Zaio hnohta pachhana thâtihpha zy
1 Areisipazy hnohta thâtihpha chho awpa ta ABEIPA ta sathaw eina thupa vâta, Abeipa KHAZOHPA Thlahpa cha ei chôta y ta; ano chata pathipalôh keichheihpazy patlâhsa awpa ta zy, seizy hnohta puana kyh nata chahrypa ta a ypazy hnohta atâhna o pahyna kyh reih awpa zy;
2 ABEIPA palôhtlâhna kô nata eima Khazohpa phuhlana noh kyh reih awpa zy; mâchhiesapa zydua thlahpalôh awpa zy;
3 buhchâh vyuhpa ta pawpi pachhih zy, mâchhiesana vyuhpa ta thaphana sathaw zy, thazeina thlahpa vyuhpa ta reithaina chysia ama hnohta pie awpa ta; Zaio liata mâchhiesapa ta a ypazy châta rao awpa ta eina tuah, ano cha palyupalihpa ta a y nawpa ta siana ABEIPA lopazy tahpa a châ thei nawpa ta.
4 Su parohpa pathaihparoh hawhpazy sa heih aw ei ta, cha hlâta rohryhrapa ta a y hawpazy cha padua pathi heih aw ei ta; khihpi pathaihparohpa, chhâ hluhpi rohryhrapa zy cha ama tao pathi heih aw.
5 Khichhaipa chyhsazy chata nama sahro zawzy cha a duahmahta pabâsa aw ei ta, pahno beih leipa chyhsazy cha nâma alei a palietuhpazy nata nama krezôh a mohôhtuhpazy ta ama y aw;
6 nâmo deikua cha ABEIPA theihthaipazy tahpa ta bipa ta y aw eichi ta, chyhsazy ta eima Khazohpa chakaotuhpazy a cha tah aw ei; phopizy sôh nie aw eichi ta, ama rôhnahna cha namâ palaikhei aw.
7 Nâmo maohphyuna vyuhpa ta a lie no ta hmô aw eichi ta, ama nozana vyuhpa ta ama tovyuh liata thaphapa ta ama sa aw; chavâta ama râh liana chata a lie no ta hnei aw ei ta; chhâzaw thaphana ama hnohta a y aw.
8 Kei ABEIPA heta pachiana siapa pasô kaw tyh na ta, paruna kyh nata do leina kyh ei hao tyh; âmo viari ei thôna hmeihseihta ta ama hnohta pie aw na ta, âmo hnohta chhâzaw bie ei hraih hra aw.
9 Ama pathlazy cha pho to hry liata pahnopa châ aw ei ta, ama sawzy cha chyhsa to hry liata pahnopa ama châ hra aw; âmo a hmôpa maihta ABEIPA byhnâ piepa chi ama châ tahpa ama pahno aw.
10 ABEIPA liana chata thata thaphapa ta y aw na ta, ei hrona he ei Khazohpa liana chata aly ngaitapa ta a y aw, myu a hneituh awpa cha pawpi pachhih ta tobi tyhpa hawhta nata myuhthieh cha a tobinazy ta tobi tyhpa hawhna heta ano chata pachhana chysiazy na bu ta, siana viahpakao pasihpa ta na pahly haw tlôh ta.
11 Leilô heta hmo a pyuhpa cha a papuapa hawhna heta nata sahdô heta a chhôh liata chicheipazy a papyusapa hawhna heta, ABEIPA Khazohpa chata siana nata reithaina phopi zydua hmiakô liana chata paysa tlôh aw ta.