Ryureihtuhpazy Bo 1

RYUREITUHPAZY CHÂBU

Ryureihtuhpazy Bo 1

Zudah nata Simeôna ta Adônibeze ama patuzie

1 Zawsua a thi tawhna cha Izarel pathlazy chata, Kana mozy cha adyuhpa ta eima châta adyuh awpa ta ahyma a sie tua aw tly?” tahpa ta ABEIPA cha a chhohia ei ta.

2 ABEIPA chata, “Zudah sie mawh sy; a ku liata râh cha ei pie haw,” tah ta. 

3 Zudah ta a unawhpa Simeôna hnohta, “Kana mozy adyuh awpa ta ei râh tovyuh liana heta a khy hra teh; kei chhao na râh tovyuh liata ei vy hra aw,” tah ta. Chatanachata Simeôna cha a hnohta sie haw hra ta.

4 Chatawhcha Zudah cha khy ta, Kana mozy nata Periza mozy cha ABEIPA ta ama ku liata pie haw ta; Beze khih liata chyhsa thy kha thie ei ta.

5 Beze khih liana chata Adônibeze hmô ei ta, adyuh ei ta, Kana mozy nata Periza mozy cha thata thie ei ta.

6 Adônibeze deikua cha a râ ta; a chadai ei ta, patu ei ta, a kupi zy nata a pheizy taipa ei ta.

7 Adônibeze chata, “Abei sysari kupi nata pheipi taipa zy chata ei tlâhkhai ry liata a zôpa a hua tyh ei ta; ei taopa haw tlaita Khazohpa ta viari eina thô he zaw,” tah ta. Chatawhcha Zerusale khih lâta a chhi ei ta, cha liana chata thi haw ta.

Zudah ta Zerusale nata Hebraw a pahniena

8 Zudah pathlazy chata Zerusale khih adyuh ei ta, la ei ta, zaozi ta chhawsao ei ta, khihpi cha mei ta rao ei ta. 

9 Cha hnôh lâna chata Zudah pathlazy cha Kana mo tlâh râh liata a ypa zy, Neke lâta a ypa zy, bypi liata a ypa zy cha adyuh awpa ta zu ei ta.

10 Zudah chata Kana mo Hebraw khih liata a ypa zy cha siehnao ta, (cha hlâta cha Hebraw khih mo cha, Kiriatharaba a châ); chatanachata Sheshai zy, Ahima zy, Talmai zy thie ei ta.

Ôthaniel ta Debi liata Aksah lahpinô châta â la(Zs 15:15-19)

11 Cha tawhna chata Debi khih liata a ypa zy cha a dyuh ta, cha hlâta cha Debi khih mo cha Kiriasepha a châ.

12 Kaleba cha, “Ahyrai Kiriasepha khih cha a dyuhpa ta a lapa cha, ei sawchanônô Aksah lahpinô ta ei pahneisa aw,” tah ta.

13 Kaleba nawhta Kenaza sawchapawpa Ôthaniel ta la ha ta. Chatanachata a sawchanônô Aksah cha lahpinô ta pahneisa ta.

14 Chatawhcha a hnohta a tlô nahta, a paw cha râh hia awpa ta reipasao ta; a alâ tawhtapa cha chô ta, Kaleba chata a hnohta, “Khâpa e na khoh,” vaw tah ta.

15 Chatawhcha ano chata a hnohta, “Byhnâ na aw pa teh; Neke râh liana chata na paysa haw tlôh chi ta, tihnawh a hneipa zy na pi hra mah y” tah ta. Chatanachata Kaleba chata tihnawh a hneipa machhua lâ tahpa zy nata tihnawh a hneipa mathi lâ tahpa zy châ pi ta.

Zudah nata Benzami râh lapa kawh zie

16 Mawsi puhpa Kani mo pathlazy cha Arada, Neke lâta Zudah râhpathohpa liana chata Zudah pathlazy chhaota thiahra khihpi tawhtapa cha khy ei ta; ama hry liata pahrâ ei ta.

17 Zudah cha a unawhpa Simeôna nata pua ei ta, Zepha khih liata a ypa Kana mo cha thie ei ta, pamo khai ei ta. Cha khihpi moh cha Hôma ama tah.

18 Zudah chata Kaza khih a râh rakha chhaota, Askelaw khih a râh rakha chhaota, Ekrôna khih a râh rakha chhaota la hra ta.

19 ABEIPA cha Zudah hnohta y ta, chatanachata tlâh râh liata a pahrâpa zy cha papua khai ta, saikao liata a pahrâpa zy deikua cha thua talaili zy ama hneipa vâta papua thei vei.

20 Mawsi ta a vaw rei hawpa hawhta Hebraw khih cha Kaleba pie ei ta; cha liatahpa Anaki sawchapawpa zy pathôh cha papua ta.

21 Benzami pathlazy chata Zebu mo, Zerusale khih liata a ypa zy cha papua veih ei; Zebu mozy cha Benzami pathlazy nata he no taih heta Zerusale liata hmaohkha ta ama pahrâ.

Zawsi ta Bethel a tiah

22 Zawsi chhôhkha zy chhao cha Bethel khih adyuh awpa ta pua hra ei ta; ama hnohta ABEIPA y ta.

23 Zawsi chhôhkha zy chata Bethel lâna chata mohparutuhpa zy tuah ei ta, (Cha hlâta cha cha khi moh cha Luza a châ).

24 Chatawhcha mohparutuhpa zy chata chyhsa pakha khih chhôh tawhta a vaw puapa hmô ei ta, a hnohta,Ngiachhiepa ta khih chhôh angiana maniah pamosa teh, chatanachata a phapata ta eima cha tah aw,” tah ei ta.

25 Chatawhcha khihpi chhôh a ngiana cha pamosa ta; zaozi ta cha khih cha adyuh ei ta, cha chyhsa nata a chhôhkha zydua deikua cha pahlôh ei ta.

26 Cha chyhsa cha Hiti mo rah liata a ngia ta, khih tao ta, cha khih moh cha Luza bi ta; atanoh taihta cha moh cha a phaoh.

Manase nata Ephrai râh lapa kawh zie

27 Manase ta Beshia khih nata a khichapei liata a ypa zy, Tanakha khih nata a khichapei liata a ypa zy, Dôra khih nata a khichapei liata a ypa zy, Iblia khih nata a khichapei liata a ypa zy, Mekidô khih nata a khichapei liata a ypa zy cha papua vei; cha râh liana chata Kana mozy deikua cha, y thlâh haw ei ta.

28 Chatawhcha Izarel pathlazy cha ama tha a tlô via rili tawhna chata Kana mozy cha raihriatuhpa châta paysa ei ta, papua khai veih ei.

29 Ephrai chata Keza khih liata Kana mo a ypa zy cha papua vei, Kana mo cha Keza khih liana chata ama hry liata tlao ama pahrâ.

Pho hropa zy râh lapa kawh zie

30 Zebulawna chata Kitraw khih liata a ypa zy, Nahalô khih liata a ypa zy cha papua vei; Kana mo cha ama hry liata pahrâ hra ei ta, raihriatuhpa châta tlao ama y.

31 Asera chata Akô khih liata a ypa zy, Sidaw khih liata a ypa zy, Ahila khih liata a ypa zy, Akazi khih liata a ypa zy, Helbah khih liata a ypa zy, Aphika khih liata a ypa zy, Rehô khih liata a ypa zy cha papua vei.

32 Asera pathlazy cha cha râh liata a ypa Kana mozy hry liana chata tlao ama pahrâ hra, âmo chata papua veih ei.

33 Nathalai chata Besheme khih liata a ypa zy, Bethana khih liata a ypa zy cha papua vei, cha râh liata a ypa Kana mozy hry liana chata tlao ama pahrâ hra; anodeikuacha Besheme khih liata a ypa zy nata Bethana khih liata a ypa zy cha raihriatuhpa châta ama y.

34 Amawri mo chata Dana pathlazy cha tlâh râh lâta papua ei ta, saikao lâta ama chô awpa pasai tlôh leipa ei ta;

35 Amawri mo deikua cha Harhera tlâh liata zy, Aizalô khih liata zy, Shaalbi khih liata zy y thlâh haw ei ta, châhrasala Zawsi chhôhkhapa zy ku cha thatlôpa ta châ ta, ama raihriatuhpa châta ama y haw.

36 Amawri mo râh râhri cha Akrabi khyna nata Sela tawhta khy lymâ ta. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 2

Ryureihtuhpazy Bo 2

Bôkhi liata Abeipa vâlyuhchâpa

1 ABEIPA vâlyuhchâpa cha Kilkal khih tawhta Bôkhi khih lâta khy ta. Ano chata. “Izi râh tawhtapa kha cha papua ei na ta, nama pathlatuhpa zy hnohta chhiesapa ta ei taih hawpa râh liana khata cha pangiasa ei na ta, nama hnohta, ‘Bie ei hraihpa kha parao chachei aw va na.

2 he râh liata a ypa zy nata bie hraih khah u; ama maisâh zy parao pa muh vy,’ tah na ta. Chârasala ei biepiepa a pyh leipa eichi ta. Khâpa vâta e, he hawhta nama tao?

