Khazohpa biehraina zina lymâ
1 ABEIPA chata he tana heta a tah: Pachiana zy ula, a sia ngaitapa ta tao hra teh u, ei pachhana cha vaw tlô daihmâpa ta, ei siana cha a lâ daihmâ haw tlôh ta.
2 Cha hawhta a taopa chyhsa nata khâchâ a pyhtuhpa chyhsa sawchapawpa cha a nohhlao na, pahânoh parao leipa ta a ô tyhtuhpa nata hmopha leipa rai tao lei awpa ta a phapa ta a ku a vaih tyhtuhpa cha,” tah ta.
3 Khichhaipa chyhsa ABEIPA a pazaotuhpa chata, ABEIPA ta a chyhsazy tawhta eina panano tlai aw,” tah kha se; hrilyupa chata, “Moh teh, tho raohpa ei châ hih,” tah hra kha se.
4 Ei pahânoh zy a ôpa ta, ei lyna zie hmozy a tlypa ta, ei biehrai khâchâ a pyhtuhpa hrilyupazy kyh liana chata ABEIPA ta he tana heta tah tlôh ta:
5 Ei o chhôh liata nata ei kuh chhôhzy liana chata sawchapawpa nata sawchanô hneipazy hlâta hmahta, thei thlâh hana pha viapa nata mohpha viapa ei pie aw; ama hnota chhâzaw moh pahleipadia khao lei awpa ei pie aw,” tahpa ta.
6 Khichhaipa chyhsazy chhao pahânoh parao leipa ta, a ô tyhpa nata ei biehrai khâchâ apyhpa maih, ABEIPA chakao awpa nata a seizy ta y awpa ta ABEIPA a zyhpa maih cha-
7 âmo tlai cha ei tlâh pathaihpa liana chata a chhi aw na ta. ei thlahchhâna o liata thaphapa ta ei paysa aw; ama raopa hlânazy nata ama atheihna zy cha ei maisâh liana chata alypa ta a y aw; ei o cha chyhsa to chata thlahchhâna o tah tlôh aw ei ta, tahpa ta.
8 Abeipa KHAZOHPA Izarel papuapa sahlaozy a pahmaohpakhytuhpa chata ano ei pahmaohpakhypa ta a ypazy leipa chhao pho hropazy a hnohta ei pahmaohpakhy aw,” tah ta.
Izarel nohthlah achhyna thai lei pachâsana
9 Lyurâhpa sa zydua saih u, lyurâhpa liata sa a ypa zydua saih u, nie awpa ta a vy teh u.
10 Riahvaihtuhpazy cha ama mo chao ta, pahnona a hnei leipa sai châ ei ta; i ao a hnei leipa sai châ ei ta, nga thai veih ei; mâsapa ta a zia thlâhpa ta, a mô akhohpa châ ei ta.
11 Izy cha karây ngaitapa châ ei ta, a daih tahna hnei beih veih ei. Chazy cha mietahkuvaihtuhpa, hmo a pahno thei leipa ama châ; âmo lâpi chyu, âmo athôhna lâ chyuta a heih khai ei ta, ama zydua tlaita.
12 “Avy teh u, kresawti la aw pi ta, chatanachata pari theina ta eima pabie aw, mylâ cha atanoh hawhna he châ heih aw ta, noh rôhnah ngaitapa a châ aw,” tah chyu ei ta.