Nohro ta Zaio rôhnah nawpa zie
1 Thyu la, khaih teh; na khaihna cha vaw tlô ta, ABEIPA rôhnahna cha na chô liata a vaw pua haw hih.
2 Zohna ta leilô he khu tlôh ta, zohna chhakalupa ta chyhsa zy a khu hra aw; châhrasala ABEIPA cha na chô liata vaw pua aw ta, a rôhnahna cha na chô liata â lâ aw.
3 Phopizy na khaihna lâta a vy aw ei ta, abeizy chhao na vaw puana khaihna thlaraw siena lâta amâ vy hra aw.
4 A heih la, mohmia pasaih la, moh teh; ama zydua ta a pakhy ei ta, nâ lâta amâ vy hih; na sawchapawzy cha lâ hlapi tawhta avy aw ei ta, na sawchanô zy cha ama cha vaw pyh aw.
5 Cha hnôh lâna chata hmô aw chi ta, khaih ha aw chi ta, na pathipalôh cha a chalyu aw ta, pakhaihpa ta a y aw; tilaipi liata sôhdaona hluhpi chata nâ lâta a pangai awpa vâta nata phopi sôh chata nâ lâta a vaw tlô awpa vâta.
6 Râraoseihpa hluhpi chata a cha paly aw ei, Midia nata Ephah râh liata râraoseihpa dawpazy chata; cha zydua cha Sheba râh tawhta amâ vy aw. Ngôh nata deiryh vaw phaoh aw ei ta, ABEIPA reithaina bie ama pahnosa.
7 Keda sahlao sa zaw zydua cha na hnohta y pakhypa ta y aw ei ta, Nebaiô sahlao mietahkupa tôhpazy chata a cha chakao aw ei; ei maisâh liana chata alypa ta khy aw ei ta, ei rôhnahna o cha ei parôhnahsa aw.
8 Meihdo hawhta a zawpa nata vachhuh ama opy pangaipa ta a zaw ngâpa hawhta a zawpa zy he ahy zy maw?
9 Ano chata a cha parôhnahsapa vâta ABEIPA na Khazohpa moh châta nata Izarel sahlao Mo Pathaihpa châna chata na sawchapawpazy ama tâkâ nata ngôh chhaota, lâ hlapi tawhta a chhi awpa ta liahpahlôzy chata na hâ tlai aw ei ta.
10 “Khichhaipa chyhsazy chata na kuhpachhôhzy cha paryh pathi aw ei ta, ama abeizy chhaota a cha chakao ha aw ei; ei hiehâhna chata cha tu na ta, châhrasala ei khokheina ta ei cha ngiachhi tlôh hih.
11 Na kuh ochhizy chhao pahypa ta y thlâh ha aw ta; a chhô a zâ ta khaw aw veih ei; chyhsazy ta pho to sôh, nâ lâta vaw cheipa ta ama abeizy chhao ama vaw chhi thei nawpa ta.
12 Châ chakao khoh leipa phopi nata khihnarâh cha leidia tlôh aw ta; cha pho cha phie paraopa ta ama y aw.
13 Ei su pathaihpa pangia awpa ta Lebanaw rôhnahna cha nâ lâta a vy aw, fir meisa thokô nata meisa thokô nata sidy thokô hmaohkha ta, a vy aw ei ta; ei phei tlyna su cha ei parôhnahsa aw.
14 Nama rie cha patheituhpa sawchapawpazy cha a bôhpa ta nâ lâta a vy aw ei ta; cha nawhtawtuhpa zydua cha a naopa ta na pheipazah liata amâ bôh aw; nâ cha ABEIPA khihpi, Izarel sahlao Mo Pathaihpa Zaio a cha tah aw ei.
15 Ahy hmah tly beih leina taihta siesaipa nata ahaopa ta na ypa vyuhpa ta, chhâzaw ta pasâhsa chaipa chhâ hluhpi alyna ta ei tao aw.
16 Phopizy sâhpiti pazy aw chi ta, abei sahlao hneirônazy chhao napazy aw; kei, ABEIPA he cha Pachhatuhpa nata cha Chatlaituhpa, Zakaw sahlao mo Thatlôpa cha ei châ tahpa na pahno aw.
17 Dawh vyuhpa ta ngôh vaw cheih aw na ta, thua vyuhpa ta chhao tâkâ ei vaw cheih aw; tho vyuhpa ta chhao dawh, alô vyuhpa ta chhao thua.Thatlôna cha na hyutuhpa ta rao aw na ta, siana cha nâma châ hnawtuhpa ta ei rao aw.
18 Nôchhiepa ta hmotaopa pyu cha na râh liata theipa ta châ khao leipa aw ta, pathaihparohna nata pahleipadiana pyu chhao na râhri chhôh liata theipa châ khao aw vei; na kuh cha Pachhana tlao tah aw chi ta, na kuh ochhizy chhao Reithaina na tah hra aw.
19 Noh khi nohchhô ta nâma cha khaituhpa châ khao leipa aw ta, thlâpâ chhao khita na khaihna awpa ta cha khai hra aw vei; ABEIPA deikua cha na châta tlyzaw khaituhpa ta y aw ta, na Khazohpa cha na rôhnahna châta a y hra aw.
20 Na noh cha tla khao hra aw vei, na thlahpa chhao cha lei khao hra aw vei; ABEIPA cha na tlyzaw khaihtuhpa châ ha tlôh aw ta, na mâchhiesana nohzy cha a chhâ ha aw.
21 Na chyhsa zydua chhao ama zydua ta chyhsa siapa châ aw ei ta; na râh cha tlyzaw ta ama to aw, palyupalihpa ta ei y theina awpa ta âmo cha a chhy a thaopa ei loh, ei ku hriana ama châ aw.
22 Chyhsa chyhpa cha sâhkha châ ha aw ta, chyhsa chyh chaipa chhao phopi thatlô ngaitapa a châ ha hra aw; kei ABEIPA heta a daihti liana chata ei patlôsa patoh aw.