hmiakô liata ABEIPA a pua haw tahna a châ aw,” tah ta.

25 Chatanachata ABEIPA ta bie a piepa hawhta Davi chata tao ta, Philistina mozy cha Keba tawhta Kaza taihta a dyuh ta.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 6

Davi cha Khazohpa Byh la awpa ta a sie (1Tr 13:5-14)

1 Davi chata Izarel mozy hry liata chyhsa atlyhpa thy thôh pakhy ta.

2 Davi cha thyu ta Baale-zudah tawhtapa zawpi zydua chhaota Khazohpa Byh cherubi zy chô liata a tyuhpa Pheisaih zy ABEIPA moh ama bipa cha la awpa ta pua haw ei ta.

3 Khazohpa Byh cha talaili thiehpa liata soh ei ta, tlâh liata Abinada o tawhtapa la ei ta; Abinada sawchapawpa Uzah nata Ahiô zy chata talaili thiehpa cha pasiesa ei ta.

4 Chatawhcha tlâh liata Abinada o tawhtapa cha Khazohpa Byh chhaota la ei ta; Ahiô cha Khazohpa Byh hmialâ ta sie ta.

5 Chatawhcha Davi nata Izarel chyhsa zydua chata ABEIPA hmiakô liata a paro theipa chi nanopa meisah tho ta taopa nata totâ zy, tlaipi zy, khoh chyhpa zy, chiahmie nata paotlâ zy tô ei ta.

6 Chatawhcha Nakô sawhri ama tlô nata Uzah chata Khazohpa Byh cha pazah ta patu ta, viahchao cha a paochheichhâpa vâta.

7 Chatawhcha Uzah chô liata ABEIPA pathi-ia ta; a hmotaopa â do leipa vâna chata Khazohpa ta cha liana chata thie ta; Khazohpa Byh kiapâh liana chata thi haw ta.

8 ABEIPA cha Uzah chô liata a hmotaopa vâta Davi cha a hie hâh ta, cha su moh cha Perezuza bi ta, atanoh taihta a châ thlâh haw.

9 Cha noh liana chata Davi chata ABEIPA cha chi ta; “Kheihta e, ABEIPA Byh cha kei lâta a vaw tlô thei aw tly?” tah ta.

10 Chatanachata Davi chata ABEIPA Byh cha Davi khih liata ano lâna chata pasie khoh khao leipa ta; Kiti chyhsa Ôbededôma o lâta tlao soh haw ta.

11 Chatawhcha ABEIPA Byh cha Kiti chyhsa Ôbededôma o liana chata thla thôh y ta; chatanachata Ôbededôma nata a chhôhkha zydua cha ABEIPA ta byhnâ pie ta.

Khazohpa Byh cha Zerusale ama vaw tlôkhei

(1Tr 15:1-16, 6)

12 Chatawhcha Abei Davi cha, “Khazohpa Byh vâta Ôbededôma chhôhkha nata a o nata alyu zydua ABEIPA ta byhnâ a pie,” tahpa ta chho ei ta. Chatanachata Davi chata Khazohpa Byh cha Ôbededôma o tawhtapa Davi khih lâna chata a ly ngaitapa ta za la haw ta;

13 ABEIPA Byh a sytuhpa zy cha keih charu ama chakâ pata nahta viahchao tôhpa nata sahrho pasapa thawpa ta atheih ei ta.

14 Chatawhcha Davi cha ABEIPA hmiakô liata thata lâh ta, Davi chata lini ephod a ky ta.

15 Chatanachata Davi nata Izarel mo zydua chata rahaona chôta nata chiahmie tôna chôta ABEIPA Byh cha khykhei haw ei ta.

16 ABEIPA Byh cha Davi khih a ngiah noh na chata Sawla sawchanônô Mikhal chata o py tawhta vaw sai ta, ABEIPA hmiakô liata Davi a sualipa nata lâpa cha hmô ta; a palôhrupa ta mohnao haw ta.

17 Chatanachata ABEIPA Byh cha a ngiakhei ei ta, a sona awpa ta Davi ta a paraipa poh-o chhôh liata a su awpa liana chata soh haw ei ta; Davi chata raopa hlâna zy nata adyhna hlâna zy ABEIPA liata hlâ ta.

