Zaio thlahpalôhna biezy
1 Siana a zituhpa saih u, ABEIPA a tluatuhpa saih u, ei bie nahthlie teh u; nâmo daina lôpanô lâ nata khaotlô liata na mo chaona khaoh lâ moh teh u.
2 Nama paw Abaraha lâ nata nâmo châ satuhpa Sara lâ moh teh u; ano cha pakha dei a châ nona khata aw na ta, byhnâ pie na ta, chyhsa hluhpi ta ei tao hawpa kha.
3 ABEIPA chata Zaio cha thlahpalôh haw tlôh ta; su pathaihparoh hawhpa zydua cha thlahpalôh ta; a râhpathohpa cha Idâh hawhta tao ta, a leisadi bypi cha ABEIPA sahdô hawhta tao hra ta; cha liana chata lyna nata thaphana zy lyna bie reina nata hla sana pyuzy a y aw,
4 Hy ei chyhsa saih u, ei bie he nahthlie ula, hy ei phopi saih u, ei bie liana heta nah pachôh teh u; keima tawhta ryhpa bie vaw pua tlôh aw ta, pho to khaihna awpa ta ei pachiana ei pahâsa aw.
5 Ei siana cha â hnia na, ei pachhana cha pua haw ta, ei bâhzy heta chyhsa to ryu a reipa aw; liahpahlôzy chata na hâ aw ta, ei bâh he ama ngâ aw.
6 Avâzy lâna khita mohmia pasaih ula, a ry lâta leilô cha moh teh u; avâ khi meikhuh hawhta pai aw ta. leilô he chysia hawhta a paroh aw, a chhôh liata a pahrâpa cha, cha hawhna hra chata ama thi aw; ei pachhana deikua cha chhâzaw ta y aw ta, ei siana chhao he pahleipa ta y aw vei.
7 Siana a pahnotuhpa ei ryhpa bie pathipalôh liata a vaopa saih u, ei bie nahthlie teh u; chyhsazy reipachhiena chi leipa ula, ama riethlana nôpo hra khah u.
8 Chhôma-uh ta chysia a niepa hawhta âmo cha nie tlôh aw ta, alôpa ta sahmi pala a niepa hawhta ano cha a nie aw; ei siana deikua cha chhâzaw ta y aw ta, ei pachhana cha chhâ zydua taihta a y aw,” tahpa ta.
9 Hy ABEIPA ba y, hra la, hra la, thatlôna a bu teh, eikhano ta hlâno chhâzy y nota nâ hrapa hawhna khata a hra teh. Nâ he Rahabi a dizaona taih a chhawhtuhpa drakao a chôtuhpa kha châ va chi mâ?
10 Nâ he tilaipi ti athupa kawh ngaitapa ti a pakuatuhpa, tilaipi athuhpa cha chatlaipa zy chakana lâpi ta a taotuhpa châ va chi mâ?
11 Chatawhcha ABEIPA chatlaipazy cha kua heih aw ei ta, hla sana chôta Zaio cha tlô aw ei ta; chhâzaw ta alyna ama luh chô liata zy a y aw; alyna nata thaphana hmô aw ei ta; pachârôhna nata mâchhiesana cha alei ha aw.
12 Kei, kei tlai he nâmo thlah cha palôhtuhpa cha ei châ; ahy ma na châ a thi awpa chyhsapa a chipa nata sibiepa hawh deita ta chyhsa sawchapawpa a taotuhpa chi cha,
13 ABEIPA, ano Taotuhpa, avâ paraipa ta leilô bônazy a bôtuhpa mypa ta; pasaipa-ituhpa parao awpa ta a chhuahnoh, hiehâna vâta deita ta noh y ta a chi ngâthlâh hapa cha ahy e na châ? Pasaipa-ituhpa hiehâhna cha khataih lâ a y haw tly?
14 Sei patupa cha a chatliepa ta papuapa ta y aw ta, thiepa ta khaotlô liata zu leipa aw ta, a pati cha a phahla hra aw vei.
15 Kei ABEIPA na Khazohpa, a pathyutuhpa châ tlôh na ta; ei moh cha Pheisaihzy ABEIPA cha a châ.
16 vâ khi ei parai thei nata, leilô bônazy ei bô thei nata Zaio sahlao hnohta, Ei chyhsazy nama châ.’ ei tah thei nawpa ta ei biezy cha na pakah liata soh na ta, ei ku ta ei cha hrôbieh,” tahpa ta.
17 Hy Zerusale, ABEIPA ku tawhta a hiehâna nyu liatahpa a do no y, hra la, hra la, thyu teh; nâ chata paochheichhâna nyu biebu liatahpa doh chi ta, phie doh khai chi ta.
18 A sawchapaw a sapa zydua hry liana chata ano a chhihthatuh awpa ahy hmah y leipa ei ta; a sawchapaw chhypa zydua hry liana chata a ku a patupa ahy hmah y hra veih ei.
19 He hmo miano heta a cha tlô thlupa he; ahy e châ chakhei aw? Roryhrana nata paraona zy chakâna nata zaozi zy heta; kheihta e thlah ei cha palôh thei aw tly?
20 Na sawchapawpazy cha panao ei ta, sathawh sao liata a aopa hawhta othliah machhua lâ zydua liana chata a zia hôlô ei ta; ABEIPA hiehâna nata na Khazohpa rana ta ama bie chyu.
21 Chavâta riepatheipa nata kresawti a paripa cha tlô leipa ta a paripa y, he he pahno teh u:
22 Na Beipa, ABEIPA, na Khazohpa chyhsazy a reikhei tyhtuhpa chata heta na heta a tah: Pachâ teh, paochheichhâna nyu, ei hiehâna nyu biebu tlai cha na ku tawhtapa ei la haw; doh heih khao aw va chi;
23 nama rie cha patheituhpazy ku liana chata ei soh aw, âmo chata na hrona hnohta, Eima cha tly thei nawpa ta a bôh teh,’ ama tahpa kha; na ky cha alei hawhta nata othliah hawhta na dao thlâh hapa kha,” tahpa ta.