Kôrasa hnohta biepiepa
1 ABEIPA chata a sathaw thupa Kôrasa, phozy cha a hmiako liata panawh awpa nata, abei sahlao chaisaihna zy pathlâpa awpa nata a hmiakô liata ochhizy pahypa awpa nata kuh ochhizy khaw leipa ta paysa awpa ta a ku chachâh lâ ei patupa hnohna chata he tana heta a tah
2 Kei na hmiakô liata sie aw na ta, a byuhpazy ei pahnai aw, dawh ochhizy cha parao aw na ta, ahraina thuatlaizy cha ei tai pathla aw,
3 ABEIPA na moh ta cha aw tuhpa, Izarel sahlao Khazohpa tlai cha ei châ tahpa na pahno thei nawpa ta zohna hry liata ryuzy cha pie aw na ta, su dâhthlohpa zy liata sôh nyupa zy chhao ei cha pie aw.
4 Zakaw sahlao ei chakaotuhpazy nata Izarel sahlao ei tlyhpa zy vâna chata na moh ta ei cha aw, na pahno beih vei hra la na moh ei cha bi.
5 Kei he ABEIPA cha ei châ, a hropa rai y veih ei, keima leipa ta cha Khazohpa rai y veih ei, tahpa, na pahno hra vei la, na chai ei châsaih aw,
6 chatanachata noh chhina lâ tawhta nata, noh tlana tawhta chyhsazy ta ama pahno thei nawpa ta, keima leipa ta cha a hropa rai y veih ei; Kei he ABEIPA cha ei châ, a hropa rai y vei.
7 Khaihna tao tyh na ta, zohna chhao ei tao tyh, adyhna tao tyh na ta, moleina chhao ei tao tyh, kei he ABEIPA, cha hmo zydua a tao tyh tuhpa cha ei châ.
Abeipa cha taotuhpa a châ
8 Avâzy saih u, chôlâ tawhna khata a di patlasa teh u, avâ ypazy khata siana za lei thlu mawh sy; pachhana chhy pathaosa thei nawpa ta alei a pahy sala, siana nata hmaohkha ta pyuh mawh sy; kei ABEIPA heta cha cha ei tao.
9 Ano a Taotuhpa a ei tuhpa cha a hu a po na! Alei liata beihkaopa hry liata beihkaopa tlai cha. Beih lei chata a vituhpa hnohta, ‘Khâpa ma na tao,’ a tah aw ma? Cha vei khiahta na raihria chata, A ku tao thaipa rai hnei vei,’ a cha tah aw ma?
10 A paw hnohta, ‘Khâpa ma na sa?’ a tahtuhpa tlyma, a nô hnohta, ‘Khâpa ma na sa?’ a tahtuhpa cha a hu a po na,” tahpa ta.
11 ABEIPA Izarel sahlao Mo Pathaihpa amo Taotuhpa chata he tana heta a tah: Hmo a vaw tlô awpa kyh cha na hiahri ula, ei sawchapawpazy kyh liata nata ei ku liana heta bie na pie teh u,
12 alei he tao na ta, a chô liata chyhsapa a ypa he tao na ta; keima ta ei ku tlai heta avâ parai na ta, a pheisaihzy cha bie ei pie hra.
13 Ano cha siana hneipa ta pahra na ta, a lâpi zydua cha ei patlâh aw; ano chata ei khihpi cha tao pathi aw ta, ama chatlaina ty nata lymâ khopa vâta châ leipa ta, ei seizy cha a papua aw, Pheisaihzy ABEIPA ta a tah,” tahpa ta.
14 ABEIPA ta he tana heta a tah: Izi râh hriapasapa sahlao nata Ethiôpia râh sôhdaopa nata Sabia sahlao chyhsa doseihpazy cha, nâmo lâta a vy awh ei ta, nâmo châta ama y aw na, nâmo ama cha zi aw; bâlia a kypa ta amâ vy aw, chatanachata â khu lâta paopa ta châ naoh aw ei ta, Khazohpa cha nâmo liata a y tlai na, a hropa rai y veih ei, khazoh hropa rai y veih ei,’ tahpa ta, nama hnohta ngiachhiena ama haw aw,” tahpa ta.
15 Hy Izarel sahlao Khazohpa, Pachhatuhpa, Kheihta zie na Khazohpa a nyu tyhpa na châ thei aw?
16 Ano achhytuhpa zydua cha maohphyuhpa ta nata nozapa ta ama y aw, khazoh nohthlahpa a taotuhpazy cha atymâpa ta ama leidia aw.
17 Izarel sahlao deikua cha chhâzaw pachhana liata ABEIPA pachhapa ta ama y aw; chhâzaw taih chhaota maophyuh leipa ta nama no za hra aw vei.
18 ABEIPA avâzy a taotuhpa chata, ano cha Khazohpa cha a châ, ano chata alei tao ta, pa-i ta; khâpa hmah châ leipa lâta tao leipa ta, chyhsapa pahrâna chata a taopa tlao a châ; he tana heta tah tlôh ta, Kei he ABEIPA cha ei châ, a hropa rai y vei.
19 A ru lâta leilô zohpa su liata bie reih beih leipa na ta, Zakaw pathlazy hnohta, Khâpa hmah châ leipa ta na tlua teh u,’ tah beih va na: kei ABEIPA heta siana kyh reih tyh na ta; bie dopazy cha ei reih tyh.
Babylaw khazoh nohthlahpazy nata Abeipa
20 Apakhy ula, a vy teh u, phopi hry liata hriena a khôkhâhpa sahlao saih u, a vaw hnia chyu teh u! Ama tho khazoh nohthlahpa tao chhyhpa ama chei tyhpa a pachha thai hlei leipa khazoh hnohta thlah a chhâtuhpa zy chata pahnona rai hnei veih ei.
21 Reih ula, vaw papua teh u; a chhohia chyu ei se!Hlâno tawhta ahy e a pahnosa? Hlâno tawhta ahy e a reih? Keima ABEIPA heta ei tahpa châ vei ma? Keima leipa ta cha khazoh hropa rai y veih ei. Khazohpa siapa nata Pachhatuhpa ei châ; keima leipa ta cha a hropa rai y veih ei.
22 Kaoki liatahpa zydua saih u, keima lâ a vaw heih ula, pachhapa ta y teh u! Kei he Khazohpa châ tlôh na ta, ahropa rai y veih ei.
23 ‘Pakhu to cha ei hmiakô liata paneih aw ta, paleih to chhaota ei hnohta chhiesapa ta bie a taih aw, keimasasy ta a reipa ta chhie ei sa haw, bie cha siana saita ei pakah tawhta pua haw ta, vaw kua heih khao aw vei.
24 Chyhsa to ABEIPA liata deita siana nata thatlôna a y, tahpa ta ei hnohta ama reih aw; ano lâ tlaita chyhsa a vy aw ei ta; a chô liata palôh châ leipa zydua maohphyuhpa ta ama y ha aw.
25 Izarel pathla zydua cha ABEIPA liana chata thai pachâsapa ta y aw ei ta, ama parôhnahsa aw,” tahpa ta.