Abeipa chakaotuhpa cha phopizy châta khaihna a châ zie
1 Hy liahpahlôzy saih u, ei bie nahthlie ula; lâhlapi tawhta chyhsa to saih u, nahthlie hra teh u. ABEIPA chata chhi tawhta na aw ta, ei nô py chhôh tawhta ei moh vaw reih haw ta.
2 Ei pakah he zaozi tiah ngaitapa hawhta tao ta, a ku liana chata na nyu ta; li padipa ta na tao ta, a lava byh liana chata na khô ta.
3 Ei hnohta, “Hy Izarel y, nâ cha ei chakaotuhpa châ chi ta, palyupalihpa ta ei yna awpa cha na châ,” tah ta.
4 Kei deikua chata, “Khâpa hrao leipa ta hria pasa na ta, khâpa hmah châ leipa nata a ruapa liata ei tha hryuh na ta; châhrasala ei chô liata pachiana awpa cha ABEIPA hnohta a y, eina thôhna awpa chhao cha ei Khazohpa hnohta tlai a y,” tah na ta.
5 Chatawhcha atahmâ cha ABEIPA Zakaw sahlao a hnohta a chhihtha heih nawpa nata Izarel sahlao a hnohta a chhi pakhypa ta ama y nawpa ta, chhi tawhta na taotuhpa chata reih ta, a chakaotuhpa ta y awpa ta ABEIPA mohmô ta chyhsa zachhipa châ tlôh na ta, ei Khazohpa cha ei thatlôna vaw châ haw hra ta.
6 Ano chata, “Zakaw sahlao phozy padua nawpa nata Izarel sahlao hry liata pabohsapa zy cha paysa nawpa ta ei sei ta na ypa he hmo chyhpa ta a châ; Zenitaizy pakhaihtuhpa ta chhao ei cha rao hra aw, kaokih taihta ei pachhana a tlô thei nawpa ta,’ tah ta.
7 ABEIPA Izarel sahlao Chatlaituhpa nata Mo Pathaihpa chata chyhsazy mohnaopa, phopi sahlao pasipa, ryureituhpa chakaotuhpa hnohna chata he tana heta a tah: ABEIPA ngâchhihpa Izarel sahlao Mo Pathaihpa nama châ tlyhtuhpa vâna khata, abeizy ta hmô aw ei ta, ama thyu aw, abeisawzy chhaota amâ chhy aw,” tahpa ta.
Zaio taopathi heina bietaipa
8-9 ABEIPA chata he tana heta a tah, Daihti a lychhihpa liata cha nahthlie na ta, pachhana noh liata ei cha bao; atahpa zy hnohta, ‘Pua teh u, zohna liata a ypa zy hnohta, A vaw luah teh u,’ tahpa ta. Lyurâh a paduatuh awpa nata ryuto râh roryhra chiehpa zy âmo sahlao cha pahrâsa awpa ta cha paboh na ta. Chyhsa zy biehrai châta ei cha rao aw, lâpizy liana chata nie lymâ aw ei ta, tlâh sâhpa pathaihparohpa zydua liana chata ama bana su cha a y aw.
10 Ama nodipa ta ama dâhphi leipa aw ta, alalôhpa ta rie patheipa ta noh ta aih hra aw vei, âmo a ngiachhietuhpa chata a chhi tlôh aw ta, tihnawh kiapâh liana tlai chata a chhihtha aw.
11 Ei tlâh zydua cha lâpi ta tao aw na ta, ei lâlaizy cha pasâhpa ta ama y hra aw.
12 Moh teh, haozy hao lâhlapi tawhta amâ vy aw huh, moh teh, haozy hao maw lâ tawhta zy, notla lâ zy tawhta amâ vy aw huh; haozy hao Sini râh tawhta amâ vy aw huh,” tahpa ta.
