Isai 1

Isai 1

Pho moleipa

1 Amôza sawchapawpa Isai ta Zudah sahlao bei Uziah zy, Zawtha zy, Ahaza zy, Hezekiah zy abei nota Zudah sahlao nata Zerusale kyh liata aluahna a hmôpa cha.

2 Hy avâzy saih u, nahthlie ula, hy leilô nah pachôh teh; ABEIPA chata bi a reih na; “Sawzy a kukheipa ta palaiseih na ta, ei chô liata aty haw tlôh ei ta.

3 Viahchao tôhpa ta a hneituhpa pahno ta, alâ chhaota a puhpa laopiena pahno hra ta; Izarel sahlao deikua chata pahno tlôh leipa ei ta, ei chyhsazy chata pachâ hra veih ei,” tahpa ta.

4 A! phopi moleipa, hmoparaona a hri ngaitapa a phaohpa chyhsa zy, hmo moleina a taotuhpa chi zy, a chhie ngaitapa ta a taopa sawzy ama châ! ABEIPA cha siesai ei ta, Izarel sahlao Mo Pathaihpa cha nawhtaw ei ta, a pananopa ta hnôh lâ amâ sy haw.

5 Khazia aty via rilipa ta hriepa ta khâ nama y tly? Luh cha a pôhpa duata pasa ta, pathipalôh chhao cha a pôhpa duata a panawh haw.

6 Pheipazah tawhta luh tai tlaita tlâhna rai y vei, hmah zy, thidôna zy, hnia a khaohpazy sai a châ; chazy cha bie leipa ta, chahry hra leipa ta, sathaw hnia hra veih ei.

7 Nama râh cha rohryhrapa ta y ta, nama khihpi zy cha mei ta kâ khai haw ta; nama râh cha khichhaipazy ta nama mohmô liata nie khai ei ta; khichhaipazy paraopa hawhta, roryhrapa ta a y.

8 Zaio sawchanônô cha kresahdô liata byureih hawhta, athei sahdô liata chapu hawhta, nata khihpi padôhpa hawhta sisaipa ta y haw ta.

9 Pheisaihzy ABEIPA ta a laibâhpa maniah a pahlôhpa leipa khiahtala, Sawdawma hawhna khata y ha aw pi ta, Kawmawra hawhna khata eima y ha aw.

Ro hmeihseih awpa ta hruana

10 Sawdawma ryureituhpazy saih u, ABEIPA bie he thei teh u! Kawmawra mo saih u, eima Khazohpa pachuna bie lâna heta nama nahkhao pachôh teh u!

11 “Nama atheihna hluh ngaitapazy he, ei châta khâpa a phahnai? ABEIPA ta a tah. Mietahkupa tôhpa raona hlânazy nata pasapa sahroh thawpa thaw chata ei bie haw; viahchao tôhpa zy, mietahkupa tawzy nata mie tôhpa zy, thisaih liata chhao aly va na.

12 “Ei hmiakô liata aluah awpa ta namâ vy nona heta, ei dôhpachhôh tlyhmia tlypa he ahy e châ hnaw ei?

13 Khâpa hrao leipa atheihna zy vaw cheih khao khah u; Khâpa leipa rohpahâhpa cha ei châta pasichhih ngaitapa a châ. Thla thiehpa zy, pahânoh zy, pakhypi liata hrua pakhynazy hmoparaona nata pakhyna rôhnah ngaitapa chhao he chhyh thei khao va na.

14 Nama thla thiehpazy nata nama daihti hneipa kuzy cha ei palôhrupa chata â hao; ei châta phaohri ngaitapa a châ, mao-oh thei khao va na.

15 Nama ku nama pazawh tita chhao, nâmo tawhtapa ei mo chahu aw na ta: ei hluhpi thlah nama chhâ tita chhao, nathli khao awh va na; nama kuzy cha thisaih ta bie tlôh ta.

16 A si ula; pathaipa ta y teh u; ei mohmô tawhta nama hmo moleina taopazy pahlei ula; hmo moleina tao khao khuh vy,

17 a phana kyh a chu teh u; pachiana siapa tlua ula, pasaipa-ina a taopazy cha bao ula; paw hnei leipazy cha pachha ula, nôhmeizy cha reikhei teh u.

18 “A vy tua u, pachâ khoh tua ei suh u. ABEIPA ta a tah: nama moleinazy sailaw hawhta saih hra sala, dâhaw hawhta, a ngyuh aw; saidôhpa hawhta saih haw hra sala, mietahkupa hmi hawhta a y aw.

