1 Bel cha a bôh ta, Nebô cha a pahnai thlâh ha ta, ama khazoh nohthlahpazy cha sahroh chô liata nata viahchao chô liata khaih ei ta; he hmozy nama phaohpa he sahroh thachhâpa phaohri phaohpa hawh dei a châ.
2 A vaw pahnai thlâh ha ei ta, a bôh chyu ei ta, phaohripa cha pachha thei tlôh leipa ei ta, âmo khazohzy chhao cha sei ta achhipa ta tlao y haw ei ta.
3 Hy Zakaw chhôhkha zy nata Izarel chhôhkha zy hry liata a laibâhpa zydua, py tawhta ei piepa, chhi tawhta ei chhihtha hawpa saih u, ei bie nahthlie teh u;
4 nama machâna taih chhaota ano cha châ aw na ta, nama sâpawhna taih chhaota ei cha py aw ei. Keima ta tao na ta, keima lilaw ta ei pie aw;kei chata a pyh aw na ta, ei pachha aw.
5 Miakha sai eima châ theina awpa ta ahy nata e eima pakho, ahy tluta e na tao ta, ahy nata e eina pakho aw?
6 Sahria tawhtapa ngôh bô tyh ta, tâkâ khopathliana ta a pathlia tyhpa zy chata ngôh a daihtuhpa pahrua ei ta, ano chata khazoh ta tao tyh ta; chatanachata a khu ei ta, a naoh tyh ei ta!
7 Ama ngiatlâh ta a pia ei ta, siekhei ei ta, a su awpa liana chata soh tyh ei ta, a duah ngâthlâh ha ta, a yna tawhtapa cha a pasie khao aw vei. Chyhsa ta ano cha aw aw ei ta, châhrasala a chhy thei tlôh leipa aw ta, ama nôpona tawhtapa pachha thai hra aw vei.
8 Hy taopasituhpazy saih u, cha cha athei thlâh ha ula, pachâ u la, pahno teh u.
9 Cha hlâta hlâno hmozy cha a thei thlâh ha teh u; kei he Khazohpa châ na ta, a hropa rai y veih ei; kei he Khazohpa ei châ, keima hawhpa rai y veih ei,
10 kei ta a chhâ awpa cha a thaona tawhta reih tyh na ta, hmo tao leipazy cha hlâno tawhta ei reih tyh, Ei ryhraopa cha a duah patlô aw ta, ei khopa zydua cha ei tao khai aw,’ tahpa ta,
11 nochhi lâ tawhta pavaw nodipa, râh hlapapi tawhta ei chyhsa raopa cha aw na ta. Reih haw na ta, ei patlô hra aw; a chhuah haw na ta, ei tao hra aw.
12 “Palôhrupa a palaipa, siana a hlapa ta a ypa saih u, ei bie nahthlie teh u.
13 Ei siana kyh cha vaw pahnia na ta, lâhlapi ta y aw vei, ei pachhana chhaota bohpi châ aw vei; ei rôhnahna Izarel sahlao châta pachhana cha Zaio liana chata ei soh aw, tahpa ta.