Zephatha ta Amawna mo ku tawhta Izarel mo a pachha
1 Kilia chyhsa Zephatha cha, chyhsa thatlôpa riahphapa châ ta, a paw cha Kilia a châ, a no cha sihryhpa a châ.
2 Kilia lahpinô chata sawchapaw zy sapa ta; a lahpinô sawchapawpa zy cha ama pitloh nahta Zephatha cha papua ei ta, a hnohta, “Nâma la eima paw o ryu to thei aw va chi; chanô hropa liata saw châ tlôh chi ta,” tah ei ta.
3 Chatanachata Zephatha cha a unawhpa zy tawhtapa cha a râ syulyu haw ta, Tôba râh liata y ta; Zephatha hnohna chata chyhsa chakhypa zy y pakhy ei ta, zi tyh ei ta.
4 A noh hro via ta cha Amawna pathlazy chata Izarel mozy a dyuh ei ta.
5 Amawna pathlazy chata Izarel mozy cha amâ dyuh nahta, Kilia mo machâ zy cha Tôba râh liatahpa Zephatha a chhi awpa ta pua ei ta;
6 Zephatha hnohna chata, “A vy la, Amawna pathlazy eimâ dyuh thei nawpa ta eima hyutuh chaipa ta y mah y,” tah ei ta.
7 Châhrasala Zephatha ta Kilia machâ zy hnohna chata, “Nâ hao ei ta, ei paw o tawhtapa cha eina papuapa eichi châ vei mâ? Kheihtazie ta e, nama nôpo pata nahta kei lâta namâ vy?” tah ta.
8 Kilia machâ zy chata Zephatha hnohta, “Cha vâna tlai chata atahmâ he nâma lâta eimâ vaw heih, Amawna pathlazy adyuh awpa ta eima hnohta na sie thei nawpa ta, Kilia râh liata a ypa zydua chô liata eima hyutuhpa ta na y aw,” tah ei ta.
9 Zephatha ta Kilia machâ zy hnohna chata, “Amawna pathlazy adyuh awpa ta na padisa heihpa ta, ABEIPA ta âmo cha eina pie khiahtala, nama hyutuhpa ta ei y tlai aw,” tah ta.
10 Kilia machâ zy chata Zephatha hnohta, “ABEIPA cha eima likawh liata pahnotuhpa a châ aw; na bie hawhta eima tao tlai aw,” tah ei ta.
11 Chatanachata Zephatha cha Kilia machâ zy hnohna chata sie ta, chyhsa zy chata hyutuhpa ta nata pawhrâh chaipa ta tao ei ta; Zephatha chata Mizpah khih liata ABEIPA hmiakô liata bie to reih ta.
12 Chatawhcha Zephatha ta Amawna pathlazy abei hnohna chata, “Kheihtazie ta he hawhta ei râh adyuh awpa ta kei lâta a vypa ma na châ tly?” tahpa ta lyuhchâpa tuah ta.
13 Amawna pathlazy abei chata, “Izarel mo Izi râh tawhta ama vaw pua nona khata ei râh ama lapa vâta Arnaw tawhta Zabaw nata Zawdâh taihta; chavâta cha râh zy cha a naota ta na vaw pie heih teh,” tahpa ta Zephatha lyuhchâpa zy cha a chhy ta.
14 Zephatha ta Amawna pathlazy abei hnohta lyuhchâpa tuah heih ta,
15 a hnohta, “Zephatha ta he tana heta a tah: Izarel mozy ta Môaba râh lapa leipa ei ta, Amawna pathlazy râh chhao lapa hra veih ei,
16 Izi râh tawhta ama vaw puana Tilaipi Saihpa taihta, râhpathohpa kha sie palâh ei ta, Kadesa kha ama tlô.
17 Izarel sahlao ta Edôma abei hnohta, ‘Ngiachhiepata ta na râh sie pakhô ei sih y,’ tahpa ta lyuhchâpa tuah ei ta, châhrasala Edôma abei chata nahthlie khoh leipa ta. Cha hawhna hra chata Môaba abei hnohta tuah heih ta, châhrasala â ryh tah leipa ta. Chatanachata Izarel mozy cha Kadesa liata y haw ei ta.
18 Chatanachata râhpathohpa cha sie palâh ei ta, Edôma râh nata Môaba râh cha chahlô ei ta, Môaba râh nochhi lâchhâh ta sie ei ta, Arnaw hiakha lâta ariena su tao ei ta; Môaba râh chhôh liata cha angia leipa ei ta, Arnaw cha Môaba râhri cha tlô ta.
19 Chatawhcha Izarel mo ta Amawri mo abei Sihaw, Hesbaw abei lâta lyuhchâpa tuah ei ta; Izarel mo chata a hnohta, ‘Eima su lâta sie nawpa ta ngiachhiepata ta na râh sie pakhô ei sih y,’ tah ei ta.
