1 Sia lei ngaitapa ta bie a raotuhpa zy, nata a do leipa ta a rohtuhpa zy cha ama hu a po na!
2 Nôhmeizy cha ama hraona ama vaw châ thei nawpa ta, nata paw hnei leipazy cha ama hmo lapa hawhta ama tao thei nawpa ta, dyhchhiepazy cha pachiana siapa pakhâkhâhsa awpa nata ei chyhsazy hry liata sipasapa hmo awpa rai lapa awpa ta.
3 Ama cha hriena noh liata nata lâhlapi tawhta roryhrana a vaw tlo awpa liana chata kheihta e nama tah aw tly?" Cha bao awpa ta ahy lâta namâ râ aw tly? Nama rôhnahna cha khataih liata nama siesai aw tly?
4 Patâhpa sahlao hry liata deita a boh aw ei ta, thihpa sahlao ry liata ama pao aw. Chata tluta a taopa chhaota a hiehâhna cha pai tlôh leipa ta a ku cha khâ pathla ta.
Abeipa ta Asuria a hmâ zie
5 Hy Asuria chyhsa, ei pathi-iana sôsi, ei palôh cha leina a cheihtuhpa chôhchahrei y!
6 Hraona hmo la awpa nata hmo lapa la awpa nata othliah chiatlao hawhta tly awpa ta ano cha haidihaiduapa phopi adyuh awpa ta tuah aw na ta, ei hiehâhna chyhsazy adyuh awpa ta bie ei pie aw.
7 Châhrasala ano chata cha hawhpa cha a chhuahpa châ leipa ta, cha hawhpa cha a pathipalôh ta chhao pachâ hra vei; châhrasala ano pathipalôh liata phopi hluh ngaitapa paraopa nata pahleipadiapa tlao a pachâ;
8 “Ei pheisaih hyutuhpa zydua he abei sai châ veih ei mâ?
9 Kalnô khih cha Kakhemi khih hawhta châ haw vei ma? Hama khih cha Arpa khih hawhta châ haw vei mâ? Samari cha Damaska hawhta châ vei ma?
10 “Ei ku heta khazoh nohthlahpa khihnarâh, Zerusale nata Samari liatahpa hlâta khazoh nohthlahpa athupa ta chapaipa ta tao chhyhpa pha viapa a hneipa zy chhao hmô haw tlôh ta,
11 Samari nata a khazoh nohthlahpazy chô liata ei taopa hawhta, Zerusale nata a khazoh nohthlahpazy chô liata chhao tao hra aw va na ma?” tah tlôh ta.
12 ABEIPA chata Zaio Tlâh nata Zerusale chô liata rai hria awpa zydua a paloh tina chata, Asuria bei pathipalôh a palaipa theilâpa nata a moh pasâhsana rôhnahna cha ei hrie aw.
13 Ano chata: Ei ku thatlôna ta ei tao haw, ei sona ta chhao, kei cha so tlôh na ta; chyhsazy râhri zy pasie haw na ta, ama hmo sôhpa zy chho haw na ta, abeidyuchhai liata atyupa zy châ haw na ta.
14 Ei ku heta chyhsazy hneirôna zy cha pavaw bu hawhta hmô ta, chyhsa ta pavaw ti a panô a thyusaipa ama lapa hawhta leilô pahrâpa zydua ei pakhy khai haw ei; mathlaw a chakhypa tlyma, pakah a âpa tlyma, a sapa tlyma rai chhao y veih ei,” tah tlôh ta.
15 Ahrei heta a chaina châta a hmâhtuhpa lâta a palai aw ma? thoâna heta a hmâhtuhpa lâta a mohnao aw ma? sômasi ta a chabatuhpa tlao a hmâpa hawhta tlyma, chôhchahrei ta tho a châ tlôh leipa tlao a hmâpa hawhta tlyma deita he a châ.
16 Chavâta Abeipa Pheisaihzy ABEIPA chata a chyhsa hri-ia pathaihpa adyuh awpa ta hri tuah aw ta; a chhôh liata chasipa mei cha a kâ haipa hawhna heta patipa ta a y aw.