19 A phapa ta nata rei a ngiahpa ta nama y khiahtala, râh phana he nama nie aw;

20 châhrasala a ngiah leipa ta nama y khiahtala, zaozi ta pahleipadiapa ta nama y aw; ABEIPA pakah chata cha cha a reih haw,” tah ta.

Zaio pachiana nata chatlaina

21 Kheihta zie ta e khihpi ngâchhihpa cha sihrypa lâta a vaw châ haw tly, pachiana siana ta a biepa a cha tyhpa tlai! Ano liana chata siana y tyh ta, atahmâ deikua chata lianycheituhpa zy tlao ama y haw hih.

22 Na tâkâ cha syu-ie lâta a lie haw ta, na kresawti cha ti pahlaopa a châ haw.

23 Nâ abeisawzy cha aty hmâhpa, parutuhpazy viasa châ ei ta. Chyhsa to ta hmosaipiepa khoh ei ta, lymâ amâ chadai tyh. Paw hnei leipazy pachia tyh leipa ei ta, nôhmeizy bie ama hnohta tlô beih vei.

24 Chavâta Abeipa, Pheisaihzy ABEIPA, Izarel sahlao Thatlôpa chata: “A, nâ dyuhtuhpazy he papai aw na ta, ei khakhaipazy chô liata phuh ei la aw.

25 Na chô liata ei ku pathla aw na ta, na syu-i cha a siapa ta pahlei awna ta, na thua iechhiepa cha ei pathaisa aw.

26 A hmiatuapa hawhna khata na ryureituhpazy nata na ryhraotuhpazy cha a thaona liata ama ypa hawhna khata ei paysa heih aw. Cha hnôh lâna chata siana khihpi, khihpi ngâchhihpa bipa nama châ aw.”

27 Zaio cha pachiana siapa ta chatlaipa châ ha aw ta, molei a ropa chhao siana ta chatlaipa ama châ aw.

28 Châhrasala hmoparaopazy nata moleipazy pahleipadiana cha hmaohkha ta y aw ta, ABEIPA a siesaituhpazy chhao pahleipadiapa ta ama y hra aw.

29 Nama oaka thokô kho ngaitapazy cha zakhei aw ei ta; nama sahdô a tlypazy vâna chata noza ngaitapa ta nama y aw.

30 Oaka thokô a hna a uah hawpa, nata sahdô ti a hnei leipa hawhta y tlôh aw eichi ta.

31 Chatawhcha thatlôpa cha lâpi hawhta châ ha aw ta, a raihria cha meihli hawhta a châ aw, chatanachata kâ rairieh aw ta, ahy hmah ta pachhai aw veih ei. 

Isai (Isaiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52	Bo 53	Bo 54	Bo 55	Bo 56
Bo 57	Bo 58	Bo 59	Bo 60	Bo 61	Bo 62	Bo 63
Bo 64	Bo 65	Bo 66

Isai 2

Isai 2

Khizaw liata Abeipa ta adyhna ta ryu a reina(Mik 4:1-3,)

1 Amôza sawchawpa Isai ta Zudah nata Zerusale kyh a hmôpa bie cha.

2 Noh hnôh lâna chata he hawhta vaw tlô aw ta, ABEIPA o yna tlâh cha tlâh laipazy chô liana chata pa-ipa ta y aw ta, tlâh chyhpazy chô liana chata palaisapa ta a y hra aw; cha liana cha phopi to cha ama loh aw;

3 chatawhcha chi hlupi cha a vy aw ei ta,” A vy ula, ABEIPA tlâh lâ, Zakaw Khazohpa o lâna chata khy suh vy; ano ta lâpi thâtihzy cha maniah pachu aw ta, a lâthlôhzy liana chata eima sie aw,” ama tah aw. Zaio tlâh tawhta ryhpa bie vaw pua tlôh aw ta, ABEIPA bie cha Zerusale tawhta avaw pua aw.

4 Ano chata phopizy likawhta ryureih aw ta, chi hluhpi chhao a ra hra aw; ama zaozi cha aleipaliena hmaopazaohpazy lâta nata ama aseizy cha savâzy lâta ama daih aw; phopi cha phopi hropa chô liata zaozi chalo khao leipa aw ta, adyuhna kyh chhao achu khao hra aw veih ei.

A palaipazy chôta Abeipa pachiana

5 Hy Zakaw chhôhkhazy saih u, a vy ula, ABEIPA khaihna liata charei ei suh vy.

6 Ama râh cha sôhdaopazy ta bie ei ta,Philistina mozy hawhta reikiapa châ ei ta,pho hropazy ta su to liata ama ypa vâta,na chyhsa, Zakaw chhôhkhazy cha siesai haw tlôh chi ta.

