1 Eima theipa ahy e a ngiapâ thei aw? ABEIPA hmotaotheina cha ahy hnohta e a luah?
2 ABEIPA hmiakô liana chata daw panyu ngaitapa hawhta ano cha vaw thao tlôh ta, alei chawhkaraipa tawhta thari hawhta a pua hra; pizie phana nata chhithaina rai hnei leipa ta, ano eima hmô nata ano eima khona awpa ta a ngiana rai y vei.
3 Ano cha chyhsa zy nawhtawpa nata kho leipa ta y ta; pachârôhnazy a hneipa nata pachâ chhiena a pahnopa châ ta; chyhsazy ta ama hmia chahu saipa hawhna chata, ano cha nawhtawpa ta y ta, keimo hra chata ano cha pasâhsa tlôh pi va.
4 Ano chata eima pachâ chhiena zy phaohpa ta, eima pachârôhna zy chhao phaoh tlaita; châhrasala keimo chata pachârôhna tla thlupa ta, Khazohpa tupa ta, riepatheipa ta pachâ tlôh pi ta.
5 Châhrasala ano cha eima taopasina zy vâta hmah phaohpa ta y ta, eima hmoparaona zy vâta thi padôpa ta y ta; eima thlahlôhna awpa ta chhoreina cha a chô liata tla ta, a chheina hreichheipazy ta patlâhpa ta eima y haw.
6 Eima zydua heta mietahkupa hawhta pavia pi ta; eima lâpi chyu lâta tlei pi ta; ABEIPA chata ano chô liata eima zydua hmoparaona cha pahnie haw ta.
7 Ano cha pasaipa-ipa ta y ta, Châhrasala anosasy ta a panawh ta, a pakah chhao â vei. mietahkupa taw thie awpa amâ chhipa hawhta nata mietahkupa a hmi ngyutuhpazy hmiakô liata a chalih thlâh hapa ta a ypa hawh tlaita, a pakah â vei.
8 Pasaipa-ina nata pachiana tawhta lapa ta y ta; a hrolâhpazy chhochhi chata ahy e a pachâ rimâ aw tly. Ahrohpa râh liatahpa pahleipadiapa ta a ypa cha, ei chyhsazy taopasina vâta pachârôhna tla thlupa ta a y?
9 Chatawhcha hmo nôchhiepa ta tao beih leipa ta, a pakah liata dôpakheina rai y beih vei hrasala, a thlâ cha hmo a paraopazy hnohta taopa ei ta, a thi tawhna chata moleipazy hnohta y ta.
10 Châhrasala ABEIPA ta ano cha thi padôpa ta a khohpa rai a châ, pasa pataosa tlaita; a hrona cha moleina châta hmohlâpa ta na hmâ tita a chi pathla cha hmô ha aw ta, a hro chhôh nohzy cha pasihsa aw ta, ABEIPA kho viapa cha a ku liata vânoh topa ta a y aw.
11 A hrona hriapasana thei cha hmô aw ta, palôhchâpa ta a y ha aw; ei chakaotuhpa siapa chata a pasa taona ta chyhsa hluhpi cha thai pachâsa aw ta; ama hmo paraonazy cha a phaopa aw.
12 Chavâta ano cha moleipazy tovyuh hawhpa rai hra aw na ta, ano chata hraona hmozy cha thatlôpazy a rai hra aw; a hrona cha thina taihta leihtha ta, taopasituhpazy hry liata reipâpa ta a ypa vâta; châhrasala chyhsa hluhpi moleina cha phaoh ta, taopasituhpazy châna chata thlah chhâpa ta.