3 Nama kâ zy liata ahloh hawhta tlao châ aw ei ta, ama khazohpa cha nama châta khohei ama châ aw, ei tah hra khâ,” tah ta.

4 ABEIPA vâlyuhchâpa ta Izarel pathla zydua hnohta cha biezy cha a rei nahta, zawpi sahlao cha ao tlili tlai ta cha chyu ei ta, cha liana chata ABEIPA lâta atheih ei ta.

Zawsua thina

6 Zawsua ta zawpi zy a papaisa tawhna chata Izarel pathlazy cha chyhsa to âmo tovyuh chyu râh cha pahrâ awpa ta sie haw ei ta.

7 Zawsua hro chhôh chata zawpi zy ta ABEIPA chakao tyh ei ta.

8 Nuna sawchapawpa Zawsua ABEIPA chakaotuhpa cha kô za kha nata ko hrawh a châ nahta thi ta.

9 Kasa tlâh maw lâchhâh Ephrai tlâh râh liata ano tovyuh râhri chhôh Timnahere khih liana chata pabu ei ta.

10 Cha chhâ zydua chhao cha ama pathlatuhpa zy lâta pahmaoh pakhypa ta y khai haw ei ta; cha chyhsa zy hnôh lâna chata ABEIPA nata Izarel zy chata a hmotaopa zy chhao a pahno leipa chhâ hropa vaw y haw ei ta.

Izarel paosaina nata ryureituhpa zy chakaona.

11 Izarel pathlazy chata ABEIPA mohmô liata hmo moleipa tao ei ta, Baal sahlao zy chakao haw ei ta;

12 ABEIPA ama pathlatuhpa zy Khazohpa Izi râh tawhta a chhihthatuhpa kha a heisai ei ta; khazoh hropa ama chheipâh liata a ypa sahlao khazoh zy hry liatahpa cha zi ei ta, a naoh haw ei ta; chatanachata ABEIPA cha a pathi pa-ia haw ei ta,

13 ABEIPA cha a heisai ei ta, Baal nata Astarô chakao ei ta.

14 Chatanachata Izarel zy chô liata ABEIPA pathi cha ia ta, âmo a hrao tyh tuhpa zy ku liana chata pie haw ta, âmo ta hrao ei ta, ama khakhaipa ama chheipâh liata a ypa zy hnohna chata zuah ta, chatanachata ama khakhaipa zy cha pahnie khao leipa ei ta.

15 Khataih lâ rai sie ei sala ABEIPA ku cha ama chô liata a chhiena lâta tla lymâ ta, ABEIPA ta ama hnohta chhiesapa ta a vaw rei hawpa hawhta nôpo ngaitapa ta y ei ta.

16 Chatawhcha ABEIPA ta ryureituhpa zy tao pa ta, chazy chata âmo a hraotuhpa zy ku tawhtapa cha vaw pachha haw ei ta.

17 Chata chôna chhaota ama ryureituhpa zy bie cha a pyh leipa ei ta; khazoh hropa zy liana chata aphei ei ta, tlao a vaw naoh haw ei ta; ama pathlatuhpa zy ta ABEIPA biepiepa zy a pyhpa ta amâ chhih tyhpa lâpi cha thlai tleisai ei ta.

18 ABEIPA ta ryureituhpa zy a vaw taopa nona chata ABEIPA cha ryureituhpa hnohta y ta, ryureituhpa hro chhôh liana chata ama khakhaipa zy ku tawhtapa cha pachha lymâ ta; âmo pasaipa-ipa nata nô papotuhpa zy vâta a hrô ei ta, chavâta ABEIPA cha a ngiapachhi haw ta.

19 Châhrasala ryureituhpa cha a thipata nahta hnôh lâ a sy haw heih ei ta, khazoh hropa zy chakaopa ta a naohna kyh liata ama pathlazy hlâta a chhie viapa ta y haw ei ta; ama hmotao tyhpa zy nata ama chhoruna zy chhao pathlei veih ei.

20 Chatawhcha ABEIPA cha Izarel zy chô liata a pathi-ia ta, “He phozy heta ama pathlatuhpa zy bie ei piepa, ei biehrai cha parao ei ta, ei bie a ngiah tlôh leipa ei ta,

21 kei chhaota atahmâ tawhta la Zawsua thi hlâta papua bâhpa phozy he papuapa khao aw va na, 22 ama pathlatuhpa zy â chhipa hawhna khata ABEIPA ryhpa amâ chhih aw ma, a chhih vei aw ma, tahpa Izarel sahlao zy pasia nawpa ta âmo cha ei hmâh aw,” tah ta.

23 Chatanachata ABEIPA ta cha phozy cha thlai papua leipa ta paysa haw ta, Zawsua ku liata chhao pie hra vei. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 3

Ryureihtuhpazy Bo 3

Izarel pasia nawpa ta phopi zy siesaipa

1 He phozy he ABEIPA ta Izarel zy Kana râh liata chariah adyuh beih leipa pasia nawpa ta a paysapa zy cha ama châ;

2 cha Izarel pathla chhâ sahlao, cha hlâta khâpahmah a pahno beih leipa zy chata ama pahno nawpa ta nata chariah adyuhna yzie pachu nawpa deita ta paysapa ama châ. Chazy cha Philistina mo abei papangawh Kana mo zydua, Sidaw mozy, Lebanaw tlâh liata a ypa Hivi mozy ama châ, Baalhamaw tlâh tawhta Hama khih a ngiana taihta.

4 ABEIPA ta Mawsi hmâpa ta ama pathlazy bi a vaw piepa zy kha, amâ ngiah nata ngiah lei pahno nawpa ta cha sahlao cha Izarel zy pasia nawpa ta ama châ.

5 Chatawhcha Izarel pathlazy cha Kana mozy, Hiti mozy, Amawri mozy, Periza mozy, Hivi mozy, Zebu mozy hry liana chata y ei ta;

6 ama sawchanô zy cha lahpinô ta hnei ei ta, ama sawchanô zy cha ama sawchapawpa zy pahneisa ei ta; ama khazoh zy chakao ei ta.

Kusarisathai ku tawhta Ôthaniel ta Izarel a pachha

7 Izarel pathlazy chata ABEIPA mohmô ta, hmo moleipa tao haw ei ta, ABEIPA ama Khazohpa cha my ei ta, Baal nata Astarô a chhy ei ta.

8 Chavâta ABEIPA pathi cha Izarel zy chô liana chata ia haw ta, Mesôpôtamia râh abeipa Kusarisathai lâta zuah haw ta; Izarel pathlazy cha Kusarisathai bie ry liata kô charie y ei ta.

9 Chatawhcha Izarel pathlazy chata ABEIPA ama pado pata nahta ABEIPA ta Izarel pathlazy pachhatuhpa vaw taopa ta, cha chata vaw pachha haw ta, cha cha Kaleba nawhta Kenaza sawchapawpa Ôthaniel a châ.

10 ABEIPA Thlahpa cha a chô liata vaw tlô ta, Izarel zy ryureipa ta; chariah adyuh awpa ta pua ta, ABEIPA ta Mesôpôtamia râh abeipa Kusarisathai cha pie ta; Kusarisathai cha pahnie haw ta.

11 Chatawhcha râh cha kô sypalih thlalôhpa ta y ta. Chatawhcha Kenaza sawchapawpa Ôthaniel cha thi haw ta.

Môaba mo ku tawhta Ehu ta Izarel a pachha.

12 Izarel pathlazy chata ABEIPA mohmô ta hmo moleipa tao haw heih ei ta; ABEIPA mohmô liata hmo ama paraopa vâta ABEIPA ta Môaba beipa Eklaw cha Izarel zy liata thatlôpa ta tao ta.

13 Chatawhcha ano chata Amawna pathlazy nata Amale mozy pakhy ta, Izarel mozy cha adyuh ta, thiahra khihpi cha pahrâ haw ta.

14 Chatanachata Izarel pathlazy cha Môaba beipa Eklaw bie ry liata kô hrawhleicharie y ei ta.

15 Châhrasala Izarel pathlazy chata ABEIPA ama pado pata nahta, ABEIPA ta Kerai sawchapawpa Ehu, Benzami chyhsa chaveipa pachhatuhpa vaw tao pa ta. Izarel pathlazy chata Môaba beipa Eklaw pie awpa ta lymâ pacheisa ei ta.

16 Ehu chata zaozi tiah rairiepa dy kha a seihpa daih ta; cha cha a byhpi chachâh lâ poh ry liata a vao ta.

17 Môaba beipa Eklaw cha lymâ pie ta. Eklaw cha chyhsa thawh ngaitapa châ ta.

18 Chatawhcha lymâ a pie khai pata nahta, lymâ a chabatuhpa zy cha pasiesa heih ta.

19 Ano deikua cha Kilkal khih kiapâh ta alô daina su tawhta kua heih ta, “ABEIPA y, bieparu chho awpa ei cha hnei,” tah ta. Chatawhcha ano chata, “A chalih teh u,” tah ta. Chatanachata a kiapâh liata a duahpa zydua chata puasai khai haw ei ta.

20 Ehu cha ano cha a chhôhpadâhpa chakuapa liata ano deita ta a vaw tyuh ta, Ehu chata, “Khazohpa ta na hnohta reih awpa bie eina tah,” tah ta. Chatawhcha a dyuchhai tawhtapa cha thyu ta.