7 Ama râh cha tâkâ nata ngôh ta bie ta, ama hmo sôhpazy rei tiah lei châ ta; ama râh cha arâzy ta bie ta, ama talailizy rei tiah lei a châ hra.

8 Ama râh cha khazoh nohthlahpa ta bie ta; ama ku ta ama hriapa, ama kudyzy ta taopa cha amâ chhy tyh.

9 Chyhsa nawhpazy cha panawhpa ta y ei ta, chyhsa laipazy cha panawhpa ta y hra ei ta: chavâta âmo cha a ngiahthai khah y!

10 ABEIPA china tawhta nata a beina zie rôhnahna tawhna chata, lôpanô liata a ngia ula, dohlei liata a nyu teh u.

11 Chyhsa akhona cha panawhsapa ta y aw ta, chyhsa apalaina cha panawhsapa ta a y aw, cha noh liana chata ABEIPA deita parôhnahsapa ta a y aw.

12 Pheisaihzy ABEIPA chata he zy chô liata chhiena noh vaw tlô awpa a hnei a pasâhsapa nata a palaipa zydua chô liata nata pasâhpa ta a ypa zydua chô liata zy;

13 Lebanaw liata sidy thokô a sâhpa nata pasâhsapa ta a ypa zydua chô liata zy; Basana liata oaka thokô zydua chô liata zy;

14 tlâh sâhpa chô liata zy, nata tlâh chyhpa pasâhsapa ta a ypa zydua chô liata zy;

15 o sâhpa chô liata zy, kuhdôhna a hneipa zydua chô liata zy;

16 Tasi balyh zydua chô liata zy, balyh khochhihpa zydua chô liata chhao a y aw.

17 Chyhsapa apalaipa zy cha panawhpa ta y aw ta, chyhsazy atahsana cha panawhpa ta a y aw;"cha noh liana chata ABEIPA deita pasâhsapa ta a y aw.

18 Chatawhcha khazoh nohthlahpa zy cha ama leidia khai aw.

19 Alei thata chalyu awpa ta a thyu tita ABEIPA chichhihna tawhta nata abeina zie rôhnahna tawhna chata, chyhsazy cha lôpanô lôpuzy liata nata alei khaohzy liana chata amâ ngia aw.

20 Cha noh liana chata chyhsazy ta ama tâkâ nohthlahpazy nata ama ngôh nohthlahpa zy achhy awpa ta ama tao papazy cha, bikalipazy hnohta nata pazu tâbâlâpazy hnohna chata thyu aw ei ta;

21 alei he thapi ta chalyu awpa ta a thyu tita ABEIPA chichhihna tawhta nata a beina zie rôhnahna tawhna chata lôpanô lôpuzy liata nata lôkâhpa lôpanô keipa zy liana chata amâ ngia aw.

22 Ama hnapasu liata deita husona a ypa chyhsapa ngâpa he bâhsai teh u, khâpa kyh liata ngâ tlâh ama châ tly? 

Isai (Isaiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52	Bo 53	Bo 54	Bo 55	Bo 56
Bo 57	Bo 58	Bo 59	Bo 60	Bo 61	Bo 62	Bo 63
Bo 64	Bo 65	Bo 66

Isai 3

Isai 3

Zudah nata Zerusale chôta Abeipa pachiana

1 Pachâ teh u, Abeipa, Pheisaizy ABEIPA chata Zerusale tawhta nata Zudah sahlao amâ ngâchhâ chaipa nata ama ngâ pachaipa amâ ngâchhâpa niepa zydua nata ama ngâchhâpa ti zydua cha a lapa hai hih;

2 chyhsa thatlôpa nata pheisaih zy, ryureituhpa nata hrohsopa, a pahno theipa, nata machâ zy chhaota;

3 sypangawh hyutuhpa nata chyhsa zachhihpa, ryhraotuhpa nata zôthaipa nata reikah a thaipa zy chhaota.

4 Chatawhcha ama abeisaw ta a y awpa ta hawti zy tao aw na ta, hawsaih zy ta âmo chôta ryu ama reih aw.

5 Chyhsa zy cha pasaipa-ipa ta ama y aw, chyhsa to a pasaipa-ipa ta y aw ei ta, chyhsa to âmo vaih nata apasaipa-ipa ta ama y aw; hawtipa cha machâpa chô liata apalai ngaitapa ta y aw ei ta, chyhsa chhiepa chhao chyhsa zachhihpa liata apalai ngaitapa ta ama y hra aw.

6 Chyhsa ta a unawhpa paw o liata patupa ta, “Nâ cha chysia hnei chi ta, eima ryureituhpa ta y la, he raona he na ku liata y mawh sy,” a tah tita;

7 cha nona cha ano chata a ao papua aw ta, “Kei la patlâhtuhpa ta y aw va na; ei o liata niepa y tlôh leipa ta; chysia y hra vei; chyhsa zy ryureituhpa ta na tao aw veih ei chi,” tahpa ta.

8 A rôhnahna mo rupachhô awpa ta ama rei nata ama hmotaopazy cha ABEIPA adyuhpa lâ a châpa vâta Zerusale cha rao khai haw ta, Zudah sahlao cha ama pao khai haw.

9 Ama hmia a lâna zie ta âmo lâta pahnosa tlôh ta; ama moleina cha Sawdawma hawh tlaita paluahsa ei ta, phih veih ei. Ama hro cha a hu a po na! Âmosasy ta raona a tao tlôh ei ta.

10 A siapa a phapa ama châna zie chho teh u, ama hmotaopa theilâpa cha nie tlôh aw ei ta.

11 Hmoparaopa cha a hu a po na! Ama rao aw, a ku ta hmotaopa viarithôna cha hmô tlôh aw ta.

12 Dyu pacheisatupazy ta ei chyhsa zy rie patheisa ei ta, Phusâ pacheisatuhpa zy ta âmo chô liata ryu ama reih haw. Hy ei chyhsa saih u, nama chhihthapa zy chata cha chhihtha pasi haw ei ta, nama siena lâpizy cha ama parao tyh.

13 ABEIPA cha reikhei awpa ta a vaw duah ta, chyhsazy pachia awpa ta a vaw duah haw ta.

14 BEIPA chata a chyhsazy machâ sahlao chô liata nata ama abeisawzy chô liata a pachia aw: “Kresahdô nie khaituhpa zy châ eichi ta, chyhsa dyhchhiepa zy tawhta hraona hmo lapa cha nama ozy liata a y.

15 Kheihta e, ei chyhsazy raona taih tupa ta nata dyhchhiepazy hmia cha nama charoh pazaopa he?” Abeipa Pheisaihzy KHAZOPA ta a tah.

Zaio sawchanônôzy chôta Abeipa ryureina

16 ABEIPA chata: “Zaio sawchanôzy atahsapa ama rao pahiepahâpa ta mokhaoh ta dôveipa ta chareipa ta, charei ngâpa nata la ngâpa ta, ama pheizy ta parona ama taopa vâta;

17 ABEIPA ta Zaio sawchanôzy luh patlysa aw ta, ABEIPA ta ama sâphaozy a tai hra aw,” tah ta.

18 Cha noh liana chata ABEIPA ta amâ tobina zy cha a lapa aw, ama phei liata paro theipa zy, sao lakhu zy, raopaky zy cha;

19 rahy pathliahpa zy, lâkyu zy, a khuna poh zy cha,

20 luh chahryna zy, phei hmobaoh bâlia zy, chaisaihna zy, rohpahâhpa byh zy, a chazeina zy cha;

21 kusadi zy nata hnapasu pataopa hmo sôhpa zy,

22 kyhchhi noh chysia zy, viahpakao pasihpa zy, poh rih dipa zy, sahria zy cha;

23 thlalâ zy, poh naipa zy, khutho zy, hmiakhuna zy cha.

24 Rohpahâhpa vyuhpa ta hmo thupa avaw y aw; chaisaina vyuhpa ta khawhri a y aw, sâ pamihpa vyuhpa ta luh pôlôna a y aw; poh a ngiapa vyuhpa ta lathopala poh a sai aw; chhithaina vyuhpa ta nozana a y aw.

25 Nama chyhsazy cha zaozi ta papaopa ta y aw ei ta, na chyhsa thatlôpazy cha adyuhna liata ama pao aw.

26 A kuh ochhizy cha ama chachôhna a chôpa ta mâchhiesapa ta y aw ei ta, ano cha rohryhrapa ta y aw ta, alei liata a tyu aw. 

Isai (Isaiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52	Bo 53	Bo 54	Bo 55	Bo 56
Bo 57	Bo 58	Bo 59	Bo 60	Bo 61	Bo 62	Bo 63
Bo 64	Bo 65	Bo 66

Isai 4

Isai 4

1 Cha noh liana chata chanô pasari ta chapaw pakha patu aw ei ta, “Keimo pati nie aw pi ta, keimo chysia zy eima ky aw, na moh deita maniah paphaosa teh; eima nozana maniah pahrupa teh,” tahpa ta ama rei aw.

Nohhro ta Zerusale a rôhnah nawpa zie

2 Cha noh liana chata ABEIPA cha a ngia ngaitapa ta nata rôhnah ngaitapa ta y aw ta, Izarel sahlao laibâhpazy chata alei liata theilâpa zy cha a pha ngaitapa nata a ngia ngaitapa ta a y aw.