18 Davi ta raopa hlâna nata adyhna hlâna zy cha a hlâ khai nahta, Pheisaih zy ABEIPA moh ta zawpi zy byhnâ aw pa ta,

19 zawpi zydua Izarel mo zydua cha a chanô a chapaw ta chyhsa to viahchhâ tlâ kha nata sa tlo kha nata kre thei pachawhpa sao kha rai chyu ta. Chatanachata chyhsa zydua ama o chyu lâta a di haw ei ta.

20 Chatawhcha Davi cha a chhôhkha zy byhnâ aw awpa ta a di haw ta. Châhrasala Sawla sawchanônô Mikhal cha Davi dy awpa ta vaw pua ta, “Atanoh ta Izarel abeipa cha a rôhnah kaw dia, nozana châh a pahno leipa chyhsa leilôpa thluahruapa ta a ypa hawh tlaita atanoh a chakaotuhpa laihsa zy mohmô liata a y thla ha khâ!” vaw tah ta.

21 Chatawhcha Davi chata Mikhal hnohta, “Na paw nata a chhôhkha zydua hlâta na tly ta, ABEIPA chyhsa Izarel zy chô liata abei ta na raotuhpa ABEIPA hmiakô liata mâ tâh, ABEIPA hmiakô liana chata a lâh awpa rai ei châ mâ tâh.

22 Hezy hlâna heta zakhei ei chhih via aw, keima chhao na mohmô liata panawhsapa ta ei y aw; anodeikuacha chakaotuhpa laihsa zy na reipa cha palyupalihpa ta ei y aw,” tah ta.

23 Chatanachata Sawla sawchanônô Mikhal chata a thina taihta saw hnei leipa ta.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 7

Davi hnohta Khazohpa biehraina (1Tr 17:1-27)

1 Abei cha a o liata y ta, ABEIPA ta ama chheipâh liata a khakhaipa zydua tawhtapa thlahlôhpa ta a paysa tawhna chata,

2 abei chata hrohsopa Natha hnohta, “Keima cha sidy tho o liata pahrâ na ta, Khazohpa Byh deikua cha poh-o liata y ta,” tah ta.

3 Natha chata abei hnohta, “Na palôhrupa liata a ypa hawh tlaita tao teh; ABEIPA na hnohta a y mâ tâh,” tah ta.

4 Châhrasala cha zâ lilaw liana chata Natha hnohta,

5 “Ei chakaotuhpa Davi cha kei chho teh, ABEIPA chata he tana heta a tah, ‘Ei yna awpa ta nâma ta o eina sapa aw chi ma?

6 Izarel pathlazy Izi râh tawhtapa ei chhihtha no tawhta atahmâ taihta o liata y leipa na ta, poh-o liata nata achhyna byureih liata tlao y lymâ tyh na ta.

7 Izarel pathla zydua hry liata ei siena maih liata chhao ei chyhsa Izarel zy pasa awpa ta bie ei piepa ryureituhpa zy hnohta, “Khazia sidy tho ta o eina sapa veih eichi,” tahpa ta ei reih beih ma?’

8 Chavâta ei chakaotuhpa Davi hnohta, ‘Pheisaih zy ABEIPA chata he tana heta a tah. mietahkupa bâna su na mietahkupa vaihpa tawhtapa cha ei chyhsa Izarel mozy chô liata hyutuhpa châta cha lana ta;

9 na siena maih liata na hnohta y lymâna ta, na hmiakô liata na khakhaipa zy pahlei lymâ na ta; alei liata chyhsa rôhnah ngaitapa zy, moh rôhnah ngaitapa ta ei cha tao aw.

10 Chatawhcha ei chyhsa Izarel châta su rao aw na ta, âmo ei su liata ypa ta ama pasi khao lei awpa ta âmo chalo aw na ta; hmialâ hawhna khata moleina sawzy tâ ama rie pathei khao leipa aw ei ta,

11 ei chyhsa Izarel zy chô liata ryureituhpa zy ei rao no hawhna kha, cha khao hra aw vei; chatawhcha na khakhaipa zydua tawhtapa he ei cha pahâsa aw. Cha leipa chhaota ABEIPA ta chhôhkhapa chata a cha paduapa aw tahpa a cha chho.

12 Na noh a kipa ta na mahpaw zy hnohta nâ mô tina chata, na hnôh lâta na pathla na chhi liata a pathei awpa cha padua aw na ta, a khihnarâh cha ei pa-i aw.