21 Ehu chata a ku chavei lâta a byhpi chachâh lâta zaozi cha phia ta, a py liata a chô ta;

22 a hâ chhao cha a pamôh haw ta, a zaozi cha a thawpa ta a pamai khâh ha ta, a py liata zaozi cha phia tlôh lei khâh ta; a hnôh lâta a chhipahlie.

23 Chatanachata Ehu cha aikah lâta pua ta, chhôhpadâhpa ochhi zy cha khawhlôh ta, khâchâ hrai ta.

24 A pua ha tawhna chata a chakaotuhpa zy cha a vy ei ta, ama hmô nah ta, chhôpadâhpa chhikao zy cha khâchâ a hrai haw ta, “A chhôpadâhpa chakuapa lâta a vaw ha chypa a châ,” tah ei ta.

25 Chatawhcha nozachhihna taihta hâ thlâh ha ei ta; chhôpadâhpa chhikao zy cha pahy khao leipa ta y ta, châhbi la ei ta, pahy ei ta; chatawhcha ama beipa cha siphiah liana chata a thipa ta a hluah thlâh ha ta.

26 Ehu hra cha, kha hawhta ama hâ thlâh ha chhôh khata a râ syulyu haw ta; alô daina su kha khô ta, Seira lâta a râ ta.

27 Cha su a tlô nahta Ephrai tlâh râh liata chiahmie tô ta, Izarel pathlazy chata tlâh râh tawhta ano lâta zu ei ta, ano chata âmo chhihtha ta.

28 Ano chata ama hnohta, “Na zi teh u; ABEIPA ta nama khakhaipa Môaba mozy he a cha pie haw ei,” tah ta. Chatanachata zi ei ta, Môaba râh daih lâ Zawdâh chakapa zy cha patu ei ta, ahyhmah chaka pasai leipa ei ta.

29 Cha nona chata Môaba mo thy kha tlai chyhsa thatlôpa nata riahphapa thie ei ta; pakha hmah ta a râpa y veih ei.

30 Cha nona chata Môaba mozy cha, Izarel mozy liata nawh haw ei ta, râh cha kô sycharie chhôh thlalôhpa ta y ta.

Philistina mo tawhta Shamaka ta Izarel a pachha

31 Cha hnôh lâna chata Anatha sawchapawpa Shamaka a vaw luah hra ta, cha chyhsa chata Philistina mo chyhsa za charu viahchao tona chôhchahrei ta dysao ta; ano chata Izarel mozy cha a pachha. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 4

Ryureihtuhpazy Bo 4

Debôrah nata Baraka ta Sisera ama pahniena

1 Ehu thi tawhna cha Izarel pathlazy chata ABEIPA mohmô ta hmo moleipa tao heih ei ta.

2 Hazaw khih a satuhpa Kana râh abei Zabi hnohna chata ABEIPA ta zuah haw ta; cha pheisaih hyutuh chaipa cha Sisera châ ta, Zenitai zy râh Harôse khih liata a ypa a châ.

3 Izarel pathlazy chata ABEIPA pado ei ta; ano chata thua talaili za chaki hnei tlôh ta, kô syno chhôh tlai Izarel pathlazy cha thata a pasaipa-i.

4 Cha nona chata hrohso nô Debôrah, Lapidô lahpinô cha Izarel zy ryu vaw reih ta.

5 Ephrai tlâh râh liata, Ramah nata Bethel khih likawh ta, Debôrah thiahra tho ry liata a tyuh ta, Izarel zawpi zy cha ryu a reipa tyh.

6 Kedesa Nathalai râh tawhtapa Abinôami sawchapawpa Baraka cha bie tah ta, a hnohta, “ABEIPA Izarel zy Khazohpa ta,’ Tabaw Tlâh lâta sie la, Nathalai pathlazy nata Zebulawna pathlazy chyhsa thy kha a chhi teh.

7 Chatanachata Kishaw chavah liata Zabi pheisaih hyutuhpa Sisera cha a talaili nata a sahlao zy chhaota vaw tuah aw na ta; ano cha na ku liata ei cha pie aw,’ tahpa ta bi a piepa châ vei mâ?” tah ta.

8 Baraka ta a hnohta, “Na sielâh hra la, ei sie aw; eina sielâh leipa chi khiahtala, sie aw va na,” tah ta.

9 Ano chata, “Ei cha sielâh tlai aw, anodeikuacha na siena liata moh phana to aw va chi, ABEIPA ta Sisera cha chanô ku liata a zuah aw na,” tah ta. Debôrah cha thyu ta, Baraka hnohta Kedesa khih lâna chata sie haw hra ta.

10 Baraka chata Zebulawna mo nata Nathalai mo cha Kedesa liata pahmaoh pakhy ta; chyhsa thy kha, ano chhaota sie ei ta; Debôrah chhao a hnohta sie hra ta.

11 Keni chyhsa Heba cha, Keni chyhsa Mawsi puhpa Hôba pathlazy hry tawhtapa â nano ta y ta, Kedesa kiapâh liata Zaanani râh liata oaka thothih kiapâh liata a poh-o parai ta.

12 Abinôami sawchapawpa Baraka cha Tabaw Tlâh lâta a khy tahpa Sisera chho ei ta,

13 a sahlao zy Zenitai zy râh Harôse khih tawhtapa Kishaw chavah liata pakhy chaimâh ta.

14 Debôrah chata Baraka hnohta, “Thyu teh, atanoh he, ABEIPA ta Sisera cha a cha piena noh a châ na, cha chhihthatuhpa cha ABEIPA châ vei mâ?” tah ta. Chatanachata Baraka cha Tabaw Tlâh tawhtapa chô ta, chyhsa thy kha ta zi ei ta.

15 ABEIPA ta Sisera nata a talaili zydua nata a pheisaih sahlao zydua cha zaozi ta Baraka hmiakô liana chata patypamâ ta; Sisera cha a talaili tawhta chô ta, a phei ta a râ syulyu haw ta.

16 Baraka deikua chata, talaili zy nata pheisaih sahlao cha Zenitai râh Harôse taihta a chadai ta, Sisera pheisaih sahlao zydua cha zaozi ta thie khai ei ta, pakha hmah a hrohpa y veih ei.

17 Sisera deikua cha Keni chyhsa Heba lahpinô Zael poh-o lâta a phei ta a râ ta; Hazaw beipa Zabi nata Keni chyhsa Heba chhôhkha zy cha adyh thlâh hapa châ ei ta.

18 Zael cha Sisera dy awpa ta pua ta, a hnohta, “Papuh, a vaw ngia teh, kei lâta a vaw ngia teh, chi khâ,” tah ta. Chatanachata poh-o chhôh lâna chata a hnohta a ngia ta, ano chata poh ta khu ta.

19 A hnohta, “Ngiachhiepata ta ti dopa bâh ta na pie tua; ei dâh a phi kaw na,” tah ta Chatawhcha sâhpiti ôh pahy ta, padosa ta, khu haw heih ta.

20 Chatawhcha a hnohta, Poh-o chhikao liata a duah la, ‘He liana heta chyhsa ama y ma,’ tahpa ta ama cha hiahri khiahtala, y vei’, tah lymâ mah y,” tah ta.

21 Chatanachata Heba lahpinô Zael chata, poh-o khaipâna la ta, syulô chaba ta, dusawta ta pangai ta, khaipâna chata a siali liata khai ta, pua pahli ta, alei liata a ngia ta, a tha chhâpa ta a mokuh pahâh kaw tlôh ta. Chatanachata thi haw ta.

22 Baraka ta Sisera a vaw chadaipa cha, kei dy a chhuahpa ta Zael cha pua ta, a hnohta, “A vy tua na chyhsa tluapa cha ei cha pamosa tua aw,” tah ta. Chatanachata a hnohta vawh ta, Sisera cha vaw thi thlâh ha ta, poh-o khaina cha a siali liata a chaloh thlâh ha ta.

23 Chatanachata Khazohpa ta cha nona chata Izarel pathlazy hmiakô liata Kana râh beipa Zabi cha panawhsa haw ta.

24 Izarel pathlazy chata Kana râh beipa Zabi cha pahnie rili haw ei ta, Kana râh beipa Zabi cha pahleipadiana taihta tao haw ei ta. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 5

Ryureihtuhpazy Bo 5

Debôrah nata Baraka hla

1 Chatanachata Debôrah nata Abinôami sawchapawpa Baraka chata, cha nona chata:

2 Hyutuhpa zy chata Izarel hry liata chhihtha ei ta, zawpizy chata thathyu ngaitapa ta ama vaw hlâ hih. ABEIPA cha reithai teh u!

3 “Hy nâmo abeizy saih u, nahthlie ula; hy nâmo hyutuhpa saih u, nah pachôh teh u, kei tlaita ABEIPA palyupalihpa ta hlasa aw na ta, ABEIPA Izarel zy Khazohpa reithaipa ta hla ei sa aw.

4 “ABEIPA, Seira tawhtapa nâ vy nahta, Edôma sibiepa su tawhtapa na vaw pua nona khata, alei cha a chalyu ngâ ta, avâ zy chhao vaw suah ta, amei zy cha avâ pasuasa ta.

