1 A siapa cha leidia tyh ei ta, ahy hmah ta ama palôhrupa ta pachâ tyh leipa ei ta; zawngiahna a hneipa chyhsa zy chhao lapa ta y tyh ei ta, ahy hmah ta pachâ hra veih ei. A siapa cha hmo moleina a vaw tlô awpa tawhta lapa ta y tyh ei ta,
2 thlalôhna liana chata a ngia tyh ei ta; ama rakhôzy liana chata thaphapa ta amâ zia tyh, a do ngaitapa ta a siepa maih cha.
3 Châhrasala nâmo, dyuthainô sawchapawpa apheipa nata sihrypa pathla saih u, he liana heta a vaw hnia teh u.
4 Ahy e saisona châta nama hmâh tyh tly? Ahy lâta e nama pakah âpa ta nama paleih nama pachhao chie tly?
5 Nâmo oaka tho hry liata thobuh ry to liata aohrao ngaitapa ta saikao chhôh zy liata alô a keipa thaby liana zy hawhta a thietuhpa saih u, paraona saw haithaina pathla châ vei eichi ma?
6 Chavah saikao mihpa hry liana chata na tovyuh y ta;chazy tlai cha na tovyuh cha a châ; chazy châna tlai chata dopa hlâpa ta patlai chi ta, hmopiepa na hlâpa kha. Chazy hmo hry liana chata palôhtlâhpa ta ei y aw ma?
7 Tlâh sâhpa a sâh kawpa chô liana chata na rakhô soh chi ta, cha liana hra chata atheihna hlâ awpa ta nâ khy tyh.
8 Ochhizy nata chhikao to hnôh lâ liana zy chata na ngiana cha soh chi ta, kei liata châ leipa ta mo hropa liata a paluahsa chi ta; na rakhô pakawh chi ta; âmo hnohta bie hraih chi ta, ama rakhô cha na hmôna liana chata khô chi ta.
9 Sathaw chhaota Môleka* lâta sie chi ta, na rohpahâhpa zy cha papôhsa chi ta, na lyuhchâpazy cha lâhlapi ta tuah chi ta, Sheôl taih tlaita na panawhpa kha.
10 Na siena lâpi pasihpa vâta rietheipa ta y chi ta, châhrasala, “Hnabeiseina rai y vei,” tah tlôh leipa chi ta, na thatlôna pahrâna hmô chi ta, chavâta panao leipa ta na y hawpa kha.
11 Ahy e chipa ta china kyh ta ypa ta, haipa reih tyhpa ta, kei na pahno khao leipa chi ta, na palôhrupa ta na pachâ khao vei tly? Bohpi ta a chalih thlâh ha va na mâ? Chi chhao eina chi hra leipa chi he.
12 Na siana kyh nata na hmotaopazy reih aw na ta, châhrasala khâpa hmah ta cha phahnai aw vei.
13 Na aw tina chata, na nohthlahpa sahlaozy chata cha pachha ei se! âmo sahlao cha thlih ta cheih aw ta; hu ta a phaoh pathlah khai aw. Na ngâtuhpa deikua chata lyurâh he hnei aw ta, ei tlâh pathaihpa he a to aw.
14 Chatawhcha ano chata, Pabyu ula, pabyu ula, lâpi a chhuahdy teh u, ei chyhsazy lâpi tawhta amâ hluana awpa cha thy teh u,” a tah aw.
15 Moh chônôpa, pasâhsapa, chhâzaw ta a ypa, a mo Pathaihpa chata he tana heta tah tlôh ta: Kei su chônôpa nata pathaihpa liata y na ta, chyhsa a reisipa palôhrupa pahra awpa nata a ngiapachhipazy pathipalôh pahra awpa ta, chyhsa palôhrupa a ngiapachhipa ta a reisi ngaitapa hnohta chhao ei y.
16 Chhâzaw ta adyuh tlôh leipa aw na ta, ei pathi khâ ia hra aw vei; chata leipa ta cha chyhsa palôhrupa ei hmiakô liata panao aw ta, hrona ei taopazy chhao cha ama panao hra aw.
17 A karâ-y ta a paraona vâta ei hie hâh ta, tu na ta, ei hmia chahu na ta, ei pathi a ia; ano hra cha a pathipalôh yzie tyhpa ta chhoru ngaitapa ta y lymâ ta.
18 A yzie zy cha hmô na ta, ano cha ei patlâh aw; a chhi hra aw na ta, ano mâchhie asakheituhpazy lâta thlahlôhna zy ei pie heih aw.
19 Adyhna, adyhna, lâhlapi ta a ypa lâta nata a hniata ta a ypa lâna chata y sy, ABEIPA ta a tah; ano cha ei patlâh aw.
20 Moleipazy deikua cha tilaipi a chatlao tyhpa hawhna cha ama châ; y molo thei tlôh leipa ta, a tizy chata a puapa nata chiatlao apapua tyh.
21 Ei Khazohpa chata moleipazy châta thlahlôhna rai y vei,” tah ta.