17 Izarel sahlao khaihna cha mei châpa ta châ aw ta, ama Moh Pathaihpa cha mei paleih châpa ta a châ hra aw; cha chata noh noh khata ahlohzy nata bôhbawzy cha kâpa ta a pahleipadia aw.
18 A râhhmâhpa nata a pathei kawpa rôhnahna su chhao cha a pôhpa tlokhuh ta ABEIPA ta pahleipadia aw ta; a tlâh leipa a panao daihti no hawhta a châ aw.
19 A râhhmâhpa liata tho a y tlakaihpa zy cha hawtipa rei khi deita a châ aw.
Izarel laibâhpa zy
20 Cha noh liana chata Izarel sahlao a laibâhpa zy nata Zakaw chhôhkhapa a râpa zy chata âmo a thietuhpa cha ngâh heih khao leipa aw ei ta, ABEIPA Izarel sahlao Mo Pathaihpa cha hmeihseihta ta ama ngâh ha aw
21 A laibâhpa Zakaw sahlao a y tlakaihpazy cha Khazohpa thatlô ngaitapa lâna chata ama kua heih aw.
22 Na chyhsa Izarel sahlao cha tilaipi sadi tluta châ hra ei sala, a y tlakaihpazy deita cha kua heih tlôh aw ei ta, Siana khô pathlahna paraona cha tlô awpa ta liahsa raopa a châ.
23 Abeipa, Pheisaihzy ABEIPA chata chhâna tlô tlai awpa ta raopa cha alei chô zydua lialiah liata tao tlôh aw ta.
24 Chavâta Abeipa, Pheisaihzy ABEIPA ta he hawhna heta a tah: “Hy ei chyhsa, Zaio liata a pahrâpa saih u, Izi râh liata ama taopa hawhna khata sômasi ta cha chheipa ta a chôhchahrei cha nâmo chô liata chalo hra sala Asuria chyhsa cha chi khah u.
25 Bohpi leipa tawhta palôh châ leina cha pahleipa ta y aw ta, ei hiehâhna chhao âmo pahleipadiana ta pahleipa ta a y hra aw.
26 Ôreba lôpanô liata Midia sahlao ama thie no awhta Pheisaihzy ABEIPA chata ano chheina vaw pathyu aw ta; Izi râh liata a chalopa hawhna khata.
27 Cha noh liana chata a phaohri cha na ngiatlâh tawhta la aw ta, a raopaky cha na rao tawhta a la hra aw, sathaw thupa vâna chata raopakypa cha pahleipa ta a y ha aw,” tahpa ta.
Asuria mo siehnaona zie
Rimô tawhna chata adyuhtuhpa cha a khy ta,
28 Aiatha khih a tlô haw; Mikrô khih a sie palâh haw, Mikmasa khih liata a hmo soh ta;
29 siena liata ama sie haw. Keba khih a rie ei ta; Ramah khih mo sahlao cha a chalyu ei ta, Sawla Kibia sahlao cha ama râpai haw.
30 Hy Kali khih sawchanô y, na ao ta a paropa ta awh teh! Hy Laisah khih y nahthlie teh! Anatho khih y, ngiachhie nâ chhi kaw dia!
31 Mamenah khih sahlao amâ râpai haw, Keba khih a pahrâpa zy cha a râpai a chhuahpa ta amâ pahmaohpakhy.
32 Atanoh tlai heta Nôba khih liata a châ aw. Zaio sawchanô tlâh Zerusale tlâh byuhpa cha a ku a cha tho thlu.
33 Pachâ tua, Abeipa Pheisaihzy ABEIPA chata hmo rarôh y ngaitapa ta a chiahzy chhawh pathla haw ta; a sâh ngaitapa zy cha thlupa ta y aw ta, a seih patluapazy chhao cha pahnaipa ta a y aw.
34 Thua ta râhhmâhpa tho phi kalupazy cha thlu aw ta, Lebanaw thozy cha chyhsa rôhnahpa thlupa ta a pao aw.