5 Tlâh zy cha, ABEIPA hmiakô liata cho ta, Sinai tlâh taih chhao hao, ABEIPA Izarel zy Khazohpa hmiakô liana chata.

6 “Anatha sawchapawpa Shamaka hro nohzy nata, Zael hro noh zy khata, lâlaizy cha maoh kaw ta, khitlyhpa zy cha lâpi chakhypa zy liata sie tyh ei ta.

7 Izarel râh liata khihzy cha pahrâ leipa ta, rypa ta y ta, kei Debôrah thyu na ta, Izarel râh no he ei thyu hlâ lei kha cha,

8 Khazoh thiehpa zy patu ei ta, chatanacha kuh ochhi kiapâh liana zy khata adyuhna y ta, Izarel râh liata chyhsa thy palih tlai hry liana khata, vyhphao nata asei kha a ypa rai a y mâ?

9 Ei palôhrupa cha Izarel sahlao zy pachiatuhpa zawpi zy hnohta thathyu ngaitapa ta a piepa zy lâna cha a y. ABEIPA cha reithai teh u.

10 “Nâmo alâ râhpa chô a kiahpa zy saih u, nama poh phaw chha ngaitapa liata a tyuhpa saih u, nâmo lâpi liata a chareipa saih u, cha biezy cha phuah teh u.

11 Châtai a katuhpa zy pyu rai theileipa, ti thaina su liana chata ABEIPA hmo siapa taopa zy cha, ama rei ngâ aw. Izarel râh chô liata a hmo siapa taopa zy tlai cha. “Chatanachata ABEIPA zawpizy cha kuh ochhi lâna zy chata zu ei ta.

12 “A hra la, a hra la, Debôrah! A hra la, a hra la, hla sa teh! Thyu la, Baraka, nâ Abinôami sawchapaw, na patupa zy cha sei ta a chhi teh.

13 Chatanachata molaipa a y chhôhpazy nata zawpizy cha a zu ei ta; chyhsa thatlô ngaitapa nâ dyukhei awpa ta ABEIPA cha a za chô haw.

14 Amale liata thari a hneipa zy cha Ephrai tawhta za chô ta, Benzami, na chyhsa hry liatahpa zy ta, ama cha zi hih, Makhia tawhta râh pachiatuhpa zy a zu ei ta, Zebulawna tawhta châ rohtuhpa chôhchahrei chabatuhpa zy cha amâ zu;

15 Iskara molaipa zy cha Debôrah hnohta a hlao ei ta, Iskara hawhta Baraka chhao; saikao lâna chata ano nata zâ râ ei ta, Rubena mo ti lona zy lâna chata amâ chhuahpa pathipalôh thata y ta.

16 Khazia mietahkupa sahdô likawh liata nâ tyuh thlâh haw, mietahkupa zaw awna siaramo nahthlie awpa hawhta? Rubena mo ti lona zy liana chata pathipalôh pasiana thata a y.

17 Kilia mo cha Zawdâh haosâ ta y ei ta, Dana mozy cha khazia e balyh liata ama y thlâh haw? Asera mo cha tilaipi ngiakâ liata atyuh molo ei ta, ama lichakohpa liana chata ama y thlâh haw.

18 Zebulawna mo nata Nathalai mo he, sibiepa su a sâhpa liata thi riah a chi leipa ama châ.

19 Abeizy ta a vy ei ta, adyuh ei ta, Kana abeizy chata Mekidô ti kiapâh Tana khih liata adyuh ei ta, hraona sôh lapa rai hnei veih ei.

20 Avâ tawhta a vaw dyuh ei ta, awhsizy ta ama su tawhta, Sisera cha a vaw dyuh ei ta.

21 Kishaw ta âmo cha phaoh khai ta, hlâno Kishaw chata. Hy ei thlahpa, thatlô ngaitapa ta sie lymâ teh!

22 Chatanachata arâ zy cha a thluah ngâ ta, arâ chahrapa zy cha amâ zaw ngâpa vâta.

23 “Merô cha a chhie sapa teh u, ABEIPA vâlyuhchâpa ta a tah, cha liata a ypa zy cha thata chhiesa pa teh u, ABEIPA baopa ta amâ vy leipa vâta, ABEIPA ta chyhsa thatlô ngaitapa adyuhna liata bao awpa ta amâ vy leipa vâta.

24 “Chanô zydua hry liata Zael, Keni chyhsa, Heba lahpinô he, nohhlao chaipa a châ aw, chanô poh-o liata a pahrâpa sahlao zydua hry liana chata noh hlao chaipa a châ aw.

25 Ano chata ti vaw hiah, sâhpiti vaw pie ta, chyhsa phapa nyu ta sâhpiti kuapa vaw pie ta.

26 Khaipâna a chaba ta, a chachâh lâta raihriapa syulô; a luh liata khaipahlie ta a siali liata khai pahlie ta, alei liata a chalona taihta khai ta.

27 A phei thaby liata pao ta, a khu thlâh ha ta; a phei thaby liata pao haw ta; a paona su liana chata a thipa ta a pao thlâh haw.

28 “Sisera nô cha opy liata a vaw luah ta, diahpai kao liata aw ta; ‘Khazia e, a talaili a vaw tlô to vei, khazia e, a talaili phei nainô a sô? ‘tah ta.

29 A chanô sopa zy ta a chhy ei ta, anosasyh ta a chhy hei ta.

30 Hmo thei khao vei ei ma? Chyhsa to ta laihsa pakha, pano chyu tlyma; Sisera to awpa cha hraona poh chi nanopa, hraona poh a ngiapa chi nanopa, hraona rao liata a ao awpa poh, a kârâno ta pakypa, chi nanopa ma?’ tahpa ta.

31 “Cha hawhna chata, hy ABEIPA, na khakhaipa zydua cha leidia khai ei sala! Ano kyh a pachutuhpa zy deikua cha, thatlô ngaitapa ta a siepa noh hawhna he châ mawh sy,” tahpa ta hla sa ei ta. Chatawhcha râh cha kô sypalih chhôh thlalôhpa ta y ta. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 6

Ryureihtuhpazy Bo 6

Kidia awna

1 Izarel pathlazy chata, ABEIPA mohmô ta hmo parao haw ei ta; ABEIPA ta Midia mo ku liata kô sari paysa ta.

2 Midia mozy chata Izarel mozy cha vaw pahnie rili ei ta; Midia mozy vâna chata lzarel pathlazy chata tlâh liata khaoh zy, lôpu zy, kuh zy tao ei ta.

3 Izarel mozy ta chi ama cheih nata Midia mozy, Amale mozy, nochhi sawzy sahlao cha khy ei ta, adyuh ei ta;

4 khy hnao ei ta, Kaza taihta alei liata a pyupazy cha paraopa ei ta, Izarel râh liata niepa rai pahlôh veih ei. Mietahkupa zy, viahchao zy, alâ zy taih ta.

5 Ama sahroh zawzy nata ama poh-o zy chhaota vaw thyu ei ta, khawsu hawh tlaita a hluh ngaitapa ta vaw thyu tyh tlôh ei ta; âmo nata ama râraoseihpa zy cha reitiahpa châ vei, râh parao awpa ta amâ vy tyh.

6 Izarel mozy cha Midia mo vâna chata sipasa ngaitapa ta y ei ta; Izarel pathlazy chata ABEIPA cha pado haw ei ta.

7 Midia mo vâta Izarel pathlazy ta ABEIPA ama padona chata,

8 ABEIPA Izarel pathlazy hnohna chata hrohsopa vaw tuah ta; ano chata ama hnohta, “ABEIPA Izarel zy Khazohpa ta he tana he a tah; Izi râh tawhtapa cha kaw chhihtha ei na ta, sei tawhtapa cha papua ei na ta;

9 Izi mo ku tawhtapa nata cha pasaipa-i tuhpa zydua ku tawhtapa cha pachha ei na ta, nama hmiakô tawhtapa âmo cha to na ta, ama râh cha pie ei na ta;

10 chatawhcha kei ta, ‘Kei he ABEIPA nama Khazohpa ei cha hih; he nama yna râh hneituhpa Amawri mo khazoh zy he nama chi chachei awpa châ vei,’ tah na ta. Châhrasala ei bie reipa cha angiah tlôh eichi va,” tah ta.

11 ABEIPA vâlyuhchâpa cha a vy ta, Ôphrah khih liata Abieza chyhsa Zôasha ei oaka tho ry liata a tyuh ta, a sawchapawpa Kidia cha Midia mozy hmô thei lei awpa ta kre saohna khaoh liata sâh tly ta.

12 ABEIPA vâlyuhchâpa cha a hnohta a vaw luah ta, a hnohta, “Nâ, chyhsa thatlôpa riahphapa y, ABEIPA cha na hnohta a y na,” tah ta.

13 Kidia ta a hnohta, “Hy ei zibeipa y, ABEIPA eima hnohta a y tlôh khiahta cha, kheihtazie ta e he hawhta eima chô liata hmo a vaw tlô? Eima pathlatuhpa zy khata, ‘ABEIPA ta Izi râh tawhtapa cha maniah a kaw chhihthapa châ vei mâ?’ tahpa ta a hmotaopa noâh ngaitapa zy maniah ama chho tyhpa kha, khataih lâ a vawh haw? Atahmâ la, ABEIPA ta maniah pathlua haw ta, Midia mo ku liata maniah a pie haw mâ tâh,” tah ta.

