Abeipa viarithôna noh
1 Edôma râh tawhta Bôzrah khih tawhta chysia nohpa ta a vypa hao ahy maw? A poh a bupa rôhnah ngaitapa a thatlô ngaitana zie hawhta a vypa hao? Keima a sia ngaitapa ta bie reipa ta pachhana kyh liata thatlô ngaitapa kha ei châ,” tahpa ta.
2 Khâpa vâta e na poh bupa kha saih ta, na chysia chhao kha kresaona khaoh liata a tlytuhpa chysia hawhta a y tly?
3 “Keima deita ta kresaona khaoh liata tlypa ta sao na ta, chyhsa to hry liatahpa pakha hmahta ei hnohta y leipa ei ta; âmo cha ei hiehâhpa ta tly na ta, ei pathi-iapa ta tlychheih na ta; chatanachata ama hrona thisaih cha ei chysia liata hiepa ta y ta, ei poh zydua he ei papua khai haw.
4 Viarithô noh cha ei pathipalôh liata y tlôh ta, ei chyhsa chatlaipazy kô cha a vaw tlô haw hra.
5 Vaw moh na ta, baotuhpa rai y leipa ei ta; a duakheituhpa rai ama y leipa cha ei noâh chhei ha ta; chavâta keima bâh tlai heta pachhana na tlôkhei ta, ei pathi-iana chata einâ duakhei.
6 Chyhsa to cha ei hiehâhna ta tlysao na ta, ei pathi-iana ta parisa na ta, ama hrona thisaih cha alei liata ei lei haw,” tahpa ta.
Izarel chôta Abeipa phanazie
7 ABEIPA ta hmo tota maniah a vaoheipa lymâ hawhta, ABEIPA kyhpacha ngiachhiena biezy nata ABEIPA reithaina biezy reih aw na ta; a zawngiahnazy lymâ hawhta a kyhpachâ ngiachhie ngaitana zie lymâ hawhta Izarel chhôhkhapa zy liata a pha ngaitana zie ama chô liata a vaoheina kyh chhao kha ei reih hra aw.
8 Ano chata, ‘Ei chyhsazy saw a pakheipa ta a tao lei awpazy ama chatlai na,’ tah tlôh ta; amo Pachhatuhpa ta vaw y haw ta.
9 Âmo nôpona zydua liana chata ano cha a nôpo tyh hra ta, vâlyuhchâpa tlyma, lyuhchâpa tlyma châ leipa ta, ano tlaita âmo cha pachha ta; a kyhpachâna nata a ngiachhiena ta âmo chatlai haw ta; hlâno noh zydua liana chata âmo pi ta, âmo â pyh tyh.
10 Châhrasala aty ei ta, a Thlahpa pathaihpa cha pachâ parôhsa haw ei ta; chavâta ama khakhaipa ta paliepa ta y ta, ano tlai chata âmo cha â dyuh haw ta.
11 Cha nona chata Mawsi, a chakaotuhpa, hlâno nohzy cha a thei thlâh ha ei ta, he tana heta ama tah, Tilaipi tawhta a mietahkupa zaw a vaihtuhpa zy chhaota âmo a kaw chhihthatuhpa kha khataihta a y? A Thlahpa pathaihpa âmo hry liata a sohtuhpa kha khataih ta a y?
12 A bâh rôhnah ngaitapa Mawsi chachâh lâta a pasiesatuhpa kha chhâzaw moh a taona châta ama hmiakô liata ti a pachhaituhpa khataihta a y?
13 Amâ hluah lei nawpa ta ti a thuh ngaitapa liata râhpathohpa liata arâ chhihthapa hawhta âmo sahlao a chhihthatuhpa kha khataihta a y?
14 Saikao liata sahro a zupazy hawhta, ABEIPA Thlahpa chata âmo sahlao cha pahâsa ta. Cha hawhna chata moh rôhnah ngaitapa na tao nawpa ta na chyhsazy nâ chhipa kha,” tahpa ta.
Zawngiahna nata bao nawpa ta thlahchhâna
15 Avâ tawhna khata za sai la, na pathaihna nata na rôhnahna yna tawhna khata za moh tua. Na phahnai khona nata na hmotaopa rôhnah ngaitapazy kha khataihta a y? Na pathipalôh ta na khona nata thapasana zy kha kei liata papaisa khah y.
16 Abaraha ta maniah pahno vei hra sala, Izarel chhaota maniah pachâ vei hra sala, nâ cha eima Paw châ tlôh chi ta; nâ cha hy ABEIPA y, eima Paw châ chi ta; na moh cha chhâzaw tawhta keimo maniah Chatlaituhpa a châ.
17 Hy ABEIPA y, nâ ta khâpa vâta e na lâpizy tawhta maniah paviasa tyh chi ta, nâma chi lei awpa ta eima pathipalôh maniah na pachyusa tyh tly? Na sei, na ryutopa phozy vâna heta vaw kua heih teh.
18 Khazia yna supathaihpa moleipazy ta amâ tlyh, khazia maniah adyuhtuhpa zy ta na supathaihpazy cha ama parao?
19 Ama chô liata ryu na rei beih leipazy hawhpa, na moh a phao beih leipazy hawhpa cha eima châ haw.