Babylaw chôta pachiana
1 Hy Babylaw sawchanô laihsakôpa y, pua la dohlei liata a tyuh teh; hy Kaldia chyhsa sawchanô y, abeidyuchhai leipa ta alei liata atyuh teh! Panyu dôlôpa ta nata lôhrâtlôpa chatah khao veih ei.
2 Sâh charona lôzy la la, sâh charieh la, a khuna poh soh la, na saina pasihpa kha ty la, na phei hy la, chavahzy chaka teh.
3 Na thluahruana cha khu leipa ta y aw ta, na nozana cha a la aw. Phuh la aw na ta, chyhsa ahy hmah a ryh aw va na.
4 Eima Chatlaituhpa cha a mo Pheisaihzy ABEIPA a châ, Izrael sahlao Mo Pathaihpa ta a tah.
5 Hy Kaldia sawchanô y, a chalihpa ta atyuh la, zohna liata a ngia teh; khihnarâhzy abeinô,cha tah khao aw veih ei.
6 Ei chyhsazy chô liata ei hie hâh ta, ei ryuto cha papuapalei na ta; na ku liata cha pie na ta, nâ chata ama chô liata ngiachhiena rai palâsa leipa chi ta; machâ sahlao chô lâ taih chhao na raopaky a hri ngaitapa cha pahnieh chi ta.
7 “Kei he chhâzaw ta abeinô ei vaw châ aw,” tah chi ta, cha hmozy cha na pathipalôh ta pachâ leipa chi ta, a chhâna awpa rai pahno hra va chi.
8 Chavâta na, haosailôh lia a hlao khohpa a papeisa leipa ta a ypa a palôhrupa liata, Keima he ei châ, keima dei leipa ta cha a hropa rai y veih ei; nôhmei ta y leipa aw na ta, sawzy achhaihna pahno hra aw vana, a tahtuhpa he he pahno teh:
9 He hmo miano, sawzy a chhaihna nata nôhmeina heta noh kha hmo liata movi hlâta a cha vaw tlô thlu aw; na dyu hmâna cha hluh chhei hapa ta na vaina hluh kaw hrasala, chazy cha thata a vaw tlô aw.
10 Na pasichhihna cha ngâ chi ta, Ahy hmah ta hmô vei,” tah bao hra chi ta. Na sona nata na novâhna chata khâpa hrao leipa ta cha pachâsa ta; Keima ei châ, keima dei leipa ta cha mo hropa rai y veih ei, na pathipalôh liata tah hra chi ta.
11 Châhrasala na chô liata hmo moleina vaw tlô aw ta, a vaihna zie thai aw va chi; vâchhiena chhaota cha tlô thlu aw ta; cha cha khôkhâh thei aw va chi; rohryhrapa chhao sôkha ta na chô liata vaw tlô aw ta, cha cha pahno chhielie aw va chi.
12 Na vaina nata na dyu hmâna na hawti ta tawhta na rie na pathei tyhna zy cha a duakhei teh; phahnai kheipa ta na pahnie khei thei khiahta cha.
13 Na ryraopa a hluh ngaitapa vâta na rie a thei kaw he; atahmâ cha avâ a reihtuhpa zy, awhsi a saituhpa zy thla chareih a chho chhielietuhpa zy cha, aduah ei sala, na chô liata hmo a vaw tlô awpa zy tawhna chata cha pachha ei se.
14 Moh teh, sawphaoh hawhta ama cha aw, mei ta a kâ aw; meipaleih hmotaotheina tawhna chata cha pachha aw veih ei. A palalôhna meihei hawhta châ leipa aw ta, a aih awpa mei hawhta chhao châ hra aw vei!
15 Cha hawhna chata na rie na pathei tyhna hmozy cha na châta a y aw, na hawtita tawhta na sôh a daohtuhpa zy cha; âmo lâpi chyu liata viavi aw ei ta; cha pachha awpa ahy hmah ta y aw veih ei.