2 Samuel Bo 21
Kilia mozy viarithôna
1 Davi hro nota a kô zaopa ta kô thôh chakâhna tlô ta; Davi chata ABEIPA a chhohia ta. ABEIPA chata, ‘Sawla vâta nata a chhôhkha zy thisaih a palosatuhpa zy vâta a châ, Kibia mozy thie tlôh ta,” tah ta.
2 Chatawhcha abei chata Kibia mozy aw ta. Ama hnohta, ‘Kibia mozy cha Izarel pathlazy châ leipa ei ta, Amawri mo laibâhpa zy kha tlao châ ei ta. Izarel pathlazy chata âmo liata chhie vaw sa haw ei ta. Sawla ta Izarel pathlazy nata Zudah pathlazy chata phahnai a khohpa vâta thie a chhuah tyhpa a châ.
3 Davi chata Kibia mozy hnohta, “Nâma châta khâpa e ei tao aw? ABEIPA ryu cha byhnâ nama aw thei nawpa ta kheihawhta a ryhna e ei tao aw?” tah ta.
4 Kibia mozy chata a hnohta, “Sawla nata a chhôhkha zy chhaota eima kyh liana heta tâkâ nata ngôh lâ kyh châ leipa ta; Izarel hry liana heta chyhsa thie theina hnei hra ma pi,” tah ei ta. Ano chata, “Nama reipa maih cha ei cha taopa aw ei,” tah ta.
5 Âmo chata abei hnohta, “Maniah pahleipadiatuhpa nata Izarel râh chhôh liata rai y leipa ta pahleipadia awpa ta maniah a teituhpa cha,
6 a sawchapawpa pasari zy maniah pie la, ABEIPA chyhsa zy raopa Sawla yna Kibia liana chata ABEIPA hmiakô liata eima bangie aw,” tah ei ta. Chatawhcha abei chata, “Âmo ei cha pie aw,” tah ta.
7 Châhrasala abei chata ABEIPA hnohta Davi nata Sawla sawchapawpa Zawnatha likawh ta, ama pho likawh ta chhiesana vâta Sawla sawchapawpa Zawnatha sawchapawpa Mephibôse cha paboh ta.
8 Abei chata Aiah sawchanônô Rizpah, Sawla sawchapawpa pano a sapa, Amôni nata Mephibôse deikua cha a chhi ta; chatawhcha Mehôla chyhsa Barzilai sawchapawpa Adriel, Sawla sawchanônô Meraba sawchapawpa papangawh a sapa zy chhaota;
9 Kibia mozy ku liata pie ta, âmo chata ABEIPA hmiakô liata tlâh liata bangie ei ta, ama pasari chata hmaohkha ta thi ei ta. Sâh hria daihti bali sâh hria a thao no rachhôh ta thie ei ta.
10 Chatawhcha Aiah sawchanônô Rizpah chata latho poh la ta, sâh hria tua no tawhtapa avâ tawhta vâkatlâh a vaw suana taihta a y nawpa ta lôpanô chô liata poh rai ta; ama chô liata nohchhô ta avâ pavaw zy a chohpa nata zâ ta lyurâhpa sazy ama ypa cha pasaih leipa ta.
11 Sawla nôtho, Aiah sawchanônô Rizpah hmotaopa cha Davi chho ei ta,
12 Davi cha sie ta, Philistina mozy ta Kilbô liata Sawla ama thie nota Philistina mozy ta Besa bypi liah liata ama bangiepa a parutuhpa Zabeskilia mozy tawhtapa Sawla rupa nata a sawchapawpa Zawnatha rupa zy cha khykhei ta;
13 Sawla nata a sawchapawpa Zawnatha rupa cha pakhy ei ta.
14 Chatawhcha Sawla rupa zy nata a sawchapawpa Zawnatha rupa zy cha Benzami râh liata Zelah khih liata a paw Kisa thlâ liata pabu ei ta; chatawhcha abeipa biepiepa lymâ hawhta tao ei ta. Cha hnôh lâna chata cha râh chô liata Khazohpa a palôh tlâh haw ta.
Abisai ta mo pahreipa tawhta Davi a pachhana
15 Philistina mozy chata Izarel mozy cha a dyuh heih ei ta, Davi cha a chyhsa zy chhaota zu ei ta, Philistina mozy cha a zâ dyuh ei ta, Davi cha a tha chhâ kaw ta.
16 Chatawhcha Isabibenô mo pahreipa sawchapawpa zy hry liatahpa, a asei a hrina lâ dawh sekel za thôh, zaozi thiehpa a vaopa chata Davi cha thie a chhuah ta.
17 Châhrasala Zeruia sawchapawpa Abisai ta pachha ta, Philistina mo a dyuh ta, thie haw ta. Chatawhcha Davi chyhsa zy chata, “Izarel meiôh na pachhai lei nawpa ta a dyuh awpa ta eima hnohta pua khao cheita aw va chi,” tahpa ta a chô liata chhie sa ei ta.
Davi chakaotuhpa zy ta mo pahreipa zy ama thie(1Tr 20:4-8)
18 Cha hnôh lâna chata Philistina mozy nata Kôba khih liata adyuhna y heih ta; chatanachata Husa chyhsa Sibekai chata mo pahreipa sawchapawpa zy hry liata Sapha thie ta.
19 Philistina mozy nata Kôba khih liata adyuh heih ei ta, Bethlehe chyhsa Kôliatha thie ta, a asei bi cha thaisana bâtlâh hawhta a châ.
20 Chatawhcha Katha khih liata adyuhna y heih ta, cha liana chata chyhsa doh seih ngaitapa, a ku chavei chachâh paroh miacharu, a phei chavei chachâh paroh miacharu, a zydua ta syno nata sâpalih a hneipa y ta; ano chhao chyhsa pahreihpa liata a pihpa a châ.
21 Chatawhcha Izarel mozy cha kei pahao ta, Davi unawhpa Shimei sawchapawpa Zawnatha chata thie ta.
22 Cha papalih zy cha Katha khih liata mo pahreipa liata a pihpa châ ei ta; chazy cha Davi nata a chyhsa zy ku ta thi ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 |