13 Ano chata ei moh châta o sa aw ta, a khihnarâh abeidyuchhai cha chhâzaw châta ei pa-i aw.

14 A paw châ aw na ta, ano cha ei sawchapawpa châ aw ta. Hmo a parao khiahtala chyhsapa chôhchahrei nata chyhsapa sawzy tuna ta chhorei aw na ta;

15 châhrasala na hmiakô tawhta ei soh hapa Sawla tawhta ei lapa hawhna khata ei zawngiahna chata ano la siesai aw vei.

16 Chatawhcha ei hmiakô liata na chhôhkha nata na khihnarâh cha chhâzaw ta khâchâ pa-ipa châ aw ta; na beidyuchhai cha chhâzaw ta pa-ipa a châ aw,’ a tah,” tahpa ta ABEIPA bie vaw tlô ta.

17 Cha bie zydua lymâ hawhta nata cha aluahna hawhna tlai chata Natha ta Davi hnohta reih ta.

18 Chatanachata Abei Davi cha angia ta, ABEIPA hmiakô liata a tyuh ta, Hy Abeipa KHAZOHPA y, ahyma châ na ta, ei chhôhkha zy chhao ahyma châ ei ta, he taihta einâ chhi chi?

19 Hy Abeipa KHAZOHPA y, chazy chhao cha na mohmô liata cha hmo chyhpa ta châ ta; châhrasala na chakaotuhpa cha chhôhkha yzie nawpa kyh cha kô hluhpi chhôh châta vaw reih haw hra chi ta, hy Abeipa KHAZOHPA y, hezy chhao he chyhsapa zy tahzie haw hra ta châ ta!

20 Davi heta nâ lâta khapa e a reih hlei aw? Na chakaotuhpa he pahno khai tlôh chi, hy Abeipa KHAZOHPA y!

21 Na chakaotuhpa pahno awpa ta na bie vâta nata nama pathipalôh lymâ hawhta he hmo rôhnah ngaitapa zy he tao haw chi ta.

22 Chavâta hy ABEIPA Khazopa y, nâ cha na rôhnah na; eima nah ta eima theina zie ta nâma hawhpa rai y leipa ei ta, nâma leipa ta cha Khazohpa rai y hra veih ei.

23 Khazohpa ta ano chyhsa zy châta â vaw tlyhpa Izi râh tawhtapa nata pho to nata ama Khazohpa tawhtapa na châta nâ tlypa na chyhsa zy hmiakô liata nâma châta hmo rôhnah ngaitapa nata na râh châta hmo chichhi ngaitapa tao awpa nata ano moh rôhnah ngaitapa tao awpa ta na chysa Izarel zy hawhpa rai he khizaw liana heta pho hropa ahy e a y?

24 Chatanachata na chyhsa Izarel zy cha chhâzaw ta na chyhsa ama vaw châ thei nawpa ta na châta pa-i haw chi ta; ABEIPA nâ cha Khazohpa vaw châ haw chi ta.

25 Chatanachata hy ABEIPA Khazohpa y, na chakaotuhpa kyh nata a chhôhkhapa zy kyh na reipa cha chhâzaw châta pa-i la, na rei hawpa hawhna khata tao mah y;

26 ‘Pheisaih zy ABEIPA cha Izarel zy Khazohpa a châ,’ tahpa ta na moh cha chhâzaw ta palyupalihpa ta y mawh sy, na chakaotuhpa Davi chhôhkhapa zy na hmiakô liata pa-ipa ta ama y aw.

27 Hy Pheisaih zy ABEIPA Izarel Khazohpa y, na chakaotuhpa hnohta, ‘Chhôhkha ei cha paduapa aw,’ tahpa ta phuah haw tlôh chi ta, chavâta na chakaotuhpa chata he thlahchhâna he nâ lâta a tlôkhei ngâ.

28 Hy Abeipa KHAZOHPA y, nâ cha Khazohpa châ chi ta, na bie cha hmeihseihpa châ ta. he hmo phapa he, na chakaotuhpa lâta taih haw chi ta;

29 chavâta na chakaotuhpa chhôhkha zy cha na hmiakô liata chhâzaw ta ama y thlâh ha thei nawpa ta byhnâ pie mah y; hy Abeipa KHAZOHPA y, nâ chata reih haw tlôh chi ta, na byhnâ ta na chakaotuhpa chhôhkha zy cha chhâzaw ta byhnâ piepa ta y mawh sy,” tah ta.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 8

Davi ta a râh a pakawhna (1Tr 18:1-13)

1 Cha hnôh lâna chata Davi chata Philistina mozy cha adyuh ta, pahnie ta, chatanachata Davi chata Philistina mo ku tawhta Methekamah chhu haw ta.

2 Môaba mozy adyuh ta, alei liata paziasa ta, thliena ri ta thlie ta, tlâh no cha thie awpa ta thlie ta, tlâh kha cha a tlâh dua ta a hrohpa ta pahlôh awpa ta thlie ta. Cha tanachata Môaba mozy cha Davi chakaotuhpa vaw châ haw ei ta, chhie zy pie tyh ei ta.

3 Davi chata Euphrate chavah lâta a râh la heih awpa ta a sie no ta, Zôbah beipa Rehô sawchapawpa Hadadeza chhao a dyuh ta.

4 Chatanachata Davi cha a arâ a kiahpa chyhsa sâh kha nata za sari nata pheisaih thy no patu ta; chatanachata Davi chata talaili a daophipa arâ zydua cha ama chazaw chhawh pa ta, talaili za kha a daophi awpa deikua cha pahlôh ta.

5 Chatawhcha Damaska liata Suria mozy, Zôbah beipa Hadadeza pachha awpa ta a siepa cha Davi ta Suria chyhsa zy hry liata chyhsa thy no nata sâh no thie ta.

6 Chatanachata Davi chata Suria râh liata Damaska liana chata pheisaih soh ta: chatanachata Suria mozy cha Davi chakaotuhpa ta vaw y haw ei ta, chhie zy pie tyh ei ta. ABEIPA ta Davi cha a siena maihta pahniesa lymâ ta.

7 Chatawhcha Davi chata Hadadeza sahlao zy ngôh vyhphao zy lapa ta, Zerusale lâta cheih ta.

8 Chatawhcha Hadadeza khih Betah tawhta zy, Berôthai tawhta zy ta Abei Davi chata dawh a hluhpi la ta.

9 Hama beipa Tô-i chata Hadadeza pheisaih zydua Davi ta a pahnie tahpa vaw thei ta,

10 Hadadeza cha adyuh ta a pahniepa vâta a naoh awpa nata alykhei awpa ta Tô-i chata a sawchapawpa Zôrama cha Davi lâta tuah ta; Hadadeza chata Tô-i he adyuh tyhpa vaw châ tlôh ta. Zôrama chata tâkâ ri hmobaoh zy, ngôh hmobaoh zy, dawh hmobaoh zy vaw cheih ta;

11 chazy cha râh hropa a pahniepa zydua liatahpa tâkâri nata ngôh a hlâpa zy chhao chata Abei Davi ta ABEIPA lâta hlâ hra ta,

12 Suria mo ei zy, Môaba mo eih zy, Amawna pathla eih zy, Philistina mo eih zy, Amale mo eih zy, Zôbah beipa Rehô sawchapawpa Hadadeza tawhta a hraona hmozy cha.

13 Chatawhcha Davi cha Alôh Saikao liata Suria chyhsa thy kha nata sâh charie a thiepa a vaw kuapa cha a moh vaw pathâh haw ta.

14 Chatawhcha Edôma liata pheisai soh ta; Edôma râh su to liata pheisai thata soh ta, chatanachata Edôma mo zydua cha Davi chakaotuhpa vaw cha haw ei ta. Chatanachata ABEIPA ta Davi cha a siena maih liata pahniesa lymâ ta.

Davi a chakaotuhpa zy(2Sm 20:23-26; 1Tr 18:14-17)

15 Chatanachata Davi chata Izarel mo zydua chô liata ryu reih ta; Davi chata a chyhsa zydua chô liana chata a sia ngaitapa ta ryu reih ta.

16 Chatawhcha Zeruia sawchapawpa Zôaba cha pheisaih hyutuh chaipa châ ta; Ahitu sawchapawpa Zehôsapha cha thâtih rohtuhpa châ ta;

17 Ahitu sawchapawpa Zadôka nata Abiatha sawchapawpa Ahimele cha theihthaipa châ ei ta; Seraiah cha a rohtuhpa châ ta;

18 Zehôiada sawchapawpa Benai cha Kherô mo nata Pele mozy hyutuhpa châ ta; Davi sawchapawpa zy cha theihthaipa ama châ.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 9

Mephibôse chôta Davi ngiachhiena

1 Davi chata, “Zawnatha vâta ngiachhiena ei palâsa thei nawpa ta Sawla chhôhkha zy hry liata chyhsa ama y vâ ma i?” tah ta.

2 Sawla chhôhkha zy chakaotuhpa pakha a moh Ziba y ta, Davi lâta vawh awpa ta aw ei ta; abeipa chata a hnohta, “Ziba na châ ma?” tah ta. Ano chata, “Ei châ na, kei na chakaotuhpa he,” tah ta.

3 Abeipa chata, “Khazohpa ngiachhiena ei palâsa thei nawpa ta Sawla chhôhkha zy hry liata chyhsa y veih ei tlyma?” tah ta. Ziba chata abeipa hnohta, “Zawnatha sawchapawpa pakha y ta; a phei chhao a sy pâ ngyu,” tah ta.

4 Abeipa chata a hnohta, “Khataih liata e a y?” tah ta. Ziba chata abeipa hnohta, “Lôdeba liata Amiel sawchapawpa Makhia o liata a y,” tah ta.

5 Cha tanachata Abei Davi chata chyhsa tua ta, Lôdeba tawhta Amiel sawchapawpa Makhia o liatahpa cha kei palasa ta.

6 Sawla saw Zawnatha sawchapawpa Mephibôse cha Davi lâta a vy ta, a hmia lâta pao ta, a naoh ta. Davi chata, “Mephibôse!” tah ta. Ano chata, “Moh tua, na chakaotuhpa hih,” tah ta a chhy ta.

7 Chatawhcha Davi chata a hnohta, “Chi khâ; na paw Zawnatha vâta cha ngiachhie tlai aw na ta, na mahpaw Sawla râh zydua cha pahneisa heih aw na ta; ei tlâhkhai liata pati na dôh tyh aw,” tah ta.

8 Chatawhcha a naoh ta, “Kei a thi ruapa hawhpa, na chakaotuhpa he, khâpa châta ma na pachâ tly?” tah ta.

9 Chatanachata abeipa chata Sawla chakaotuhpa Ziba cha aw ta, a hnohta, “Sawla hmo zydua nata a chhôhkha zydua hmozy cha na zibeipa sawchapawpa he ei pie khai haw.

10 Chatawhcha ano châta alei palie aw chi ta, nâma nata na sawchapawpa zy nata na chakaotuhpa zy chhaota, na zibeipa sawchapawpa châta nipa zy a hnei thei nawpa ta na hria chiehpa zy cha vaw cheih aw chi ta; na zibeipa sawchapawpa Mephibôse deikua chata ei tlâhkhai liata pati a dôh tyh aw,” tah ta. Ziba chata sawchapawpa pahrawhleipangawh nata chakaotuhpa syno hnei ta.

11 Chatanachata Ziba chata abeipa hnohta, “Ei beipa, ei zibeipa ta a chakaotuhpa bie a piepa lymâ hawhta na chakaotuhpa heta a tao aw,” tah ta. Chavâta Mephibôse cha Davi tlâhkhai liata abeipa sawchapawpa hawh hra ta pati a dôh tyh.

12 Mephibôse chata sawchapawpa hawtipa hnei ta, a moh cha Mikha a châ. Chatawhcha Ziba o liata a pahrâpa zydua cha Mephibôse chakaotuhpa châ ei ta.

13 Chatanachata Mephibôse cha abeipa tlâhkhai liata pati a dôh tyhpa vâta Zerusale liata pahrâ ta. A phei karâ no a zypa a châ.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24

2 Samuel Bo 10

Amawna mo nata Suria mo pahniena (1Tr 19:1-19)

1 Cha hnôh lâna chata Amawna pathlazy abeipa cha thi ta, a sawchapawpa Hanu cha ano vyuhpa ta a bei ta.

2 Davi chata, “A paw ta eina ngiachhiepa hawhta kei chhaota Nahasa sawchapawpa Hanu cha ei ngiachhie hra aw,” tah ta. Chatanachata Davi chata a paw kyh liata thlahpalôh awpa ta ano chyhsa zy tuah ta. Davi chyhsa zy cha Amawna pathlazy râh kei tlô ei ta.

3 Châhrasala Amawna pathlazy pahrâpa sahlao chata ama zibeipa Hanu hnohna chata, “Davi heta na paw a zapa vâta nâ lâta thlahpalôhtuhpa a vaw tuahpa ta na pangiasa ma? Davi heta a chyhsa zy he khihzy vaw parao awpa ta mopa ta nata mohparu awpa ta nâ lâta a vaw tuapa châ vei mâ?” tah ei ta.

4 Hanu chata Davi chyhsa zy patu ta ama kâhmi hiakha lâ ngyupa ta, ama chysia zy cha a liah liah ta ama chakhai phana rakha ta tai ta, pasiesa haw ta.

5 Davi ama chho nahta a dy awpa ta chyhsa tuah ta, âmo cha noza ngaita tlôh ei ta. Chatawhcha abeipa chata, “Nama kâhmi a seih hlâta cha Zerikô liata y chy ula, cha hnôh lâna chata a vy la vâh eichi,” tah ta.

6 Amawna pathlazy chata Davi a haopa ama vaw châ haw tahpa ama pahno nahta, Amawna pathlazy chata Berô liata Suria chyhsa sahlao nata Zôbah liata Suria chyhsa sahlao pheisaih thy no nata abei Maakha chyhsa sâh kha chhaota, Tôba mozy thy kha nata sâh no chhao bie tah ei ta, pahrua ei ta.

7 Davi ta cha cha a thei nahta, Zôaba nata pheisaih riahphapa zydua tuah ta.

8 Chatawhcha Amawna pathlazy cha vaw pua ei ta, khih a ngiana ochhi lâna chata adyuh awpa ta a paziah ei ta; Zôaba chyhsa nata Rehô chyhsa Suria mozy nata Tôba nata Maakha sahlao zy deikua cha ânano ta sibiepa su liata y ei ta.

9 Chatawhcha ama hmialâ nata ama hnôh lâta amâ vaw dyuh aw tahpa Zôaba ta a pahno nahta, Izarel mozy hry liatahpa aphapa a tlyh ta, Suria mozy adyuh awpa ta vaw paziah ei ta;

10 mo hropa zydua cha a unawhpa Abisai ku liata soh khai ta, Amawna pathlazy adyuh awpa ta a paziah ta.

11 Suria mozy he ei pahnie lei awpa khiahtala nâma ta na bao aw chi ta; chatawhcha nâma ta Amawna pathlazy na pahnie lei awpa khiahtala ei cha bao aw.

12 Riahpha ngaitapa ta y ula, eima chyhsa zy nata Khazohpa khih pachhapa ta riahpha ta y ei suh u,” ABEIPA chata a pha a tahna zie lymâ hawhta tao mawh sy,” tah ta.

13 Chatanachata Zôaba nata a hnohta chyhsa zy chata Suria mozy adyuh awpa ta adyuhna su lâ cha a kei hnia ei ta, chatawhcha a hmiakô liata a râpai ei ta.

14 Chatawhcha Amawna pathlazy ta Suria mozy ama râpai tahpa ama pahno nahta, âmo chhao cha Abisai hmiakô liana chata a râpai haw hra ei ta, khih liata a ngia ei ta. Chatawhcha Zôaba chata Amawna pathlazy cha kuasai ta, Zerusale lâ a di haw ta.

15 Suria mozy ta Izarel mozy hmiakô liata pahniepa ta ama y tahpa ama pahno nahta a hmaohpakhy ei ta.

16 Chatawhcha Hadadeza chata chyhsa tuah ta, Euphrate khô lâta Suria mozy cha papua ta; Hadadeza pheisaih hyutuhpa Shôba chata chhihtha ta, Helama lâta a vy ei ta.

17 Cha cha Davi chho ei ta, ano chata Izarel mo zydua awpakhy ta. Zawdâh chaka ei ta. Helama lâta sie ei ta. Chatawhcha Suria mozy chata Davi adyuh awpa ta a vaw paziah ei ta, a vaw dyuh ei ta.

18 Suria mozy cha Izarel zy hmiakô liata a râpai haw ei ta; Davi chata Suria mo talaili za sari chô liata a kiahpa nata arâ chô a kiahpa chyhsa thy palih thie ta, ama pheisaih hyutuhpa Shôba chhao tusao ta, cha liana chata thie haw ta.

19 Chatanachata Hadadeza chakaotuhpa ta a ypa abei zydua ta Izarel zy hmiakô liata pahniepa ta ama y hawpa ama vaw pahno nahta, Izarel zy chhaota adyhna tao ei ta, ama chakaotuhpa ta y haw ei ta. Chatawhcha Suria mozy chata Amawna pathlazy cha bao ngâh khao leipa ei ta.

2 Samuel (2 Samuel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24