Zephatha nata Ephrai
1 Ephrai mozy cha ahmaohpakhy ei ta, maw lâ pangaipa ta sie ei ta, Zephatha hnohta, “Khazia e, Amawna pathlazy adyuh awpa ta a vy chi ta, na hnohta sie awpa ta maniah na hrua vei? Na o liata eima cha raopa aw,” tah ei ta.
2 Zephatha ta ama hnohta, “Amawna pathlazy he ei chyhsa zy nata thata adyuh pi ta, bie eima cha tah nona khata, ama ku tawhtapa maniah pachha tlôh eichi va.
3 Nâmo ta na pachha khoh vei eichi tahpa ei pahno pata nahta, thi’pa pachâ leipa ta y na ta, Amawna pathlazy adyuh awpa ta pua na ta, chatanachata ABEIPA ta âmo cha ei ku liata na pie haw ta; chavâta khazia e, nâ dyuh awpa ta atanoh he nama vaw pua?” tah ta.
4 Zephatha chata Kilia chyhsa zydua cha pakhy ta, Ephrai mo cha a dyuh ta; “Nâmo Ephrai pho a râpa sahlao, nâmo Kilia mo, Ephrai mo hry liata nata Manase mo hry liata a hlaohlipa sahlao rôhnah,” ama tah tyhpa vâta.
5 Kilia mozy chata Ephrai mo a daih lâ Zawdâh chakapa zy cha patu ei ta. Chatanachata Ephrai mo a râpa zy chata, “Eima vaw chaka aw,” ama tahna maihta, Kilia mozy chata a hnohta, “Ephrai mo na châ ma?” tah lymâ ei ta. Ano ta, “Châ va na,” a tah khiahtala,
6 a hnohta “Shibôle, tah tua,” tah ei ta, chatawhcha ano chata, “Sibôle,” tlao tah ha tyh ta, a reipasia thai tyh tlôh leipa vâta patu ei ta, Zawdâh chakana liata vaw thie lymâ eita, cha daihti liata Ephrai mo cha thy palih nata sâh no thie ei ta.
7 Zephatha chata Izarel mo chô liata kô charu ryu reih ta. Kilia chyhsa Zephatha cha thie ta, Kilia râh liata ano khih miakha liata pabu ei ta.
Ibza, Elawna nata Abdaw ta Izarel ryu ama reih
8 Cha hnôh lâna chata Bethlehe khihpa Ibza ta Izarel mo chô liata ryu reih ta.
9 Cha chyhsa chata sawchapaw nata sawchanô sythôh rairieh hnei ta. A sawchanônô sythôh zy cha râh hro lâ dyhchâ ei ta, a sawchapawpa zy chata râh hropa chyhsa laihsa sythôh lapa hra ta. Izarel mo chô liata kô sari ryu reih ta.
10 Ibza cha thi ta, Bethlehe khih liata pabu ei ta.
11 Cha hnôh lâna chata Zebulawna chyhsa Elawna ta Izarel mo chô liata kô hrawh ryu reih ta.
12 Zebulawna chyhsa Elawna cha thi ta, Zebulawna râh liata Aizalô khih liata pabu ei ta.
13 Cha hnôh lâna chata Piratho chyhsa Hilel sawchapawpa Abdaw ta Izarel mo chô liata ryu reih ta.
14 Ano chata sawchapaw sypalih nata samoh sythôh, alâ taw sysari chô liata a kiah tyhpa hnei ta; Izarel mo chô liata kô charie ryu reih ta.
15 Piratho chyhsa Hilel sawchapawpa Abdaw cha thi ta, Ephrai râh Amale mozy tlâh râh liata Piratho khih liata pabu ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |