Abeipa deita Khazohpa a châ
1 Atahmâ deikua cha, hy Zakaw ei chakaotuhpa saih u, Izarel ei tlypa saih u, thei teh u!
2 ABEIPA cha taotuhpa, chhi tawhta cha paduatuhpa, nâmo cha baotu awpa chata he tana heta a tah: Hy Zakaw ei chakaotuhpa saih u, nâmo Zesuru sahlao ei tlypa saih u, chi khah u.
3 Dâhphipa chô liata ti hry tlôh aw na ta, alei hipa liana chata ti lohpazy cha hry hra aw na ta; nama pathlazy chô liata ei Thlahpa hry aw na ta, nama sawzy chô liata ei byhna ei leithlu aw.
4 Âmo cha liaryh zy ti lona kiapâh liata apyuhpa hawhta sibiepa hry liata ama pyuh aw.
5 Chyhsa pakha ta, ‘ABEIPA eih ei châ,’ tah aw ta; mo hropa ta Zakaw moh a bi aw ta; mo hropa ta a ku liata 'ABEIPA eih,’ tahpa ropa ta. Izarel mo cha a chi moh ta a hmâh aw,” Tahpa ta tah ta.
6 ABEIPA, Izarel sahlao Beipa ama Chatlaituhpa, Pheisaihzy ABEIPA chata he tana heta a tah:” Kei he hmiatua chaipa nata hnôh chaipa ei châ; keima leipa ta cha khazoh rai y veih ei.
7 Keima hawhpa he ahy ma a y? Phuah mawh sy, ano tlaita phuah sala reih se, a pahnopasiana cha na pamosa mawh sy. Hmo a vaw y awpazy nata a vaw tlô awpazy cha phuah mawh sy.
8 Chi khah u, china hnei hra khah u; hlânona khata nama hnohta reih hawna ta, cha pahnosa haw veih eina mâ? Chatanachata nâmo he na pahnokhei tuhpazy nama châ! Keima leipa ta cha Khazohpa rai ama y ma? Lôpanô rai y vei; miakha hmah a ypa pahno va na,” tahpa ta.
Nohthlah achhyna a phahnai leina zie
9 Khazoh nohthlahpa taopa a taotuhpazy cha ama zydua ta hrao leipa sai châ ei ta, ama hmo khopazy cha phahnai aw vei; ama maohphyuhna awpa rai ta âmo a chhytuhpazy chhaota hmô thei leipa ei ta, pahno thei hra veih ei, chatanachata no pazasapa ta ama châ aw.
10 Ahyma khazoh zua a padua tly, cha vei khiahta cha ahyma khâpa hmah a phahnai leipa khazoh nohthlahpa taopa zua a leih tly?
11 Pachâ teh, a chhytuhpa zydua cha maohphyu aw ei ta, zôthaipa chyhsazy chhao; chyhsapa hry liatahpa âmo zydua ta apakhy khai ei sala, a duah ei se, chi aw ei ta, ama maohphyu chyu aw.
12 Syudaihpa ta ahrei daih tyh ta, meihei liana chata phôh ta; syulô zy ta daih ta, a bâh thatlôna ta a daih tyh; a no di ta, a tha a chhâ tyh, ti rai doh leipa ta a tha a zei tyh.
13 Thobyh taotuhpa ta khawhri parai ta, pihsi ta roh ta; thopamina ta paryh ta, a hlôpa taona chhaichhi ta a ngiana tao ta; chyhsapa pôhraohpa hawhta padua ta, o liata a y awpa ta chyhsapa a ngiana zie hawhta a padua tyh.
14 Ano chata sidy thozy a thlu ta, anosasy chata saipara tho nata oaka tho a la ta, râhhmâhpa tho hry liatahpa miakha cha a eipa ta a y awpa ta pa-i ta; meisah kô loh ta, vâsua ta a pasa tyh.
15 Cha hnôh lâna chata chyhsa chata mei liata tipa ta a châ aw; cha liatahpa cha la ta, a palalôh tyh; mei ta patih ta, viahchhâ a pa-ai; khazoh tao ta, â chhy tyh, cha tho cha khazoh nohthlahpa ta tao ta, cha cha pakhu paneihpa ta a chhy tyh.
