1 ABEIPA chata he tana heta a tah: Nama nô mana châ, ei mana châ khataih liata a y? Châ vei khiahta ei bana zy ahy hnohta e ei chazua ei? Nama hrao leinazy vâta zuapa ta y eichi ta, nama paraonazy vâta nama nô chhao cha mapa ta a y.
2 Khâpa vâta e, ei vy nona khata chyhsa rai ama y vei tly? Khâpa vâta e, ei aw nona khata nâ chhy awpa rai ama y vei tly? Ei ku he chatlai thei lei awpa ta pachyupa ta a y rai ma? Cha vei khiahta pachha awpa ta hmotaotheina rai hnei va na ma? Ei ra nahta tilaipi pakua tyh na ta, chavahzy cha râh chawhkaraipa ta ei tao tyh; ti rai a y leipa vâta ngazy cha pahnâh ngaitapa ta dâhphipa ta a thi tyh.
3 Avâ khi zohna ta tobi tyh na ta, lathopala poh a khuna awpa ta ei tao tyh,” tahpa ta.
Abeipa chakaotuhpa reingiana
4 Chyhsa thachhâ ngaitapa cha thlahlôhna bie ta tha ei padâh thei nawpa ta Abeipa KHAZOHPA chata pachutuhpa paleih na pie ta. Ano chata my ta tota pahra ta, pachupazy ta ama theipa hawhta thei awpa ta ei nah he a pahra tyh.
5 Abeipa KHAZOHPA chata ei nah na pahypa ta kei cha aty leipa na ta, a heisai hra va na.
6 Ei kyh he a tutuhpa zy hnohta dao na ta, ei baih he baihmi a phiatuhpazy hnohta dao hra na ta; maohphyuna liata nata pachie liata ei hmia a chahu va na.
7 Abeipa KHAZOHPA chata na bao tlôh aw ta;chavâta nozapa ta y beih leipa na ta; chavâta meilô hawhta a heih tyh na ta, maophyuh aw va na, tahpa ei pahno;
8 thai na pachâsatuhpa cha â hnia na; ahy e nâ dyuh aw? A duah rairieh ei se. Nâ vaw hnia mawh sy.
9 Abeipa KHAZOHPA chata eina bao aw; ahy e thai lei na pachâsa aw? Cha zydua cha chysia hawhta paroh aw ei ta, chhôma-u ta a nie khai aw.
10 Nâmo hry liata ABEIPA chipa ta a chakaotuhpa bie a ngiahpa ahy e a châ, zohna liata chareipa ta khaihna rai a hnei leipa chata ABEIPA moh cha ngâ sala, a Khazohpa chô liata a pahnieh mawh sy.
11 Mei patipa ta meithu zy ta a chadôsa tyhpa zydua saih u, nama mei paleih liata nata nama meithu tipazy liana chata charei teh u! He he ei ku tawhta nama hmô awpa cha a châ: pachârôh ngaitapa ta namâ ziana awpa cha.