Nie leipa ta yna zy a vaona dopa
1 A paro ngaitapa ta awh teh, a chado khâ, chiahmie hawhta na ao papua la; ei chyhsazy hnohta ama taopasina chho la, Zakaw chhôhkhapa zy hnohta ama moleinazy chho hra teh.
2 Âmo chata noh chareih ta na tlua ei ta, ei lâpi kyhzy pahno ama byuh tyh; a sia ngaitapa ta taopa nata ama Khazohpa pachiana a bâsai beih leipa pho hawhta; ei hnohta pachiana sia ngaitapa na hiah tyh ei ta, Khazohpa a vaw hnia awpa chhao ama byuh tyh.
3 Khâpa vâta e nie leipa ta y pi ta, na hmô tlôh vei? Khâpa vâta e keimo sasyh ta a panawh pi ta, na pahno tlôh vei?” ama tah tyh. Nie leipa ta nama yna noh liana chata nâmo phasana chakao eichi ta, nama raihriatuhpa zydua nama pasaipa-i tyh.
4 Atuna nata a eina awpa nata moleina kutô ta a chô awpa ta nieleipa ta nama y tyh. Nâmo ao he chô lâta pahnosa tlâh châpa ta cha noh liana chata nie leipa ta y beih veih eichi.
5 Cha hawhna cha nie leipa ta yna cha ei khona zie a châ ma? Chyhsa rie a pathei awpa noh a châ ma? Lothi hawhta luh a bôh awpa nata ry lâta lathopala poh phawpa ta buhchâh a mia awpa a châ ma? Chazy cha nie leina nata ABEIPA chata noh aly tlâh châpa na tah aw ma?
6 He he nie leina ei khona zie châ vei ma? Moleina ta chahryna pathlâpa nata raopaky rizy pahluhpa nata pasaipa-ipa sahlao papuapa nata raopakypa to thliepa hih.
7 Âmo viahchhâ nodipazy hnohta raipa nata sipasapa papuapa sahlao ama o lâta a chhipa he châ vei ma? Thluahruapa hmôpa ta poh thy thlupa nata âmo sapa hawhta a phaohpa tawhta anyu leipa he châ vei mâ?
8 Chatawhcha na khaihna cha my nohchhipa hawhta vaw pua aw ta, na tlâhna awpa châta a vaw thao patoh aw; na siana chata châ chhi aw ta, ABEIPA rôhnahna cha na hnôh lâ cha cha pakhâtuhpa a châ aw.
9 Cha tina chata awh aw chi ta, ABEIPA ta â chhy aw; awh aw chi ta, ano ta, He liana he ei y,” a tah aw. Nama hry tawhta raopakypa zy kudy ta a dyna zy, reih pha leipa a hmâhpa zy he pahleipa ta,
10 nodipazy hnohta na kho viapa piepa ta riepatheipa lôhrâ na patlô hra khiahta cha, na khaihna cha zohna hry liata khaih aw ta, na zoh kaluhna cha nohchhô hawhta a châ ha aw.
11 ABEIPA chata khâ cha chhihtha aw ta, su chawhkaraipa liata chhao lôhrâ cha patlô aw ta, na ruzy chhao tha a patlô hra aw; sahdô ti ta pasapa hawhta nata tihnawh a kua beih leipa hawhta na châ ha aw.
12 Nâ tawhta a pua awpazy chata, su parohpa, pathaihparoh chipazy cha tao pathi heih aw ei ta; chhâ hluhpi lôbôzy ta na paryh heih aw; nâ cha a raopa a tao pathituhpa, chyhsa pahrâna awpa ta lâpizy a tao pathituhpa, a cha tah aw ei.
Pahânoh hmâna zie
13 Pahânoh parao lei awpa ta, ei noh pathaihpa liata na khopa tao lei awpa ta na phei cha pahmâsapa ta, pahânoh cha noh ly a chhihpa nata ABEIPA noh pathaihpa cha za pachhihsapa ta; nama lâpi a chhih leipa ta, nama phasana chakao leipa ta, nama bie rei leipa ta na palyupalih khiahta cha;
14 ABEIPA chô liata thaphapa ta y chi ta, leilô su sâhpa zy liata cha paysa aw na ta; na mahpaw Zakaw ryuto hmô ta ei cha pasa aw; ABEIPA pakah chata cha cha a reih haw.