16 Cha tho cha thokha mei liata ti ta; thokha cha sa niena châta hmâh ta; sa rao ta, rihbiepa ta a y tyh; mei a aih ta, “Khaw, eina lalôh haw,” tah ta;
17 a laibâhpa cha khazoh ta tao ta, khazoh nohthlahpa taopa tlai cha; cha cha pakhu paneihpa ta a chhy ta, ano lâta thlah chhâ ta, “Na pachha teh, ei khazoh na châ mâ tâh!” a tah tyh.
18 Pahno leipa ei ta, pacha hra veih ei; ano chata ama hmô thei lei nawpa ta ama mo pasosa haw tlôh ta; ama pahno thai lei nawpa ta ama pathipalôh chhao khaw pâ haw ta.
19 Ahy hmahta pahno heih leipa ei ta, “Thokha cha mei liata ti tlôh na ta, a mei-ia liata chhao viahchhâ pa-aih na ta, sâh chhao rao na ta, nie tlôh na ta; a laibâhpa cha hmo pasichhihpa ta ei tao aw tlyma? Tho thabypa lâta pakhu paneipa ta ei naoh aw tlyma?” tah awpa ta âmo liana chata pahnona novâhna y hra vei.
20 Buchâh deita nie tyh ta; a pathipalôh dopa ta a ypa cha a hrona a pachha thei lei nawpa ta nata, “Ei ku chachâh lâna heta haina bie y vei ma?” a tah thei lei nawpa ta ano cha a pathaisa haw.
Abeipa cha Izarel Chatlaituhpa a châ
21 Hy Zakaw sahlao saih u, he hmozy he a thei thlâh ha teh u; Izarel sahlao saih u, ei chakaotuhpa châ tlôh eichi ta; kei ta cha padua ei na ta, ei chakaopa nama châ; hy Izarel sahlao saih u, ei mypa ta y aw vei eichi.
22 Nama taopasinazy cha meido chha kalupa pahleipa hawhta pahlei hawna ta, nama moleinazy cha meido chha kalupa hawhta pahlei haw hra na ta; kei lâta vaw kua heih teh u, cha chatlai haw tlôh ei na ta.
23 Hy avâzy saih u, thaphapa ta sa teh u, ABEIPA ta cha cha tao haw tlôh ta; alei ry lâ zy saih u, awh teh u; tlâhzy saih u, hy lyurâhpa nata a chô liata tho a ypa to saih u, hla sa teh u! ABEIPA chata Zakaw sahlao chatlai haw ta, Izarel sahlao liana chata palyupalih tlôh aw ta.
24 ABEIPA nâmo cha Chatlaituhpa, chhi tawhta nâmo cha paduatuhpa chata he tana heta a tah: Kei he, ABEIPA hmo zydua a taotuhpa, keima deita ta avâ a paraituhpa, alei a pakawhtuhpa cha ei châ; ahy e ei hnohta a y?
25 Kei he, hrohso pakheipa sahlao pahnona zy khâpa hrao leipa ta tao ta, a peihpa zy a hrupa ta a taotuhpa; a sopazy hnôh lâta paheisa ta, ama novâhna hruna ta a taotuhpa,
26 ano chakaotuhpa bie pa-ipa ta, ano lyuhchâpazy ryraopa a patlô patuhpa; Zerusale kyh liata, ‘Cha liana chata chyhsa ama y heih aw,’ a tahtuhpa nata, Zudah râh khihpi zy kyh liata, Taopa ta y heih aw ta, a sawnawhzy cha ei tao pathi heih aw,’ a tahtuhpa;
27 ti athuhpa hnohta, ‘Kua teh, chavahzy chhao cha ei pakua hra aw,’ a tahtuhpa.
28 Kôrasa kyh liata, ‘Ano cha ei mietahkuvaihtuhpa châ ta, ei chhuahna zydua pi a patloh aw’, tahpa nata, Zerusale kyh liata, ‘taopa ta a y heih aw,’ tahpa nata; Khazohpa achhyna-o lâta, Na lôbô cha paryhpa ta a y heih aw,’ tahpa ta,” tah ta.