Khazohpa ta Zaio cha seichâna tawhta a pachha aw
1 Hy Zaio y, hra la, hra la; na thatlôna a bu teh; Hy Zerusale, khihpi pathaihpa y; na chysia a ngiapazy cha a bu teh; atahmâ tawhta cha chopawtai leipa nata chyhsa puapâna chhôh liata a ngia khao tlôh leipa aw ei ta.
2 Hy Zerusale y, buchado châ baipa kha a chatho teh; thyu la, a tyuh teh; hy Zaio sawchanô sei ta a ypa, na rao chahrynazy kha pathlâ teh.
3 ABEIPA chata he tana heta tah tlôh ta: “Khâpa hmah châ leipa ta zuapa châ eichi ta; tâkâ leipa ta chatlaipa nama châ aw,” tahpa ta.
4 Abeipa KHAZOHPA chata he tana heta tah tlôh ta: Ei chyhsazy cha cha hlâ chata Izi râh liata y awpa ta pua ei ta, chatawhcha Asuria mo ta khâpa vâta hmah châ leipa ta pasaipa-i ei ta.
5 Chavâta atahmâ he liana heta khâpa ei tao aw, ei chyhsazy he khâpa hmah châ leipa ta siekheipa ta y tlôh ei ta. ABEIPA ta a tah. Âmo chô liata ryureituhpazy cha thata sâh ei ta. ABEIPA ta a tah; ei moh he noh y ta reipachhiepa ta a y tyh.
6 Chavâta ei chyhsazy ta ei moh ama pahno aw; cha noh liana chata a reituhpa ei châ tahpa ama pahno aw; keima he ei châ,” tahpa ta.
7 Tlâhzy liata thâtihpha tlôkheipa ta adyhna bie tlâh awh kheipa ta, Hmophapa thâhtihpha tlôkheipa ta, pachhana bie tlâh awh kheipa ta. Zaio hnohta, “Na Khazohpa cha ryu a reih,” a tahtuhpa phei a ngia kaw dia.
8 Na riahvaihtuhpazy ta ama ao papua ei ta, thapha ngaitapa ta hmaohkha ta ama sapa cha; ABEIPA cha Zaio lâ a vaw kua heih tina chata, hmia achhypa ta hmô tlôh aw ei ta.
9 Zerusale su pathaihparohpa saih u, thaphapa ta pua ula, hmaohkha ta sa teh u; ABEIPA chata a chyhsazy cha thlahpalôh haw tlôh ta, Zerusale cha a chatlai haw.
10 ABEIPA ta phopi zydua mohmô liata a ba pathaihpa cha paluahsa haw ta; chatanachata kaokih liatahpa zydua ta eima Khazohpa pachhana cha ama hmô aw.
11 Pua teh u, pua teh u, cha tawhna chata pua teh u, hmo puapa rai hria khah u"; a chhôh tawhta pua ula, pathaih ngaitapa ta y teh u, nâmo ABEIPA hmobaoh a chabatuhpa saih u.
12 Paraparô ngaitapa ta pua tlôh leipa aw eichi ta, râpaipa ta sie hra aw vei eichi, ABEIPA chata hmia a sah tlôh aw ta, Izarel sahlao Khazohpa cha nama hnôh lâ riah a vaihtuhpa a châ aw.
Abeipa chakaotuhpa pasa taona
13 Pachâ teh, ei chakaotuhpa cha vânoh-ohpa ta y aw ta, palyupalihpa nata pasâhpa ta y aw ta, a sâh ngaitapa ta a y aw.
14 Zawpizy ta ano ama hmô nata noâh tah kaw ei ta; A hmia cha chyhsapa hmia hlâta pachhiepa ta y ta, a pizie cha chyhsa sawchapawzy pizie hlâta hmahta a chhie viapa vâta
15 phopi hluhpi ta ano liata noâhpa ta y ei ta; abei sahlao ta ano liata hmao mopa ta ama y aw; âmo hnohta chho beih leipa cha hmô tlôh aw ei ta, nahkhao ta ama thei beih leipa cha ama pachâ thai awpa vâta.