13 Hy avâzy saih u, thaphapa ta sâh teh u; hy leilô y, thaphapa ta y teh; hy tlâhzy saih u, hla sa teh u! ABEIPA chata a chyhsa cha thlahpalôh haw tlôh ta, chyhsa riethei a taopazy chhao cha a ngiachhie aw.
14 Châhrasala Zaio chata, ABEIPA ta na pathlua ta, ei Khazohpa ta eina my haw,” tah ta.
15 Chanô ta sawchapawpa a chhi tawhta a puapa cha ngiachhie lei awpa ta, a saw sâhpi a pazy haipa cha a my thei mâ? Chazy chata ama my thei; châhrasala kei chata cha my aw va na.
16 Moh tua, ei kupazahzy liana heta ei cha roh hih; na kuh pâhchhôzy cha ei hmiakô liata y tyh ta.
17 Na o satuhpazy chata nâma cha pahleipadiatuhpazy hlâta a paraparôh ei ta, nâma cha paraotuhpazy chata ama cha puasai aw.
18 A heih la, mohmia pasaih la, moh teh; he zydua a pakhy ei ta, nâ lâta amâ vy he. Nâ chata palyupalihna a baipa hawhta he sahlao he a baipa ta, myuthi a saipa hawhta he sahlao heta nâ sai tlai aw, ei hroh na, ABEIPA ta a tah.
19 Na su pathaihparohpa nata roryhra chiehpa zy nata na lyurâh pahleipadia chiehpa kyh liata atahmâ cha a pahrâtuhpazy châta chyh tu tlai aw chi ta, nâma cha palâtuhpazy kha lâhlapi ta ama y ha aw.
20 Na saw na pahlei tawhta na saw hnei heihpa chata na nahkhao theina liata he hawhna heta ama reih aw: Su he kei châta chyh tu ha ta; ei yna awpa ta su na pie teh,’ tahpa ta.
21 Chatanachata nâ ta na pathipalôh ta: He sahlao he ahyma na sapa tly? Ei sawzy pahlei na ta, keima deita saita a khie ngâpa ta châ tlôh na ta, châhrasala he sahlao he ahyma a chhy tly? Pachâ teh, keima deita ta siesaipa ta y tlôh na ta; he sahlao he khatita ma ama vaw y tly?’ nama tah aw,” tahpa ta.
22 Abeipa KHAZOHPA chata he tana heta a tah: Pachâ teh, pho to châta ei ku pazawhpa ta, mo to châta ei pahnosana ei chaluah aw; na sawchapawpazy cha a pyhpa ta nâ lâta a vaw chhi aw ei ta, na sawchanôzy chhao ama ngiatlâh liata khaihpa ta a chhipa ta ama y aw.
23 Abeizy cha na sawzy a chhytuhpa chapaw châ aw ei ta, ama beinôzy chhao cha na sawzy achhytuhpa chanô ama châ aw. Âmo chata alei liata a khupa ta châ chhy aw ei ta, na phei liata dohlei cha ama palie aw. Chatanachata kei he ABEIPA ei châ tahpa na pahno ha aw; na hâtuhpazy cha maophyuhpa ta y aw veih ei,” tah ta.
24 Hraonazy cha chyhsa thatlôpa tawhta lapa ta, chyhsa chichhihpa seizy cha pachhapa ta ama y aw ma?
25 ABEIPA ta he tana heta a tah: Chyhsa thatlôpa seizy tlai chhao chhuhpa ta y aw ei ta, chyhsa chichhihpa hraonazy cha pachhapa ta ama y aw, nâma châ dyuhtuhpa cha adyuh tlôh awna ta, na sawzy chhao ei pachha hra aw.
26 Nâma cha pasaipa-ituhpazy cha ama sapa pachaisa aw na ta; kresawti thlôhpa paripa hawhta âmo thisaih ta ama pari aw. Chatanachata chyhsa zydua ta kei ABEIPA he nama Pachhatuhpa nata nama Chatlaituhpa, Zakaw sahlao Moh Thatlôpa cha ei châ, tahpa nama pahno aw,” tahpa ta.