20 Châhrasala Sihaw chata Izarel mo cha a râh sie pakhô awpa ta ngâh thei leipa ta; Sihaw chata a chyhsa zydua pakhy ta Zahaza khih liata ariena su tao ei ta, Izarel mo cha a dyuh ta.
21 ABEIPA Izarel zy Khazohpa ta Sihaw nata a sahlao zydua cha Izarel mozy ku liata pie ta, thie ei ta; chatanachata Izarel mozy chata cha râh, Amawri mozy yna râh zydua cha hnei khai ei ta.
22 Amawri mo râhri zydua Arnaw tawhta Zabaw taihta, râhpathohpa tawhta Zawdâh taihta, hnei khai haw ei ta.
23 Chatanachata ABEIPA Izarel zy Khazohpa ta a chyhsa Izarel mozy hmiakô liata Amawri mo cha chhupa ta, nâma ta na hneipa theina kyh a y ma? ABEIPA eima Khazohpa ta eima hmiakô liata a chhu papazy cha eima hnei aw.
25 Môaba abei Zipô sawchapawpa Balaka hlâta na tlô via ma? Ano chata Izarel mozy cha patypamâpa ta â dyuh beih ma?
26 Izarel mo Hesbaw liata a khihchapei liata zy, Arôera nata a khichapei liata zy, Arnaw râhri daih lâ khihpi zydua liana zy chata kô za thôh tlai ama y nona khata, khâpa vâta la leipa ta a y thlâh hapa ma na châ?
27 Chavâta na chô liana heta hmo khâpahmah parao va na, nâma heta nâ dyuh einâ chhuahpa vâ chi ta, ei chô liana heta hmo tlao na parao; ABEIPA ryureituhpa chata atahmâ he Izarel pathlazy nata Amawna pathlazy likawh liata bie cha pachâ mawh sy, a tah,” tahpa ta.
28 Châhrasala Amawna pathlazy abei chata Zephatha bietapa cha nahthlie khoh leipa ta.
29 ABEIPA Thlahpa cha Zephatha liata vaw tlô ta, Kilia nata Manase râh sie pakhô ta, Kilia râh liata Mizpah sie pakhô ta, Kilia râh Mizpah tawhna chata Amawna pathla hnohna chata sie lymâ ta.
30 Zephatha chata ABEIPA lâta chhie sa ta; “Amawna pathlazy he ei ku liata eina pie tlai chi khiahtala,
31 Amawna pathlazy tawhtapa thlalôhpa ta ei di heih tina chata khâparai ei chhikao tawhta na dy tuachaipa maih cha ABEIPA châta châ aw ta, raopa hlâna ta ei hmâh tlai aw,” tah ta.
32 Chatanachata Zephatha cha Amawna pathlazy a dyuh awpa ta sie ta; ABEIPA ta a ku liata pie haw ta.
33 Arôera tawhta Minia taihta a dyuh lymâ ta, khih syno tlai, Abelkremi taihta thie ta. Chahawhna chata Amawna pathlazy cha Izarel pathla hmiakô liana chata panawhsapa ta y haw ei ta.
Zephatha sawchanônô.
34 Chatawhcha Zephatha cha a yna Mizpah khih liata a o châ tlôh ta; a sawchanônô chata khoh chyhpata ta zy nata lâpa ta vaw dy ta; a saw matlupa châ ta; ano leipa cha sawchapawpa nata sawchanô hropa rai hnei vei.
35 Chatawhcha ano a hmô pata nahta a poh zy hrie ta, “A pei rimâ cha, ei sawchanônô! Eina panawh ngaita chi, ei nô na papotuhpa hry liatahpa na châ haw; ABEIPA lâta bie a taih haw tlôh na ta, cha cha a pathlei theipa châ khao va na,” tah ta.
36 Ano chata a hnohta, “Ei pâ y, ABEIPA lâta bie a taih haw chi ta, nâ taihpa hawhna tlaita, ei chô liata na tao awpa a châ, ABEIPA ta na khakhaipa Amawna pathlazy chô liata tlaita na phuh la haw tlôh ta,” tah ta.
37 Chatawhcha a paw hnohna chata, “He tana heta ei tao aw, thla no chhôh cha keima deita ta y aw na ta, tlâhzy lâta a khiekhâ aw na ta, ei laihsana he mâchhie ei sa aw na, keima nata ei viasa zy chhaota,” tah ta.
38 Ano chata, “Sie mah y,” tah ta. Thla no hawh awpa ta tuah ta; pua haw ta, ano nata a viasa zy chhaota tlâh zy lâna chata a laihsana cha mâchhie sa ta.
39 Thla no tawhna chata a paw lâta a di heih ta, ano chata chhie a sa hawpa hawhna khata a chô liata tao ta. Chapaw ahyhmah ta a pahno pathei vei.
40 Izarel mozy hry liana chata Izarel sawchanô zy ta Kilia chyhsa Zephatha sawchanônô cha kô tato ta noh palih mâchhiesana yzie ta hnei haw ei ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |