1 A siana cha khaihna hawhta papuapa ta, a pachhana cha meiôh khaihpa hawhta a papua hlâ lei ta cha Zaio vâta a thlih thlâh ha leipa aw na ta, Zerusale vâta y molo aw va na.
2 Phopizy ta na siana cha hmô aw ei ta, abei zydua ta na rôhnahna cha ama hmô hra aw; moh thiehpa ABEIPA pakah ta a bi awpa chata a cha aw awh ei.
3 ABEIPA ku liata a ngiana lakho nata na Khazohpa liata rôhnahna lakho na châ hra aw.
4 Pathluapa cha tah khao aw veih ei; na râh chhao cha roryhrapa ta ama tah khao hra aw veih ei; nâ cha ei lyna ti tlao cha tah aw ei ta, na râh chhao cha pakiana ama tah hra aw; ABEIPA na chô liata a ly tlôh ta, na râh chhao chata pakiapa ta a y aw.
5 Satlia ta laihsakôpa a pakiapa hawhta, cha paduatuhpa ta a cha pakia aw ei; myuh a hneituhpa cha myuh chô liata a lypa hawhta, na Khazohpa chata na chô liata âly aw.
6 Hy Zerusale y, na kuh chô liata riahvaihtuhpazy pavaisa na ta; a chhô a zâ ta khatita hmah a chalih aw veih ei;
7 Zerusale he pa-ipa ta,alei liana heta reithai tlâhpa ta a tao hlâ leita cha, nâmo ABEIPA pahnokheituhpa ta a ypa saih u, y molo cheita hra leipa ula, ano chhao cha pa y molosa cheita hra kha u.
8 ABEIPA ta, “Na sâh cha nama khakhaipazy niepa châta pie khao cheita leipa aw na ta, râh hropa chyhsazy ta na hriapa kresawti cha doh khao aw veih ei,
9 a hriatuhpazy chata tlao doh aw ei ta, ABEIPA ama reithai aw, a lyutuhpazy chata ei supathaihpa dôhpachhôh tlyhmia liana chata tlao ama doh ha aw,” tahpa ta.
10 Pua ula, kuh chhikaozy liata pua teh u, chyhsazy châta lâpi a chhuahdy ula; pabyuh ula, lâlai pabyuh teh u, alôzy cha a siapa ta a huah ula, chyhsazy chata pahnona tawh teh u.
11 ABEIPA ta kaoki taihta he tana heta a pahnosa: Zaio sawchanô hnohta he tana heta reih teh u, Moh teh, na pachhana a vaw tlô haw; a lymâ cha a hnohta a y hih, a thôhna a hmiakô liata y hra ta.
12 Chatanachata âmo cha Mo pathaihpa sahlao, ABEIPA chatlaipazy, tah aw ei ta; nâ cha, Hmôpa, pathlua leipa khihpi a châ tah aw ei,” tahpa ta tah ta.