Izarel chôta Abeipa tlyzaw kyhpachâna
1 Hy saw leipa, nâ, saw a sa beih leipa y, thaphapa ta sa teh; nâ, saw a zeih beih leipa y, hla sapa ta awh teh! vahpa a hneipa sawzy hlâta saw leipa chanô sawzy hluh via tlôh ei ta, ABEIPA ta a tah.
2 Na poh-o su cha pakawh teh, na ynazy poh-o chô cha paraipa ta y mawh sy, pahlô kha, na khawhrizy cha paseih la, a paraina khaihna zy cha pa-i teh.
3 Chachâh lâ nata chavei lâta hiepatlapa ta y tlôh aw chi ta, na chi pathlazy cha pho to ryutopa ta y aw ei ta, khihpi roryhra chiehpa zy liana chata chyhsa ama pahrâsa heih aw.
4 Chi khâ, maophyuh aw va chi; nozapa ta y khâ, maohphyuhpa ta y aw va chi; na thyutlia noh maophyuhna cha my hawpa ta, na nôhmeina moh chhiena a thei khao aw va chi.
5 Nâma châ taotuhpa cha na vahpa châ tlôh ta, a moh cha Pheisaizy ABEIPA a châ; Izarel sahlao Mo Pathaihpa cha nama chatlaituhpa a châ hra, ano cha khizaw zydua Khazohpa ama tah aw.
6 Lahpinô mapa, pachârôh ngaitapa, thyutlia nota lahpinô hnei hawpa machiehpa aw heihpa hawhta ABEIPA ta a cha aw he, na Khazohpa ta a tah.
7 Buakha cha ma na ta; châhrasala ngiachhie ngaitapa ta ei châ chhi heih aw.
8 Ei hiehâna khôpa ta buakha ta nâ tawhta ei hmia nyu na ta; châhrasala chhâzaw nôphana ta ei cha ngiachhie aw, ABEIPA cha Chatlaituhpa ta a tah.
9 Cha cha kei chata Naw hro no hawhna kha châ tlôh ta; Naw tizy chata alei vao khao aw vei, tahpa ta chhie ei sapa hawhna khata; na chô liata ei hie hâh khao leipa aw ta, cha ra khao aw va na, tahpa ta chhie ei sa.
10 Tlâhpizy cha lei tlôh aw ei ta, tlâhzy cha pasiepa ta y hra aw ta; ei nôphana deikua he nâ tawhtapa lei leipa aw ta, ei dyhna biehrai chhao pasiepa ta y hra aw vei, ABEIPA cha ngiachhietuhpa ta a tah.
Zerusale thiehpa
11 “Hy nâ, rie patheipa ta thlipawpa a pathlua ngâpa, thlahlôhna a hnei leipa y, na alôzy cha hlyu angiapa ta bô aw na ta, na lôbôzy cha saphai tôhzy ta ei paryh aw.
12 Na kuhzy cha rubi lô ta, na ochhizy cha lôsôhpa zy ta, na pâhchhô zydua cha alô angiapazy ta ei tao aw.
13 Na saw zydua cha ABEIPA pachupa ta y aw ei ta; na sawzy thlahlôhna cha thata a châ aw.
14 Siana ta pa-ipa ta y aw chi ta; pasaipa-ina tawhta lâhlapi ta y aw chi ta; chi aw va chi, hmo rarôh ypa tawhta lâhlapi ta y hra aw chi ta; châ hnia aw vei.
15 Apahmaohpakhypa ta ama y thei na, châhrasala keima rei châ vei; nâma châ siehnao awpa a pôhpakhypa zy cha, nâma vâta ama pao aw.
16 Kei chata syudaipa syu zipa ta a raihriana awpa chaih hrai a daih tyhtuhpa cha tao na ta. Keima lilawta parao awpa ta paraotuhpa ei tao hra;
17 Nâma siehnaona awpa ta chaihrai adaihpa rai phahnai aw vei, paleih to biepeipa ta nâma châ khotuhpazy cha thai lei na pachâsa aw. Cha cha ABEIPA chakaotuhpazy ryuto cha châ ta, ama siana cha kei tawhtapa a châ, ABEIPA ta a tah.