Mo to hnohta zawngiahna hmosaipiepa
1 Hy dâhphipa saih u, tizy lâna heta a vy teh u; tâkâ a hnei leipa zy chhao, a vy ula chalei ula, nie teh u! A vy ula, kresawti nata sâhpiti tâkâ leipa ta a mâ leipa ta chalei teh u.
2 Viahchhâ châta châ tlôh leipa ta khâpa vâta e tâkâ nama pahryu? Lôhrâtlôna châta châ tlôh leipa ta khâpa vâta e nama tha nama pahryu? Pakhâta ta nahthlie ula, hmophapa cha nie hra teh u, nama hrona cha hmo thawpa liata thaphapa ta y se.
3 Nama nah pachôh ula, kei lâta a vy teh u; nahthlie ula, chatanachata nama hrona cha a hroh aw; chatawhcha nama hnohta chhâzaw bie ei hraih aw, Davi hnohta ngiachhiena khâchâ taipazy hmeihseihpa cha.
4 Pachâ teh, ano cha chyhsa to châta pahnotuhpa ta cha rao na ta, chyhsa to châta chhihthatuhpa nata hyutuhpa ta ei cha rao.
5 Pachâ teh, na pahno beih leipa phopi cha aw aw chi ta, nâma cha pahno leipa phopi cha nâ lâta amâ vaw râ aw, ABEIPA na Khazohpa vâta Izarel sahlao Mo Pathaihpa vâna chata, ano chata cha parôhnahsa haw tlôh ta.
6 Hmô thei awpa ta a y nona heta ABEIPA cha tlua ula, a hnia nona heta aw teh u!
7 moleipa chata a yzie cha bâh sai sala, chyhsa sia leipa chata a pachânazy cha bâh sai hra mawh sy; ano cha ABEIPA lâta vaw kua heih mawh sy, chatanachata a vaw ngiachhi aw, eima Khazohpa lâta kua hei mawh sy, ano ta a ngiahthai ngaita tlôh aw ta.
8 Ei pachâpazy he na pachâpa châ tlôh leipa ta, na yzie zy cha ei yzie châ hra vei, ABEIPA ta a tah.
9 Avâzy khi alei hlâta a sâh viapa hawhta, ei yzie zy he nâma hlâta a sâh via tlôh ta, ei pachâpazy chhao he nâma pachâpazy hlâta a sâh via hra.
10 Vâsua nata dâhaw cha avâ tawhta suah tyh ta, kua heih beih leipa ta, alei he tlao pasa ta, hmo papyusapa ta a chhy pakasa ta, sâh chi a hietuhpa hnohta sâh chi pie ta, a nietuhpa lâta viahchhâ a pie tyh,
11 Cha hawhna hra chata ei pakah tawhta ei bie a puapa cha a y aw; Khâpa hmah taopa hnei leipa ta kei lâta vaw kua heih leipa aw ta, ei khopa tao khai aw ta, hmo tao awpa ta tuana liana chata vânoh topa ta a y aw.
12 Thaphapa ta puapa ta thlahlôhpa ta chhihthapa ta y tlôh aw eichi ta; tlâh laipazy nata tlâh chyhpa zy chata na hmiakô liata hla sa aw ei ta, lyurâh thokô zydua chata ama ku chabaipa ta ama y hra aw.
13 Ahloh vyuhpa ta meisa tlao pyu aw ta; bôhbaw vyuhpa ta myrtle kô tlao a pyuh aw; cha cha ABEIPA chata moh phana awpa nata chhâzaw pahnona, pahleipadiapa ta a y lei awpa a châ aw,” tahpa ta.