Hrohsopa sawchapawpa mo
1 ABEIPA ta ei hnohta, “Châ rona phiapa la la, chyhsa kawlaw ta ‘Mahesalahebaza* châta,’ tahpa ta roh teh.
2 Chatanachata pahnotuhpa ngâchhihpa Uriah theihthaipa nata Zeberekia sawchapawpa Zekaria cha pahnotuhpa châta ei tao aw,” tah ta.
3 Chatawhcha hrohsonô hnohna chata a kei ngia na ta; ano chata saw phaoh ta, sawchapawpa sa ta, ABEIPA ta ei hnohta, “Ano moh cha Mahesalahebaza bi teh,
4 hawti cha, ‘Ei pâ,’ ‘Ei nâ,’ tahpa a pahno hlâ chhaota Damaska hneirôhna zy nata Samari hraona hmozy cha Asuria beipa hmiakô liata siekhei tlôh aw ei ta,” tah ta.
5 ABEIPA chata ei hnohta reih heih ta;
6 “He chyhsazy heta Shilôah tizy a naipa ta a lohpa cha ama khoh leipa vâta nata Rezi nata Remaliah sawchapawpa chô liata amâ lypa vâta;
7 chavâta ABEIPA ta âmo chôta Chavah ti chahrapazy nata hluh ngaitapazy Asuria beipa nata ano rôhnahna zie zydua tlai cha patlôsa thlu aw ta; a lona kao zydua cha khôpa ta a kiah zydua liata chhao a khô aw;
8 Zudah sahlao râh taihta sie palâh aw ta, vaopa ta khô hra aw ta, a rao taih tlai a pha aw; chatawhcha ano mathlaw pakaina zie zy cha hy Imanuel, na râh hâ lâ zydua cha a pabie khai aw.” tahpa ta.
9 Chi to saih u, he he pahno ula, paraokhaipa ta y aw eichi ta; râh hlapapi liata a ypa pho zydua saih u, nama nah pachôh ula; chariah chhaichhi a tao ula, paraokhaipa ta nama châ aw; chariah chhaichhi a tao ula, paraokhaipa ta nama châ aw.
10 A pahmaopa ta biezy pachia teh u, khâpa hmah châ aw vei; bie cha vaw reih teh u, a duah aw vei; Khazohpa cha eima hnohta y tlôh ta.
Abeipa cha na chi awpa châ se
11 ABEIPA chata ku thatlôpa ta he hawhna heta ei hnohta reih ta, he chyhsazy yzie liana heta ei sie lei nawpa ta na pachu hra ta:
12 “He chyhsazy ta pathaihpa ta amâ ngiahpa cha nâmo ta pathaihpa ta a ngiah hra khah u; ama china kyhzie chi khah u, riahchhiepa ta y hra khah u.
13 Châhrasala Pheisaihzy ABEIPA, ano tlai cha pathaihpa nama tah awpa a châ; ano cha nama chipa châ sala, na chipa chhao ano vaw châ hra se.
14 Chatawhcha ano cha su pathaihpa châ aw ta; Izarel sahlao chhôhkhapa miano châna deikua chata ahluana lô nata pakhâna lôpanô tlao châ aw ta, Zerusale a pahrâpazy chata khohei nata aphyh a châ hra aw.
15 Chatawhcha âmo hry liata a hluhpi ta a chapia aw ei ta; a hluahpa ta paraopa ta y aw ei ta; patupa nata lapa ta ama y aw,” tahpa ta.
16 Pahnosana bie he chaty aw na ta, ryhpa bie he ei pachupazy hry liata ei chahnaopa-i aw.
17 Kei chata Zakaw chhôhkhapa zy tawhta a hmia a nyutuhpa ABEIPA châ ha aw na ta, ei mokhâh aw.
18 Nahthlie teh, kei nata ABEIPA eina piepa sawnawzy he Izarel sahlao hry liata Pheisaihzy ABEIPA Zaio Tlâh liata pahnonazy châta nata noâhchhihna zy châta eima châ.
19 Chatawhcha chyhsa ta, “Lyurâhripa khazoh a hneipa nata dyuthaipa a hrâh ngaitapa nata chaeihchamyhpa cha a chhohia teh u,” ama cha tah tina chata, he tana heta a chhy teh u, chyhsazy ta ama Khazopa cha ama cha chhohia awpa châ vei mâ? Ahrohpazy chata athihpa amâ chhohia awpa a châ ma?
20 Ryhpa bie nata pahnosana bie cha he hawhna heta ama reih vei khiahtala âmo chata khih deih aw vei.
21 Nôpopa nata nodipa chôta râh cha chahryh aw ei ta, ama no a di tina chata ama pathi-ia aw ta, ama bei nata ama Khazohpa lâna cha chhie sa aw ei ta, avâ lâ ama ua aw;
22 chatawhcha alei lâ moh aw ei ta, nôpona nata zohna pachârôhna thazeina a châ aw; a zohna chhakalupa liata topa ta ama y aw.