Absalaw thina
1 Davi chata a hnohta chyhsa a ypa zy cha reih ta, pheisaih sâh kha chôta hyutuhpa zy, za kha chôta hyutuhpa zy tao ta.
2 Davi chata chyhsa zy cha tuah ta, su thôh pachhaih ta su kha cha Zôaba ta hyu ta, su thôh pachhaih ta su kha cha Zôaba unawhpa Zeruia sawchapawpa Abisai ta hyu ta, su thôh pachhaih ta su kha cha Kiti chyhsa Itai ta hyu ta. Chatawcha abeipa chata zawpi hnohta, “Keima tlai chhao nama hnohta ei vaw sie tlai aw,” tah ta.
3 Châhrasala zawpi zy chata, “Sie aw va chi. Keimo sahlao he cha a râ hawhpa rai châ ei sih la, a pei tah leipa aw ei ta. Chatawhcha a khophie daihmâ chhao he thi hra ei sala, a pei tah aw veih ei. Nâma cha keimo sahlao thy kha tluta sôh tlôh chi ta; chavâta khihpi tawhta maniah bao awpa ta amâ chiehpa ta na ypa cha tlao a pha via,” tah ei ta.
4 Abeipa chata ama hnohta, “A pha nama tahpa maih cha ei tao aw,” tah ta. Chatanachata abeipa cha kuh chhikao kiapâh liata aduah ta. Chatanachata pheisaih zydua cha a za nata a sâh ta pua ei ta.
5 Chatawhcha abeipa chata Zôaba nata Abisai nata Itai cha, “Keima vâta satliapa Absalaw cha chado ngaitapa ta kei tao teh u,” tahpa ta bie pie ta. Zawpi zydua ta Absalaw kyh liata abeipa ta pheisaih hyutuhpa zydua bie pie nona chata thei ei ta.
6 Chatanachata pheisaih zy cha Izarel mozy adyuh awpa ta adyuhna su lâna chata sie haw ei ta; amâ dyuhna cha Ephrai râhmâhpa liata a châ.
7 Cha liana chata Davi chyhsa zy hmiakô liana chata Izarel mozy cha pahnie haw ei ta, cha liana chata cha nona chata chyhsa thy no tlai thie ei ta.
8 Amâ dyuhna chata cha râh chhôh râh zydua cha pahly khai tlôh ta; cha nona chata zaozi hlâta hmahta râhmâhpa ta a hluh via a palâ.
9 Absalaw chata Davi chyhsa zy cha a kei tyh ta. Absalaw cha a sabaitu chô liata kiah ta, sabaitu cha ôaka tho chiah buh ru ngaitapa ry liata a ngia ta, a luh cha ôaka tho liana chata a taw ha ta, avâ nata alei likawh ta a bangiepa ta a y thlâh haw, chatawhcha sabaitu cha a râ lymâ haw ta.
10 Ahy tlyma ta hmô ta, Zôaba chho ta, “Ôaka tho liata Absalaw a bangie thlâh hawpa ei hmô,” tah ta.
11 Zôaba chata a chhotuhpa hnohta, “Pachâ teh, cha cha hmo na hmô tlai ma! Khazia thiepa ta alei liata na pathla vei? Cha hawhna chata tao la, tâkâ tlaw hrawh nata chaisaihna ei cha pie awpa tlai,” tah ta.
12 Chatawhcha chyhsa chata Zôaba hnohta, “Tâkâ sâh kha rai hmô aw sala, abeipa sawchapawpa chô liata ei ku pathla chachei ta aw va na; eima nahkhao theina liata tlaita abeipa ta nâma nata Abisai nata Itai hnohta, ‘Satliapa Absalaw cha ahyhmah ta hria cheita kha ei se,’ tahpa ta bie cha pie tlôh ei ta.
13 Ngâchhih lei ngaitapa ta thie aw sala, (abeipa liana chata khâpahmah nyu theipa châ tlôh leipa aw ta), nâma cha a phih ha tlôh aw chi ta,” tah ta.
14 Zôaba chata, “He hawhna heta la na kiapâh liata y thei va na,” tah ta. Asei miathôh a chei ta, ôaka tho hry liata a hrohpa ta a vaw ypa Absalaw châh-ao liana chata a chô ta.
15 Chatawhcha Zôaba chhaichhi a chabatuhpa satliapa pahrawh chata vaw chadô ei ta, Absalaw a chô ei ta, thie haw ei ta.
16 Zôaba chata chiahmie tô ta, Izarel sahlao a chadaituhpa pheisaih zy cha vaw kua haw ei ta; Zôaba chata âmo cha khâchâ pakhâ haw ta.
17 Chatawhcha Absalaw ri cha la ei ta, râhmâhpa liata khaotlô thu ngaitapa liata thy ei ta, a chô liana chata alô pacho ei ta, chatawhcha Izarel chyhsa zydua cha âmo poh-o chyu lâta a râ haw ei ta.
18 Absalaw chata a hro no ta, Abei Saikao liata alô pachopa vaw pacho haw ta, “Ei moh a dia lei nawpa ta, sawchapawpa chhao hnei tlôh lei khâh na ta,” tah ta; cha alô pachopa moh châta anô moh bi ta, atahmâ taihta Absalaw a thei thlâh hana tahpa a châ.
19 Chatanachata Zadôka sawchapawpa Ahimaza chata, “A kei râ aw nata ABEIPA ta a khakhaipa phuh a lapa na zie thâtih he abeipa cha ei kei chho aw,” tah ta.
20 Châhrasala Zôaba chata, “Thâtih cha noh hropa liata chho lah vâ chi, abei sawchapawpa cha a thi hawpa vâta, atanoh la thâtih khâpa hmah kei chho khâ,” tah ta.
21 Chatanachata Zôaba chata Kusa chyhsa hnohta, “Sie la, na hmo hmôpa cha abeipa kei chho teh,” tah ta. Kusa chyhsa chata Zôaba cha a bôhpa ta a naoh ta, a râ haw ta.
22 Chatanachata Zadôka sawchapawpa Ahimaza chata Zôaba hnohta, “Khâparai châ sala Kusa chyhsa kha ei kei chadai aw,” tah ta. Chatawhcha Zôaba chata, “Ei sawchapawpa y, thâtih chhona ty hmô tlôh lei khâh aw chi ta, khazia e nâ chadai aw?” tah ta.
23 Châhrasala ano chata, “Khâparai châ sala ei chadai aw na,” tah ta. Chatawhcha ano chata a hnohta, “A râ thlâh ha teh,” tah ta. Chatanachata Ahimaza chata bypi lâ lâpi lâna chata a râ ta, Kusa chyhsa cha chhao ta.
24 Chatanachata Davi cha kuh chhikao chhâh likawh liana chata a tyuh ta; riahvaihtuhpa cha kuh chhikao khôtho lâ tahpa chô lâna chata khy ta, mohmia pasaih ta, chyhsa pakha ano deita ta a vaw râ ta.
25 Chatawhcha riahvaihtuhpa cha aw ta, abeipa cha chho ta. Abeipa chata, “Chyhsa pakha dei a châ khiahtala thâtih vaw reih awpa a hnei aw,” tah ta. Chatawhcha a vy parah ta, a vaw hnia lymâ ta.
26 Riahvaihtuhpa chata chyhsa hropa a vaw râpa hmô heih ta; chatawhcha riahvaihtuhpa chata ochhi vaihtuhpa aw ta, “Moh teh, chyhsa hropa ano deita ta a vaw râ heih!” tah ta. Abeipa chata, “Ano chhao chata thâtih a vaw tlôkhei awpa a châ chu,” tah ta.
27 Chatawhcha riahvaihtuhpa chata, “A hmiatuapa a râna zie cha Zadôka sawchapawpa Ahimaza a râna zie a lyu kawpa ta ei pahno,” tah ta. Abeipa chata, “Ano cha chyhsa pha ngaitapa châ ta, thâtih pha a vaw tlôkheipa a châ aw,” tah ta.
28 Ahimaza chata aw ta, abeipa hnohta, “A pha khai na,” tah ta. Chatawhcha a hmia alei lâ a khupa ta abeipa hmiakô liata a naohpa ta a bôh ta, “Abeipa ei zibeipa adyuh a chhuahpa ta ku pathla a chhuahtuhpa zy a pakhâtuhpa ABEIPA na Khazohpa cha reithaipa ta y mawh sy,” tah ta.
29 Chatawhcha abeipa chata, “Satliapa Absalaw cha a tlâh bao ma?” tah ta. Ahimaza chata a chhy ta, “Zôaba ta abeipa chakaotuhpa kei na chakaotuhpa tlaina he eina tuah no ta amâ tymâ ngaitapa hmô na ta, châhrasala khâpa ma tahpa deikua cha pahno va na,” tah ta.
30 Chatawhcha abeipa chata, “Ei kâ lâ a vaw duah chy teh,” tah ta. Chatawhcha a kâ lâ a vaw duah ta.
31 Chatawhcha Kusa chyhsa cha vaw tlô ta; Kusa chyhsa chata, “Abeipa ei zibeipa chata thâtih ei vaw tlôkhei! Na chô liata a typa sahlao zydua phuh cha atanoh he ABEIPA ta a cha lapa haw,” tah ta.
32 Abeipa chata Kusa chyhsa hnohta, “Satliapa Absalaw cha a tlâh bao ma?” tah ta. Kusa chyhsa chata a chhy ta, “Abeipa ei zibeipa khakhaipa zy nata na chhiena a tluatuhpa zydua cha cha satliapa hawhna chata y khai mawh sy,” tah ta.
33 Chatanachata abeipa cha a nôpo kaw ta, kuh chhikao chô lâ chhôhpadâhpa lâta khy ta cha ta; a khy nona chata, “Hy ei sawchapawpa Absalaw y! Na vyuhpa ta tlao ei thi thlâh ha awpa tlai! Hy Absalaw, ei sawchapawpa, ei sawchapawpa y!” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 |