Absalaw ta Davi a dyuhna
1 Cha hmozy hnôh lâna chata Absalaw chata talaili nata arâ zy nata chyhsa sypangawh a hmiakô lâta a râ awpa ta a chhuahnoh ta.
2 Absalaw cha mydi ta thyu ta, kuh ochhi liana chata a vaw duah tyh ta; abeipa lâta biepeipa vaw reih awpa maih cha Absalaw chata aw ta, “Khataih khihpa na châ?” vaw tah tyh ta. Chatawhcha âmo ta, “Na chakaotuhpa he Izarel phozy hry liatahpa pho kha ei châ,” tah lymâ ei ta.
3 Absalaw chata, “Na bie cha pha ta, a do ta, châhrasala a pachâtuh awpa ta abeipa ta ahyhmah rao vei,” vaw tah tyh ta.
4 Absalaw lilaw chata, “Chyhsa to biepeipa reih awpa a hneipa tlyma, hiah awpa a hneipa tlyma maih cha kei lâta amâ vy awpa ta kei he he râh ryureituhpa ta na tao sala ei tah kaw dia! Chatanachata a sia ngaitapa ta ei reipa tyh awpa tlai,” vaw tah tyh hra ta.
5 Ahyrai ano a naoh awpa ta a vaw hniapa maih cha paza ta, patu ta, sy tyh ta.
6 Chatanachata Izarel chyhsa abeipa lâta bie reih awpa ta a vypa maih cha Absalaw chata cha hawhta vaw tao lymâ ta; Absalaw chata Izarel mozy pathipalôh cha sy ta.
7 Chatawhcha kô palih a tloh nahta Absalaw chata abeipa hnohta, “Hebraw khih lâta ABEIPA lâta ei bietai patlô nawpa ta na pasiesa teh.
8 Na chakaotuhpa heta Suria râh liata Keshu liata ei y nona khata, ‘ABEIPA ta Zerusale lâ einâ chhi tlai khiahtala ABEIPA ei chakao aw,’ tahpa ta bie ei vaw taih haw,” tah ta.
9 Abeipa chata a hnohta, “Thlahlôh ngaitapa ta sie teh,” tah ta. Chatanachata thyu ta, Hebraw lâna chata sie ta.
10 Absalaw deikua chata, “Chiahmie pyu nama thei pata nahta, ‘Absalaw cha Hebraw liata abei a châ,’ tah muh vy,” tahpa ta Izarel pho zydua lâta a ru lâta chyhsa tuah ta.
11 Absalaw lâna chata a chyhsa hruapa chyhsa za no Zerusale tawhta vawh hra ei ta, palôhrupa pha ngaitapa phaohpa ta vawh ei ta, khâpahmah ta pahno veih ei.
12 Chatawhcha Absalaw chata atheihna zy cha a hlâ nota Kilô mo Ahithôphel Davi ryureilâhpa cha a khih Kilô tawhtapa bie tah ta. Ama bie paraopa cha a ru ngaitapa châ ta, Absalaw lâna chata zawpi zy cha tha patlô ei ta.
13 Chatawhcha Davi hnohna chata, “Izarel mozy palôhrupa cha Absalaw lâta â heih kaw,” tahpa ta chyhsa a vy ta.
14 Davi chata ano hnohta Zerusale liata a chakaotuhpa a ypa zydua hnohna chata, “Thyu ula, a râ ei suh u; ahyhmah Absalaw tawhna heta pua thei tlôh lei khâh aw pi ta; pua parah teh u, cha leipa ta la a chadaipa ta maniah vaw pha aw ta, eima chô liana heta hmo pha leipa patlôsa aw ta, zaozi ta khih a vaw dyuh pathlei aw na,” tah ta.
15 Chatawhcha abeipa chakaotuhpa zy chata abeipa hnohta, “Na chakaotuhpa zy he eima zibeipa abeipa ta a raopa maih tao awpa ta eimâ mâ thlâh ha na,” tah ei ta.
16 Chatawhcha abeipa chata o a hâ awpa ta chanô pahrawh, nôtho zy cha soh ta.
17 Chatawhcha abeipa cha pua ta, zawpi zydua chata zi ei ta; o chhâh no liata a pahâ ei ta.
18 Chatawhcha a chyhsa zydua chata siepakhô ei ta; Khere mo zydua zy, Pele mo zydua zy, Kiti mo zydua zy, chyhsa za charu Katha tawhta ano a vaw zituhpa zy chata abeipa cha a baichhâ lymâ ei ta.
19 Chatanachata abeipa chata Kiti chyhsa Itai hnohna chata, ”Kheihta zie ta e, nâ he na vaw sie hra? Kua la, abeipa hnohta y teh; nâma cha khichhaipa râh hropa chyhsa châ tlôh chi ta, na yna su lâ kua heih teh.