3 ABEIPA ta pachiana thlahpa nata mei kâna thlahpa ta Zaio sawchanôzy puana cha a pasi khai nata Zerusale thisaih cha a chhôh tawhtapa a pasi khai tina chata,

4 Zaio liata a ypa nata Zerusale liata a ypazy cha pathaihpa ama tah aw. Zerusale liata a hrohpa zy hry liata moh a rohpa zydua cha.

5 Chatawhcha ABEIPA ta Zaio Tlâh liata pahrâna zydua chô liata nata ahmaohpakhypa zydua chô liana chata nohchhô ta meihdo nata meikhu, zâ ta mei kâ ngâpa khaihna a taopa aw; cha chô liata khuna cha rôhnahna châ tlôh aw ta.

6 Nohchhô ta noh sa a pahlituhpa châta nata thlihpipa nata vâsua tawhtapa a pabohna nata a nyuna su byureih a châ aw. 

Isai (Isaiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52	Bo 53	Bo 54	Bo 55	Bo 56
Bo 57	Bo 58	Bo 59	Bo 60	Bo 61	Bo 62	Bo 63
Bo 64	Bo 65	Bo 66

Isai 5

Isai 5

Kresahdô pakhona

1 Ei kho ngaitapa kyh, Kresahdô kyh cha ei kho chaipa châta ei sa aw: Ei kho chaipa chata tlâh alei pha ngaitapa liata kresahdô hnei ta.

2 A chheipâh ta alei chao ta, alôzy a siapa ta a huah ta, krezô pha chaipa loh ta; a liah liana chata o sâhpa sa ta, cha liana chata kre saona khaoh chao ta; kre thei pathei awpa ta a hnabeiseih ta, châhrasala kre patah leipa tlao pathei ta.

3 Atahmâ he, hy Zerusale liata a pahrâpa zy nata Zudah chyhsa zy saih u, keima nata ei kresahdô likawh kyh he pachiapa ta ei châ haw ei.

4 Ei kresahdô liana heta ei taopa hleikhô ta, a chô liata khâpa e tao hei hlei awpa a y tly? Khâpa vâta ei kre thei ta pathei awpa ei hnabei a seih thlâ nata kre patah leipa ta a vaw pathei thlâh ha tly’?

5 Atahmâ ei kresahdô liata ei tao awpa ei cha chho aw ei. A dôhna cha la aw na ta, nie khaipa ta a y aw; alô sahdô cha pachô aw na ta, tly pâpa ta a y aw.

6 Pathaihparohpa ta paysa aw na ta, a chiah thlâpa ta y leipa aw ta, alei paliepa ta y hra aw vei, bobaw nata ahlohzy tlao a pyuh aw; meihdozy chhao vâsua rai a chô liata pasuasa lei awpa ta bie ei pie aw.

7 Pheisaihzy ABEIPA kresahdô cha Izarel chhôhkhazy he châ ta. Zudah chyhsazy he a thokô khochhihpa châ tlôh ta; pachiana siapa hnabeiseih ta, châhrasala thisaih palona tlao vaw y ta; siana a hnabei sei ta, châhrasala awna pyu tlao a vaw y haw!

Moleipazy châta hupona

8 Râh liah chhô liata âmo deita ama y awpa ta, chyhsa a hlao theina su rai y leina taihta, o nata o a pazao lymâpa nata lyu nata lyu a pazaosa lymâtuhpa zy hu cha a po na!

9 Pheisaihzy ABEIPA chata ei nahkhao liata he tana heta a tah: Hmeihseihta ta o hluhpi a lai ngaitapa, a ngia kawpazy cha pahrâtuhpa y leipa ta roryhrapa ta a y aw.

10 Kresahdô bai hrawh su liata bath kha, deita veih aw ta, sâh chi hômer kha tupa ta ephah deita veih tlôh aw ta,” tahpa ta.

11 Mydikari ta pari theipa dona ama zi thei nawpa ta a thyupa; kresawti ta a pari hlâ lei zâ taihta a ytuhpazy cha ama hu a po na!

12 Totâ nata totâ selao, paotlâ nata rah-mo nata kresawti chhaota ama kyhchhina zy liata y tyh ta; châhrasala ABEIPA hriana cha pachâ tyh leipa ei ta, a ku hmotaopa cha pachâ hra veih ei.

13 Chavâta ei chyhsazy cha pahnona ama hnei leipa vâta sei ta a chhipa ta y haw ei ta; ama chyhsa zachhihpazy cha nodipa ta thi ei ta, ama zawpizy cha dâhphipa ta ama thi.

14 Chavâta Sheôl chata a khona cha pakawh ta, a pakah thlie theipa rih a châ leina taihta a hra ta, ama rôhnahna zy, ama zawpi zy, ama palaina zy, ama hry liata aly ngaitapa ta a ypa zy chhaota cha liana cha za ngia haw ei ta.

15 Chyhsa nawhpa zy cha pabohpa ta y ei ta, chyhsa laipazy cha panawhpa ta y ei ta, apalaipa mokhaoh zy cha panawhpa ta y haw ta.

16 Pheisaihzy ABEIPA deikua cha pachiana liata pachônôsapa ta y haw ta, Khazohpa Pathaihpa cha siana liata liahsa pathaisapa ta y haw ta.

17 Chatawhcha mietahkupa tawzy cha ama bâna su liata bâpa hawhta y aw ei ta, chyhsa thawhpa pathaihparohpa su liata hmozy cha viavipa sahlao ta ama nie aw.

18 Khâpa hrao leipa khawhri ta hmo paraona a daophipa ta, talaili a daophina khawhri ta a daophipa hawhta moleina a daophipa zy cha ama hu a po na!

19 “Eima hmô thei nawpa ta tao parah sala, a hmotao awpa cha a chatliepa ta tao se; eima pahno thei nawpa ta Izarel sahlao Mo Pathaihpa ryraopa cha a vaw hniapa ta vaw tlô mawh sy!” a tahtuhpa ta cha.

20 Hmopha leipa cha hmophapa a tahpa, hmophapa cha hmopha leipa a tah tyhpa cha, a khaihna cha zohna ta a pachâpa, zohna cha khaihna ta a pachâ tyhpa, a khapa cha a thlôhpa ta, a thlôhpa cha a khapa ta, a pachâpazy cha ama hu a po na!

21 Âmo pachâ ta a sopazy nata âmo mohmô ta thai a tahpazy cha ama hu a po na!

22 Kresawti dôhna kyh liata chyhsa thatlô ngaitapa, sahhma pahlaona kyh liata tha a hneipa chyhsazy,

23 lymâ vâta moleina thai pachâsa tyhpa ta, a siapa siana a lapa tyhpa zy cha ama hu a po na!

24 Chavâta mei ta sawphaoh chuahmi a kâpa hawhta nata sibie raopa mei paleih liata a paopa hawhta, ama thari cha hmyna hawhta y aw ta, ama paw cha dohlei hawhta â zaw aw: Pheisaihzy ABEIPA ryhpa cha khoh leipa ei ta, Izarel sahlao Mo Pathaihpa bie cha ama nawhtawpa vâta.

25 Chavâta ABEIPA pathi cha chyhsa zy chô liata ia ta, a ku cha âmo chô liata tla ta, tu ta, chatawhcha tlâhzy cha a chalyu ta; ama rizy cha othliah liah liata zy hnaihny hawhta y hôlô ta. Cha tluta a tahpa chhaota a pathi-iapa cha pai tlôh leipa ta, a ku cha khâ pazawh thlâh ha ta.

26 Phopizy a hlapapi ta a ypa zy chata pahnosana chaluah aw ta, kaoki tawhtapa aw awpa ta a pahi aw; pachâ tua, âmo sahlao cha a chatlie ngaitapa ta amâ vy aw!

27 Âmo hry liata ahy hmahta ama thazei leipa aw ta, a pachhi hra aw veih ei; Ahy hmahta ama mo ku leipa aw ta, a mô hra aw veih ei; ama chakhai liata ama chaisaina cha pahuapa ta y hra leipa aw ta, ama pheiky hraina cha chi hra aw vei;

28 ama châtai zy tiah ta, ama libaw zydua a kei chiehpa ta y ta, ama arâ chakiezy cha meilô hawh tlaita pachâpa châ aw ta, ama talaili pheizy cha khisô hawh tlaita pachâpa a châ hra aw.

29 Ama pyu cha chakeibarôhneipa ahupa hawhta châ ta, chakeibarôhneipa dawpazy a hupa hawh tlaita paro ei ta; paro aw ei ta, ama sâh tai awpa cha tai aw ei ta, a bopa ta siekhei aw ei ta, a pachha awpa ahy hmah ta y aw veih ei.

30 Cha noh liana chata tilaipi paro ngâpa hawhta ama chô liata ama paro aw. Chatawhcha chyhsa ta râh cha ama sai khiahtala, pachâ tua, zonha nata nôpona sai châ ta; khaihna cha meidozy liana chata pazohpa ta y ta. 

