Isai 9
Adyhna Beipa pihna nata ryureina
1 Châhrasala thlazohpa ta a y hawpa châna chata thazeina rai y khao aw vei. Hlâno ta cha Zebulawna nata Nathalai râh cha nawhtawpa ta paysa ta, châhrasala a hnôh lâta cha a rôhnah ngaitapa ta a paysa haw. Tilaipi siena lâ Zawdâh haosâ lâ phopizy Kalili cha.
2 Chyhsa zohna liata a chareipazy chata khaih ngaitapa ama hmô haw; thina nohpahli râh liata a pahrâpazy, chô liana tlai chata a khaihna a vaw khaih haw.
3 Ama thaphana zy papôh haw chi ta, alyna tha tlaita âmo na pie; sâhria nota thaphapa hawhta na hmiakô liata thaphapa ta y ei ta, chyhsa hraona sôh a rai ei ta, ama thaphapa hawh tlaita.
4 A phaohrina raopaky nata a ngiatlâh liata la, a pasaipa-ituhpa byuthôh cha Midia sahlao pahnie noh hawhna khata parao pa haw tlôh chi ta.
5 Kalihpitopa ta chariah chysia a tobina zydua nata chysia thisaih nata a pahlaopahlipa zydua cha raopa ta mei liata raopa châta deita châ tlôh ta.
6 Eima châta hawti vaw pih ta, sawchapawpa pihpa ta y haw pi ta; ryureina cha a ngiatlâh liata a pahnieh aw ta, a moh cha “Ryhraotuh Noâhchhihpa, Khazohpa Thatlôpa, Chhâzaw Paw, Dyhna Beipa,” bi tlôh aw ei ta.
7 Davi abeidyuchhai chô liata nata a khihnarâh chô liata ryureina pôhzie nata adyhna chhâna y beih aw vei, pa-i awpa nata atahmâ tawhta chhâzaw taih chhaota pachiana nata siana liata padua awpa ta. Pheisaihzy ABEIPA tiamana chata chazy cha a tao aw.
Izarel chôta Abeipa hiehâhna
8 ABEIPA ta Zakaw sahlao lâta bie paphao ta, Izarel sahlao chô liata tla aw ta;
9 chyhsa zydua cha panawhpa ta y aw ei ta, Ephrai nata Samari liata a pahrâpazy, apalaipa nata pathipalôh chapuachaluahpa ta:
10 “Beileitlo mei ta rao chiehpazy cha cho hra sala, lô châpa daihpa ta eima sa aw; theiku kôzy cha thlupa ta y hra sala, sidy thozy ta eima thla aw,” a tahtuhpazy chata ama pahno aw.
11 Chavâta ABEIPA ta Rezi adyuhtuhpazy cha ano adyuh awpa ta pasyu aw ta, ama khakhaipazy a pathyu aw.
12 Nochhi lâta Suria mozy, notla lâta Philistina mozy, pakah âpa ta Izarel sahlao ama palâ khai aw. Chata tluta a tahpa chhao chata a hiehâhna cha pai tlôh leipa ta a ku cha khâ pathla ta.
13 Châhrasala chyhsa to chata âmo atutuhpa lâ cha a hei heih hlei leipa ei ta, Pheisaihzy ABEIPA cha tlua hlei veih ei.
14 Chavâta ABEIPA chata Izarel sahlao tawhna chata a luh nata chaolahmei; bakô chiah nata lothi chhao noh kha ta tai aw ta,
15 machâpa nata zachhihpazy a luh cha châ ei ta, haipa bie a pachu tyhpa hrohsopa zy cha chaolahmei ama châ;
16 he chyhsazy a chhihthatuhpazy ta paviasa ei ta; ama chhihthapazy cha pahleipadiapa ta ama y.
17 Chavâta ABEIPA cha ama satliazy chô liata aly leipa aw ta, ama hârapazy nata nôhmeipa zy cha ngiachhie hra aw vei; ama zydua ta haiphiapa nata hmo moleina a taotuhpa sai châ ei ta, pakah to chata bie hrao leipa reih chyu tlôh ei ta. Chata tluta a taopa chhaota a hiehâhna cha pai tlôh leipa ta a ku cha khâ pathla ta.
18 Hmoparaona cha mei hawhta kâ tyh tlôh ta, bôhbaw nata ahlohzy cha a tlôna taih a kâ; râhpathohpa tho phi kalupazy liana chata kâ ta, a khu chôlâ a charihpa ta a kiah tyh.
19 Pheisaihzy ABEIPA hiehâhna vâta râh cha a raona taih kâ ta, chyhsazy chhao mei liata ti awpa tho hawhta châ ei ta; ahy hmah âmo unawhpa chhao pahlôh veih ei.
20 Chyhsa ta ama chachâh lâ tahpa chhu aw ei ta; ama chavei lâ tahpa nie aw ei ta, châhrasala ama rih bie hlei aw vei; chyhsa to ta âmo bâh sapa ama nie chyu aw,
21 Manase ta Ephrai sahlao nie aw ei ta; Ephrai ta Manase ama nie aw, chatawhcha âmo pano chata hmaohkha ta Zudah sahlao amâ dyuh aw. Chata tluta a taopa chhaota a hiehâhna cha pai tlôh leipa ta, a ku cha khâ pathla ta.