20 Azâhia deita a vypa châ tlôh chi ta, atanoh he eima hnohta chhutla chakhâ maniah a zi awpa ta ei tah awpa na châ ma? Ei sie theina lâta sie aw na ta. Nâ cha kua la, na unawhpa zydua he a chhi teh; ngiachhiena nata hmeihseihna na hnohta y mawh sy,” tah ta.
21 Châhrasala Itai chata abeipa cha a chhy ta. “ABEIPA hrona nata abeipa ei zibeipa hrona reipa ta ei reih, abeipa he na yna liana maihta cha thipa khiahtala thi aw na ta, hrohpa khiahta hrohpa châ aw ta, na chakaotuhpa he a y lymâ aw,” tah ta.
22 Chatawhcha Davi chata Itai hnohta, “Sie ula, sie lymâ teh u,” tah ta. Chatawhcha Kiti chyhsa Itai cha a chyhsa zydua nata ama sawnawh zydua chhaota sie ei ta.
23 Chatawhcha a râh dua ta ao tlili ta cha ei ta, zawpizy cha sie khai ei ta, râhpathohpa lâpi lâ pangaipa ta, abeipa chhao cha Kidraw chavah chaka ta, zawpi zydua chata chaka hra ei ta.
24 Chatawhcha Zadôka zy, Khazohpa Biehraina Byh a sypa ta Livai sahlao zydua chhaota, ano hnohta sie hra ei ta; Khazohpa By cha pachhô ei ta, zawpi ta khih cha ama puasai khai na taihta Abiatha cha y chy ta.
25 Chatawhcha abeipa chata Zadôka hnohta, “Khazohpa By cha khihpi chho lâta a sy heih teh u. ABEIPA modypa ta ei y khiahtala na Chhihtha heih aw ta. Khazohpa Byh nata a yna cha na pahmôsa heih aw ta,
26 anodeikuacha, ‘Nâma liata a lyna rai hnei va na,’ a tah khiahtala, he hawhna dei he châ na ta, a pha a tahpa hawhta ei chô liata tao se,” tah ta.
27 Abeipa chata theihthaipa Zadôka hnohta, “Hmô theituhpa châ va chi mâ? Na sawchapawpa pano, na sawchapawpa Ahimaza nata Abiatha sawchapaw Zawnatha chhaota thlahlôh ngaitapa ta khihpi lâ a di teh u.
28 Kei cha thâtih eina pahnosa hlâ lei cha cha râhpathohpa liata chavah kiah zy liana heta ei vaw y aw,” tah ta.
29 Chatanachata Zadôka nata Abiatha chata Khazohpa Byh cha Zerusale lâta siekhei heih ei ta, cha liana chata y haw ei ta.
30 Châhrasala Davi cha Ôli Tlâh khyna lâna chata khy ta, a khy nona chata cha lymâ ta, a luh a khu ta, a phei a ky leipa ta sie ta, a hnohta chyhsa zydua chata ama luh a khu chyu ei ta, cha lymâna chôta khy ei ta.
31 Chatawhcha ahyzy tlyma ta Davi cha, “Ahithôphel cha Absalaw chhâh a châpa ta a siehnaotuhpa zy hry liata â hlao hra,” tahpa ta chho ei ta, Davi chata, “Hy ABEIPA y, Ahithôphel aryhna a raopa cha hruna lâta pachâsa awpa ta ei châ haw na,” tah ta.
32 Davi cha Khazohpa achhyna tlâh laki a tlô nahta, Arakhi chyhsa Husai cha a viahpakao a hripa a kypa ta, a luh liata alei a hlaopa ta ano dy awpa ta a vy ta.
33 Davi chata a hnohta, “Ei hnohta na vaw sie hra khiahtala ei châta phaohripa châ aw chi ta.
34 Châhrasala vawh la, Absalaw hnohta, ‘Hy beipa y, na chakaotuhpa ta ei y aw; cha hlâta na paw chakaotuhpa ta ei ypa hawhna khata atahmâ he nâma chakaotuhpa ta tlao ei y aw na,’ na kei tah khiahta deikua cha Ahithôphel aryhna raopa na pakhâtuhpa tlao na châ aw.
35 Cha liana chata na hnohta theihthaipa Zadôka nata Abiatha chhao y hra veih ei ma? Chatanachata abei o liata bie a puapa na pahnopa maih cha theihthaipa Zadôka nata Abiatha chho tyh aw chi ta.
36 Pachâ teh, ama sawchapawpa zy pano Zadôka sawchapawpa Ahimaza nata Abiatha sawchapawpa Zawnatha chhao ama hnohta ama ypa kha; chatawhcha na hmô theipa maih cha na pahnosa awpa ta âmo cha na vaw tao tyh aw,” tah tyh.
37 Chatanachata Davi viasa Husai cha khihpi liana chata a ngia ta, Absalaw cha Zerusale liata a ngia haw ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 |