Isai (Isaiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52	Bo 53	Bo 54	Bo 55	Bo 56
Bo 57	Bo 58	Bo 59	Bo 60	Bo 61	Bo 62	Bo 63
Bo 64	Bo 65	Bo 66

Isai 6

Isai 6

Isai aluahna hmôpa nata awna

1 Abei Uziah a thi kô liana chata abeidyuchhai a sâhpa nata a chaluahpa liana chata Abeipa atyuhpa cha hmô na ta, a chysia pai pasihpa chata achhyna-o cha pabie khai haw ta.

2 A kiapâh liana chata serafizy a duah ei ta; ama zydua ta mathlaw miacharu sai hnei chyu ei ta; miano ta a hmia khu ta, miano ta a pheizy khu ta, miano ta a zaw hra ta.

3 Chatawhcha pakha ta a hropa hnohta: “Pheisaihzy ABEIPA cha a pathaih na, a pathaih na, a pathai na; leilô zydua a rôhnahna ta a bie,” tahpa ta a awsao rairieh ei ta.

4 Chatawhcha a awtuhpa awna pyu chata a chhikao thaby bôna taihta a chalyu ta, chatawhcha meikhu ta o bie haw ta.

5 Chatawhcha kei chata: “Ei hu a po na! Leidiapa ta ei y; hmao pathaih leipa chyhsa châ na ta, hmao pathaih leipa chyhsa hry liata ei pahrâ; ei mozy ta Abeipa, Pheisaihzy ABEIPA hmô tlôh ta!” tah na ta.

6 Chatawhcha serafi pakha chata alô-iatheipa a ia chiehpa chaikie ta maisâh tawhta lapa ta a ku liata chabapa ta keima lâta a vaw zaw ta.

7 Ei pakah papha ta; “‘Nahthlie teh, he heta na hmaozy vaw hria haw ta; na moleina cha siekheipa ta a châ haw, na moleina chhao a ngiahthaipa a châ hra,” tah ta.

8 Chatawhcha Abeipa ao chhao cha thei na ta, “Ahy e tuah aw na ta, ahy e eima châta a sie aw?” tahpa ta. Cha tina chata kei ta, “He liata ei y! Na tuah la,” tah na ta.

9 Chatawhcha ano chata, “Sie la, he chyhsazy kei chho teh: ‘Thei ula, pachâna pahno khah u; hmô ula, pahno khah u,’ tahpa ta.

10 He chyhsazy pathipalôh he pathawhsa la, ama nahkhaohzy papâsa la, ama mozy pasosa teh; ama mokhaohzy ta hmô pathlei aw ei ta, ama nahkhaohzy ta theipa ta, ama pathipalôh ta pahno ei sala, a hei heihpa ta patlâhsapa ta ama y pathlei aw na,” tah ta. 

11 Chatawhcha kei chata, “Hy Abeipa y, khati taihta e?” tah na ta. Ano chata: “Khihpizy paraopa ta a pahrâpa zy ama y leina taih, ozy cha chyhsazy y leina taih nata lyurâh cha roryh a hra khaina taih,

12 ABEIPA ta chyhsazy cha lâhlapi ta pasie ta, râh chhôh liata su siesai chiehpa hluhpi a y hlâ leita cha.

13 Chatawhcha a chhôh liana chata pahrawh hryta pakha rai y sala, kâ khaipa ta a y hra aw, châhrasala terebi thokô nata oaka thokô tawhta a thabypa a y thlâh ha tyhpa hawhta.” tahpa ta. Chi pathaihpa cha a thabypa a y thlâh hapa cha a châ. 

Isai (Isaiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52	Bo 53	Bo 54	Bo 55	Bo 56
Bo 57	Bo 58	Bo 59	Bo 60	Bo 61	Bo 62	Bo 63
Bo 64	Bo 65	Bo 66

Isai 7

Isai 7

Ahaza hnohta Isai bie rei hmiatuapa

1 Zudah beipa Uziah sawchapawpa, Zawtha sawchapawpa Ahaza noh liana chata, Suria beipa Rezi nata Izarel bei Remaliah sawchapawpa Pekah cha Zerusale adyuh awpa ta khyhnao ei ta, châhrasala pahnie thei veih ei.

2 Davi chhôhkha zy cha, “Suria cha Ephrai nata a pazao ei ta,” tahpa ta chho ei ta, a pathipalôh nata a chyhsa zy pathipalôh cha lyurâhpa thozy thlih ta a chalyupa hawhna heta chalyupa ta y haw ta.

3 Chatawhcha ABEIPA ta Isai hnota “Atahmâ nâ nata na sawchapawpa Shiazashuba* chhaota, machhua lâ tipo tihry a chhâna lâta pohpasutuhpa sibiepa su lâlai liata Ahaza dy awpa ta pua teh u,

4 ano hnohta, ‘A chado la, a thlih hra teh; he mawrei pachhupa khu ngâpa miano, Rezi hnohta Suria nata Remaliah sawchapawpa hiehâna kyh ru ngaitapa vâna heta chi khah y, riahchhiepa ta y hra khah y.