14 ABEIPA chata ano cha moh ta, a hnohta, “He na thatlôna heta sie la, Izarel mo he Midia mo tawhtapa pachha mah y, cha tuah vana mâ?” tah ta.

15 Ano chata a hnohta, “Hy ABEIPA y, kheihta e Izarel mozy he ei pachha bao hra aw? Pachâ tua, Manase pathla hry liata pho riethei chaipa châ pi ta, kei hra he, ei paw chhôhkhapa zy hry liata a chyh chaipa châ tlôh na ta,” tah ta.

16 ABEIPA chata a hnohta, “Na hnohta ei y lymâ aw mâ tâh, Midia mo cha chyhsa pakha hawh tlaita na pahnie khai thlâh ha aw,” tah ta.

17 Ano chata a hnohta, “Na modypa ei châ khiahtala nâ tlaita eina chho chi tahpa pahnona khâpa ma na pamosa mah y.

18 Na hmiakô liata hlâ awpa hmopiepa ei la aw na ta, na lâta ei vy heih hlâ lei cha, he tawhtapa he ngiachhiepa ta vaw sie chachei ta khah y,” tah ta. Ano chata, “Nâ vy hei hlâ lei cha ei vaw y thlâh ha aw,” tah ta.

19 Chatawhcha Kidia cha vawh ta, mie taw nata viahdie ephah hmo kha thinô pahlao leipa tao ta; a sapa cha kachuh liata soh ta, a tihâh cha beih liata soh ta, oaka tho ry liata ano lâna chata cheih ta, hlâ ta.

20 Khazohpa vâlyuhchâpa chata a hnohta, “Sâh nata viahchhâ thinô pahlao leipa kha la la, he alô chô liana heta soh la, a tihâh kha patlai thlu teh,” tah ta. Cha hawhna chata tao ta.

21 ABEIPA vâlyuhchâpa chata a chôhchahrei chabapa pawhmao chata sâh nata viahchhâ thinô pahlao leipa cha kei hria ta; chatawhcha alô tawhna chata mei vaw pua ta, sâh nata viahchhâ thinô pahlao leipa cha kâ khai ha ta; ABEIPA vâlyuhchâpa cha a hmô thei leipa lâta sie haw ta.

22 Chatawhchata Kidia chata ABEIPA vâlyuhchâpa a châ tahpa pahno haw ta, Kidia ta, “Cha ngaita rimâ cha, hy Abeipa KHAZOPA! ABEIPA vâlyuhchâpa cha hmia a chhypa tlaita ei hmô haw cha zaw,” tah ta.

23 ABEIPA ta a hnohta, “Thlalôh ngaitapa ta y la; chi khâ, thi aw va chi,” tah ta.

24 Chatanachata Kidia ta, cha liana chata ABEIPA chata maisâh tao ta, “ABEIPA cha thlalôhna a châ tahpa ta Zehôvasalaw bi ta. Atanoh taihta Abieza mozy khih Ôpharah liata a y thlâh haw.

25 Cha zâ liana chata ABEIPA ta a hnohta, “Na paw viahchao tôhpa, viahchao tôhpa miano kô saripa cha la la, na paw hneipa Baal maisâh he pacho la, a kiapâh lâta Asherah he thlu teh;

26 he kuh chô liana heta a yzie hneipa ta ABEIPA na Khazohpa châta maisâh tao la, viahchao tôhpa mianona cha la la, Asherah na thlu awpa tho hmâpa ta raopa hlâna hlâ teh,” tah ta.

27 Chatanachata Kidia chata a chakaotuhpa zy hry liatahpa pahrawh a chhi ta, ABEIPA ta a hnohta a reipa hawhna chata tao ta; a paw chhôhkha zy nata khihpi liata chyhsa zy cha a chipa vâta nohchhô ta tao ngâh leipa ta, zâ ta a tao.

28 Khihpi liata chyhsa zy cha mydi ta ama thyu nahta, Baal maisâh cha chati pathlapa ta y ta, a kiapâh liata Asherah cha thlupa ta y ta, maisâh taopa chô liata viahchao tôhpa pô nona hlâpa cha vaw y thlâh ha ta.

29 “He he ahy taopa tlyma?” tahpa ta a chho ei ta. Chatawhcha ama hiahri nahta ama pachâ khai tawhna chata, “Zôasha sawchapawpa Kidia taopa a châ he,” tah ei ta.

30 Chatanachata khihpi liata chyhsa zy chata Zôasha hnohta, “Na sawchapawpa cha a vaw chhi teh, a thi tlai awpa a châ. Baal maisâh a chati pathlahpa vâta nata a kiapâh ta Asherah a thlupa vâta,” tah ei ta.

31 Châhrasala Zôasha chata, ano a vaw leih tuhpa zydua hnohna chata,” Baal cha nama chakhei aw ma? Ano cha nama paboh aw mâ? Ahyrai ano a chakheipa maih cha myna tlai heta thie awpa a châ, khazoh a châ khiahtala a maisâh ama chati pathlapa vâta anosasyh ta a chakhei se,” tah ta.

32 Chatanachata a maisâh a chati pathlapa vâta, “Baal ta ano a kho mawh sy,” tahpa ta, cha nona chata Zerubaal bi haw ta.

33 Midia mo zydua nata Amale mozy nata nochhi sawzy cha a pahmaohpakhy ei ta, chavah chaka ei ta, Zezrel saikao liata a rie ei ta.

34 Châhrasala ABEIPA Thlahpa cha Kidia chô liana vaw tlô ta; chiahmie tô ta, Abieza mo chata ano lâ pangai ei ta.

35 Manase mo zydua hry liata chyhsa tuah ta, cha sahlao chhao chata ano lâta pangai ei ta, Asera mo hnohta zy, Zebulawna mo hnohta zy, Nathalai mo hnohta zy chhao chyhsa zy tuah ta; âmo chhao chata a vaw pahlyh haw hra ei ta.

36 Kidia ta Khazohpa hnohta, “Na reipa hawhta, keima ku ta Izarel zy he na pachha awpa khiahtala,

37 sawhri liata mietahkupa hmi soh aw na ta; mietahkupa hmi liana deita chata diati ypa ta, alei zydua cha a hi khai khiahtala na reipa hawhta keima ku ta Izarel zy he na pachha aw tahpa ei pahnô aw,” tah ta.

38 Cha hawhna tlai chata vaw châ ta. A mylâ mydi ta thyu ta, mietahkupa hmi cha a sao nata, mietahkupa hmi liatahpa cha diati biebu kha tlai saoh tlôh ta.

39 Chatawhcha Kidia ta Khazohpa hnohta, “Ei chô liata na pathi-ia khah y, ei kha ei reih heih tua aw; ngiachhiepata ta ei kha chhâ mietahkupa hmi ta na pasiasa heih tua mah y; atahmâ cha mietahkupa hmi deita cha hi sala, alei chô zydua liata diati tlao y mawh sy,” tah ta.

40 Cha hawhna chata Khazohpa ta cha zâ liana chata vaw tao ta; mietahkupa hmi deita cha hi ta, alei chô zydua liana chata diati cha tlao vaw y ta. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 7

Ryureihtuhpazy Bo 7

Kidia sahlao ta Midia mo ama pahnie

1 Zerubaal (cha cha Kidia châ ta) nata a hnohta zawpi a ypa zydua cha mydi ta thyu ei ta, Harô chavah kiapâh liata a rie ei ta; Midia mozy riena su cha, ama yna maw lâchhâh Môreh tlâh kiapâh saikao liata a châ.

2 ABEIPA ta Kidia hnohta, “Na hnohta a ypa zy kha, Midia mozy, ama ku liata ei pie nawpa ta la ama hluh tu na, chata leipata la Izarel mozy ta, ‘Keimo ku tlaita a pachhapa eima châ mâ tâh,’ tahpa ta einâ palai thlu tlamaw aw ei na.

3 Chavâta zawpi sahlao zy nah theina liata, ‘Ahyrai a chipa nata a chalyupa maih kua ei sala, Kilia tlâh tawhtapa he a di mawh sy,’ tahpa ta phuah teh,” tah ta. Zawpizy cha thy no nata sâh no vaw kua ei ta; thy kha y ei ta.

4 ABEIPA ta Kidia hnohta,” Chyhsa zy kha ama hluh tu ngâthlâh ha na; chavah lâ a chhi la, cha liana chata keima ta ei cha pahrua pa aw; ‘He chyhsa he cha na hnohta sie hra ei se,’ ei tahpa maih cha, na hnohta sie sala; ‘He chyhsa he cha na hnohta sie khah ei se,’ ei tahpa maih cha, sie kha se,” tah ta.

5 Chatanachata zawpizy cha chavah lâna chata a chhi ta; ABEIPA ta Kidia hnohta, “I hawhta a palei ta ti a paliepa mai cha, â nano ta soh lymâ la, cha hawhna hra chata a bôhpa ta pakhu paneihpa ta ti a sypa maih chhao,” tah ta.

6 Chatawhcha ama ku pazah liatahpa a paliepa zy cha chyhsa za thôh châ ei ta; mo hropa zydua cha a bôhpa ta, pakhu paneihpa ta ti a sypa sai ama châ.

7 ABEIPA ta Kidia hnohta, “Chyhsa za thôh a palei ta a paliepa zy kha hmâpa ta cha pachha aw ei na ta, Midia mozy he na ku liata ei pie aw; zawpi zydua cha, âmo su chyu lâta a di ei se,” tah ta.

8 Chatanachata zawpizy chata niepa zy nata chiahmie zy cha chaba ei ta, Izarel Chyhsa zydua cha ama poh-o lâta padisa khai ta, chyhsa za thôh zy deikua cha paysa ta; Midia mo riena su cha ama mathi lâ saikao liana chata a châ.

9 Cha zâ liana chata ABEIPA ta a hnohta, “Thyu la, ariena su lâna chata zu teh, na ku liata ei pie haw.

10 Anodeikuacha zu awpa na chi khiahtala, na chakaotuhpa Pura nata ariena su lâna chata zu tua ula,

11 ama bie reipa thei aw chi ta, chatawhta na ku cha tha patlôpa ta y aw ta, ariena su lâna chata na sie ngâh ha aw,” tah ta. Chatanachata a chakaotuhpa Pura nata ariena su liata riahvaihpa sahlao ty tuachaipa yna lâna chata zu ei ta.

12 Midia mozy nata Amale mozy nata nochhi saw zydua cha saikao liana chata khawsu hawh tlai ta a hluh ngaitapa ta y thlâh haw ei ta; ama râraoseihpa zy cha reitiahpa rimâ châ leipa ta, ama hluhna lâ cha tilaipi kiah liata leisadi zie tlai châ ei ta.

13 Kidia a za tlô nahta, chyhsa pakha heta a viasapa cha a mâ sapa chho ta; a hnohta, “Pachâ teh, mâ sa na ta; bâli sâh viahchhâ tlâ he Midia sahlao ariena su lâna heta zâ hluah ta, poh-o liana heta vaw su ta vaw pacho ta, a palie haw ta, poh-o cha a kiapâh ta pao ta,” tah ta.

14 A viasapa chata a chhy ta, “Cha cha Izarel chyhsa Zôasha sawchapawpa Kidia zaozi a châ thlâh ha chu; Khazohpa ta Midia mo nata pheisaih sahlao zydua cha a ku liata a pie chu,’ tah ta.

15 Kidia ta cha mâsapa nata a yzie ama chhopasiapa cha a thei nahta, Khazohpa a chhy ta; Izarel mozy ariena su lâna chata kua heih ta. “Thyu teh u, ABEIPA ta Midia pheisaih sahlao cha nama ku liata a pie haw,” tah ta.

16 Chyhsa za thôh zy cha py thôh ta tao ta, ama zydua ta chiahmie nata beih ruapa a chhôh liata meirei so chiehpa pie chyu ta.

17 Chatawhcha ano chata ama hnohta, Na moh ula, ei taopa hawhta tao lymâ hra muh vy; ariena su ty tuachaipa ei tlô pata nahta, ei taopa hawh lymâ ta tao hra muh vy.

18 Kei nata ei hnohta a ypa zydua heta chiahmie eima tô pata nahta, ariena su chheipâh ta a ypa zydua chhaota, chiahmie tô khai hra aw eichi ta, ‘ABEIPA châta nata Kidia châta,’ tahpa ta aw chyu muh vy, tah ta.

19 Kidia nata a hnohta a ypa chyhsa za kha cha zâ vaina liah liata riahvaihpa amâ thla dyu no tlaita, ariena su ty tuapa za tlô ei ta; chiahmi tô ei ta, ama beih chabapa cha pakei ei ta.

20 A hlao thôh chata chiahmie cha tô ei ta, beih cha pakei ei ta, ama chavei lâta meirei chaba ei ta, ama chachâh lâta chiahmie tô awpa ta chaba ei ta, “ABEIPA nata Kidia zaozi!” tahpa ta thata aw ei ta.

21 Ariena su chheipâh liata chyhsa to âmo a duana su chyu liana chata a duah khai ei ta, pheisaih sahlao zydua cha a râ ei ta, awh chaimâh ei ta, parâpaisa haw ei ta.

22 Chiahmie za thôh cha tô ei ta, ABEIPA ta pheisaih sahlao zydua cha, âmo nata âmo zaozi ta padyuhsa chaimâh ta; pheisaih sahlao zy cha Zerera lâchhâh ta Besitata taih, Taba kiapâh Abelmehôla râhri taihta a râpai ei ta.

23 Izarel mo cha Nathalai tawhta zy, Manase zydua tawhna zy chata a hmaohpakhy ei ta, Midia mo a chadai ei ta.

24 Kidia ta Ephrai tlâh râh zydua liana chata, “Midia mo he a vaw dyuh teh u, Zawdâh chhaota,” tahpa ta chyhsa zy tuah ta. Chatanachata Ephrai mo zydua cha ahmaohpakhy ei ta, Bethabarah taihta chavah zy cha Zawdâh chhaota vaw la khâh khai ei ta.

25 Midia beipa pano Ôreba nata Ziba patu ei ta; Ôreba cha Ôreba lôpanô liata thie ei ta, Midia mo cha a chadai ei ta; chatanachata Ôreba nata Ziba luh cha Zawdâh haosâ lâ Kidia lâta vaw cheih ei ta. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 8

Ryureihtuhpazy Bo 8

1 Ephrai mozy chata a hnohta," Kheihtazie ta he hawhta maniah tao chi ta, Midia mo nâ dyuhna liana chata maniah na hrua hra vei,” tah ei ta. Thata paphôh ei ta.

2 Ano chata ama hnohta, “Nâmo hlâta khâpa e ei tao via hlei? Abieza mo kre thei lyupa hlâta Ephrai mo kre thei kamothopa he tha via ta châ vei mâ?

3 Khazohpa ta Midia mo beipa Ôreba nata Ziba cha nama ku liata vaw pie haw ta; nâmo hlâna heta kei ta khâpa ei tao via thei hlei,” tah ta. Cha bie a rei nahta a chô liata ama hiehâhna dia ha ta.

Kidia ta Midia beipazy a patu.

4 Kidia nata a hnohta chyhsa za thôh a ypa zy chata Zawdâh cha za tlô ei ta, chaka ei ta, riethei ngaitana chôta a chadai lymâ ei ta.

5 Chatawhcha Sukô khih liata chyhsa zy hnohna chata, “He na zituhpa zy he ngiachhiepata ta viahchhâ pie teh u, panao ngaita haw ei ta, Midia mo beipa Zebah nata Zalmuna ei chadai,” tah ta.

6 Sukô khih liata molaipa zy chata, “Zebah nata Zalmuna cha na ku liata y haw ei ta, na pheisaih zy viahchhâ eima pie thlâh ha aw mâ?” tah ei ta.

7 Kidia chata, “Chatatlyh, ABEIPA ta Zebah nata Zalmuna cha ei ku liata eina pie tita râhpathohpa ahloh nata ahloh zôh zy chata nama pôhpa cha ei cha hriechhei aw ei,” tah ta.

8 Cha tawhna chata Penuel lâta sie ta, ama hnohta cha hawhna hra chata reih heih ta; Penuel khih liata chyhsa zy chata Sukô khih liata chyhsa zy, a chhyna zie hawh hra ta a vaw chhy hra ei ta.

9 Penuel khih chyhsa zy hnohna chata, “Padyhna bie phaohpa ta ei vaw kua heih tita, he kuh sâhpa he ei vaw pacho aw,” tahpa ta reih hra ta.

10 Zebah nata Zalmuna cha Kakô liata y ei ta, ama zawpi sahlao zy, nochhi sawzy zawpi sahlao a thi bâhpa zydua thy kha nata sâh pangawh zy chhaota; zaozi a chabapa sai ta, thy sy kha nata thy no thi tlôh ei ta.

11 Kidia cha Nôbah nata Zôbehah nochhi lâta poh-o liata a pahrâpa sahlao zy lâpi lâta khy ta, zawpi zy cha a dyuh ta; zawpi sahlao zy cha thlalôh ngaitapa ta vaw y tlôh ei ta.

12 Zebah nata Zalmuna cha a râpai haw ei ta; ano thata a chadai ta, Midia mo beipa pano Zebah nata Zalmuna cha patu ta, zawpi sahlao zydua cha thata patypamâ ta.

13 Chatawhcha Zôasha sawchapawpa Kidia cha Here chakhâ tawhta adyuhna tawhtapa cha vaw kua haw heih ta.

14 Sukô khih satlia pakha patu ta, biezy hiahri ta; chatanachata Sukô khih liata molaipa sahlaozy nata machâzy moh cha ropa khai ta, sysari nata pasari châ ei ta.

15 Sukô khih chyhsa zy lâna chata khy ta, “Zebah nata Zalmuna moh teh u, he chyhsa zy he mâ tâh, ‘Zebah nata Zalmuna cha na ku liata a y hawpa hawhta, cha hawhta na chyhsa panaopa zy viahchhâ eima pie awpa cha?’ tahpa ta eina taola bao hrapa ei chi kha,” tah ta.

16 Cha khih machâ zy cha patu ta, râhpathohpa ahloh nata ahloh zôh zy chata Sukô mozy cha hrie ta.

17 Chatawhcha Penuel khih kuh sâhpa cha pacho ta, a khih liata chyhsa zy chhao cha thie ta.

18 Chatanachata Zebah nata Zalmuna hnohta, “Tabaw liata chyhsa nama thiepa zy kha kheihawhpa chyhsa e ama châ?” tah ta. Âmo chata, “Nâma hawhpa he ama châ, abei saw lyuna ama hnei chyu,” tah ei ta.

19 Ano chata, “Ei unawhpa ei nô sawchapawpa zy tlai ama châ mâ tâh; ABEIPA cha a hropa tlai hawhna heta âmo cha a vaw pahlôhpa châ ula, ei cha thie leipa ei tlai,” tah ta.

20 Chatawhcha a sawchapawpa pih tuachaipa Zethy hnohna chata, “Thyu la, nama ta thie teh,” tah ta. Châhrasala satliapa chata a zaozi phia vei; satliapa dei a châpa vâta a chi.

21 Chatawhcha Zebah nata Zalmuna chata, “Nâma kha vaw thyu la, maniah thie teh, pitlohpa cha tha a hnei mâ tâh,” tah ei ta. Kidia cha thyu ta, Zebah nata Zalmuna cha thie ta; ama râraoseihpa rao liata raopaky zy cha la ta.

Kidia hmotaopa zy nata a thina

22 Chatanachata Izarel mozy chata Kidia hnohta, “Nâma ta eima chô liata ryu reih mah y, nâ nata na sawchapawpa nata na sawchapawpa sawchapawpazy taih chhaota, nâ ta Midia mozy ku tawhtapa he maniah pachha haw tlôh chi ta,” tah ei ta.

23 Kidia ta ama hnohta, “Kei ta la nama chô liana heta ryu reih leipa aw na ta, ei sawchapawpa chhao ta, nama chô liata ryu reih hra aw vei; ABEIPA ta nama chô liata ryu tlao a rei aw,” tah ta.

24 Kidia ta ama hnohta, “Hmo miakha deikua hiah awpa ei cha khoh ei; chyhsa to ta nama hraona rahy cha na pie chyu teh u,’ tah ta. (Ishmael mo ama châpa vâta ngôh rahy ama hnei).

25 Chatawhcha âmo chata, “Eima cha pie aw,” tah ei ta. Chatanachata poh phaw ei ta, chyhsa to ta ama hraona rahy cha soh chyu ei ta.

26 Cha ngôh rahy a hiapa zy cha â hrina lâta ngôh sekel sâh kha nata za sari a châ; raopaky zy, rahy bangiepa zy, Midia mo abeizy poh sailawpa rei leipa ta, ama râraoseihpa zy bâlia pa-aopa chhao a hlao leipa ta.

27 Chatawhcha Kidia ta chazy chata ephod tao ta, a yna Ôphrah khih liata soh ta, cha liana chata, cha tawhtapa cha Izarel mo zydua aphei khai haw ei ta, Kidia nata a chhôhkha zy châta chhao khohei a vaw châ haw.

28 Chatanachata Midia mo cha Izarel pathlazy hmiakô liana chata panawhpa ta y haw ei ta, a pie thei khao leipa ei ta, Kidia a hroh chhôh chata, râh cha kô sypalih chhôh thlalôhpa ta y ta.

29 Zôasha sawchapawpa Zerubaal cha ano o liata pahrâ haw ta.

30 Kidia chata ano sapa tlai sawchapawpa sysari hnei ta, lahpinô a hluhpi a hneipa châ ta.

31 Chatawhcha Sekhe khih liata a nôtho ta sawchapaw sapa hra ta, a moh cha Abimeleka bi ta.

32 Zôasha sawchapawpa Kidia cha chhâ palopa ta thi ta, chatanachata Abieza mo Ôphrah khih liata a paw Zôasha thlâ liata pabu ei ta.

33 Kidia a thi pata nahta Izarel pathlazy cha hnôh lâ a sy haw heih ei ta, Baal zy liana chata aphei ei ta, Baalberi cha ama khazoh ta tao ei ta.

34 Chatawhcha Izarel pathlazy chata ama chheipâh liata khakhaipa zydua tawhtapa a pachhatuhpa ABEIPA ama Khazohpa cha a thei khao leipa ei ta;

35 Zerubaal (Kidia) cha Izarel mozy chô liata phana a papuatuhpa chhôhkha zy chô liata chhao phana papua khao hra veih ei. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21

Ryureihtuhpazy Bo 9

Ryureihtuhpazy Bo 9

Abimeleka a beina

1 Zerubaal sawchapawpa Abimeleka cha Sekhe khih lâta a nô rilâhpa zy lâta sie ta, a nô pawzy chhôhkha zydua bie chho ta,

2 Sekhe khih liata chyhsa zydua nah theina liata bie reih ula, ‘Zerubaal saw zydua, chyhsa sysari zy ta nama chô liata ryu ama reipa ma a pha via nama tah ma? Mo pakha ta nama chô liata ryu a reipa ma?’ tah tua muh vy, kei chhao nama rupa nata nama sapa ei châ tahpa he a thei thlâh ha hra muh vy,” tahpa ta reih ta.

3 Chatawhcha a nô rilâhpa zy chata Sekhe khih liata chyhsa zydua nah theina liana chata cha bie zydua cha reih ei ta; chatanachata Abimeleka zi khona palôhrupa vaw phaoh haw ei ta, “Ano cha eima unawhpa a châ mâ tâh,” tah haw tlôh ei ta.

4 Chatawhcha Baalberi o tawhna chata tâkâ sysari pie ei ta, chazy chata Abimeleka ta chyhsa a papeisa leipa nata chyhsa leipa zy hrua ta, âmo chata ano zi ei ta.

5 Chatawhcha Ôphrah khih liata a paw o lâta vawh ei ta, Zerubaal sawchapawpa a unawhpa sysari zy cha, alô miakha chô liata thie ta; Zerubaal sawchapawpa hawti chaipa Zôtha deikua cha hroh ta, “ano cha a nyu hawpa a châ.

6 Sekhe khih liata chyhsa zydua nata Milô liata chyhsa zydua cha a pahmaoh ei ta, Abimeleka cha Sekhe khih liata lôbôpa kiapâh oaka kiapâh liana chata abei ta tao haw ei ta.

7 Cha cha Zôtha ama chho nahta, Kerizi Tlâh laki lâta a kaw duah ta, ao paro ngaitapa ta awh ta, ama hnohta, “Nâmo Sekhe khih liata chyhsa zy saih u, bie ei reipa he nahthlie teh u, Khazohpa chhaota nama bie a nahthlie hra aw.

8 Ei kha cha tho he ama beipa chata sathaw thu awpa ta kei pua ei ta; Ôli tho hnohna heta, ‘Nâ eima beipa ta y mah y,’ tah ei ta.

9 Châhrasala Ôli tho chata ama hnohta, ‘Khazohpa nata chyhsa palyupalih nawpa ta eina hmâna chaipa ei thaw he puasaipa ta tho chô liata zua ei chanei ngâh aw mâ?’ tah ta.

10 Chatawhcha thozy chata theiku kô hnohta, ‘A vy teh, nâ eima beipa ta y mah y,’ tah ei ta.

11 Châhrasala theiku kô chata ama hnohta, ‘Ei thlôhna nata ei theilâpa pha ngaitapa he puasaipa ta tho chô liata zua ei chanei ngâ aw mâ?’ tah ta.

12 Chatawhcha thozy chata kre hnohta, ‘Avy teh, nâ eima beipa ta y mah y’ tah ei ta.

13 Krezôh chata ama hnohta, ‘Khazohpa nata chyhsapa a palysatuhpa ei kresawti he puasaipa ta tho chô liata zua ei chanei ngâ aw mâ?’ tah ta.

14 Chatanachata tho zydua chata ahloh hnohta ‘A vy teh, nâ eima beipa ta y mah y’ tah ei ta.

15 Chatawhcha ahloh chata tho hnohta, ‘Nama beipa châta sathaw eina thu tlai khiah eichi ta la, ei nohdi liana heta ngâh muh vy; a châ vei khiahta deikua cha ahloh liana chata mei vaw puapa ta Lebanaw liata sidy thozy cha kâ khai mawh sy,” tah ta.

16 Chatawhcha Zôtha chata ama hnohta, “Abimeleka nama abeipa châta nama taopa he hmeihseihpa nata a sia ngaitapa ta a taopa châ eichi ta, Zerubaal nata a chhôhkha zy cha a pha ngaitapa ta tao eichi ta, â phuhpa lymâ hawhta a chô liata a taopa châ eichi ta.

17 ei pâ heta chariah cha dyuhpa ei ta, thi pâ ha ta, Midia mo ku tawhtapa cha cha pachha haw ei ta;

18 atanoh heta ei pâ chhôhkhapa zy chô liana chata aty eichi ta, a sawchapawpa zy sysari tlai alô miakha chô liata thie eichi ta, nama unawhpa a châpa vâta a seichanônô sawchapawpa Abimeleka he Sekhe khih mozy abeipa ta tao haw tlôh eichi ta:

19 atanoh he Zerubaal nata a chhôhkhapa zy chô liata hmeiseipa nata a sia ngaitapa ta a taopa nama cha khiahtala Abimeleka chô liana heta a ly teh u, ano chhao nama chô liana heta a ly mawh sy;

20 cha hawhta a châ vei khiahta deikua cha Abimeleka tawhna heta mei vaw pua sala Sekhe khih liata chyhsa zy nata Milô chyhsa zy cha kâ khai mawh sy; Sekhe khih liata chyhsa zy nata Milô tawhta mei vaw pua sala Abimeleka cha kâ khai mawh sy,” tah ta.

21 Chatanachata Zôtha cha a râ ta, a râ syulyu ta, Bera lâta a râ ta, a unawhpa Abimeleka a chipa vâta, cha liana chata y thlâh ha ta.

22 Abimeleka cha Izarel mo chô liata kô thôh ryu reih ta.

23 Khazohpa ta Abimeleka nata Sekhe khih liata chyhsa zy likaw liana chata palôhrupa moleipa paysa ta, chatanachata Sekhe khih liata chyhsa zy chata Abimeleka chô liata piepie ngaitapa ta tao ei ta;

24 cha cha Zerubaal sawchapawpa sysari zy chô liata nôchhie ngaitapa ta ama taopa vâta ama chô liata phuh lana a vaw tlô thei nawpa nata âmo a thietuhpa ama unawhpa Abimeleka chô liata nata a unawhpa zy thie awpa ta a ku tha a patlôtuhpa Sekhe mozy chô liata ama thisaih a y thei nawpa ta a châ.

25 Sekhe khih liata chyhsa zy chata tlâh laki zy liata ano a ru lâta a byhtuhpa zy soh ei ta, cha lâpi lâta a siepa maih cha hrao tyh ei ta; cha ky cha Abimeleka chho ei ta.

26 Ebe sawchapawpa Kaal, a unawhpa zy chhaota vaw thyu ei ta, Sekhe khih liata a ngia ei ta; Sekhe mozy chata ano ngâ ei ta.

27 Chatawhcha lyu lâta sie ei ta, ama kresadô liatahpa lyu ei ta, tly ei ta, kyhchhi tao ei ta, ama khazoh o liata a ngia ei ta, niepa ta doh ei ta, Abimeleka cha chhie sapa ei ta.

28 Chatawhcha Ebe sawchapawpa Kaal chata, “Ahyma Abimeleka cha, keimo Sekhe mo eima châpa he keimo lâ zua eima chakao awpa cha? Zerubaal sawchapawpa nata Zebula he a machâpa cha Sekhe paw Hamôra mozy chakao veih ei mâ? Khazia ano eima chakao aw?

29 He sahlao he keima rei ta ama y mawh sala: Abimeleka he ei panawh thlâh ha awpa tlai. Abimeleka hnohta, ‘Na pheisaih pakhy la vaw thyu teh,’ ei tah aw,” tah ta.

30 Cha khih ryureituhpa Zebula chata Ebe sawchapawpa Kaal bie reipa cha a thei pata nahta a pathi sôkha ta ia ta.

31 Chatanachata piepie ngaitapa ta Abimeleka hnohna chata, “Ebe sawchapawpa Kaal nata a unawhpa zy Sekhe lâta a vy ei ta, na chô liata aty khai a chhuahpa ta khih liata chyhsa zy ama pasyupali.

32 Na sahlaozy chhaota a zo vâta vaw thyu ula, lyu liata a vaw byh teh u.

33 Chatanachata my ta nohchhi pata nahta thyu la, khih cha a vaw dyuh mah y: ano a sahlao zy chata ama châ vaw dyuh pata nahta a rypaoh na tahna zie hawhta ama chô liata vaw tao mah y,” tahpa ta chho awpa ta chyhsa zy tuah ta.

34 Chatanachata Abimeleka nata a sahlao zydua cha a zo vâ ta thyu ei ta, hlao palih ta a pachhaipa ta Sekhe khih cha chadô ei ta.

35 Ebe sawchapawpa Kaal cha kei pua ta, khihpi a ngiana chhikao liana chata a kei duah ta; Abimeleka cha a sahlao zy chhaota a ru lâta amâ byhna su tawhtapa cha vaw pua haw ei ta.

36 Chatawhcha Kaal ta zawpi zy a hmô nahta, Zebula hnohta, “Pachâ teh, tlâh laki tawhta zawpi zy ama za chô!” tah ta. Zebula chata a hnohta, “Tlâh nohpahlipa hao chyhsapa hawhta na hmôpana a châ aw,” tah ta.

37 Kaal chata, “Moh châh chi, râh liatahpa hao zawpi ama za chô, py kha chhochhi cha Môneni oaka tho lâpi liata amâ vy huh,” tah heih ta.

38 Chatanachata Zebula chata a hnohta, “Ahyma Abimeleka eima chakao awpa cha?’ tahpa ta na reina pakah kha khataih lâ a vawh haw? He sahlao he na chyhsa mohnaopa zy tlai kha châ veih ei mâ? Kei pua la, rie a kei dyuh teh,” tah ta.

39 Kaal chata Sekhe mozy cha a chhi ta, Abimeleka cha a kei dyuh ta.

40 Abimeleka chata a vaw chadai ta, a râpai haw ta; khihpi a ngiana chhikao taihta chyhsa hluhpi hmah phaopa ta pao hôlô ei ta.

41 Abimeleka cha Arumah khih liana chata pahrâ haw ta; chatanachata Zebula chata Kaal nata a unawhpa zy cha Sekhe khih liata y thei lei awpa ta papua khai haw ta.

42 A mylâ ta cha zawpi zy cha sibiepa su lâta vawh ei ta, Abimelaka cha va chho ei ta.

43 Zawpi zy cha a chhi ta, py thôh lâta tao ta, sibiepa su liana chata a byh ei ta, a heih ta, zawpi zy cha khihpi tawhtapa vaw pua ei ta, chatanachata âmo cha adyuh ta, thie ta.

44 Abimeleka nata a sahlao zy chata a râ hnao ei ta, khihpi a ngiana chhikao lâna chata a kei duah ei ta, hlao no zy chata sibiepa su liata a ypa zydua cha a râ hnao ei ta, thie haw ei ta.

45 Abimeleka chata khihpi cha cha noh liana chata noh y ta adyuh ta;

46 Sekhe kuh sâhpa liata a ypa zydua chata, cha kyh cha ama thei nahta Elberi kuh liata a ngia khai haw ei ta.

47 Sekhe kuh sâhpa liata chyhsa zydua cha hmaohkha ta ama y khai haw tahpa Abimeleka chho ei ta.

48 Abimeleka nata a hnohta a ypa zydua cha Zalmaw Tlâh lâta kiah ei ta; Abimeleka chata ahrei a chei ta, tho pahrei pathlâ ta, a pia haw ta. Chatawhcha a sahlao zy hnohna chata, “Ei taonazie hmô eichi ta, ei taopa hawhna heta nâmo chhaota tao parah hra teh u,” tah ta.

49 Chatawhcha chyhsa zydua ta tho pahrei cha pathlâ chyu ei ta, Abimeleka cha zi ei ta, kuh chheipâh liana chata soh lymâ ei ta, kuh liana chata rao thlu ei ta, chatanachata Sekhe kuh sâhpa liata chyhsa zydua chhao cha thi ei ta; chapaw nata chanô sâh kha ama châ.

50 Chatanachata Abimeleka cha Thebe khih liata sie ta, Thebe khih cha padô ta, la ta.

51 Anodeikuacha cha khihpi chhôh liana chata kuh y ta, cha liana chata chapaw nata chanô zydua nata khihpi chhôh liata chyhsa zydua cha a ngia ei ta, khâchâ a khawhlôh ei ta; kuh chhôh liana chata hmaohkha ta y ei ta.

52 Abimeleka cha kuh lâna chata vawh ta, a kei dyuh ta, mei ta rao a chhuahpa ta kuh chhikao kiapâh lâta vawh ta.

53 Chatawhcha chanô ahy tlyma ta sâh charona a chô la ta, Abimeleka luh liata za pathla thlu ta, a luh rupa kei ta.

54 Chatanachata chariah chhaichhi a chabatuhpa satliapa cha aw parah ta, a hnohta, “Na zaozi kha phia la na vaw thie tua, “Chyhsa zy ta chanô thiepa a châ,’ eina tah lei nawpa ta,” tah ta. Chatawhcha a satliapa chata chhô pahlie ta, thi haw ta.

55 Chatawhcha Izarel sahlao zy chata Abimeleka cha a thi tahpa ama thei pata nahta, chyhsa to ama o lâta a di chyu ei ta.

56 Abimeleka ta a unawhpa zy sysari thie ta, a paw chô liata a taona zie kyh liata a moleina kha Khazohpa ta cha hawhna chata viari a thô hrapa a châ;

57 Sekhe khih liata chyhsa zydua moleina zydua kha Khazohpa ta viari thô ta, chatawhcha Zerubaal sawchapawpa Zôtha chhiesana kha ama chô liana chata a vaw tla. 

Ryureihtuhpazy (Judges)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21