5 Suria nata Ephrai nata Remaliah sawchapawpa ta hmo moleina kyh ta na chô liata aparaohpa ta,

6 “Zudah cha khyhnaopa ta patypamâ ei sih la, cha liana chata a ngiana awpa ta a lialiah liata Tabe-el sawchapawpa cha abei ta patyu ei suh u,” tahpa ta.

7 He hawhna heta ABEIPA Khazohpa ta a tah: Cha cha a duah leipa aw ta, vaw tlô hra aw vei.

8 Suria luh cha Damaska châ ta, Damaska luh cha Rezi châ tlôh ta. (Kô sycharu nata kô pangawh a tloh hlâta Ephrai cha pho tah tlâh châ leipa ta y awpa ta parao khaipa ta a y aw.)

9 Ephrai luh cha Samari châ ta, Samari luh cha Remaliah sawchapawpa châ tlôh ta. Namâ ngiapâ vei khiahtala â ipa ta a duah thei aw veih eichi,’ tahpa ta tah teh,” tah ta.

Imanuel kyh liata Isai biereipa

10 ABEIPA chata Ahaza hnohta reih heih ta,

11 “‘ABEIPA na Khazohpa lâna chata Sheôl hawhta athuhpa liata tlyma, a chôlâ a sâhpa liata tlyma pahnona hiah teh,” tah ta.

12 Ahaza deikua chata, “Hiah aw va na, ABEIPA pasia hra aw va na,” tah ta.

13 Chatawhcha ano chata, “Hy Davi chhôhkhapa saih u, atahmâ thei ula! Chyhsa riepatheisana kyh zie cha nâmo châta a daihpa châ vei ma, ei Khazohpa chhao rie nama patheisa hra aw ma?

14 Chavâta ABEIPA tlai chata pahnona a cha pie aw ei. Nahthlie teh u, laihsakôpa saw phaoh aw ta, sawchapaw sa aw ta, a moh cha Imanuel* a bi aw.

15 Ano chata hmo moleina khoh leina nata hmophana khona a pahno tita sâhpiti kuapa nata kheihti a nie tyh aw.

16 Hawtipa cha hmo moleina khoh leina kyh nata hmophapa khona kyh a pahno hlâna chhaota, abei pano nâ haopazy khihnarâh cha roryhrapa ta a châ aw.

17 Ephrai ta Zudah â chhaih noh tawhta a tlô beih leipa nohzy cha ABEIPA chata na chô liata nata na khihnarâhzy chô liata nata na paw chhôhkhapa zy chô liana chata a patlôsa aw; Asuria beipa tlai cha.

18 Cha noh liana chata ABEIPA ta Izi râh chavah chhâna lâta mathyupa a ypa nata Asuria râh liata akheih a ypa cha aw awpa ta a pahi aw.

19 Chatawhcha a vy aw ei ta, âmo zydua ta saikao pathaihparohpa liata zy nata lôpanô khaoh liata zy nata ahloh zydua chôta nata thobuh phapa zydua chô liata a pahâ aw ei ta.

20 Cha noh liana chata ABEIPA ta sâ ngyuna a pahliepa, Chavah Haosâ râh liata Asuria bei a ypa cha hmâpa ta luh nata phei hmi cha ngyu khai aw ta; kâhmi chhao a ngyu khai hra aw.

21 Cha noh liana chata chyhsa pakha ta viahchao zeinô pô kha nata mietahkupa pô no pasa aw ta;

22 sâhpiti a hluh ngaitapa ta ama pie awpa vâta, sâhpiti kuapa a hi tyh aw; râh chhôh liata a ypa maihta sâhpiti kuapa nata kheihti nie tyh tlôh aw ei ta.

23 Cha noh liana chata su to krezô sâh kha, tâkâ sâh kha ty yna maih cha bôhbaw nata ahloh su a châ aw.

24 Râh zydua bôhbaw nata ahloh sai a châ hawpa vâta;

25 chatawhcha tlâh, tupi ta palie hawpa zydua liana chata bôhbaw nata ahloh chipa vâta a ryh leipa aw chi ta, viahchao tôhpa zy pabâsana nata mietahkupa tlaihna châta tlao a châ ha aw. 

Isai (Isaiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52	Bo 53	Bo 54	Bo 55	Bo 56
Bo 57	Bo 58	Bo 59	Bo 60	Bo 61	Bo 62	Bo 63
Bo 64	Bo 65	Bo 66